Rɔmunfuɛ Mun 7:1-25
7 ?Aniaan mun, amun siman kɛ, kɛ sran kun i ɲin o su’n, blɛ sɔ’n nun yɛ Mmla’n sie i-ɔ? (Afin be nga n su kan ndɛ n kle be’n, be si mmla’n i nun ndɛ’n.)
2 I wie yɛle bla ng’ɔ le bian’n i liɛ’n. Blɛ mɔ i wun’n i ɲin te o su’n, mmla’n waan ɔ nin i be ti sran wunmuan. Sanngɛ sɛ i wun wu’n, i wun’n i mmla’n siemɛn i kun.+
3 Blɛ mɔ i wun’n i ɲin te o su’n, sɛ ɔ ja bian uflɛ’n, nn w’a kunndɛ bian i wun bo.+ Sanngɛ sɛ i wun wu’n, i wun’n i mmla’n siemɛn i kun. Ɔ maan sɛ bla’n ja bian uflɛ’n, e kwlá seman kɛ w’a kunndɛ bian i wun bo.+
4 I sɔ’n ti’n, aniaan mun, amun kusu Mmla’n sieman amun kun, tɛ mɔ Klisi fɛli i wunnɛn’n yili’n ti. Ɔ maan amun a kaci sran uflɛ liɛ.+ Sran sɔ’n, ɔ cɛnnin nguan+ naan y’a kwla yo like ng’ɔ jɔ Ɲanmiɛn klun’n.+
5 I nun nga e yo ninnge nga klɔ sran konvi sɔ be’n, Mmla’n kleli e weiin kɛ konvi tɛ sɔ’n ti yɛ maan e wunnɛn’n yo sa tɛ’n niɔn, yɛ i sɔ’n ti yɛ e wu-ɔ.+
6 Sanngɛ siɛn’n, y’a ɲan e ti Mmla’n i sa nun,+ afin ɔ tanndanman e ɲrun kun. Ɔ maan e ti Ɲanmiɛn wawɛ’n i kanga,+ e timan mmla nga be klɛli’n i kanga kun.+
7 ?Sɛ ɔ ti sɔ’n niɔn, é sé sɛ? ?É sé kɛ Mmla’n timan kpa? Cɛcɛ! Afin sɛ ɔ ti kɛ Mmla’n nunman lɛ’n nn m’an siman like nga be flɛ i sa tɛ’n.+ I wie yɛle be ɲin m’ɔ blo sran like su’n. Mmla’n kɛn i ndɛ se kɛ: “Nán ɔ ɲin blo sran like su.”+ Sɛ ɔ ti kɛ Mmla’n w’a seman sɔ’n, nn m’an siman like nga be flɛ i aɲinblɔɛ’n.
8 Sanngɛ mmla’n mannin sa tɛ’n i atin. Sa tɛ’n ti’n, min ɲin blo ninnge wafawafa kwlaa su. Afin i nun nga mmla’n nunman lɛ’n, sa tɛ’n leman tinmin.+
9 Nanwlɛ, laa’n, i nun nga mmla’n nunman lɛ’n, n wo nguan nun. Sanngɛ kɛ mmla’n bali’n, sa tɛ’n ɲannin tinmin. Ɔ maan n wuli.+
10 Yɛ n wunnin kɛ mmla m’ɔ fata kɛ ɔ fa sran mun sie nguan atin’n su’n,+ ɔ fali be sieli wie atin’n su.
11 Yɛ kɛ mɔ mmla’n mannin sa tɛ’n i atin’n ti’n, sa tɛ’n lakali min kpɛkun ɔ kunnin min, mmla’n i dunman nun.
12 Ɔ maan Mmla’n bɔbɔ ba’n, fiɛn kaan sa nunmɛn i wun, yɛ ndɛ nga be kɛn i nun’n, fiɛn kaan sa nunmɛn i wun, ɔ ti i nuan su sɛsɛ, kpɛkun ɔ ti kpa.+
13 ?Ɔ maan sa ng’ɔ ti kpa’n yɛ ɔ kunnin min-ɔn? Cɛcɛ! Sa tɛ’n yɛ ɔ yoli min sɔ-ɔ. Sa ng’ɔ ti kpa’n i dunman nun’n, sa tɛ’n kpɛli wie’n i ba mannin min, naan sa tɛ’n w’a yi wafa ng’ɔ fa ti’n i nglo,+ naan mmla’n w’a kle kɛ sa tɛ’n ti tɛ tra su.+
14 Afin e si kɛ Mmla’n ti Ɲanmiɛn liɛ. Sanngɛ min liɛ’n, n ti klɔ sran, be yoli min atɛ sa tɛ’n i sa nun.+
15 N wunman like nga n yo’n i wlɛ. Afin n yoman like nga n klo kɛ ń yó’n. Sanngɛ like nga n kpɔ i’n yɛ n yo-ɔ.
16 Sɛ like nga n kloman kɛ ń yó’n yɛ n yo’n, i sɔ’n yo maan n wun i wlɛ kɛ Mmla’n ti kpa.
17 Like nga n yo’n, nán min ɲinfu-ɔ. Sanngɛ sa tɛ ng’ɔ o min nun’n yɛ maan n yo-ɔ.+
18 Afin n si kɛ min bɔbɔ min klun lɔ’n, yɛle kɛ min wunnɛn’n nun’n, like fi nunman nun m’ɔ ti kpa-ɔ. Afin n klo kɛ ń yó sa ng’ɔ ti kpa’n, sanngɛ n lemɛn i wun fanngan.+
19 N yoman sa kpa nga n klo kɛ ń yó’n. Sanngɛ sa tɛ nga n kloman kɛ ń yó’n yɛ n yo-ɔ.
20 Ɔ maan sɛ n yo like nga n kloman kɛ ń yó’n, nn nán min yɛ n yo-ɔ. Sanngɛ sa tɛ ng’ɔ o min nun’n niɔn.
21 M’an wun i wlɛ kɛ mmla ng’ɔ sie min’n yɛ: Kɛ min waan ń yó sa kpa’n, sa tɛ’n jin min bue.+
22 Min klun lɔ’n, n klo Ɲanmiɛn i mmla’n kpa.+
23 Sanngɛ n wun kɛ mmla uflɛ o min wunnɛn’n nun. Ɔ ti kɛ mmla sɔ’n ɔ nin mmla ng’ɔ o min akunndan’n nun’n,+ be kun alɛ sa. Ɔ maan kasiɛn su’n, sa tɛ’n i mmla m’ɔ o min wunnɛn’n nun’n, yɛ ɔ kwla-ɔ.+ Kpɛkun n kaci i kanga.
24 Ee, n fɛ-o! ?Wan yɛ ɔ́ dé min min wunnɛn mɔ i ti’n ń wú’n, i sa nun-ɔn?
25 Ń lá Ɲanmiɛn ase e Min Zezi Klisi dunman nun! Min akunndan’n nun’n, n ti Ɲanmiɛn i mmla’n i kanga, sanngɛ min wunnɛn’n ti sa tɛ’n i kanga.+
