1. Gombarhon ma songon dia lungun ni roha ni si Marta.

SONGON na marnipi do dihilala si Marta di parmonding ni ibotona si Lasarus. Nunga opat ari si Lasarus dikubur, alai sai tusi dope pingkiranna. Marroan do angka sisolhotna laho mangapuli, alai ndang boi dope mago lungun ni rohana i.

2, 3. (a) Dung diida si Marta Jesus, songon dia do pangkilalaanna? (b) Aha do didok si Marta, jala aha do na pinatuduhon ni i?

² Dung opat ari si Lasarus dikubur, sahat ma Jesus tu jabu ni si Marta. Dung diida si Marta ro Jesus, lam lungun ma rohana ala diboto ibana boi hian do Jesus pamalumhon sahit ni ibotona i. Nang pe songon i, tarapul do roha ni si Marta. Diboto si Marta do na diantusi Jesus songon dia pangkilalaanna. Dipatogu Jesus do haporseaon ni si Marta taringot tu haheheon marhite sungkunsungkun. Alus ni si Marta patuduhon togu ni haporseaonna. Didok ibana, ”Porsea do ahu: Ho do Kristus, Anak ni Debata, na naeng ro tu portibi on.”​—Joh. 11:27.

³ Nang pe otik hatorangan taringot tu si Marta dipaboa di Bibel, alai godang do na boi taparsiajari sian ibana. Sahalak borua na marhaporseaon do si Marta. Alani i, boi do lam togu haporseaonta molo tatiru ibana. Taparrohahon ma hatorangan ni Bibel na patuduhon haporseaonna.

4. Gombarhon ma songon dia parngoluon ni si Marta jala aha do partalian ni ibana tu Jesus.

⁴ Andorang so monding si Lasarus, hea do ro Jesus tu jabunasida di Betania. Rap tading do si Marta, si Maria dohot si Lasarus. Adong peneliti mandok, olo do ra si Marta siangkangan. Ala ibana do na jotjot mangkobasi na ringkot di jabu, jala goarna do na jotjot didok parjolo di Bibel. (Joh. 11:5) Ndang  adong dipaboa molo nasida nunga marhasohotan. Alai Bibel paboahon, maraleale do nasida dohot Jesus. Saleleng marbarita na uli di Judea, di jabu ni si Marta do Jesus tading. Godang do hasusaan na masa tu Jesus di Judea alani ulaon marbarita. Alani i, las do roha ni Jesus ala dijangkon si Marta do ibana tading di jabunasida.

5, 6. (a) Boasa godang na dihobasi si Marta tingki ro Jesus tu jabuna? (b) Aha do diulahon si Maria dung ro Jesus?

⁵ Las do roha ni si Marta manjangkon halak na ro tu jabuna. Ibana sahalak na ringgas, alani i ndang hea ibana so sian ulaonna. Tingki ro Jesus dohot na asing tu jabuna, dihobasi ibana ma godang sipanganon. Di tingki i, somal do parjabu patuduhon haburjuon dohot las ni roha manamue halak na ro. Tingki adong na ro tu jabu ni sasahalak, diumma, dibungka solopna, diburi jala dilap patna dohot miak. (Jaha Lukas 7:44-47.) Diparade do na ringkot tu halak na ro i, songon sipanganon dohot inganan.

⁶ Godang do sihobasan ni si Marta dohot si Maria laho manamue Jesus tingki i. Tontu, diurupi si Maria do si Marta andorang so sahat dope Jesus. Alai dung ro Jesus, so ma si Maria sian ulaonna, ala lomo rohana manangihon Jesus mangajar. Harajaon ni Debata ma na jotjot diajarhon Jesus, i ma tema ni parbaritaonna. Ndang songon pamimpin agama, sangap do dibahen Jesus angka borua. Alani i, hundul do si Maria di lambung pat ni Jesus manangihon ibana mangajar.

7, 8. Boasa gabe jut roha ni si Marta, jala aha do didok ibana?

⁷ Jut ma roha ni si Marta mangida si Maria ala godang dope na ingkon ulahononna. Alani i, sai dibereng ma dompak si Maria. Boi do tapingkirhon songon dia si Marta patuduhon jut ni rohana mangida si Maria? Murhing ma bohina tu si Maria, ala ndang tolapna mangkobasi ulaon i!

