1, 2. (a) Didia do angka naposo ni Jahowa najolo manomba Ibana? (b) Songon dia do pangkilalaan ni Jesus tu bagas joro na adong di Jerusalem? (c) Aha do na laho taulas di parsiajaran on?

SIAN najolo sahat tu saonari, adong do inganan ni naposo ni Debata laho manomba Ibana. Songon, tingki si Abel mangalehon pelean tu Jahowa, ra dipajongjong ibana do sada langgatan. (1 Musa 4:3, 4) Si Noak, si Abraham, si Isak, si Jakob, dohot si Musa pe mambahen langgatan do. (1 Musa 8:20; 12:7; 26:25; 35:1; 2 Musa 17:15) Dipaboa Jahowa do tu halak Israel asa dipajongjong sada inganan na badia (tabernakel). (2 Musa 25:8) Dung i, diparentahon Ibana do tu nasida asa dipajongjong sada bagas joro. (1 Rajaraja 8:27, 29) Dung malua nasida sian Babilon, rap marpungu ma muse nasida di parguruan (sinagoga). (Markus 6:2; Johannes 18:20; Ulaon ni Apostel 15:21) Halak Kristen na parjolo rap marpungu di jabu. (Ulaon ni Apostel 12:12; 1 Korint 16:19) Saonari, naposo ni Jahowa di liat portibi on marpungu laho manomba jala marsiajar taringot Ibana di marribu Bale Harajaon.

 ² Diargai Jesus do bagas joro ni Jahowa na adong di Jerusalem. Holong ni Jesus tu bagas joro, paingothon angka siseanna tu hata ni panurat Psalmen na mandok: ”Hamuruhon humongkop bagasmu do manganhon ahu.” (Psalmen 69:9; Johannes 2:17) Dos songon bagas joro na adong di Jerusalem, ndang na maringanan Jahowa di Bale Harajaon. (2 Kronika 5:13; 33:4) Alai ingkon tapatudu do pangargaion na bagas tu ingananta manomba Ibana. Di artikel on laho taulas ma songon dia prinsip ni Bibel mangajari hita asa marparniulaon na denggan, mangaradoti, jala mangurupi asa boi jongjong Bale Harajaon. *—Ida surat na di toru.

3-5. Aha do Bale Harajaon i, jala songon dia do pangkilalaanta tu parpunguanta?

³ Bale Harajaon i ma inganan parpunguan laho manomba Jahowa. Silehonlehon na arga do parpunguan, na boi patoguhon paralealeonta tu Debata. Di parpunguanta, organisasiNa mangalehon panogunoguon na tahaporluhon. Sada hak na sumurung do digokhon Jahowa dohot anakNa asa rap mangan sian ”langgatan ni Tuhan i” ganup minggu. (1 Korint 10:21) Unang ma lupa hita mansai arga do gokhon sian Jahowa on.

⁴ Tangkas do dipaboa Jahowa asa rap marpungu hita manomba Ibana jala mangurupi na asing (Jaha Heber 10:24, 25.) Molo taargai do Jahowa, unang ma hea tatinggalhon parpunguan molo so adong ulaon na mansai ringkot. Na taargai do Jahowa molo taparade jala parsidohot hita di parpunguan.—Psalmen 22:23.

⁵ Molo taradoti jala denggan parniulaonta di Bale Harajaon, patuduhon na taargai do Jahowa. Ingkon parohon sangap tu Jahowa ma nian parniulaonta, alana patar do tarsurat goarNa disi.—Bandingkon 1 Rajaraja 8:17.

6. Songon dia do pandapot ni halak taringot Bale Harajaonta dohot taringot na ro tu parpunguan? (Ida gombar di mula ni parsiajaran.)

⁶ Molo taargai do Bale Harajaon, boi do i diparrohahon halak na asing. Songon, donganta baoa di Turki mandok: ”Longang do rohangku ala ias jala taratur Bale Harajaonmu. Angka halak na ro tusi pe denggan paheanna jala burju manjangkon ahu.” Diihuthon donganta i ma sude parpunguan jala ujungna tardidi ma ibana. Di Indonesia, sahalak donganta manggokhon hombar jabuna, walikota, dohot na asing asa ro mangida Bale Harajaon na baru jongjong. Longang do Walikota i mangida denggan ni bangunan, uli ni tamanna dohot parpeak ni Bale Harajaon i. Laos didok ma: ”Ias ni inganan parpunguanmuna on, patuduhon na sintong do haporseaonmuna.”

