1, 2. (a) Aha do hasusaan na masa tu bangso ni si Elia? (b) Aha do paraloan na diadopi si Elia di Dolok Karmel?

DIPARROHAHON si Elia ma jolma na torop, na rap mardalan tu Dolok Karmel. Sogot dope ari, nunga tarida naung loja jala male nasida. Patar do pangkorhon ni ari logo saleleng tolu satonga taon di luat i tu nasida.

² Rap mardalan do nasida dohot 450 panurirang ni Baal na anggar jago, marginjang ni roha jala marsogo ni roha tu si Elia, panurirang ni Jahowa. Nang pe nunga dipamate si Izebel gok naposo ni Jahowa, alai tongtong do dihatindangkon si Elia panombaon na sintong. Sadia leleng ibana boi martahan? Di roha ni angka malim on, ndang tolap sahalak ni si Elia mangalo jolma na torop i. (1 Raj. 18:4, 19, 20) Marhureta harajaon do si Ahab mandapothon nasida, jala sogo do rohana tu si Elia.

3, 4. (a) Boasa mabiar si Elia tingki mangadopi ari na ringkot i? (b) Sungkunsungkun aha do na laho taulas?

³ Di tingki i, idaon ni si Elia sandiri ma masa tanda halongangan na balga di ngoluna. Idaonna ma sada tanda halongangan na patuduhon imbar ni halak na burju dohot na jahat. Songon dia do pangkilalaan ni si Elia tingki i? ”Jolma do si Elia, sabangko dohot hita”, sipata mabiar do ibana. (Jaha Jakobus 5:17.) Na taboto: Diantusi si Elia do, na so adong halak na marhaporseaon asing ni ibana di tongatonga ni halak na so marhaporseaon dohot angka malim sisopsop mudar i.​—1 Raj. 18:22.

⁴ Alai, boasa masa sisongon i tu halak Israel? Jala, aha do partalian ni na masa i tu hita saonari? Taparrohahon ma sitiruon sian haporseaon ni si Elia na parohon laba tu hita saonari.

5, 6. (a) Aha do na diadopi halak Israel? (b) Songon dia do Raja Ahab mambahen hansit roha ni Jahowa?

⁵ Saleleng ngolu ni si Elia, songon na so margogo do ibana mangida leas ni roha ni bangso Israel na pasidingkon  panombaon tu Debata Jahowa. Nunga leleng ndang hot panombaon ni halak Israel, sipata manomba Jahowa, jala sipata manomba ganaganaan. Lam tu posina ma na masa on di tingki ni si Elia.

⁶ Hansit situtu do roha ni Jahowa dibahen Raja Ahab. Dioli ibana do si Izebel, boru ni raja Sidon. Martahi do si Izebel laho pararathon panombaon tu Baal di Israel, jala pasohon panombaon tu Jahowa. Dirajai si Izebel do si Ahab. Dipajongjong ibana do sada joro dohot langgatan tu Baal, jala diuluhon ma rayat asa marsomba tu debata ni sipelebegu.​—1 Raj. 16:30-33.

7. (a) Aha do na mambahen panombaon tu Baal mambahen hansit roha ni Jahowa? (b) Boasa boi pos rohanta na so maralo na nidok ni Bibel taringot leleng ni ari logo na masa di tingki ni si Elia? (Ida ma  kotak.)

⁷ Boasa panombaon tu Baal mambahen hansit roha ni Jahowa? Ala, ditaiti do roha ni halak Israel manomba Baal, jala on padaohon nasida sian Debata na sintong. Ulaon hagigion jala hajahaton do na pinatudu ni agama i. Baoa dohot borua mangulahon haramunon, parmainanon, jala mamelehon angka dakdanak. Alani i, disuru Jahowa ma si Elia pasahathon tu si Ahab na laho masa ari logo sahat tu na ro muse panurirang ni Debata. (1 Raj. 17:1) Dung pigapiga taon, ro ma muse si Elia mandapothon si Ahab, jala disuru asa dipapungu rayat dohot angka panurirang ni Baal di Dolok Karmel. *

