Fluwa klikli nga Pɔlu klɛli Korɛntifuɛ mun’n 12:1-31
12 Siɛn’n aniaan mun, n kunndɛ kɛ amun si ninnge nga Ɲanmiɛn wawɛ’n fa cɛ’n*+ be su ndɛ’n kpa.
2 Amun si kɛ i nun mɔ amun ti mɛn’n nunfuɛ’n,* amun ko sɔli amuin. Yɛ amun yoli like nga amuin sɔ mɔ be ijɔman’n+ be klo’n. Kpɛkun amun fali atin kwlaa nga be kleli amun’n su.
3 Ɔ maan siɛn’n, n kunndɛ kɛ amun si kɛ sran nga Ɲanmiɛn wawɛ’n maan ɔ su kan ndɛ’n, nán maan ɔ se kɛ: “Be boli Zezi i sannzan!” Yɛ sɛ Ɲanmiɛn wawɛ’n nunman sran kun su’n, ɔ kwlá seman kɛ: “Zezi ti e Min!”+
4 Ninnge nga Ɲanmiɛn wawɛ’n fa cɛ’n* be ti wafawafa, sanngɛ Ɲanmiɛn wawɛ’n ti kunngba cɛ.+
5 Asa ekun’n, junman nga e di man Ɲanmiɛn’n be ti fanunfanun,+ sanngɛ e Min’n ti kun.
6 Ninnge nga Ɲanmiɛn maan sran yo’n be ti fanunfanun, sanngɛ Ɲanmiɛn kunngba’n yɛ ɔ fa sran mun yo i kwlaa sɔ mun-ɔn.+
7 Sanngɛ Ɲanmiɛn wawɛ’n yi i wun nglo sɔ sran’m be tinuntinun be nun naan be uka be wiengu.+
8 Yɛle kɛ Ɲanmiɛn wawɛ’n ti’n, sran kun kwla kan ndɛ ngwlɛlɛ su. Asa ekun’n, Ɲanmiɛn wawɛ kunngba sɔ’n ti’n, sran kun kwla kan sa nga i wiengu’m be simɛn i’n, i ndɛ.
9 Asa ekun’n, Ɲanmiɛn wawɛ’n ti’n, sran kun kwla lafi Ɲanmiɛn su,+ yɛ Ɲanmiɛn wawɛ kunngba sɔ’n ti’n sran kun kwla yo i wiengu juejue.+
10 Ɲanmiɛn wawɛ’n ti’n, sran kun kwla yo abonuan sa mun,+ wie kwla ijɔ Ɲanmiɛn nuan, wie kwla wun ndɛ ng’ɔ fin Ɲanmiɛn’n nin ng’ɔ finman Ɲanmiɛn’n be wlɛ,+ wie kwla kan aniɛn fanunfanun,+ yɛ wie kusu kwla tu ndɛ nga be kɛn i aniɛn’m be nun’n be bo.+
11 Ɲanmiɛn wawɛ kunngba’n i ti yɛ sran’m be kwla yo ninnge kwlaa sɔ mun-ɔn. Like nga i bɔbɔ klo’n, yɛ ɔ fa man sran kun-ɔn.
12 Sran wunnɛn’n i likalika’m be sɔnnin. Kannzɛ ɔ ti sɔ’n, sanngɛ ɔ ti sran wunmuan kun.+ Kɛ Klisi kusu ti sɔ wie.
13 Afin i Zifu-o, i Glɛki-o, i kanga-o, i diewa-o, be yoli e kwlaa e batɛmun. Wafa kunngba nga kɛ be yo sran kun i batɛmun’n, nzue’n kɛtɛ i su’n, i sɔ yɛ Ɲanmiɛn wawɛ’n katali e su wie-ɔ. Ɔ maan e ti sran wunmuan kun. I sɔ’n ti’n, Ɲanmiɛn fɛli i wawɛ’n mannin e kwlaa.
14 Afin sran wunnɛn’n i likalika’m be sɔnnin, ɔ timan kunngba cɛ.+
15 Sɛ be ja’n se kɛ: “Kɛ mɔ n timan be sa’n ti’n, n timan be wunnɛn’n i lika’m be nun kun’n,” nɛ́n i sɔ’n ti yɛ ɔ timan be wunnɛn’n i lika wie-ɔ.
