Tikki latihan au dohot donganku hea do dang sengaja hutendang igungna. Lukka parah do ibana. Gabe merasa bersala do au. Hupikkiri ma, hupaso ma na markarate on, hape lomo hian do rohakku tu olahraga on jala nga leleng au markarate. Boasa ma gabe tarpikkir au songon i, alai jolo hupaboa ma jolo boasa au olo marsiajar karate.

 Magodang di jonok ni kota Buffalo do au di New York, Amerika Serikat. Kompak do keluarganami, hami maragama katolik jala ringgas lao tu gareja. Au pe marsikkola di sikkola Katolik jala hea do gabe putra altar. Adong sada kakakku, lomo do roha ni natua-tuanami asa gabe halak na sukses hami nadua. Molo denggan nilaiku di sikkola, boi ma au sikkola huhut karejo, jala molo dung mulak sikkola boi do au dohot kegiatan olahraga. Alani i, gabe halak na teratur ma au sian na gelleng.

 Mulai ma au marlatik karate tikki marumur 17 taon. Tolu jom ma au marlatik di bagasan sadari, jala tiap ari do au marlatik saleleng martaon-taon. Godang do suda tikkiku lao mamparsiajari akka jurus markarate dohot manonton video taringot karate. Lomo do rohakku marlatik huhut hututup mataku, nang pe tikki maniop senjata tajam. Boi do huponggolhon akka papan dohot batu bata holan sahali pukkul. Nungnga godang dapottu akka penghargaan dohot piala tikki dohot tu pertandingan. Na markarate on ma na uppetting di ngolukku.

 Ninna rohakku nungnga gabe halak na sukses be au. Nga lulus au sian perguruan tinggi jala dapottu do predikat cum laude. Karejo ma au disada perusahaan na balga gabe perancang sistem komputer. Adong do hallettu jala nga adong jabukku sandiri. Molo diida halak nga sonang be ngolukku. Alai sasittongna dang songon i ngolukku, dang las rohakku. Godang dope sukkun-sukkunku taringot hangoluan on na so taralusi.

 Asa dapottu alus ni sukkun-sukkun i, lao ma au dua hali saminggu tu gareja jala martangiang tu Debata. Sada tikki makkata-hatai ma au dohot sahalak donganku, mulai sian i muba ma ngolukku. Husukkun ma tu ibana, “Hea do ho tarpikkir aha do tujuan ni ngolu on?” Hudok ma muse, “Godang hian masalah na di portibi on jala godang na so adil.” Didok ibana ma tu au, molo ibana pe hea do songon i sukkun-sukkunna. Alai dapotna do alusna sian Bibel. Dilehon ibana ma tu au sada bukku judulna Saudara Dapat Hidup Kekal dalam Firdaus di Bumi. a Didok ibana ma tu au, lagi marsiajar Bibel do ibana dohot Saksi Jahowa. Di mulana i, dang olo au manjaha bukku na dilehonna i. Alana didok rohakku, dang boi jahaonku bukku na sian agama na asing. Alai ala lomo rohakku naeng mamboto alus ni sukkun-sukkunki, gabe hujaha ma bukku i. Naeng huboto do, masuk akkal do manang na dang na diajarhon ni Saksi Jahowa i.

 Songgot do rohakku dung huboto aha na didok di Bibel. Gabe huboto ma, ditoppa Debata jolma lao mangolu salelengna do di tano on. Sahat tu saonari pe dang muba dope tujuan ni Debata. (1 Musa 1:28) Songgot do rohakku tikki huida di Bibelhu sandiri di terjemahan King James version, adong goar ni Debata i ma Jahowa. Jadi saleleng on, tikki hudok Tangiang Ale Amanami di tangiakku jala hudok sai dipabadia ma goarmu, sasittongna na manjou goar ni Jahowa do i. (Psalmen 83:19; Mateus 6:9) Jala huboto ma muse, boasa dipaloas Debata dope masa hasusaan sahat tu saonari on. Sude na huparsiajari i masuk akkal do. Ujungna las hian ma rohakku.