7, 8. Songon dia do hita patuduhon na taargai Jahowa tingki di Bale Harajaon?

⁷ Jahowa do na manggokhon hita asa ro marpungu, jala diboto Ibana do aha na taulahon di parpunguan. Alani i, tapatudu ma parniulaon na denggan saleleng parpunguan unang ma songon na di jabu tabahen. Toho, dihalomohon Jahowa do asa las rohanta  di parpunguan, alai unang ma gabe ndang taargai parpunguanta. Alani i, unang ma tapangke pahean na so denggan, manang marSMS, mangkatahatai, jala mangallangi saleleng parpunguan. Diajarajari angka natuatua ma ianakhonna asa unang marlojonglojong dohot marmeami di Bale Harajaon.—Parjamita 3:1.

⁸ Tingki diida Jesus martigatiga halak di bagas joro ni Debata. Gabe tarrimas ma ibana jala dipalao ma nasida. (Johannes 2:13-17) Di Bale Harajaon, hita marsiajar jala manomba Jahowa. Alani i, ndang tama molo tahatai bisnis di parpunguan.—Bandingkon Nehemia 13:7, 8.

9, 10. (a) Songon dia do naposo ni Jahowa pajongjongkon Bale Harajaon, jala aha do labana? (b) Songon dia do organisasi ni Jahowa mangurupi angka huria na hurang di parhepengon?

⁹ Girgir do roha ni naposo ni Jahowa na rade pajongjongkon jala paulihon Bale Harajaon di liat portibi on, nang pe ndang margaji nasida. Ala girgir nasida, di bagasan 15 taon na parpudi on dipajongjong ma lobi sian 28.000 Bale Harajaon di liat portibi on. Hirahira 5 Bale Harajaon na baru ganup ari.

¹⁰ Organisasi ni Jahowa mamangke angka halak na rade dohot silehonlehon laho pajongjongkon Bale Harajaon didia pe na dihaporluhon. Hita mangihuthon prinsip na adong di Bibel na mandok ingkon diurupi na lobi do na hahurangan. (Jaha 2 Korint 8:13-15.) Aha do laba na tadapot? Godang ma Bale Harajaon naung dipajongjong tu huria na hurang di parhepengon.

11. Aha do na didok pigapiga donganta taringot Bale Harajaon nasida na baru, jala songon dia do pangkilalaanmu taringot i?

¹¹ Angka donganta sian huria di Kosta Rika manurat: ”Tingki jongjong hami di jolo ni Bale Harajaon na baru i, hira na marnipi huhilala hami! Holan ualu ari nunga sae dipajongjong Bale Harajaonnami na uli on! Alani pasupasu ni Jahowa dohot pangurupion ni angka donganta do on sude. Silehonlehon na arga do inganan parpunguan on. Dos songon berlian na arga sian Jahowa. Las situtu ma rohanami.” Las rohanta manangihon angka donganta na mandok mauliate tu Jahowa. Jala las roha ala sude donganta di liat portibi on adong inganan parpunguanna be. Tangkas ma dipasupasu Jahowa  do ulaonta pajongjongkon Bale Harajaon. Alana, disi sae Bale Harajaon dipajongjong, godang ma halak na ro marpungu.—Psalmen 127:1

12. Songon dia do hita boi mangurupi pajongjongkon Bale Harajaon?

¹² Songon dia do hita boi parsidohot mangurupi pajongjongkon Bale Harajaon? Hita boi gabe sahalak na rade tu ulaon i. Jala sude hita boi mangalehon silehonlehon na mangurupi pajongjongkon Bale Harajaon. Molo parsidohot hita tu ulaon on, las ma rohanta jala na rumingkot gabe tapuji ma Jahowa. Taihuthon ma naposo ni Jahowa na disurat di Bibel na mangalehon pangurupion asa boi jongjong inganan parpunguan nasida.—2 Musa 25:2; 2 Korint 9:7.

13, 14. Aha do na boi taparsiajari sian Bibel taringot Bale Harajaon?

