Diboto Hamu Do?
Boha do keadaan ni kota Ninive dung jaman ni si Jona?
MENURUT sada situs web The British Museum, “Hira-hira taon 670 SM Asiria ma na gabe kuasa dunia di tikki i. Wilayah kekuasaanna mulai sian Siprus di bagian barat, sahat tu Iran di bagian timur. Jala saleleng piga-piga taon dikuasai nasida do tong Mesir.” Ibu kota ni Asiria i ma Ninive, kota na umbalga di portibi on tikki i. Godang do disi akka taman na uli, istana na mewah, dohot perpustakaan na balga. Menurut catatan sejarah, na mamaretta Ninive di tikki i, i ma Raja Asyurbanipal. Songon akka raja Asiria na asing, dijou ibana do dirina “raja saluhut portibi on”. Jadi di tikki i, dang adong na boi manaluhon Asiria dohot Ninive.
Asiria do na gabe kuasa dunia tikki i jala na unggodang daerah kekuasaanna
Tikki gabe kuasa dunia dope Asiria, nungnga disurirakkon Jahowa marhite si Sepania taringot kehancuran ni Asiria. Didok, ‘Bahenon ni Jahowa ma hancur Asiria. Bahenonna ma tarulang kota Ninive, jala bahenonna ma i koring dos songon gurun.’ Dung i Panurirang Nahum pe mandok, “Buat hamu ma perak, rampas hamu ma mas sian kota i! . . . Hancur ma kota i, tarulang, jala dang adong be na tinggal disi! . . . Lari do sude halak na mangida ho, ditadikkon nasida do ho, jala didok do, ‘Nungnga hancur be Ninive!’” (Sep. 2:13; Nah. 2:9, 10; 3:7) Tikki dibege halak surirang on, ra dirippu nasida dang mungkin saut surirang i. Jala dang mungkin adong na boi manaluhon Asiria. Ninna roha ni nasida mustahil do i.
Kota Ninive saonari
Hape saut do surirang ni Jahowa i! Andorang so taon 600 SM, ro ma halak Babel dohot halak Media lao manaluhon Asiria. Dukkon i, dang adong be halak na tinggal di kota Ninive. Menurut bukku na diterbitton The Metropolitan Museum of Art di New York, “Nga habis tartutung kota Ninive i, jala akka halak pe mamboto taringot kota i holan sian Bibel do.” The Biblical Archaeology Society mandok, “Dang adong halak mamboto taringot kota Ninive.” Alai di taon 1845, sahalak arkeolog na margoar si Austen Henry Layard mulai mangalului reruntuhan ni kota Ninive. Sian reruntuhan na dapotna i tarida ma kota na megah do Ninive najolo.
Jadi saut do sude surirang ni Jahowa taringot kehancuran ni kota Ninive. On pe mambahen pos rohatta, pasti saut do haduan surirang ni Bibel taringot kehancuran ni pamarettaon na di portibi on.—Dan. 2:44; Pgk. 19:15, 19-21.
