Akunndanfuɛ’n 1:1-18
1 Davidi i wa m’ɔ ti sran yiayiafuɛ’n,+ m’ɔ ti famiɛn Zerizalɛmun lɔ’n,+ i nuan ndɛ mun yɛ.
2 Sran yiayiafuɛ’n waan: “Afɛ’n i tɛtɛfuɛ’n!Afɛ’n i tɛtɛfuɛ’n! I kwlaa ti afɛ ngbɛn!”+
3 ?Ngue yɛ sran kun kwla ɲɛn i junman kekle kwlaang’ɔ miɛn i ɲin di i wia’n i bo wa’n i nun-ɔn?+
4 Akpasua kun sin, yɛ akpasua uflɛ jaso su,sanngɛ asiɛ’n ká lɛ tititi.+
5 Wia’n tu i bo, yɛ ɔ tɔ,kpɛkun ɔ sɛ i sin ndɛndɛ kɔ lika nga ɔ tuli i bo lɔ’n.+
6 Aunmuan’n fita kɔ ngua lɔ, kpɛkun ɔ kpɛ i wun kɔ nglo lɔ lika’n nun.Ɔ kpɛ i wun sɔ titi, aunmuan’n kɔ ɔ ba, ɔ kɔ ɔ ba, ɔ yo i sɔ titi.
7 Nzue ba’m be kwlaa be sonji gua jenvie’n nun, sanngɛ jenvie’n yiman.+Lika nga nzue ba’m be fin mɔ be sonji’n, be sa be sin lɔ naan bé sónji ekun.+
8 Like kwlaa ti afɛ.Sran fi kwlá kanman be kwlaa be ndɛ.Be ɲinma’n fɛman ninnge’m be nianlɛ’n nun.Be su’n kusu ɔ fɛman sa tilɛ’n nun.
9 Ng’ɔ juli laa’n yɛ ɔ́ jú ekun-ɔn,yɛ like nga be yoli i laa’n yɛ bé yó i ekun-ɔn.Like fi timan uflɛuflɛ wia’n i bo wa.+
10 ?Like kun o lɛ mɔ sran kun kwla se kɛ: “Nian nga, ɔ ti uflɛuflɛ” ɔ?I sɔ like liɛ’n o lɛ w’a cɛ,ɔ o lɛ laa ka naan e blɛ liɛ’n w’a ju.
11 Sran fi i wla kpɛnman laa sran’m be su.Be nga bé wá jáso su’n be kusu’n, sran fi i wla su kpɛnman be su.Yɛ be nga bé bá be sin ekun’n, sran fi i wla su kpɛnman be su.+
12 Min mɔ n ti sran yiayiafuɛ’n, n yoli Izraɛli famiɛn Zerizalɛmun lɔ.+
13 N fali ajalɛ kɛ ń fá ngwlɛlɛ+ ń súan ninnge kwlaa nga be o ɲanmiɛn’n i bo wa’n be su like.+ N fali min ɲin n sieli ɲrɛnnɛn junman nga Ɲanmiɛn fa mannin klɔ sran mun mɔ i ti’n be ɲanman be ti’n i su.
14 N wunnin junman kwlaa nga be di i wia’n i bo wa’n,sanngɛ amun nian, i kwlaa ti afɛ ngbɛn, ɔ ti kɛ sran kun waan ɔ́ fúan aunmuan’n naan ɔ́ kó trɛ́ i sa.+
15 Like ng’ɔ ti bliwa’n, be kwlá tinngɛmɛn i,yɛ like ng’ɔ nunman lɛ’n, be kwlá kaman.
16 Yɛ n seli min klun lɔ kɛ: “Nian! N sili ngwlɛlɛ dan, n sili ngwlɛlɛ n trali be kwlaa nga be dunnin mmua min ɲrun Zerizalɛmun wa’n,+ n sili ngwlɛlɛ dan ɔ nin sa kpanngban.”+
17 N kplinnin min ɲin lele n sili ngwlɛlɛ’n nin fia bolɛ’n,*+ ɔ nin sinnzin dilɛ’n, yɛ i sɔ’n kusu ti kɛ sran kun waan ɔ́ fúan aunmuan’n naan ɔ́ kó trɛ́ i sa.
18 Afin ngwlɛlɛ silɛ dan’n, ɔ yo maan sran wun i ɲrun dan,ɔ maan sran ng’ɔ si sa dan’n, ɔ ukɛ i afɛ’n su.+
Ja ngua lɔ ndɛ mun
^ Annzɛ “sinnzin dan dilɛ’n.”
