Jue Mun 89:1-52
Maskili* su. Etan+ m’ɔ ti Ezrafuɛ’n i liɛ’n niɔn.
89 Ń má tó jue ń kán Zoova i sran klolɛ dan m’ɔ yi i nglo tititi’n i ndɛ.
Ń má fá min nuan’n ń kán nanwlɛfuɛ mɔ a ti’n, i ndɛ ń klé be nga bé wá jáso su’n be kwlaa.
2 Afin n seli kɛ: “Sran klolɛ dan’n ɔ́ ká lɛ tititi,+yɛ a wlali nanwlɛfuɛ mɔ a ti’n i bo ase kpa ɲanmiɛn su lɔ.”
3 “E nin sran mɔ n kpɛli i’n e trali aenguɛ,+n tali Davidi m’ɔ ti min sufuɛ’n i nda kɛ:+
4 ‘Ń yó maan ɔ osu’n+ ká lɛ tititi,yɛ ń yó maan ɔ famiɛn bia’n ɔ taka tititi.’”+ (Sela)
5 Ee Zoova, ɲanmiɛn su lɔ’n yi ɔ abonuan ninnge’mbe ayɛ,nanwlɛ, ɔ yi nanwlɛfuɛ mɔ a ti’n i nglo sran mɔ be ti ɔ liɛ klonglo’n be afiɛn.
6 ?Afin ɲanmiɛn su lɔ’n, wan yɛ be kwla fɛ i sunnzun Zoova-ɔ?+
?Ɲanmiɛn i mma’m be nun’n,+ wan yɛ ɔ ti kɛ Zoova sa-ɔ?
7 Ɲanmiɛn i sran’m be afiɛn’n be ɲin yi Ɲanmiɛn kpa,+ɔ ti dan yɛ ɔ yo sro be kwlaa nga be o i wun lɛ’n be ɲrun.+
8 ?Ee Ɲanmiɛn Zoova, wɔ mɔ a ti sonja’m be su kpɛn’n,ee Ya, wan yɛ ɔ le tinmin kɛ wɔ sa-ɔ?+
Sa kwlaa nun’n a kle kɛ a ti nanwlɛfuɛ.+
9 A sie jenvie m’ɔ bo dan’n.+
Kɛ ɔ mɛn i wun su’n,a kɛn i ase.+
10 A kpɔtɔli Raabu,+ ɔ kacili kɛ sran mɔ b’a kun i’n sa.+
A fali ɔ sa mɔ wunmiɛn o nun kpa’n yoli maan ɔ kpɔfuɛ’m be bo sanndili.+
11 Ɲanmiɛn su lɔ’n ti ɔ liɛ, yɛ asiɛ’n ti ɔ liɛ.+
Asiɛ m’ɔ yo like ye’n nin i su ninnge’n kwlaa’n,+ wɔ yɛ a yili be-ɔ.
12 Nglo lɔ lika’n nin ngua lɔ lika’n, wɔ yɛ a yili be-ɔ.
Tabɔɔ+ nin Ɛrmɔn+ be manman ɔ dunman’n aklunjɔɛ su.
13 Tinmin o ɔ sa’n nun.+
Wunmiɛn o ɔ sa’n nun.+
Ɔ sa fama’n wo nglo.+
14 Ɔ famiɛn bia’n taka sa kpa yolɛ’n nin sa nuan su sɛsɛ yolɛ’n su.+
Sran klolɛ dan’n nin nanwlɛ dilɛ’n be o ɔ ɲrun.+
15 Nvle ng’ɔ kpan aklunjɔɛ kpanlɛ’n, i liɛ su ti ye.+
Ee Zoova, nvle sɔ’n i nunfuɛ’m be nanti ɔ ɲrun’n i kpajalɛ’n nun.
16 Be di aklunjɔɛ ɔ dunman nun aliɛ ba kwlaa nun,yɛ ɔ sa nuan su sɛsɛ yolɛ’n ti’n, be ɲan ɲrun.
17 Afin a yo maan be ɲan wunmiɛn yɛ be le ɲrun,+yɛ ɔ klun m’ɔ jɔ be wun’n ti’n, be wunmiɛn’n*i su uka.+
18 Afin e ɲrɛn’n ti Zoova liɛ,e famiɛn’n ti Izraɛli Ɲanmiɛn m’ɔ ti Sanwun’n i liɛ.+
19 Blɛ sɔ’n nun’n, a seli ɔ sufuɛ kpa mun aolia nun kɛ:
“N mannin safuɲrɛn kun i wunmiɛn,+n yoli maan sran kun mɔ n kpɛli i nvlefuɛ’m be nun’n, ɔ ɲannin ɲrun.+
20 N wunnin min sufuɛ Davidi,+n fali ngo m’ɔ ti min liɛ klonglo’n n guɛli i ti’n su.+
21 Min sa’n ɔ́ súɛn i bo,+yɛ min sa’n ɔ́ mɛ́n i wunmiɛn.
22 I kpɔfuɛ fi su semɛn i kɛ ɔ su lapo,yɛ sa tɛ yofuɛ fi su klemɛn i yalɛ.+
23 Ń kpɔ́tɔ i kpɔfuɛ muni ɲrun lɛ,+yɛ ń kún be nga be kpɔ i’n.+
24 Ń yí nanwlɛfuɛ mɔ n ti’n nin min sran klolɛ dan’n i nglo i lika,+yɛ min dunman nun’n, i wunmiɛn’n* i su úka.