⁸ Ujungna ndang tartaon ni si Marta be jut ni rohana. Diotapi ibana ma Jesus mangkatai. ”Tuhan, ndang diantoi roham, na pinasombu ni anggingki ahu marhobasi sahalakku? Dokkon ibana antong mandongani ahu!” (Luk. 10:40) Posi do hata ni si Marta on. Adong do na manerjemahon hata ni si Marta on gabe, ”Tuan, na so asi do roham . . . ?” Disuru si Marta do Jesus asa dipinsang jala disuru si Maria mangurupi ibana.

9, 10. (a) Aha do alus ni Jesus tu si Marta? (b) Boasa ndang boi tadok na so diargai Jesus ulaon ni si Marta?

 ⁹ Olo do ra, songgot roha ni godang halak dohot roha ni si Marta mambege alus ni Jesus. Lambok ma didok Jesus, ”O Marta, Marta! Lan do disarihon jala dihasusahon ho! Sada do na ringkot! Dipillit si Maria do tohap na uli i; ndang sibuaton i sian ibana.” (Luk. 10:41, 42) Aha do lapatan ni hata ni Jesus i? Na holongan di arta do si Marta didok roha ni Jesus? Na so diargai Jesus do ulaon ni si Marta paradehon sipanganon?

¹⁰ Ndang songon i. Diboto Jesus do molo haburjuon ni si Marta i sian ias ni rohana. Ndang na so lomo roha ni Jesus molo diparade marragam sipanganon. Umpamana, hea do ro Jesus tu pesta na balga na pinatupa ni si Mateus. (Luk. 5:29) Ndang sipanganon na gabe parsoalan, alai na gabe ulaon paradehon sipanganon i do na rumingkot di si Marta. Ala holan mamingkirhon ragam ni sipanganon i, gabe lupa ma ibana tu ulaon na rumingkot. Aha ma i?

11, 12. Songon dia do Jesus mamodai si Marta?

¹¹ Ro Jesus tu jabu ni si Marta laho mangajarhon hasintongan. Rumingkot do i sian godang ni sipanganon na pinarade ni si Marta. Ra, marsak do roha ni Jesus mangida si Marta, ala ndang dohot ibana manangihon pangajarion ni Jesus na mangkorhon tu haporseaonna. Nang pe songon i, ndang dipaksa Jesus si Marta asa dohot manangihon ibana. * Songon i ma muse, ndang paksaon ni Jesus si Maria mangurupi si Marta marhobas.

¹² Dung i, diurupi Jesus ma si Marta asa unang holsoan. Didok Jesus do goar ni si Marta dua hali asa lambok rohana. Dipapos Jesus ma roha ni si Marta asa unang pagodanghu ”disarihon jala dihasusahon” rohana. Sae do holan sada manang dua ragam ni sipanganon na diparade, ala sipanganon partondion do na rumingkot. Ala na sintong do na pinillit ni si Maria, ndang olo Jesus manuru ibana laho sian lambungna!

13. Aha do na boi taparsiajari sian hata ni Jesus tu si Marta?

 ¹³ Adong do parsiajaran na dapot ni halak Kristen saonari sian na masa di jabu ni si Marta. Unang ma lalap hita dibahen ulaon manang aha pe, asa unang tading ulaon di partondion. (Mat. 5:3) Tutu, las do rohanta maniru haburjuon ni si Marta, alai unang ma paholsohu rohanta laho paradehon na hurang ringkot tingki manamue, asa unang tading ulaon na rumingkot. Na rumingkot tingki marsaor dohot dongan sahaporseaon, i ma masipatoguan jala masipajujuan di partondion, ndang alani na mangan dohot na minum. (Jaha Rom 1:11, 12.) Alani i, ndang sipanganon na mambahen marlaba parsaoranta tu dongan sahaporseaon.

14. Boasa tadok haradeon ni si Marta manangihon poda sitiruon di hita?

¹⁴ Ditangihon si Marta do poda ni Jesus i? Tontu ditangihon do! Disurat apostel Johannes taringot tu si Lasarus, ”Holong do roha ni Jesus di si Marta dohot di anggina i, nang di si Lasarus i.” (Joh. 11:5) Nunga salpu pigapiga bulan tingki dipodai Jesus si Marta. Alani i, boi ma taboto ndang hansit roha ni si Marta tu Jesus. Ditangihon jala diulahon ibana do poda ni Jesus. Sitiruon do na binahen ni si Marta on, ala porlu do hita dipodai.

