Ise do Goar ni Debata? Didok Debata, “Au do Jahowa, i do goarhu.” (Jesaya 42:8) Di Bibel, disurat do goar ni Debata hira-hira 7.000 hali. Alai godang terjemahan ni Bibel manggatti goar ni Debata gabe gelar, songon “Tuhan”. Lomo do roha ni Debata marale-ale tu hamu, alani i dijujui Ibana do hamu asa manjou “goarna”.—Psalmen 105:1.

Gelar ni Jahowa. Di Bibel, dipaboa do akka gelar ni Jahowa songon “Debata”, “Pargogo na So hatudosan”, “Panoppa”, “Ama”, “Tuhan”, dohot “Natumimbul”. Jotjot do rap dipakke gelar dohot goar ni Jahowa di godang tangiang na disurat di Bibel.—Daniel 9:4.

 Hadirion ni Debata. Tondi do Debata. (Johannes 4:24) I do alana didok Bibel, “Dang adong jolma na hea mangida Debata.” (Johannes 1:18) Asing ni i, dipaboa Bibel do taringot pakkilalaan ni Debata. Boi do jolma mambahen haccit rohana, manang mambahen las rohana.—Poda 11:20; Psalmen 78:40, 41.

Akka Parange ni Debata. Dang dipaimbar-imbar Debata akka halak sian marragam bangso. (Ulaon ni Apostel 10:34, 35) Debata ‘na burju, parasi roha, lambat tarrimas, jala gok holong ni roha dohot hasittongan’ do Ibana. (2 Musa 34:6, 7) Alai, adong do opat parange ni Debata na mambahen lomo roha ni jolma jonok tu Ibana.

Huaso. Jahowa, i ma “Debata Pargogo na So Hatudosan”. Alani i, dang marnasuda gogona lao pasautton sude janjina.—1 Musa 17:1.

Bisuk. Umbisuk do Jahowa sian manang ise pe. Didok Bibel, Ibana do “Debata na sasada i, na marbisuk i”.—Rom 16:27.

Tigor. Sai diulahon Debata do na sittong. Sempurna do sude ulaonna, jala sai “tigor” do Ibana.—5 Musa 32:4.

Holong. Didok Bibel, “holong do Debata”. (1 Johannes 4:8) Dang holan patuduhon holong Debata, alai Ibana do holong i. Holong do na mangonjar roha ni Debata lao mangulahon manang aha pe. Jala, tadapot do godang laba alani holongna.

Parale-aleon ni Debata Dohot Jolma. Jahowa, i ma Ama na parholong. (Mateus 6:9) Molo porsea hita tu Ibana, boi do hita gabe ale-alena. (Psalmen 25:14) Gariada, ditogihon Debata do hamu asa jonok tu Ibana marhite tangiang. Jala, ‘pasahatton sude holso ni rohamuna tu Ibana, ai diparrohahon do hamu’.—1 Petrus 5:7; Jakobus 4:8.

Dang Debata Jesus i. Dang songon toppaan na asing, holan Jesus do na langsung ditoppa Debata sandiri. I do alana didok Bibel, Jesus i Anak ni Debata. (Johannes 1:14) Dung ditoppa Jesus, dipakke Jahowa do ibana gabe “kepala tukkang” lao manoppa na asing.—Poda 8:30, 31; Kolosse 1:15, 16.

 Dang hea didok Jesus molo ibana Debata. Didok Jesus, “Sian Ibana do au ro jala Ibana do na manuru au.” (Johannes 7:29) Tikki makkatai dohot siseanna, didok Jesus ma Jahowa do “Damang i dohot Amamuna” jala “Debatakku dohot Debatamuna”. (Johannes 20:17) Dung mate Jesus, dipahehe Jahowa do ibana tu surgo jala dilehon Jahowa ma tu Jesus hasangapon lao hundul di siamunna.—Mateus 28:18; Ulaon ni Apostel 2:32, 33.

Diurupi Jesus do Hamu asa Marale-ale tu Debata

Jesus ro tu tano on lao mangajari hita taringot Bapakna. Taringot Jesus didok Jahowa do, “On do Anakku, haholongakki. Tangihon hamu ma ibana.” (Markus 9:7) Dibandingkon na asing, holan Jesus do na takkas mananda Debata. Didok ibana, “Dang adong na mananda Ama i asing ni Anak i. Boi do akka halak mananda Ama i molo rade Anak i mangajarhon taringot tu Ama i.”—Lukas 10:22.

Sempurna do ditiru Jesus akka parange ni Debata. Massai denggan do ditiru Jesus akka parange ni Bapakna. Alani i, boi ma didok Jesus, “Manang ise na mangida au, nungnga diida ibana Damang i.” (Johannes 14:9) Diurupi Jesus do akka halak asa marale-ale tu Debata. Ditiru ibana do holong ni Bapakna, jala dipatudu ma i sian aha na dihatahon dohot na diulahon ibana. Didok Jesus, “Au do dalan dohot hasittongan dohot hangoluan. Dang adong na boi ro tu Damang i molo so marhite au.” (Johannes 14:6) Didok ibana muse, “Sombaon ni akka sisomba Debata na tutu ma Ama i marhite panogu-noguon ni tondi parbadia dohot hasittongan. Ai halak sisongon i do dilului Ama i lao manomba Ibana.” (Johannes 4:23) Bayakkon ma! Ditogihon Jahowa do akka halak songon hamu na olo mamboto hasittongan taringot Ibana.