JIʼTE 05
Bible be tchoung fe m bi Si bi pe
Jéova be é ha taʼ poutchi gwye bi pe—po mŋwaʼgne 66 be pou tamte ne gre taʼ ŋwaʼgne yemouʼ, Bible. Daʼge mouʼtchwe o gô po hente ge : A le tchye m ge ke te Bible pe we ? Bible fe m bi we ? Ne ne ha mpaʼ ne mhente menge, pe naʼ djô she potse ne Bible.
1. A pe be pômsoung né le bve Bible, nweke pou ghôm ge a fe m bi Si ?
Pô gwè a 40 né le bve Bible. A ghe mgouʼ gwè a 3500 paʼ pou le ve dendze ŋwaʼgne a, neng gre mgouʼ gwè a 1900 paʼ pou ve lasi a. Pô pye wap le ve Bible a late hwegne pe : she ne pou le be mbyapdze, she pe pe ghem bapgou, she neng be ba mfo. Ba m poʼo sôm mo ne pou late ve taʼ ywe mouʼ mo sôʼ ve ye dyèʼ pe. A fing ne pe poʼo m ge ke ? A be poʼo nekele Bible fe m bi Si (Ké 1 Tésalonika 2:13.) Pô bô late ve mkwègne map pe. Daʼge “jwégne dôlô né le gre te pômneng ghôm nwe ye a fe m bi Si a.” * (2 Pètro 1:21) Si le le jwégne dôlô é ne gre ge pô ve mkwègne mye.—2 Timotio 3:16.
2. We fing ne tsu pé ne Bible ?
Si be é le ghôm ge “goung mgoung awè, goung mgwya awè, goung mghôm awè ba goung pô awè” le gô tsu pé ne tchoung pepoung ye a be tchum Bible a. (Ké Apokalipse 14:6.) Tyôʼô, Bible be si ne medou mghôm te tchye baya ŋwaʼgne le. Gwè a goung pô awè fing ne ké Bible, ke wap tchwe bahele, ke be gôm baya ghôm a le.
3. Jéova be é pômte Bible m tchi ge ke ?
Pou le bve Bible ne potse tsye a te tchwe mama a pe, paʼ kuir ba papirus a. Daʼge she pebè pye wap le koung Bible a, le tchente de mbou map ne bing bve ya bô mtchum mtchum pe te kwyepgne ywe ne. She pe saʼ goung ba mtse dze tchum tchôsi le tela ne simgne Bible. Daʼge she pô le ping ba ne pi vôk tsap ne ne bômte ya. Jéova ka tak ge sôm mo ke sôm ywe le kô paʼ é gô ghômte pou a wôkpe a. Bible gôm ge : “Ghôm Si yôkpe tchwe mama.”—Izaya 40:8.
PING TCHENG NE GÔ DZE
Ping dagne potse ne tchi paʼ Si le tchye m ne jwégne dôlô é gre ge pô ve Bible a, tchi paʼ é bômte ya a, ba tchi pa é ghe ge goung pô awè kouʼgne ne ghe ya a.
4. Bible sing wôkpe mo ye é fe m bi a
Yô VIDÉO. Dou ké 2 Timotio 3:16, neng gômte ne mhente menge.
-
A pe ge pômsoung ne bve Bible, be nweke pou khé ya ge Ghôm Si ?
-
O kwè ge pou fing ne ping kwaʼ ge, Si le kouʼgne ne ghe ge pô pye wap le ve Bible a jye mkwègne mye a ?
Mo fing ne ghôm bi mouʼ mo ge é ve taʼ ŋwaʼgne, daʼge tchoung ye a tchum o a fe m bi mo ye é gôm ge pou ve ŋwaʼgne a. Dendeng poʼo, pômsoung né le bve Bible, daʼge tchoung ye a tchum o a le fe m bi Si
5. Bible be a vôk ne goung potse tsye pou le ghe ne ne simgne é a
A pe ge Bible fe kwaʼ m bi Si, be pe fing ne pyap ge é pômte ya. Pô be wap ghe pawa, le tela ne simgne Bible. Ba mtse dze tchum mtchôsi le tela ne ghe ge pômneng ke ké Bible. Daʼge ba m be ye pou le le wap djô goʼ neng gôm ba ge pou gô jwe wap a, medou pô le ping ne pi vôk tsap ne ne bômte Bible. Ne ne jye taʼ ne pô bô, yô VIDÉO, neng gômte ne mhente menge.
-
Paʼ o jye tchwelô deng paʼ pô le ping ne pi vôk tsap ne ne bômte Bible a, a bo kwiʼ ji o ne ké ya a ? Nweke ?
Ké Mghôm ghamte 119:97, neng gômte ne hente yenge :
-
Ke le tsegne medou pô ne toute Bible neng gapte ya ba m be ye wap le fing ne pi vôk tsap a ?
6. Taʼ ŋwaʼgne ye goung pô awè fing ne ghe ya a
Bible be ŋwaʼgne ye pou thoute ya neng gapte ya, te tchye baya ŋwaʼgne le ye a fe be we tchum goung dzu awè a. Ké Mfaʼ 10:34, 35, neng gômte ne mhente menge :
-
Nweke Si tcheng ge pou toute Ghôm tsye neng gapte ya te djôm deng poʼo ?
-
Sôʼ m ne Bible, ke tchoʼ o ne ?
Gwè a
100%
ne pô tchum dzu awè
fing ne ké Bible ne taʼ ghôm ye wap djouʼ a
A be si ne mghôm
3 000
te twôk,
a pe goung Bible awè ke mbap mye le
5 000 000 000
A be gwè a deng Mbible mye pou thé a,
be a yôm te tchye baya ŋwaʼgne a le
SHE PÔ GÔM GE : “Bible be daʼ taʼ bvo ŋwaʼgne be pômsoung né le bve ya.”
-
O sè you ge ke ?
-
Ma potse tchente daʼte ge Bible be Ghôm Si ?
YE NE KHAMTE
Bible be Ghôm Si. É neng tchente gre ge goung pô awè kouʼgne ne ghe ya bô.
O lagne ke ?
-
Tchwe ye pou gôm ge Bible fe m bi Si a, a thoute ge ke ?
-
Ke tchente tchoʼ o ne tchi paʼ Bible ne bvôk a, deng paʼ pou ne thoute ya a, ba paʼ pou ne gapte ya a ?
-
Ne jye ge Si be é tchente kaktuô deng poʼo ne ne tcheng ne ghômte pou a wou, gre ge o youʼ ne o m tchi ge ke ?
YÔ SHE POTSE NE
Ping dagne she potse ne tôné Bible—te fe ne mbvo mŋwaʼgne mye pou le le mbou ne bve a, te ŋwak ne Mbible mye a be si tyôʼô be pou toute a.
“Comment la Bible nous est parvenue” (Réveillez-vous !, novembre 2007)
Lagne tchi paʼ Bible vôk ne potse gwye metha mye a le tcheng ne simgne ya a.
“La Bible—Histoire dʼune rescapée” (La Tour de Garde no 4 2016)
Yô mketuʼ mye pômneng tchye m ne te ne thoute Bible a.
Pou le ping bve neng thoute Bible medou mtchum. O fing ne jye m ge ke, ge pou ka ne ghe ya kwyepgne tchoung Si ?
