Tontu ndang mura manontuhon hadiah na pas tu sasahalak. Nang pe songon i, arga do sada hadiah molo hombar tu na hinirim ni na manjalo. Alai, ndang sai dos hadiah na hinirim ni ganup halak.

Umpamana, molo dilehon perangkat elektronik na terbaru tu sahalak na poso, tontu arga do i di ibana. Alai molo di halak naung matua, ra arta tadingtadingan sian keluarga do na arga di nasida. Di pigapiga hasomalan, hepeng do silehonlehon na arga, ala boi dipangke manuhor manang aha pe.

Nang pe maol mangulahon on, alai godang do na marsitutu manontuhon hadiah na dumenggan tu na hinaholongan ni nasida. Ala ndang mura manontuhon hadiah sisongon i, saonari taulas ma opat hatorangan na boi mambahen las roha ni na manjalo.

Na hinirim ni na manjalo. Sahalak baoa di Belfast, Irlandia Utara, mandok, hadiah na dumenggan do sepeda na jinalona tingki marumur 10 manang 11 taon. Boasa? Didok ibana, ”Ala i do na huhalomohon.” Sian on taboto, na hinirim ni sasahalak do na manontuhon sadia balga las ni rohana tingki manjalo hadiah. Alani i, pingkirhon ma tu ise do hadiah i lehononmuna jala aha na hinirim ni rohana. Umpamana, di angka ompungompung, arga do di nasida molo boi raphon keluarga. Hirim do rohanasida asa jotjot mangida anak dohot pahompuna. Molo tatogihon nasida mardalani, ra on do na gabe hadiah na arga di nasida.

Tingki mangkatahatai dohot sasahalak, denggan ma tangihon asa boi taboto na hinirim ni rohana. Didok di Bibel, hita ingkon ’girgir mananginangi, bangkol mangkatai’. (Jakobus 1:19) Tingki mangkatahatai dohot dongan manang keluarga, denggan ma tangihon aha do hirahira na dihalomohon dohot na so dihalomohon rohanasida.  Botoonmu ma hadiah aha do na boi palashon roha ni nasida.

Na dihaporluhon na manjalo. Ndang soal arga manang na ndang, las do roha ni na manjalo molo hadiah i hombar tu na dihaporluhon nasida. Alai, songon dia do carana asa taboto na dihaporluhon sasahalak?

Ra, boi do sungkunonmu tu sasahalak i taringot aha na dihaporluhon manang na dihalomohon rohana. Alai, sipata molo songon i dibahen, olo do gabe hurang las ni roha ni na mangalehon. Alana, umlomo do roha ni nasida mangalehon hadiah, di na so panagaman ni na manjalo. Adong do sasahalak na jotjot paboahon taringot na dihalomohon dohot na so dihalomohon rohana. Alai, ndang olo paboahon na dihaporluhon ibana.

Alani i, parrohahon jala bahen ma catatan taringot situasi ni sasahalak. Poso dope ibana manang nunga matua? Naung marhasohotan manang ndang? Naung marsirang manang naung mabalu? Adong do karejona manang ndang? Pingkirhon ma hadiah na dihaporluhon sasahalak.

Asa boi taantusi na porlu di halak na laho talehon i, denggan do molo tasungkun sasahalak na hea mangadopi situasi sisongon i. Ra, boi do urupanna hamu mamboto hatorangan na so diboto godang halak. Ala adong pangurupion sisongon i, gabe boi ma hamu mangalehon hadiah na dihaporluhon sasahalak, na so hea dipingkirhon halak na asing.

Tingki na pas. Bibel mandok, ”Hata sisandok pe di tingki halehetanna, mansai denggan do.” (Poda 15:23) On patuduhon las do roha ni na mambege molo tadok hata di tingki na pas. Dos songon i ma, molo talehon hadiah di tingki na pas manang di situasi na pas, las ma roha ni na manjalo.

Pigapiga halak mandok, denggan do molo taboto angka situasi na ringkot na laho masa. Somalna, jotjot do angka halak mangalehon hadiah tingki donganna marhasohotan, tingki adong na laho tamat singkola, manang tingki adong sada keluarga na laho tubuan anak. Molo taboto angka situasi sisongon on, boi ma tatontuhon hadiah na dumenggan di ganup situasi. *

Sasintongna, ndang holan di tingki naung ditontuhon boi hamu mangalehon hadiah. Di tingki sadihari pe, boi do tahilala las ni roha ala mangalehon. Alai, adong do na ingkon taingot. Umpamana, molo adong sahalak baoa mangalehon hadiah tu sahalak borua, boi do gabe ro tu roha ni borua i na lomo roha ni baoa i tu ibana. Jala boi mambahen gabe sala mangantusi borua i. Situasi on patuduhon, adong sada nai na porlu tapingkirhon, i ma na tinuju ni na mangalehon.

Na tinuju ni na mangalehon. Songon situasi na dipaboa nangkin, denggan do molo tapingkirhon songon dia pangkilalaan ni na manjalo hadiah i. Asing ni i, na mangalehon ingkon mamingkirhon aha do sasintongna na tinujuna. Pigapiga halak mangalehon hadiah di tingki ari raya asa sangap idaon ni halak. Na asing mangkalomohon asa adong balos ni hadiahna i.

Ingkon denggan do na tinujumuna tingki laho mangalehon hadiah. Didok di Bibel, ”Di bagasan haholongon ma tulus sasudena di hamu!” (1 Korint 16:14) Las do rohanta dohot na manjalo hadiah i molo sian holong ni roha mangulahon i. Molo sian ias ni roha do hamu mangalehon, on mambahen las roha ni Debata. Dipuji si Paulus do halak Kristen di Korint ala las roha ni nasida mangalehon hadiah jala mangurupi halak Kristen di Judea. Didok si Paulus tu nasida, ”Dihaholongi Debata do na las roha mangalehon!”​—2 Korint 9:7.

Molo taparrohahon pigapiga hatorangan naung taulas nangkin, on mangurupi hamu manontuhon hadiah na palashon roha ni na asing. Sasintongna, diulahon Debata do cara on tingki mangalehon hadiah na ummarga tu hita. Di artikel na mangihut, taulas ma aha do hadiah na dilehon Debata tu hita.