Riti 1:1-22
1 Jɔlɛ difuɛ’m be blɛ su’n,*+ awe kpɛnnin nvle’n nun. Bian kun tuli Bɛtleɛmun+ ng’ɔ o Zida akpasua’n su lɔ’n su, ɔ ko trannin Moabu mɛn’n+ nun lɔ. Ɔ nin i yi nin i wa yasua nɲɔn mun yɛ be ɔli-ɔ.
2 Be flɛ bian sɔ’n kɛ Elimelɛki,* i yi’n suan Naomin* yɛ be flɛ i mma nɲɔn’m be kɛ Malɔnun* nin Kiliɔnun.* Be ti Efratafuɛ, yɛle kɛ be fin Bɛtleɛmun m’ɔ o Zida akpasua su lɔ’n su. Kɛ be juli Moabu mɛn’n nun lɔ’n, be trannin lɛ.
3 Kɛ ɔ cɛli kan’n, Naomin i wun Elimelɛki wa wuli. Ɔ maan ɔ nin i wa yasua nɲɔn mun yɛ be kali lɛ-ɔ.
4 Kɛ ɔ́ kɔ́ i ɲrun’n, be wa jali Moabu lɔ bla. Kun suan Ɔɔpa, yɛ kun suan Riti.+ Be trannin lɛ afuɛ kɔe blu.
5 I sin’n, ba nɲɔn sɔ mun, yɛle kɛ Malɔnun nin Kiliɔnun be kusu be wa wuli. Ɔ maan Naomin leman ba kun yɛ ɔ leman bian kun. I ngunmin yɛ w’a ka-ɔ.
6 I sɔ’n ti’n, i waan ɔ́ jáso Moabu mɛn’n nun naan ɔ́ sɛ́ i sin i klɔ. Afin ɔ tili i Moabu lɔ kɛ Zoova w’a fɛ i ɲin w’a sie i i nvlefuɛ’m be su naan w’a man be aliɛ.* Ɔ nin i sewi mun yɛ be fali atin’n niɔn.
7 Ɔ nin i sewi nɲɔn’m be jasoli be tranwlɛ lɛ naan bé kɔ́ Zida mɛn’n nun. Kɛ bé nánti bé kɔ́’n,
8 ɔ seli i sewi nɲɔn’m be kɛ: “Amun wɔ, amun sa amun sin amun nin’m be awlo. Klolɛ dan nga amun fa kloli min nin amun wun mɔ be wuli’n, maan Zoova kusu klo amun sɔ wie.+
9 Maan Zoova man amun bian naan amun wla gua ase* amun wun’m be awlo’m be nun.”+ I sin’n, ɔ tɔli be nun, yɛ be sunnin sunlɛ kpa.
10 Sanngɛ be seli i kɛ: “Cɛcɛ. E nin wɔ é kɔ́ ɔ nvle’n nun lɔ.” Kɛ bé kán sɔ’n, be jrannin su kpa.
11 Sanngɛ Naomin seli be kɛ: “Min mma mun, amun sa amun sin. ?Ngue ti yɛ amún sú min su-ɔ? ?Min olɛ nga n wo yɛ’n, n kwla wu ba yasua ekun naan se kɛ bé já amun?+
12 Min mma mun, amun sa amun sin. Amun wɔ, afin m’an yo oke, n kwlá jaman bian kun. ?Kannzɛ n ɲan bian andɛ kɔnguɛ bɔbɔ naan n wu ba yasua mun’n,
13 amún trá amun awlɛn mínndɛ be lele naan b’a ɲin? ?Ba sɔ’m be ti’n, amun su jaman bian uflɛ? Cɛcɛ, min mma mun, sa yalɛ m’ɔ o amun su’n ti’n, min wla bo min wun dan. Afin Zoova w’a kle min nun.”*+
14 Be sunnin sunlɛ kpa ekun. Kpɛkun Ɔɔpa tɔli i sewi’n nun yɛ ɔ sɛli i sin-ɔn. Sanngɛ Riti liɛ’n, w’a kpɔcimɛn i.
15 I sɔ’n ti’n, Naomin seli i kɛ: “Nian! Ɔ wla’n w’a sɛ i sin i nvlefuɛ mun nin i ɲanmiɛn’m be sin. A nin ɔ wla’n, amun sa amun sin.”