¹³ Debata na ias jala na badia do Jahowa. Panggomgomi na denggan do Ibana. Alani i ma ringkot tajaga asa ias jala taratur Bale Harajaonta. (Jaha 1 Korint 14:33, 40.) Dung i, asa boi hita ias jala badia songon Jahowa, ndang holan panombaon, pingkiran dohot parniulaonta na ias, ingkon dohot do tajaga asa sai ias pamatangta.—Pangungkapon 19:8.

¹⁴ Molo ias jala taratur Bale Harajaon, ndang alang rohanta manggokhon halak asa ro tu parpunguan. Jala boi ma idaon nasida molo hita marsitutu mangulahon na tabaritahon taringot tano na imbaru na ias. Boi ma  diida nasida hita manomba Debata na badia, na mangkalomohon asa gabe Paradeiso tano on.—Jesaya 6:1-3; Pangungkapon 11:18.

15, 16. (a) Boasa ndang sai mura paiashon Bale Harajaon? Boasa ingkon sai ias tabahen? (b) Songon dia do Bale Harajaonmuna diorganisasi asa sai ias, jala aha do labana di hita?

¹⁵ Marragam do pandapot ni halak taringot haiason. Boasa? Olo do ra ala tading di inganan na marasingasing nasida. Na deba tading di inganan na kotor. Na asing hurangan aek di hutana. Alai, didia pe hita tading jala songon dia pangkilalaan ni halak na adong di luatta taringot haiason, ingkon ias jala taratur do bahenonta Bale Harajaon. Ala i do ingananta laho manomba Jahowa.—5 Musa 23:14.

¹⁶ Molo lomo rohanta ias Bale Harajaon, ingkon olo ma hita mangihuthon tudutudu. Ingkon adong do bahenon ni angka sintua jadwal paiashon jala sai diparade ma na hombar tusi. Ingkon radotan ni sintua do ulaon i sahat tu na sae. Pigapiga bagian na adong di Bale Harajaon, ingkon ganup minggu tapaias. Alai na asing ndang pola ingkon ganup minggu. Sada hak na sumurung do molo parsidohot hita paiashon Bale Harajaon.

17, 18. (a) Aha do na boi taparsiajari sian angka naposo ni Jahowa najolo? (b) Boasa ingkon sai taradoti Bale Harajaon?

¹⁷ Taradoti ma Bale Harajaonta asa tongtong denggan pangkeon. Naposo ni Jahowa di tingki naung salpu pe mangulahon songon i. Songon, saleleng pamarentaon ni Raja Joas, rade do roha ni bangso i papunguhon hepeng asa jongjong bagas joro ni Jahowa. Diparentahon raja i do tu angka malim asa dipangke hepeng na pungu i laho padengganhon na sega sian bagas joro i. (2 Rajaraja 12:4, 5) Lobi sian 200 taon dungkon i, Raja Josia papunguhon hepeng laho padengganhon bagas joro.—Jaha 2 Kronika 34:9-11.

¹⁸ Pigapiga Punguan na Mangaradoti Ulaon di Kantor Cabang [Panitia Cabang] paboahon, angka dongan di negara nasida ndang mangaradoti Bale Harajaon naung dipajongjong. Olo do ra ala ndang sude mamboto songon dia mangaradoti. Manang ndang adong ra hepeng ni nasida laho padengganhon. Alai, molo ndang tapadenggan Bale Harajaon tingki dihaporluhon, gabe ndang denggan be idaonta dohot idaon ni angka halak. Molo taradoti Bale Harajaonta, mamuji Jahowa ma hita disi jala ndang pasudahon hepeng silehonlehon ni angka donganta.

19. Aha do na ingkon ulahononta asa patuduhon na taargai do inganan manomba Jahowa?

¹⁹ Bale Harajaon dipajongjong asa parohon sangap tu Jahowa. Ndang na ugasan ni pigapiga halak manang huria i. Songon naung taulas di parsiajaran on, prinsip ni Bibel boi mangurupi hita asa marparniulaon na denggan di parpunguan. Molo taargai Jahowa, taargai ma parpunguanta dohot Bale Harajaonta. Rade ma rohanta mangalehon silehonlehon asa boi jongjong gumodang Bale Harajaon, jala girgir ma hita mangaradoti dohot paiashon i. Tatiru ma Jesus na patuduhon pangargaion tu inganan manomba Jahowa.—Johannes 2:17.