15, 16. (a) Aha do diulahon si Marta tingki marsahit si Lasarus? (b) Boasa sala na hinirim ni si Marta dohot si Maria taringot tu ibotona i?

¹⁵ Disarihon si Marta do si Lasarus tingki marsahit. Marsitutu do ibana asa boi hatop malum ibotona i. Alai, lam posi do sahit ni si Lasarus. Tingki na marsahit i si Lasarus, disi do si Marta dohot si Maria mangurus ibana. Tingki diida si Marta ibotona naung gale i, ra gabe diingot ibana do angka na masa na hea diadopi nasida!

¹⁶ Dung lam posi sahit ni si Lasarus, disuru ma halak paboahon barita i tu Jesus. Tingki i, dao do inganan ni Jesus marbarita, hirahira dua ari pardalanan. Isi ni baritana i jempek do, ”O Tuhan, na marsahit do hinaholongan ni roham!” (Joh. 11:1, 3) Pos do roha ni si Marta dohot si Maria dihaholongi Jesus do nasida. Jala porsea do nasida na ro Jesus pamalumhon si Lasarus. Hirim do rohanasida ndang jolo mate si Lasarus asa ro Jesus? Molo songon i do, sala do pangkilalaan ni nasida i, ala mate do si Lasarus.

17. Aha do na mambahen si Marta holsoan, jala aha do diulahon ibana dung diboto ibana naung jonok Jesus?

¹⁷ Marhabot ni roha ma si Marta dohot si Maria. Mangarade ma nasida mamboan si Lasarus tu kuburan, jala torop halak dohot ma i angka sisolhotna ro mangida nasida. Tingki i, holsoan do si Marta ala ndang diboto naung sahat manang ndang barita i tu Jesus. Dung opat ari mate si Lasarus, dibege si Marta ma naung jonok Jesus tu Betania. Di na so pamotoan ni si Maria, hatop ma si Marta laho mandapothon Jesus di luar ni kota i.​—Jaha Johannes 11:18-20.

18, 19. Aha do pangkirimon na pinaboa ni si Marta, jala boasa tadok togu haporseaonna?

¹⁸ Dung diida ibana Jesus, didok ma, ”Aut na dison Ho, ale Tuhan, ndang tagamon mate ibotongki!” Didok si Marta  do muse hatana na patuduhon pos ni roha dohot haporseaonna, ninna ibana, ”Alai nuaeng pe, tong do huboto, lehonon ni Debata do tu Ho nasa sipangidoonmu tu Ibana.” Dipapos Jesus do roha ni si Marta jala didok, ”Na hehe ma ibotom!”​—Joh. 11:21-23.

¹⁹ Dirimpu si Marta do haheheon di ari na naeng ro na nidok ni Jesus. Alani i, ninna ibana ma, ”Olo, huboto do, na hehe do ibana di haheheon i, na di ari parpudi.” (Joh. 11:24) Ndang songon pamimpin agama di tingki i, togu do haporseaon ni si Marta tu haheheon. Halak Jahudi na digoari halak Saduse ndang porsea tu haheheon, nang pe naung tangkas dipaboa di buku Patik. (Dan. 12:13; Mrk. 12:18) Diboto si Marta do molo Jesus mangajarhon taringot tu haheheon, jala nunga adong halak naung dipahehe Jesus. Alai, ndang adong  dope sian naung dipahehe i, nunga mate pigapiga ari songon si Lasarus. Alani i, ndang diboto ibana dope na laho masa.

20. Patorang ma lapatan ni hata ni Jesus di Johannes 11:25-27 dohot lapatan ni alus ni si Marta.

²⁰ Dung i, ninna Jesus ma, ”Ahu do haheheon dohot hangoluan.” Lapatanna, dilehon Jahowa do huaso tu Jesus laho pahehehon halak naung mate di ari na naeng ro. Didok Jesus ma muse tu si Marta, ”Porsea do ho disi?” Dialusi si Marta ma Jesus dohot hata na adong di mula ni pasal on. Porsea do ibana molo Jesus i Messias manang Kristus, Anak ni Debata jala nunga disurirangkon hian harorona tu portibi on.​—Joh. 5:28, 29; jaha Johannes 11:25-27.