16 Sanngɛ Riti seli i kɛ: “Nán jran min wun kɛ n kpɔci wɔ, nán se min kɛ n yaci ɔ su sulɛ. Afin lika nga á kɔ́’n, ń kɔ́ lɔ wie. Lika nga á lá lɛ kɔnguɛ’n, lɛ yɛ ń lá-ɔ. Ɔ nvle’n káci min nvle. Yɛ ɔ Ɲanmiɛn’n yó min Ɲanmiɛn.+
17 Lika nga á wú lɛ’n, lɛ yɛ ń wú-ɔ. Yɛ lɛ yɛ bé síe min-ɔn. Sɛ w’a yoman kɛ wie’n sa’n, sɛ like uflɛ titi e nun’n, maan Zoova nin min kan.”
18 Kɛ Naomin wunnin kɛ Riti waan saan fii ɔ nin i bé kɔ́’n, w’a semɛn i kun kɛ nán ɔ wɔ wie.
19 Ɔ maan be nɲɔn’n be ɔli. Be fali atin’n lele be juli Bɛtleɛmun.+ Kɛ be juli lɔ cɛ’n, klɔ wunmuan’n kejeli sa yekee. Bla’m be seli kɛ: “?Naomin li-ɔ?”
20 Ɔ tɛli bla’m be su kɛ: “Nán amun flɛ min Naomin,* amun flɛ min Mara.* Afin Ɲanmiɛn* ti’n, awlabɔɛ* ng’ɔ o min su’n ti dan.+
21 Kɛ ń kɔ́’n, like kpanngban o min sa nun. Sanngɛ kɛ Zoova fá min sá min sin’n, min sa nun ti ngbɛn. ?Ngue ti yɛ amun flɛ min Naomin-ɔn? Afin Zoova yɛ ɔ tanndannin min ɲrun-ɔn. Ɲanmiɛn* yɛ ɔ fali ɲrɛnnɛn yili min su-ɔ.”+
22 Kɛ Naomin jasoli Moabu mɛn’n+ nun lɔ kɛ ngalɛ’n sa. Kɛ ɔ́ sɛ́ i sin’n, ɔ nin i sewi Riti m’ɔ ti Moabufuɛ’n yɛ be ɔli-ɔ. Kɛ bé jú Bɛtleɛmun lɔ’n, nn b’a bo ɔɔzu kpɛlɛ’n i bo.+
Ja ngua lɔ ndɛ mun
^ Annzɛ “I nun nga jɔlɛ difuɛ mun yɛ be dun sran’m be ɲrun naan b’a yo sa i nuan su’n.”
^ I bo’n yɛ: “Min Ɲanmiɛn’n ti Famiɛn.”
^ I bo’n yɛ: “Min Aklunjɔɛ.”
^ Atrɛkpa’n, ɔ fin Ebre nun ndɛ kun mɔ i bo’n yɛle “yo fakafaka dan”, “tɔ tukpacɛ.”
^ I bo’n yɛ: “Sran mɔ i Wunmiɛn’n su Wie i nun’n”, “Sran mɔ i Awieliɛ’n w’a ju’n.”
^ Ebr., “kpanwun.”
^ Ebr., “amun ɲan wunmiɛn lowlɛ.”
^ Ebr., “Zoova i sa’n w’a kle min nun.”
^ I bo’n yɛ: “Min aklunjɔɛ.”
^ I bo’n yɛ: “wiwi.”
^ Ebr., “Sran m’ɔ Kwla Like Kwlaa Yo’n.”
^ Ebr., “wiwi.”
^ Ebr., “Sran m’ɔ Kwla Like Kwlaa Yo’n.”