 Takkas dope huingot tikki parjolo sahali au ro tu parpunguan ni Saksi Jahowa. Burju-burju do sude halak i jala lomo do roha ni nasida naeng mananda au. Di tikki i, adong jamita na dipasahat na mangulas taringot tangiang na ditangihon Debata. Lomo do rohakku mambege jamita i, alana jotjot do au martangiang tu Debata mangido asa diurupi. Dung i, ro ma au muse tu ari parningotan hamamate ni Jesus. Heran do au muse mangida akka dakdanak ala malo mambukka Bibel tikki dijahahon akka ayat. Ala dang huboto songon dia carana mambukka ayat ni Bibel, diurupi Saksi Jahowa do au jala diajari.

 Lam jotjot au ro tu parpunguan ni Saksi Jahowa, lam huargai ma cara ni nasida mangajarhon isi ni Bibel. Godang do na boi huparsiajari sian akka parpunguan ni nasida, jala molo nga sae marpungu lam semangat do au, lam tamba do las ni rohakku. Dukkon i, mulai ma au marsiajar Bibel dohot nasida.

 Boi ma huida beda hian do Saksi Jahowa dohot akka halak na di garejakku. Molo Saksi Jahowa, marsitutu do mangulahon lomo ni roha ni Debata. Lam pos ma rohakku nasida do halak Kristen na sittong, na marsihaholongan.​—Johannes 13:35.

 Lam godang au marsiajar Bibel, lam godang ma perubahan na hubahen di ngolukku. Alai, huhilala dang mungkin hupaso na markarate i. Lomo do rohakku latihan karate dohot martanding. Tikki hupaboa i tu na mangurupi au marsiajar Bibel, burju do ibana mandok tu au, “Marsiajar ma jolo ho, pos do rohakku bahenonmu do annon keputusan na denggan.” Las do rohakku tikki didok ibana songon i tu au. Lam marsiajar au, lam lomo ma rohakku mambahen las roha ni Debata Jahowa.

 Songon naung huceritahon, hea do dang sengaja hutendang igung ni donganku tikki latihan. Alani kecelakaan i gabe hupikkiri ma, molo toktong do au markarate boi do au gabe siihutton Kristus na patuduhon dame? Jala nungnga huboto na didok Jesaya 2:3, 4 akka halak na mangihutton Jahowa dang “marsiajar marporang” be. Diajari Jesus do akka halak asa unang mangulahon kekerasan, nang pe dibahen na so denggan tu nasida. (Mateus 26:52) Ujungna, gabe hupaso ma na markarate i, nang pe lomo hian rohakku tu olahraga i.

 Dung i huihutton ma poda ni Bibel na mandok, “Marsitutu ma ho mangoloi parenta ni Debata.” (1 Timoteus 4:7) Sude tikki dohot tenaga na hubahen lao markarate, saonari nga hubahen be tikkikki lao pajonokkon diri tu Debata. Alai dang lomo roha ni hallettu molo marsiajar Bibel au, gabe putus ma hami. Tanggal 24 Januari 1987, tardidi ma au gabe sahalak Saksi Jahowa. Dang leleng dukkon i, gabe unggodang ma hupakke tikkiku gabe penginjil lao mangurupi akka halak marsiajar Bibel. Jala hea do au dohot mangurupi di kantor pusat ni Saksi Jahowa na di New York, Amerika Serikat. Sahat tu saonari pe, toktong dope au gabe sahalak penginjil sepenuh waktu.

 Saonari nga huboto be hasittongan taringot Debata. Gabe adong ma tujuan ni ngolukku, masa depanku jala gabe las hian ma rohakku. Sahat tu saonari, toktong dope au marolahraga. Alai dang i be na uppetting di ngolukku. Manomba Debata Jahowa nama na uppetting di au.

 Tikki markarate dope au, molo adong na hira-hira mencurigahon lao menyerang au, pittor siap-siap do au. Alai molo saonari, pittor siap-siap do au lao mangurupi halak lao marsiajar Bibel. Diajari Bibel do au asa gabe halak na burju mangalehon. Jala saonari marsiajar do au asa gabe suami na burju tu istrikku na bagak, i ma si Brenda.

 Najolo lomo do rohakku markarate, alai molo saonari dang be. Alai adong do na undenggan di ngolukku. Didok di Bibel, “Otik do guna ni mangalatik daging, alai molo marsitutu mangoloi parenta ni Debata, marguna do i tu ngolunta saonari dohot tu ngolunta di ari na naeng ro.”​—1 Timoteus 4:8.