TIKKI di tano on Jesus, sempurna do ditiru ibana sifat ni Bapakna. Boi ma i tarida sian aha na diulahon Jesus. Didok ibana, “Dang adong na huulahon mangihutton lomo ni rohakku sandiri. Alai na diajarhon Damang i do na huhatahon. . . . Toktong do huulahon lomo ni rohana.” (Johannes 8:​28, 29; Kolosse 1:​15) Sada contohna, i ma songon dia sikap ni Jesus tu akka borua. Sian i boi ma taboto songon dia do pandangan ni Jahowa tu akka borua, jala aha do na dipangido Ibana sian nasida.

Piga-piga pakar mandok, “Beda hian do pandangan ni Jesus taringot akka borua tu pandangan ni akka halak tikki disurat akka bukku Injil.” Aha do bedana? Jala na uppetting, sarupa dope pandangan ni Jesus taringot akka borua di tikkinta saonari?

Dang hea Jesus marsakkap na asing-asing tu akka borua. Didok akka pamimpin ni agama Jahudi molo makkatai manang pajuppang bawa dohot borua, olo do gabe tubu keinginan lao mangulahon seks na so patut. Alani i dang diloas akka borua makkatai dohot bawa di tempat umum. Manang molo tung pe ikkon kaluar nasida tu tempat umum, ikkon dipakke nasida do kain panutup lao manutupi bohi ni nasida. Alai boha do molo Jesus? Didok Jesus, boi do bawa makkatai tu borua. Alai dipasingot Jesus do akka bawa asa dirajai nasida dirina jala asa unang asing-asing sakkapna tu akka borua.​—Mateus 5:​28.

Didok Jesus do muse, “Manang ise na manirakkon istrina jala mangoli muse tu na asing, na mangalakkup do ibana disi.” (Markus 10:​11, 12) Di jaman ni Jesus godang do akka pamimpin ni agama na mandok, “Boi do disirakkon sahalak bawa istrina, asal ma adong alana.” Alai dang setuju Jesus tu ajaran i. (Mateus 19:​3, 9) Godangan halak Jahudi mandok, “Dang mungkin bawa mangalakkup manang berzina, holan akka borua do biasana songon i.” I do alana sada bukku na dibahen akka pakar ni Bibel mandok, “Ala sarupa tanggung jawab ni suami dohot istri lao manjaga perkawinan ni nasida, on patuduhon arga do akka borua di Jesus.”

Manfaat ni ajaran ni Jesus saonari: Di acara ibadah ni Saksi Jahowa, rap marpungu do akka bawa dohot akka borua. Jala dang porlu mabiar akka borua tu akka bawa. Alana dang mungkin asing-asing sakkap ni nasida tu akka borua. Diulahon nasida do na didok di Bibel, “Tu akka borua na matua, bahen ma nasida songon omakmu, tu akka borua na poso bahen ma nasida songon ibotom, jala dang marsakkap na asing-asing”.​—1 Timoteus 5:2.

Olo do Jesus mangajari akka borua. Didok akka pamimpin agama di tikki i, dang porlu akka borua diajari. Alai boha do molo Jesus? Olo do Jesus mangajari akka borua. Jala diloas ibana do nasida mangalehon pendapat. Sada contoh, diajari Jesus do si Maria. On patuduhon dang dianggap Jesus akka borua i songon pembantu di jabu. (Lukas 10:​38-​42) Jala diajari Jesus do tong si Marta. Aha do buktina? Dung mate si Lasarus boi do dialusi ibana sukkun-sukkun ni Jesus taringot haheheon.​—Johannes 11:​21-​27.

Diattusi Jesus do aha na dipikkirhon akka borua di tikki i. Godang do akka borua na mandok, las do roha ni nasida molo marhasil gellengna, apalagi ma molo gabe nabi gellengna i. Hea ma adong sahalak borua na mandok tu Jesus, “Marlas ni roha ma borua na manubuhon jala na manusui ho.” Denggan do dialusi Jesus hata ni borua i. Dipaboa ibana do adong na paling penting sian i. (Lukas 11:​27, 28) Didok Jesus do, dang pandangan ni akka borua taringot diri ni nasida na paling penting, alai hubunganna tu Jahowa do.​—Johannes 8:​32.

Manfaat ni ajaran ni Jesus saonari: Las do roha ni akka bawa na adong tanggung jawabna di huria mambege komentar ni akka borua di acara ibadah. Diargai nasida do akka borua na matua. Alana diajarhon do “akka na denggan” jala gabe teladan do akka borua na matua i. (Titus 2:3) Asing ni i, olo do nasida kerja sama dohot akka borua tikki marbarita na uli.​—Psalmen 68:11; ida kotak  “Na Diorai Apostel Paulus do Akka Borua Mangalehon Pendapat?”.

Holong do roha ni Jesus tu akka borua. Di jaman tikki disurat Bibel, godang do halak na mandok ummarga do anak sian boru. Songon i do na didok Talmud manang bukku tradisi ni halak Jahudi. Didok, “Las hian do roha ni halak molo adong anakna. Alai susa do nasida molo adong boruna.” Piga-piga natua-tua mandok, susa do dihilala nasida molo adong boruna. Alana ikkon dilului nasida do suami tu boruna i, ikkon dilehon muse maskawin manang mahar, jala dang boi diharappon nasida annon boruna i molo nga matua nasida.