8. Aha do lapatan ni paraloan tu Baal di tingkinta saonari?

⁸ Aha do lapatan ni na masa on di tingkinta saonari? Adong na marpandapot, ndang masa be i tu tingkinta saonari, ala ndang adong be langgatan manang inganan panombaon tu Baal. Alai, on ndang holan sejarah sambing. (Rom 15:4) Hata ”Baal” lapatanna, ”nampuna” manang ”tuan”. Disuru Jahowa do asa dipillit naposoNa Ibana gabe ”baal”, manang nampuna dohot tungganedoli ni nasida. (Jes. 54:5) Sapandapot do hita na adong dope angka jolma saonari na so manomba Debata pargogo na so hatudosan? I do. Aha pe na diharingkothon sasahalak di ngoluna, hepeng, karejo, rekreasi, giotgiot ni daging, asing ni manomba Jahowa, sasintongna i do tuan ni nasida. (Mat. 6:24; jaha Rom 6:16.) Boi didok, godang dope saonari ulaon panombaon tu Baal. Marhite ulaon na  binahen ni Debata laho pasidingkon Baal najolo, boi ma hita marbisuk mamillit ise do na laho tasomba.

9. (a) Boasa Dolok Karmel inganan na pas laho patuduhon gabus ni Baal? (Ida surat na di toru.) (b) Aha do na nidok ni si Elia tu bangso i?

⁹ Sasahalak boi manatap sude di humaliangna sian punsu ni Dolok Karmel. Mulai sian sunge Kison na jonok tu Laut Tonga sahat tu Dolok Lebanon na bidang di utara. * Alai, dung na masa di Dolok Karmel i, ndang napu be tano i songon na nilehon ni Jahowa tu pinompar ni si Abraham. Tungil, jala ndang adong be tubu suansuanan binahen ni mohop ni mata ni ari tu luat i. Alai on sude, binahen ni naposo ni Debata. Dung pungu na torop i, didok si Elia ma, ”Sadia leleng nari naeng mengkatengkat hamu  angkup be? Molo Jahowa Debata, Ibana nian ihuthon; alai ia tung Baal, ibana nian ihuthon hamu!”​—1 Raj. 18:21.

10. Aha do lapatan ni hata ni si Elia na mandok, ”Sadia leleng nari naeng mengkatengkat hamu”?

¹⁰ Aha do lapatan ni hata ni si Elia na mandok, ”Sadia leleng nari naeng mengkatengkat hamu?” Ndang diboto bangso i na ringkot do tontuhonon ni nasida manomba Jahowa manang manomba Baal. Dirimpu do boi sombaon ni nasida Baal huhut manomba Jahowa. Ninna rohanasida, Baal do na mambahen sinur jala gabe na niula nasida. Dung i, ”Jahowa Zebaot” ma na mambahen nasida monang di parporangan. (1 Sam. 17:45) Lupa do nasida tu hasintongan na so boi muba, i ma, ndang dilehon Jahowa hasangaponNa tu manang ise pe. Holan Ibana do na tama disomba. Ndang dijangkon Jahowa panombaon na dilehon tu Ibana molo dipadomu tu panombaon na asing! Saonari, godangan halak ndang mangantusi hasintongan on.​—Jaha 2 Musa 20:5.

11. Pandapotmu, boasa hata ni si Elia di Dolok Karmel boi mangurupi hita mamillit aha na rumingkot di hita dohot di panombaonta?

¹¹ Jadi, nunga ”mengkatengkat” halak Israel, naeng mandalani dua sidalanan di tingki na sarupa. Godang do na mangulahon i saonari, dipasombu do ”angka baal” mangkorhon tu parngoluon ni nasida, jala mambahen nasida ndang mangkaringkothon panombaon tu Debata! Molo manat tatangihon hata ni si Elia, boi ma taboto aha na rumingkot di hita dohot di panombaonta.

12, 13. (a) Aha do ujian na dibahen si Elia? (b) Songon dia do hita boi marpos ni roha songon si Elia?