25 Ń fɛ́ i sa’n ń síe i jenvie’n su,yɛ ń fɛ́ i sa fama’n ń síe i nzue ba’m be su.+
26 Ɔ́ kpán flɛ́ min, ɔ́ sé kɛ: ‘Min Si,min Ɲanmiɛn nin Yɔbuɛ m’ɔ de min’n yɛle wɔ.’+
27 Yɛ ń fɛ́ i ń yó ba klikli,+ń fɛ́ i ń síe asiɛ’n su famiɛn’m be su.+
28 Ń yí min sran klolɛ dan’n i nglo i lika tititi,+yɛ aenguɛ nga e nin i e trali’n, ɔ su saciman le.+
29 Ń yó maan i osu’n ká lɛ tititi,yɛ ń má yó maan i famiɛn bia’n ká lɛ tititi kɛ ɲanmiɛn m’ɔ la nglo lɔ plaii’n sa.+
30 Sɛ i mma’m be yaci min mmla’n
naan be nantiman ndɛ nga n kan’n su’n,
31 sɛ be diman ndɛ nga n kan’n su’n,yɛ sɛ be nantiman min mmla’m be su’n,
32 ń fá kpɔnman ń tú be fɔ be ɲin kekle’n ti,+yɛ ń fá ngble ń tú be fɔ be fɔnlɛ’n ti.
33 Sanngɛ n su yaciman min sran klolɛ dan’n i nglo yilɛ i lika le,+yɛ ń yía nda nga n tali’n i nuan tititi.
34 N su yaciman min aenguɛ’n i su dilɛ,+n su kaciman ndɛ nga min nuan bui’m be kannin’n.+
35 Min mɔ n ti nanwlɛfuɛ’n n tali nda, n su kacimɛn i.
N su buaman ato n kleman Davidi.+
36 I osu’n ká lɛ tititi,+i famiɛn bia’n ká min ɲrun tititi kɛ wia’n sa.+
37 Ɔ́ táka kpa tititi, kɛ anglo ba
m’ɔ ti lalofuɛ ɲanmiɛn su lɔ’n sa.” (Sela)
38 Sanngɛ ɔ bɔbɔ a kpaloli i yili i blo.+
W’a fa ya dan sran mɔ a kpɛli i’n i wun.
39 A kpaloli aenguɛ nga a nin ɔ sufuɛ’n be trali’n.
A yoli i famiɛn kle’n i finfin, a yili i ase.
40 A bubuli i yɔbuɛ talɛ’m be kwlaa,a yoli maan i fiawlɛ lika mun b’a kaci yɔbuɛ kwle.
41 Be kwlaa nga be sinnin lɛ’n be fɛnnin i bo ninnge mun.
I mantanfuɛ’m be yoli i finfin.+
42 A yoli maan i ɲrun tanndanfuɛ’m be kwlali.*+
A yoli maan i kpɔfuɛ’m be kwlaa be klun jɔli.
43 A yoli maan i tokofi’n ɔli siɛn,yɛ w’a jrɛnmɛn i sin alɛ’n i kunlɛ nun.
44 A yoli maan i aɲrunɲan’n wieli,yɛ a suli i famiɛn bia’n i bo yili i ase.
45 A kpɛli i gbanflɛn blɛ’n i sin.
A fali ɲannzuɛn’n wlɛli i wun kɛ tralɛ sa. (Sela)
46 ?Ee Zoova, cɛn onin ko yɛ á yáci fialɛ-ɔ? ?Á fía sɔ tititi?+
?Ɔ ya dan’n ɔ́ júe kɛ sin sa tititi?
47 Maan ɔ wla kpɛn su kɛ min nguan ɲanman’n ti tika!+
?A yili klɔ sran mun sa ngbɛn?
48 ?Klɔ sran benin yɛ ɔ kwla tran nguan nun sa tititi m’ɔ wuman-ɔn?+
?Ɔ kwla de i bɔbɔ i wun Ndia’n* i sa nun? (Sela)
49 ?Ee Zoova, ɔ sa nga a yo be fa yili ɔ sran klolɛ dan’n i nglo laa’n,mɔ nanwlɛ mɔ a di’n ti’n, a tali Davidi i nda’n be o nin?+
50 Ee Zoova, maan ɔ wla kpɛn nzowa nga be kpɛ ɔ sufuɛ mun’n be su.
Maan ɔ wla kpɛn su kɛ ɔ fata kɛ n sua nzowa nga be kpɛ ɔ sufuɛ’m be kwlaa’n.
51 Ee Zoova, maan ɔ wla kpɛn nzowa nga ɔ kpɔfuɛ’m be kpɛ’n be su.
Maan ɔ wla kpɛn su kɛ sran mɔ a kpɛli i’n, i ja kwlaa ng’ɔ tu’n nun’n be kpɛ i nzowa.
52 Maan manmanlɛ’n yo Zoova liɛ tititi. Maan ɔ yo sɔ, maan ɔ yo sɔ.+
Ja ngua lɔ ndɛ mun
^ Nian Ndɛ’m be bo tulɛ lika’n nun lɔ.
^ Ebr., “be wɛ’n.”
^ Ebr., “i wɛ’n.”
^ Ebr., “A mɛnnin i ɲrun tanndanfuɛ’m be sa fama’n su nglo.”
^ Annzɛ “Seɔlu’n.” Nian Ndɛ’m be bo tulɛ lika’n nun lɔ.
