Fluwa klikli nga Pɔlu klɛli Timote’n 1:1-20
1 Min Pɔlu, ndɛ nga Ɲanmiɛn m’ɔ ti e Defuɛ’n ɔ nin Klisi Zezi mɔ e fa e wla e guɛ i su’n be kannin’n, i ti yɛ n ti Klisi Zezi i akoto-ɔ.+
2 Ń klɛ́ fluwa nga ń blɛ́ wɔ Timote,*+ mɔ a ti ba kpa+ mɔ a di e Min’n i junman’n:
Maan e Si Ɲanmiɛn nin e Min Klisi Zezi be yo wɔ ye, yɛ be si wɔ aunnvɔɛ, yɛ maan be yo naan a di fɔundi.
3 I nun nga ń kɔ́ Maseduanin’n, n wlali ɔ fanngan kɛ a ka Efɛzi lɔ. Ń kɛ́n i kunngba’n ń klé wɔ andɛ. Ka lɔ naan tu sran wie’m be fɔ. Se be kɛ nán be kle sran’m be like uflɛ,
4 yɛ nán be fa be ɲin sie ato ndɛ mun,+ ɔ nin osu nga i nun yɛ be fin’n be su. Ninnge sɔ’m be yoman sa fi ye,+ sanngɛ be yo maan sran’m be kan ndɛ ngbɛnngbɛn mun, kusu nn ndɛ sɔ’m be wie fi kwlá ukaman sran naan w’a lafi Ɲanmiɛn su.
5 Like nga ti yɛ n se wɔ kɛ a yo sɔ’n, yɛle kɛ n kunndɛ kɛ, kɛ é yí klolɛ’n i nglo’n,+ nán fiɛn kaan sa tran e awlɛn’n nun, nán e akunndan’n bu e fɔ, yɛ nán e yo gblɛfuɛ Ɲanmiɛn i su lafilɛ’n nun.+
6 Sran wie’m be kacili be sin sili ninnge sɔ mun. I sɔ’n ti’n, be fali be wun wlali ndɛ ngbɛnngbɛn’m be kanlɛ’n nun.+
7 Be kunndɛ kɛ bé yó mmla klefuɛ,+ sanngɛ ndɛ nga be kan’n, ɔ nin sa nga be jin su tɔkii kɛ ɔ ti nanwlɛ’n, be bɔbɔ be wunman be wlɛ.
8 E si kɛ kɛ sran kun fa Mmla’n su kɛ ɔ nin i fata’n sa’n, ɔ wun i wlɛ kɛ Mmla’n ti like kpa.
9 Asa ekun’n, nán sran kpa’m be ti yɛ be kpɛ mmla-ɔ. Sanngɛ be nga be ti yɛ be kpɛ mmla’n, yɛle be nga be diman mmla su’n,+ ɔ nin ɲin keklefuɛ mun nin be nga be sroman Ɲanmiɛn’n nin sa tɛ yofuɛ mun, ɔ nin be nga be nin be wiengu nantiman klanman’n* nin be nga be yo Ɲanmiɛn i ninnge’m be finfin’n, ɔ nin be nga be kun be si annzɛ be nin’n, ɔ nin sran kunfuɛ onga mun,
10 ɔ nin be nga be kunndɛ bla nin bian sukusuku mɔ be yo i wunsu ɲannzuɛn sa mun’n* ɔ nin yasua nga be nin be wiengu yasua be la’n, ɔ nin be nga be wua sran mun’n, ɔ nin ato buafuɛ mun nin be nga be ta nda mɔ be diman su’n, ɔ nin be nga be yo like uflɛ m’ɔ nin like kpa* nga e kleli amun’n be kɔman’n likawlɛ’n.+
11 Like kpa sɔ mɔ e kleli’n, ɔ fin Ɲanmiɛn m’ɔ di aklunjɔɛ’n i jasin fɛ m’ɔ fa wlali min sa nun’n.+
12 Ń lá e Min Klisi Zezi m’ɔ mannin min wunmiɛn’n i ase. Afin ɔ buli min nanwlɛfuɛ ti’n, ɔ fali junman kun wlali min sa nun,+
13 kusu nn laa’n, n kannin Ɲanmiɛn i wun ndɛ tɛ, n kleli i sufuɛ’m be yalɛ, yɛ n tuli min wun.+ Ɔ nin i sɔ ngba’n, ɔ sili min aunnvɔɛ. Afin ɔ si kɛ n wunman sa wlɛ, yɛ n lafimɛn i su ti yɛ n yoli sa sɔ mun-ɔn.
14 Sanngɛ aklunye nga e Min’n yili i nglo min lika’n, ɔ yoli dan trali su. Yɛ i sɔ’n ukali min kpa naan m’an lafi i su, naan m’an klo i afin n ti Klisi Zezi i sɔnnzɔnfuɛ.
15 Ndɛ ng’ɔ o yɛ’n ti nanwlɛ, yɛ be kwla fa su. Yɛle kɛ Klisi Zezi bali mɛn’n nun kɛ ɔ́ dé sa tɛ yofuɛ mun.+ Min yɛ n ti sran sɔ’m be nun klikli’n niɔn.+
16 Ɔ sili min aunnvɔɛ naan min mɔ n ti sa tɛ yofuɛ’m be nun dan’n, Klisi Zezi sin min lika kle kɛ ɔ trɛ i awlɛn sran’m be wun. Ɔ maan ɔ fali min sieli be nga bé láfi i su naan b’a kwla ɲan nguan m’ɔ leman awieliɛ’n+ be ɲrun naan be nian like nga n yo’n su.
17 I sɔ’n ti’n, maan be yi Famiɛn m’ɔ o lɛ titi’n,+ m’ɔ su wuman le’n,+ mɔ be kwlá wunmɛn i’n,+ mɔ i kunngba yɛ ɔ ti Ɲanmiɛn Kpli’n+ i ayɛ, yɛ be mɛnmɛn i tititi. Maan ɔ yo sɔ.
18 Timote min wa, ndɛ sɔ mɔ n fa wlali ɔ sa nun’n, ɔ nin ɔ su ndɛ nga Ɲanmiɛn nuan ijɔfuɛ’m be kannin’n, be ti kun. Ń kán ndɛ sɔ mun ń klé wɔ naan be ti’n w’a kwla kun alɛ kpafuɛ’n,+
19 naan kusu w’a kwla lafi e Min’n i su, naan ɔ akunndan’n w’a buman ɔ fɔ.+ Sran wie’m be yoman sa kpa nga be klun akunndan’n se be kɛ be yo’n, ɔ maan e Min’n i su mɔ be lafi’n w’a yo kɛ mmeli mɔ w’a saci mlɔnmlɔn’n sa.
20 Imene+ nin Alɛzandri be o sran sɔ’m be nun wie. N fali be n wlali Satan sa nun+ naan fɔ tulɛ sɔ’n kle be kɛ ɔ fataman kɛ be kan Ɲanmiɛn i wun ndɛ tɛ.
Ja ngua lɔ ndɛ mun
^ I bo’n yɛ: “Sran m’ɔ Bu Ɲanmiɛn i Sran’n.”
^ Ɔ kan be nga be nin Ɲanmiɛn be nunman nun kun mɔ be sumɛn i kun’n, be ndɛ wie.
^ Annzɛ “m’ɔ ti kpa man sran’n”, “m’ɔ kwla yo sran ye’n.”
^ Glɛki nun: pɔɔneia. Nian Ndɛ’m be bo tulɛ lika’n nun lɔ.