¹² Dibahen si Elia ma sada ujian. Dipangido ma asa dibahen malim ni Baal i sada langgatan, jala dipeakkon pelean disi. Dung i, martangiang ma nasida tu Baal asa diparo api. Dungkon i, patupaon ni si Elia do pelean na asing. Didok si Elia ma, ”Debata dia na mangalusi dohot api, Ibana ma Debata na tutu.” Tangkas do ditanda si Elia ise Debata na sintong. Alani i, ndang ganggu rohana tingki dipatujolohon ibana angka panurirang ni Baal mangulahon i. Dipillit nasida ma lombu laho dipelehon tu Baal. *—1 Raj. 18:24, 25.

 ¹³ Nang pe ndang adong be tanda halongangan, alai taboto do ndang mubauba Jahowa sahat tu saonari. Alani i, boi do pos rohanta tu Jahowa songon pos ni roha ni si Elia. Umpamana, tingki adong na so satolop tu na niajarhon ni Bibel, unang ma hita mabiar paloashon nasida parjolo mangkatai. Songon si Elia, unang ma tapangasahon dirinta sandiri. Alai, tapangasahon ma Jahowa marhite mamangke Bibel na ”pauliulihon, manogunogu di bagasan hatigoran”.​—2 Tim. 3:16.

14. Songon dia do dibahen si Elia mangalesengi Baal, jala boasa?

¹⁴ Dung i, dipeakkon angka panurirang ni Baal i ma pelean ni nasida, jala martangiang tu debata ni nasida. Didok ma, ”O Baal, alusi hami!” Mulahulak do nasida manggora dohot marsurak, alai ”ndang adong ro soara manang alus”. Dung tonga ari, dilesengi si Elia ma nasida. Didok si Elia ma na godang do ulaon ni Baal i, manang laho mambolongkon kotoranna umbahen ndang sanga mangalusi nasida. Manang renge modom, jala ingkon didungoi. Didok si Elia muse, ”Pagogo hamu soaramuna antong.” Tutu ma, diboto si Elia do holan gaitgait panombaon tu Baal, jala lomo do rohana asa diboto halak Israel molo sasintongna gabus do ulaon i.​—1 Raj. 18:26, 27.

15. Songon dia do na masa tu malim ni Baal patuduhon na oto do sasahalak molo ndang olo manomba Jahowa?

¹⁵ Ujungna, dipagogo angka malim ni Baal i ma ”soarana be manjoujou jala dirarihi dagingna marhitehite podang dohot hujur marningot hasomalannasida, pola sap mudar dagingnasida i”. Alai, ndang marlapatan i! Alana, ”ndang adong soara manang alus manang panangihon pe”. (1 Raj. 18:28, 29) Ndang tutu adong Baal. Sibolis do na mamangke i, asa mandao jolma sian Jahowa. Na ringkot taingot, molo ndang Jahowa na tabahen gabe tuan di hita, on parohon hailaon dohot arsak ni roha.​—Jaha Psalmen 25:3; 115:4-8.

16. (a) Aha do na niingot ni halak Israel tingki dipadenggan si Elia langgatan ni Jahowa di Dolok Karmel? (b) Songon dia do si Elia patuduhon pos ni rohana tu Jahowa?

¹⁶ Dung bot ari, jumpang ma tingki ni si Elia mamelehon  peleanna. Dipadenggan ibana ma langgatan naung sursar dibahen angka malim ni Baal. Dipangke ibana do 12 batu, ra on paingothon halak Israel na 10 marga i, na ingkon ihuthonon ni nasida dope Uhum na dilehon tu 12 marga i. Dung i, dipeakkon ma peleanna jala disiram dohot aek. Ra, sian Laut Tonga do aek i dibuat. Dihurak ibana ma bondar di humaliang ni langgatan i. Dung i, diisi ma aek. Alai ndang diulahon songon i tu malim ni Baal. On patuduhon, pos situtu do roha ni si Elia tu Jahowa.​—1 Raj. 18:30-35.

