LIKE SUANLƐ 02
Biblu’n kle kɛ e ɲrun lɔ’n yó kpa
Mɛn’n nun sa’m be ti’n, sran’m be wla bo be wun, be koko, yɛ be wun be ɲrun. ?Ɔ wun w’a yo ɔ sɔ le? Atrɛkpa’n, tukpacɛ wie, annzɛ ɔ awlɛn su sran wie m’ɔ wuli’n ti’n, ɔ wla w’a bo ɔ wun. Ɔ maan a kwla usa ɔ wun kɛ: ‘?Cɛn wie lele’n lika’n yó kpa?’ Wafa nga Biblu’n tɛ kosan sɔ’n su’n, ɔ gua e awlɛn su nzue.
1. ?Ngue ndɛ yɛ Biblu’n kan m’ɔ kle kɛ e ɲrun lɔ’n yó kpa-ɔ?
Biblu’n kan like nga ti yɛ sa tɛtɛ’m be o mɛn’n nun’n i ndɛ. Sanngɛ nɛ́n i ngba-ɔ, ɔ kle kɛ sa sɔ mun be su cɛman, naan ɔ ka kan’n bé wíe. Biblu’n se kɛ ‘e ɲrun lