1, 2. (a) Aha do na masa tu si Jona dohot tu kapal na tinompangna i? (b) Songon dia do na masa tu si Jona boi mangurupi hita saonari?

MARTABUNI ma si Jona sian soara na mambahen ibana mabiar. Ndang holan soara ni alogo manang soara ni galumbang na mambahen ibana mabiar. Alai, umbiaran do roha ni si Jona mambege soara ni sude halak na mangangguhi di kapal i, na marungkil padaohon kapal i sian parmaraan. Diboto si Jona do na laho mate ma sude na di kapal i alani ibana.

² Boasa masa songon i tu si Jona? Ala ndang dioloi ibana Jahowa. Aha do na diulahon si Jona? Adong dope tingki di ibana laho muba? Godang do na boi taparsiajari sian na masa tu si Jona. Umpamana, na masa tu si Jona mangajarhon tu hita molo halak na marhaporseaon pe boi do sala. Alani i, taparrohahon ma songon dia nasida marhamubaon.

3-5. (a) Aha do na jotjot diingot halak taringot tu si Jona? (b) Aha do na taboto taringot tu ibana? (Ida surat na di toru.) (c) Boasa ndang mura mangulahon ulaon ni si Jona?

³ Na jotjot diingot halak sian si Jona, i ma taringot tu hagaleonna. Sada sian i, tingki martabuni ibana sian Jahowa. Alai, adong dope sasintongna na porlu taparsiajari sian ibana. Umpamana, dipillit do si Jona gabe panurirang. Ndang pilliton ni Jahowa ibana molo ndang burju manang ndang marsihohot.

⁴ Otik do hatorangan taringot tu si Jona disurat di Bibel. (Jaha 2 Rajaraja 14:25.) Si Jona ro sian Gat Heper, opat kilometer sian Nasaret, inganan ni Jesus magodang hirahira  800 taon dungkon tingki ni ibana. * Ibana gabe panurirang tingki Raja Jerobeam II mamarenta di harajaon ni Israel sisampulu marga. Tingki i, nunga leleng salpu masa ni si Elia, jala si Elisa pe nunga mate tingki amang ni si Jerobeam dope na mamarenta. Nang pe disuru Jahowa panurirang na dua on pasingothon halak Israel, alai tongtong do marbalik halak Israel manomba ganaganaan. Dung i, si Jerobeam II, raja ni Israel di tingki i ’mangulahon sogo ni roha ni Jahowa’. (2 Raj. 14:24) Boi ma taboto, ndang mura si Jona mangulahon ulaonna tingki i. Alai, marsihohot do ibana mangulahon i.

⁵ Sada tingki, muba ma na masa di parngoluon ni si Jona. Disuru Jahowa ma ibana mangulahon ulaon na borat. Aha ma i?

6. Aha do ulaon ni si Jona disuru Jahowa, jala boasa mabiar ibana?

⁶ Ninna Jahowa ma tu si Jona, ”Borhat ma ho laho tu Ninive, huta na bolon i jala martingting dompak huta i, ai nunga pola maungaung hajahatonnasida sahat tu jolongku.” (Jona 1:2) Ndang pola maol taantusi boasa mabiar si Jona mangoloi parenta ni Jahowa. Dao ni Ninive, hirahira 800 kilometer tu sabola timur. Asa sahat tu Ninive, ra ingkon sabulan ma mardalan pat. Alai, ndang pardalanan i na dipingkirhon si Jona. Na mambahen ibana mabiar, i ma barita panguhuman sipaboaonna tu halak Assur na jahat jala kejam. Bangso ni Debata sandiri ndang olo manangihon si Jona. Alani i, sungkunsungkun do roha ni si Jona, olo do halak Ninive manangihon ibana? Dung i, songon dia do ibana boi malua sian Ninive, ”huta sisopsop mudar”?​—Nah. 3:1, 7.

7, 8. (a) Aha do na sinangkap ni roha ni si Jona? (b) Boasa ndang boi dohononta si Jona sahalak parbiar?

⁷ Olo do ra songon i pangkilalaan ni si Jona. Nang pe ndang tangkas dipaboa, alai na taboto martabuni do si Jona sian Jahowa. Disuru Jahowa do si Jona tu Ninive di sabola timur. Alai laho do ibana dao tu sabola barat, tu Joppe, kota pelabuhan. Dung i, markapal ma ibana tu Tarsis. Adong  pakar mandok, Tarsis, i ma Spanyol saonari. Alani i, laho ma si Jona hirahira 3.500 kilometer sian Ninive. Olo do ra sataon lelengna markapal asa sahat tu ujung ni Laut na Bolon, goar ni Laut Tonga tingki i. Nunga marsangkap si Jona asa maporus sian ulaon na sinuru ni Jahowa tu ibana.​—Jaha Jona 1:3.

⁸ Boi do tadok si Jona on sahalak parbiar? Ndang sintong molo pintor tadok songon i. Songon na laho taparsiajari, idaonta ma molo ibana sahalak na barani. Dung i, si Jona dos do songon hita, jolma na mardosa jala marungkil do ibana mangalo hagaleonna. (Ps. 51:7) Ise do sian hita na so hea mabiar?

9. Songon dia do sipata pangkilalaanta tu ulaon na nilehon ni Jahowa, alai aha do na ingkon taingot?

⁹ Sipata, olo do maol tahilala mangulahon parenta ni Jahowa. Umpamana, marbarita na uli. (Mat. 24:14) Boi do hita lupa tu na nidok ni Jesus, ”Saluhutna do tarbahen anggo di Debata!” (Mrk. 10:27) Molo ndang taingot hata ni Jesus on, boi ma taantusi pangkilalaan ni si Jona. Alai, aha do na masa tu si Jona tingki martabuni ibana sian Jahowa?

10, 11. (a) Songon dia do pangkilalaan ni si Jona dung lam dao kapal i sian pelabuhan? (b) Aha do parmaraan na masa tu kapal i?

¹⁰ Tapingkirhon ma tingki dilului si Jona ingananna di kapal i. Olo do ra kapal na tinompangna i, kapal barang Penisia. Andorang so borhat, diparrohahon ibana do songon dia parkapal i mangarade laho marlayar. Dung lam dao sian pelabuhan, dirimpu si Jona ma naung malua ibana sian biar ni rohana. Alai, tompu ma ro parmaraan tu kapal i.

¹¹ Di tonga ni laut, tompu ma ro habahaba. Balga ma galumbang ni laut. Songon dia do kapal na gelleng i boi martahan mangalo galumbang na balga i? Diboto si Jona do molo ’Jahowa na mambahen alogo na mansai gogo tu laut’ tingki i? Ndang taboto, alai dibege ibana do angka parlaut i mangido pangurupion tu debata ni nasida, jala diboto si Jona do molo debata ni nasida i, ndang tolap paluahon nasida. (3 Mus. 19:4) Dipaboa tu hita ”gabe marmara ma kapal i”. (Jona 1:4, Bibel siganup ari) Alai, songon dia ma roha ni si Jona martangiang tu Debata, haru ibana pe maporus do sian Debata?

12. (a) Boasa ndang boi dohononta na so parduli si Jona mangida aha na masa? (Ida surat na di toru.) (b) Songon dia do Jahowa patuduhon bonsir ni parmaraan i?

 ¹² Ndang diboto si Jona be sibahenonna. Alani i, laho ma ibana tu kamar partoru ni kapal i, jala tarpodom disi. * Dung i, ro ma kapten ni kapal i mandapothon si Jona. Didungoi ma ibana, jala disuru asa martangiang tu Debatana. Pos do roha nasida adong na marhagogoon umbahen na masa parmaraan i. Mangkatai ma parkapal i sama nasida mangalului bonsir ni parmaraan i. Dung i, dibahen parkapal i ma undi laho mamboto alani ise do umbahen na masa parmaraan i, gabe hona ma si Jona!​—Jaha Jona 1:5-7.

13. (a) Aha do dipaboa si Jona tu halak na di kapal i? (b) Aha do didok si Jona bahenon nasida tu ibana jala boasa?

¹³ Dipaboa si Jona ma tu parkapal i, molo ibana sahalak naposo ni Jahowa, Sitompa langit. Dipaboa si Jona ma tu nasida, na martabuni do ibana sian Jahowa. Mabiar ma halak na di kapal i dung dibege hatorangan ni si Jona. Disungkun parkapal i ma aha sibahenon ni nasida asa malua sian parmaraan i. Aha do didok si Jona? Mabiar do ra si Jona molo didabuhon ibana sian kapal i. Alai, pasombuonna do mate sude na di kapal i alani ibana? Didok ibana ma, ”Hindat hamu ma ahu, jala reongkon hamu ahu tu laut, jadi mansadi ma laut i sian hamu, ai huboto do, ala ni ahu do ro hagunturon bolon on tu hamu.”​—Jona 1:12.

14, 15. (a) Songon dia do hita boi maniru si Jona? (b) Songon dia do pangkilalaan ni parkapal i tu pangidoan ni si Jona?

¹⁴ Ndang dohonon ni si Jona songon i molo sahalak parbiar do ibana. Olo do ra gabe mombun muruk ni Jahowa mangida habaranionna i. Dung i, tarida do na togu haporseaon ni si Jona. Alani i, na tatiru do si Jona molo tajumolohon na ringkot tu donganta sian dirinta sandiri. (Joh. 13:34, 35) Rade do hita mangurupi halak na mangkaporluhon pangurupion? Las do roha ni Jahowa molo tabahen songon i!

¹⁵ Olo do ra, gabe asi roha ni parkapal i mangida si Jona. Ujungna, ndang pintor didabuhon ibana. Dibahen do sian nasa gogonasida asa boi nasida malua sian parmaraan, alai  ndang tolap. Ujungna dung martangiang nasida tu Jahowa, disampathon ma si Jona tu laut.​—Jona 1:13-15.

16, 17. Gombarhon ma na masa tu si Jona dung disampathon ibana tu laut. (Ida ma gombar.)

¹⁶ Madabu ma si Jona tu laut na bagas jala na margalumbang i. Ra, sai dilangei do asa unang lonong ibana. Diida ibana do kapal i naung lam dao sian ibana. Dung i, diluahon ombak i ma si Jona jala dilonongkon. Hamatean ma na pinaimana.

¹⁷ Di pudian ni ari, digombarhon si Jona do songon dia pangkilalaanna tingki i. Godang do na ro tu pingkiranna. Umpamana, lungun do rohana ndang boi be laho tu bagas joro ni Jahowa di Jerusalem. Nunga lonong ibana tu aek na bagas, jala tuat tu toru ni angka dolok, inganan ni limut na mangaliliti dagingna. Jala i nama inganan hamateanna.​—Jaha Jona 2:3-7.

18, 19. Aha do ujungna na masa tu si Jona, aha do binatang na adong di laut i jala ise do na parohon dengke i? (Ida surat na di toru.)

¹⁸ Alai, tompu ma diida si Jona sada binatang na balga  ro mandapothon ibana. Dipangangang babana jala dibondut ma si Jona!

¹⁹ Mate ma ahu ninna roha ni si Jona. Alai, ndang manang mahua ibana, ndang pusok hosana. Boi dope ibana marhosa, nang pe nunga di bagasan ni butuha ni dengke na golap. Longang ma roha ni si Jona, jala diboto ibana ma Jahowa do na ’manuru sada dengke na mansai balga’ mambondut ibana. *—Jona 1:17, Bibel siganup ari.