21, 22. (a) Songon dia do pangkilalaan ni Jesus mangida halak na marhabot ni roha? (b) Aha do na masa tu si Lasarus?

²¹ Songon dia do pangkilalaan ni Jahowa dohot Jesus tu halak na marhaporseaon songon si Marta? Tadapot ma alusna sian na masa tu si Lasarus. Ro ma Jesus mandapothon si Maria. Diida si Marta do songon dia lungun ni roha ni Jesus, tingki mangapuli roha ni si Maria. Diida ibana do Jesus tangis. Dibege ibana do tingki didok Jesus asa dibungka batu na manutup kuburan ni si Lasarus.​—Joh. 11:28-39.

²² Ala nunga opat ari mate si Lasarus, ndang olo si Marta dibungka kuburan i. Didok Jesus ma tu ibana, ”Nda hudok tu ho: Idaonmu do hasangapon ni Debata, molo na porsea ho?” Porsea do si Marta, alani i diida ibana ma huaso ni Debata. Dilehon Jahowa do tu Jesus huasoNa laho pahehehon si Lasarus! Boi ma tapingkirhon angka na masa tingki i na tongtong diingot si Marta. Umpamana, hata ni Jesus na mandok, ”Lasarus, ruar ma ho!” Diingot do muse songon dia soara ni si Lasarus sian kuburan i jala tingki haruar si Lasarus, lilit dope abit saput di pamatangna. Jala diingot ibana do hata ni Jesus na mandok, ”Harhari hamu i, asa mardalan ibana.” Las ma roha ni si Marta dohot si Maria huhut marlojong mangkaol si Lasarus. (Jaha Johannes 11:40-44.) Satongkin i, mago ma arsak dohot lungun ni rohanasida!

23. Aha do diparade Jahowa dohot Jesus tu hita, jala aha do na ingkon taulahon?

²³ Na masa tu si Lasarus paposhon rohanta tu haheheon na laho masa di ari na naeng ro. (Job 14:14, 15) Songon na masa tu si Marta, si Maria, dohot si Lasarus, las do roha ni  Jahowa dohot Jesus mangalehon pasupasu tu halak na marhaporseaon. Molo tapatogu do haporseaonta, lehononNa do tu hita pasupasu.

24. Songon dia do didok di Bibel taringot tu si Marta parpudi sahali?

²⁴ Disurat do muse taringot tu si Marta dung lam otik tingki ni Jesus di tano on. Laho do Jesus sahali nai tu jabu ni si Marta di Betania. Disi ma ibana maringanan satongkin. Hirahira tolu kilometer do dao ni Betania tu Jerusalem. Tingki di Betania, laho ma Jesus tu jabu ni si Simon, na pinamalum ni Jesus sian kusta. Ditamue si Simon do Jesus dohot si Lasarus, laos di tingki i ma dipaboa taringot tu si Marta parpudi sahali, dipaboa tu hita ”marhobasi” do si Marta tingki i.​—Joh. 12:2.

25. Boasa boi tadok parohon pasupasu do angka borua di huria na maniru si Marta?

²⁵ Sahalak borua na ringgas do si Marta! Marhobasi do si Marta manarihon na ringkot di donganna sian parjolo sahat tu parpudi sahali dipaboa taringot tu ibana di Bibel. Saonari, parohon pasupasu do angka borua di huria na maniru si Marta, na ringgas karejo. Dipatuduhon si Marta do haporseaonna marhite marsitutu marhobas tu Jahowa jala burju mangurupi na asing. Rade do si Marta tongtong mangulahon i? Rade. On mangurupi ibana marsihohot nang pe mangadopi sitaonon.

26. Songon dia do haporseaon ni si Marta boi mangurupi ibana?

²⁶ Ndang sadia leleng, diida si Marta do Jesus marsitaonon jala mate. Marsangkap do muse halak na mambunu Jesus i mambunu si Lasarus, ala haheheonna mambahen godang halak porsea tu Jesus. (Jaha Johannes 12:9-11.) Ujungna, marsirang do si Marta sian si Maria dohot si Lasarus alani hamatean. Alai ndang dipaboa di Bibel songon dia jala nandigan ibana mate. Na tangkas taboto, haporseaon ni si Marta mangurupi ibana martahan sahat tu ujung ni ngoluna. Alani i, ringkot do hita maniru haporseaon ni si Marta.