Arga do di Jesus anak dohot boru. Buktina dipahehe Jesus do boru ni si Jairus. Jala dipahehe Jesus do tong anak ni ina na mabalu sian kota Nain. (Markus 5:​35, 41, 42; Lukas 7:​11-​15) Asing ni i, hea do dipamalum Jesus ‘sahalak borua na marsahit saleleng 18 taon dibahen suru-suruan na jahat’. Dijou Jesus do borua i “pinoppar ni si Abraham”. Jarang do dipakke hata on di bukku ni halak Jahudi. (Lukas 13:​10-​16) Jadi ala dipakke Jesus hata on, diakkui Jesus ma sarupa do hak ni borua i tu halak Jahudi na asing. Jala diakkui Jesus do tong balga do haporseaon ni borua i.​—Lukas 19:9; Galatia 3:7.

Manfaat ni ajaran ni Jesus saonari: Adong peribahasa ni halak Asia na mandok, “Mangurus boru sarupa do i songon na maniram taman ni tetangga.” Alai unang ma songon i pandangan ni akka ama na manomba Jahowa. Ikkon diurus nasida do sude gellengna, anak dohot boru. Ikkon dipastihon natua-tua do sehat sude gellengna i jala denggan diajari.

Pos do roha ni Jesus tu akka borua. Molo adong sahalak borua na mangalehon kesaksian di pengadilan Jahudi, disarupahon ma i tu kesaksian sian sahalak hatoban. Adong sahalak sejarawan di abad na parjolo na margoar si Yosefus mandok, “Unang ma porsea tu kesaksian ni sahalak borua, ai dang boi nasida diandalhon.”

Alai boha do molo Jesus? Dipillit ibana do akka borua lao paboahon taringot haheheonna. (Mateus 28:​1, 8-​10) Alai dang porsea akka apostel tu na nidok ni akka borua i, nang pe sebenarna diida akka borua i do songon dia Jesus dipamate jala dikubur. (Mateus 27:55, 56, 61; Lukas 24:​10, 11) Jadi ala tu borua parjolo sahali dipatuduhon Jesus dirina dung dipahehe, on patuduhon pos do roha ni Jesus tu akka borua. Sarupa ma i songon pos ni rohana tu akka sisean na asing.​—Ulaon ni Apostel 1:​8, 14.

Manfaat ni ajaran ni Jesus saonari: Molo di Saksi Jahowa, olo do akka bawa na adong tanggung jawabna di huria manangihon pendapat sian akka borua. Jala olo do akka suami manangihon pendapat sian istrina. On patuduhon “sangap” do dibahen nasida istri ni nasida i.​—1 Petrus 3:7; 1 Musa 21:12.

Molo ditiru akka bawa Kristus, gabe las ma roha ni akka borua ala diargai jala dilehon hak ni nasida. On do na dipangido Debata sian mulana. (1 Musa 1:​27, 28) Molo diihutton akka suami prinsip ni Bibel, gabe dang lomo-lomona be tu istrina. Alani i pasti gabe las ma roha ni istrina i.​—Epesus 5:​28, 29.

Adong do pengalaman ni sahalak borua na margoar si Yelena. Tikki mulai marsiajar Bibel ibana, kasar do suamina tu ibana. Jala dang godang halak na mamboto i. Tikki dakdanak suamina, kasar do akka halak di lingkunganna. Jala sering do terjadi disi penculikan dohot penganiayaan tu akka borua. Didok si Yelena, “Ala marsiajar Bibel au gabe boi ma au sabar tu suamikku. Gabe huboto ma adong do na makkaholongi au, mangargai, jala parduli tu au. Gabe huboto ma muse molo marsiajar Bibel suamikku, pasti boi do ibana muba.” Dung piga-piga leleng olo ma suamina marsiajar Bibel jala gabe Saksi Jahowa ma ibana. Didok si Yelena ma muse, “Saonari dang parmuruk be suamikku. Gabe teladan do ibana di au. Berupaya do hami asa saling memaafhon. Ala diihutton suamikku prinsip ni Bibel, gabe las ma rohakku ala diargai ibana do au.”​—Kolosse 3:​13, 18, 19.

Dang holan si Yelena na makkilala songon i. Marjuta do akka borua na marlas ni roha ala rap dohot suamina mangihutton prinsip ni Bibel. Gabe las ma roha ni nasida ala diargai jala dihaholongi. Jala dang diorai nasida bergaul dohot akka dongan sahaporseaon.​—Johannes 13:34, 35.

Diboto akka bawa dohot borua do ala mardosa nasida, ikkon hilalaon ni nasida do “hangoluan na so marguna”. Alai ala jonok hubungan ni nasida tu Jahowa, i ma Debata na parholong, gabe boi ma nasida dipalua “asa unang gabe hatoban ni dosa dohot hamatean. Jala dapot ni nasida ma hasangapon, songon na dilehon tu akka anak ni Debata”. Boi do akka bawa dohot borua makkilala i haduan!​—Rom 8:​20, 21.