20. Aha do na boi taparsiajari sian tangiang ni si Jona?

²⁰ Sai dipaima si Jona do aha na laho masa tu ibana. Sian inganan na golap i, martangiang ma ibana tu Jahowa. Tangiang ni si Jona na sinuratna di buku Jona bindu dua, patuduhon pangkirimon dohot pangantusionna tu Bibel. Godang do dienet ibana di tangiangna i sian buku Psalmen. Tangiang ni si Jona patuduhon hamauliateon. Didok ibana, ”Alai anggo ahu mardongan soara pujipujian ahu mamele tu ho, gararonku do na huparbagabaga, Jahowa do nampuna hatuaon.”​—Jona 2:10.

21. Aha do parsiajaran na dapot ni si Jona taringot tu haluaon, jala aha do na porlu taingot?

²¹ Tingki ”di bagasan butuha” ni dengke i, diboto si Jona ma boi do paluaon ni Jahowa manang ise, didia, jala sadihari pe. (Jona 1:17) Dipalua Jahowa do naposoNa na marsitaonon. Holan huaso ni Jahowa do na mambahen sasahalak tolap mangolu di bagasan butuha ni dengke saleleng tolu ari. Saonari, ingkon taingot do molo Jahowa, ’Debata na mangalehon hosa’. (Dan. 5:23, Bibel siganup ari) Alani i, marutang hosa do hita tu Jahowa. Antong, rade do hita patuduhon hamauliateon? Jala rade do hita mangoloi Jahowa?

22, 23. (a) Songon dia do las ni roha ni si Jona diuji? (b) Aha do na boi taparsiajari sian si Jona tingki sala hita?

 ²² Songon dia do si Jona? Dipatuduhon do hamauliateon tu Jahowa? I do. Dung tolu ari tolu borngin, ”diutahon ma si Jona tu pasir”. (Jona 2:11) Boi ma tapingkirhon, ndang ingkon marlange si Jona asa sahat tu darat. Tutu, ingkon luluanna do dalan asa boi mulak tu jabuna. Alai ndang sadia leleng, diuji ma muse las ni roha ni si Jona. Jona 3:1, 2, mandok, ”Ro ma muse hata ni Jahowa tu si Jona paduahalihon, songon on: Borhat ma ho laho tu Ninive huta na bolon i, jala tingtingkon tusi tingting sipaboaonku tu ho.” Songon dia do bahenon ni si Jona?

²³ Ndang mabiar be si Jona. Bibel paboahon tu hita, ”Borhat ma si Jona laho tu Ninive hombar tu hata ni Jahowa.” (Jona 3:3) Dioloi si Jona ma hata ni Jahowa. Tarida ma sian on molo ibana marsiajar sian hasalaanna. Hita pe porlu do marsiajar sian si Jona. Sude do hita mardosa jala jotjot sala. (Rom 3:23) Alai, pintor mandele do hita alani hagaleonta? Manang muba do hita jala mangoloi Debata?

24, 25. (a) Aha do pasupasu ni Jahowa tu si Jona? (b) Aha do muse pasupasu sijaloonna di ari na naeng ro?

²⁴ Dipasupasu Jahowa do si Jona alani pangoloionna. Umpamana di pudian ni ari, diboto si Jona ma na malua do angka parlaut i sian parmaraan. Songon na nidok ni si Jona, dung disampathon ibana tu laut, pintor so do habahaba i jala ”mabiar situtu ma angka jolma i mida Jahowa”. Dung i, dilehon nasida ma pelean tu Jahowa, ndang tu debata na asing.​—Jona 1:15, 16.

²⁵ Jaloon ni si Jona do muse upa na umbalga di ari na naeng ro. Tolu ari ibana di butuha ni dengke. On do dipangke Jesus laho paboahon sadia leleng ibana di kuburan. (Jaha Mateus 12:38-40.) Tontu, las do roha ni si Jona mamboto i, dung dipahehe ibana di Paradeiso! (Joh. 5:28, 29) Saonari, las do roha ni Jahowa mangalehon pasupasu tu hita. Alani i, olo do hita maniru si Jona, na rade marsiajar sian hasalaanna, marroha pangoloion jala na so mamingkirhon dirina sandiri?