Dipaboa si Janet ma pengalamanna ”Ndang leleng dung mate bapakku, didok tunggani dolingku ma tu ahu nunga adong diida ibana borua na asing. Ndang martading hata ibana mambuat abitna, jala ditadingkon ma ahu dohot dua gellengku.” Dung i, dilului si Janet ma karejo, alai ndang sae gajina di nasida. Didok ibana ma muse, ”Lam marsak do ahu ala sahalakku nama manggohi haporluannami, jotjot do ahu marlungun ni roha ala ndang boi huparade sude haporluan ni gellengku songon na binahen ni na asing. Asing ni i, marsak do ahu di hata ni halak taringot hami.”

Tangiang mangurupi si Janet asa boi mangorom dirina jala manjaga paralealeonna tu Debata. Didok ma: ”Tingki borngin do na lungun huhilala, alana ndang adong be donganku mangkatai, ujungna sai holsoan ma ahu. Alai, dung martangiang jala manjaha Bibel boi ma ahu modom. Ayat na pasonang rohangku, i ma di Pilippi 4:6, 7: ’Unang holsohon hamu agia aha; alai sandok pabotohon hamu ma tu Debata pangidoanmuna marhitehite tangiang dohot elehelek mardongan mauliate! Jala dame ni Debata na sumurung sian saluhut roha, i ma mangaramoti angka ateate dohot pingkiranmuna.’ Dungkon martangiang ahu huhilala ma hadameon sian Jahowa.”

Hata ni Jesus na padamehon pangkilalaan, i ma na mandok: ”Ai diboto Amamuna do na ringkot di hamuna, andorang so mangido dope hamu.” (Mateus 6:8) Ringkot do sai mangido tu Debata. Tangiang do dalan na parjolo asa boi pajonok diri tu Debata. Aha do labana molo taulahon on? Didok Bibel: ”PajonohonNa ma tu hamu!”—Jakobus 4:8.

Tangkas ma, tangiang mangurupi hita asa lam dame pangkilalaanta tingki holsoan rohanta. Jahowa, ”sitangihon tangiang”, mangurupi sude na marpos ni roha tu Ibana. (Psalmen 65:3) I do alana Jesus mangajarhon tu siihuthon ibana asa  ”tongtong nasida martangiang, na so tupa lemba.” (Lukas 18:1) Sai tapangido ma tudutudu dohot pangurupion ni Debata, jala pos ma rohanta na lehononNa do upa tu hita. Unang ma ganggu rohanta, na boi jala na olo do Debata mangurupi hita. ”Sai martangiang ma hamu” ala i do dalan laho patuduhon na marpos ni roha hita tu Debata.—1 Tessalonik 5:17.

Aha do haporseaon i? I ma parbinotoan ala ”mananda” Debata dohot parangeNa. (Johannes 17:3) Jumolo ma hita mangalului lomo ni roha ni Debata marhite Bibel. Boi ma taboto na disarihon jala diurupi Debata do hita ganup marsadasada. Ndang holan parbinotoan taringot Debata lapatan ni haporseaon, alai dohot ma i mangargai paralealeonta tu Ibana. Songon sahalak alealenta, ndang boi pintor maraleale hita tu ibana di bagasan saborngin. Haporseaonta pe ingkon ”lam ganda” dung lam godang taparsiajari taringot Ibana, gabe sai taulahon ma ”lomo ni rohana,” ujungna tahilala ma pangurupionNa. (2 Korint 10:15; Johannes 8:29) Haporseaon sisongon i ma na mangurupi si Janet asa unang sai marsak be.

Si Janet mandok: ”Haporseaonku lam togu tu Debata tingki huhilala pangurupion sian Jahowa. Jotjot do hami mangadopi parsoalan na so boi diadopi hami. Alai ala jotjot hami martangiang, sai adong do dalan sian Jahowa, na so boi huulahon molo alani gogongku sandiri. Tingki mandok mauliate tu Debata, huingot ma godang ni pangurupionNa tu ahu. Sai diurupi do hami di tingki na pas. Dilehon do tu ahu aleale na sai rade mangurupi, i ma angka dongan sahaporseaon. Sai diparrohahon nasida do hami jala mangalehon sitiruon na denggan tu gellengku.” *

”Huboto ma boasa didok Jahowa di Maleaki 2:16: ’Huhagigihon do parsirangan.’ Hansit do parsirangan on di ahu. Nunga martaontaon hami marsirang alai sai lungun dope rohangku. Tingki songon i pangkilalaanku, laho ma ahu marbarita gabe dumenggan ma huhilala.” Ala diihuthon si Janet prinsip ni Bibel asa unang papulikkon diri, moru ma arsak ni rohana. *—Poda 18:1

Dipatorang si Janet ma muse, ”Pangurupion na umbalga na huhilala i ma ala mamboto molo Debata ’mangaramoti angka na so marama na so marina dohot mangondihon angka na mabalu.’ Ndang na tadingkonon ni Debata hami songon na binahen ni tunggani dolingku.” (Psalmen 68:6 Bibel Siganup ari) Diboto si Janet do ndang diunjuni Debata hita ”tu hajahaton.” Gariada dilehon Ibana do bisuk ”di saluhut jala ndang marpangea [mencela]” jala dilehon do ”hagogoon na sumurung” asa boi mangadopi arsak ni roha.—Jakobus 1:5, 13; 2 Korint 4:7.

Alai songon dia do molo adong na marsak alani mara?