17. Aha do na tarida sian tangiang ni si Elia, jala songon dia do hita boi maniru ibana?

¹⁷ Dung rade sude, martangiang ma si Elia. Sian tangiang ni si Elia, tarida do aha na rumingkot di ngoluna. Na parjolo jala na rumingkot, dipatuduhon do molo ”Debata di Israel”, i ma Jahowa, ndang Baal. Na paduahon, dipatudu do molo ibana holan naposo ni Debata. Alani i, holan Jahowa do na tama manjalo hamuliaon dohot pujian. Dung i, dipatudu ibana ma na holong dope rohana tu halak Israel. Hirim do rohana ”asa tung dipauba [Jahowa] rohanasida tumadingkon Baal”! (1 Raj. 18:36, 37) Nang pe hasusaan ni bangso i masa ala na so marhaporseaon nasida tu Jahowa, alai tongtong do dihaholongi si Elia nasida. Tingki martangiang hita, tapatudu do na ringkot di hita goar ni Debata, serep ni roha, dohot holong ni roha tu halak na mangkaporluhon pangurupion?

18, 19. (a) Songon dia do Jahowa mangalusi tangiang ni si Elia? (b) Aha do didok si Elia ulahonon ni halak Israel, jala boasa ndang tama marasi roha tu angka malim ni Baal?

¹⁸ Andorang so martangiang si Elia, ra didok roha ni bangso i, margabus do Jahowa songon Baal. Alai dung martangiang, mago ma ganggu ni rohanasida i. Dipaboa tu hita, ”Madabu ma api sian Jahowa jala suda dipangan pelean situtungon ro di soban dohot batu dohot tano i, pola didilati dohot aek di bagasan bondar.” (1 Raj. 18:38) Tontu, alus na mambahen longang situtu do on! Alai, aha do na diulahon bangso i?

¹⁹ Marsurak ma nasida, ”Jahowa do Debata na tutu! Jahowa do Debata na tutu!” (1 Raj. 18:39) Ujungna, diboto nasida ma na dia na sintong. Alai, ndang marhaporseaon dope nasida.  Ndang boi didok marhaporseaon sasahalak, molo holan mandok Jahowa do Debata na sintong ala nunga diida nasida madabu api sian langit. Alani i, dipangido si Elia ma asa diulahon nasida parenta na adong di Patik ni Jahowa, laho mambunu sude panurirang pargapgap. (5 Mus. 13:6-10) Angka malim ni Baal mangalo tu Jahowa dohot parentaNa. Tama do nasida mandapot asi ni roha? Taingot ma, ndang adong asi ni rohanasida tingki ditutung nasida angka dakdanak gabe pelean tu Baal. (Jaha Poda 21:13; Jer. 19:5) Ndang tama marasi roha tu nasida! Alani i, didok si Elia do asa dibunu nasida, jala i ma na diulahon nasida.​—1 Raj. 18:40.

20. Boasa boi tadok ndang denggan na nidok ni angka kritikus taringot tu na diulahon si Elia?

²⁰ Didok angka kritikus, ndang denggan na masa di Dolok Karmel i. On boi dipangke halak na fanatik tu agamana gabe ojahan pasintongkon ulaon kekerasan. Jala godang do agama marhite kekerasan mangkatindangkon agama ni nasida. Alai, si Elia ndang halak na fanatik tu agamana. Sintong do na tinujuna tingki mambunu angka malim pargapgap i. Asing ni i, nunga diantusi halak Kristen na so boi be nasida mamorangi halak parjahat, songon na diulahon si Elia. Ingkon ihuthonon ni sude halak Kristen do prinsip na adong di hata ni Jesus tu si Petrus, na mandok, ”Pasarung podangmi, ai na manintak podang, mago ma bahenon ni podang!” (Mat. 26:52) Holan marhite AnakNa do pasauton ni Jahowa hatigoran di tano on.

21. Boasa denggan tatiru haporseaon ni si Elia?

²¹ Tanggung jawab ni halak Kristen na sintong, i ma patuduhon haporseaon di ngoluna. (Joh. 3:16) Sada cara, i ma maniru angka na marhaporseaon, songon si Elia. Holan Jahowa do disomba ibana, jala dijujui do na asing mangulahon i. Barani do ibana papatarhon gabus ni agama na pinangke ni sibolis padaohon jolma sian Jahowa. Dung i, Jahowa do dipangasahon ibana, ndang dirina sandiri. Marsitutu do si Elia mangkatindangkon panombaon na sintong. Alani i, sai anggiat ma tatiru haporseaonna!