16 Yɛ sɛ be su’n se kɛ: “Kɛ mɔ n timan be ɲinma’n ti’n, n timan be wunnɛn’n i lika’m be nun kun’n,” nɛ́n i sɔ’n ti yɛ ɔ timan be wunnɛn’n i lika wie-ɔ.
17 ?Sɛ be wunnɛn wunmuan’n ti be ɲinma’n, ɔ́ yó sɛ naan y’a ti sa? ?Yɛ sɛ ɔ ti be su ngunmin’n, ɔ́ yó sɛ naan y’a ti nvan?
18 Sanngɛ Ɲanmiɛn siesieli e wunnɛn’n i likalika mun sɛsɛsɛ kɛ i bɔbɔ fa klo’n sa.
19 ?Sɛ e wunnɛn’n i likalika’m be kwlaa be ti kun’n, e wunnɛn’n yó wafa sɛ?
20 E wunnɛn’n i likalika’m be sɔnnin, sanngɛ i kwlaa sɔ’n yɛ be flɛ i sran’n niɔn.
21 E ɲinma’n kwlá seman e sa’n kɛ: “N mianman ɔ wun,” annzɛ e ti’n kwlá seman e ja’m be kɛ: “N mianman amun wun.”
22 I kpa bɔbɔ’n, e wunnɛn’n i likalika nga e bu i kɛ be o lɛ ngbɛn’n, be ti cinnjin.
23 Yɛ e wunnɛn’n i lika nga e bu i kɛ be timan klanman’n, e nian be lika kpa.+ Ɔ maan e wunnɛn’n i likalika nga be nin nzra nun fataman’n, e nian be lika kpa,
24 kusu nn nga be ti klanman’n, e yoman be sɔ. Kɛ Ɲanmiɛn yili e wunnɛn’n i sɔ-ɔ. Yɛle kɛ e wunnɛn’n i lika nga be timan klanman’n, Ɲanmiɛn maan be yo cinnjin.
25 I liɛ’n, e wunnɛn’n i likalika’m be su bubuman be wun nun. Sanngɛ bé úka be wun.+
26 Sɛ e wunnɛn’n i lika kun yo e ya’n, e wunnɛn’n i likalika onga’m be nin i be fɛ.+ Yɛ sɛ be kannvu e wunnɛn’n i lika kun’n, e wunnɛn’n i likalika onga’m be nin i be di aklunjɔɛ.+
27 Amun ti Klisi i wunnɛn,+ kpɛkun amun tinuntinun amun ti i wunnɛn’n i lika kun.+
28 Yɛ asɔnun’n nun’n, Ɲanmiɛn dun mmua sieli akoto mun,+ i nɲɔn su’n, Ɲanmiɛn nuan ijɔfuɛ mun,+ i nsan su’n, like klefuɛ mun.+ I sin’n, be nga be yo abonuan sa mun’n,+ kpɛkun be nga be yo sran’m be juejue’n+ nin be nga be uka be wiengu’n, ɔ nin be nga be kle be wiengu’m be atin’n,+ yɛ be nga be kan aniɛn fanunfanun mun’n.+
29 Be kwlaa be timan akoto. ?Nɛ́n i-ɔ? Be kwlaa be timan Ɲanmiɛn nuan ijɔfuɛ. ?Nɛ́n i-ɔ? Be kwlaa be timan like klefuɛ. ?Nɛ́n i-ɔ? Be kwlaa be yoman abonuan sa. ?Nɛ́n i-ɔ?
30 Be kwlaa be kwlá yoman sran’m be juejue. ?Nɛ́n i-ɔ? Be kwlaa be kanman aniɛn fanunfanun.+ ?Nɛ́n i-ɔ? Be kwlaa be kaciman ndɛ mun aniɛn’m be nun.+ ?Nɛ́n i-ɔ?
31 Sanngɛ maan amun mian amun ɲin kpa amun kunndɛ ninnge nga Ɲanmiɛn fa man sran mun’n be nun kpakpafuɛ mun.+ Yɛ kusu ń má klé amun like kun m’ɔ ti kpa trɛ i ngba’n.+
Ja ngua lɔ ndɛ mun
^ Annzɛ “maan sran yo’n.”
^ Yɛle kɛ, i nun mɔ be lafiman Ɲanmiɛn su’n.
^ Annzɛ “maan sran yo’n.”
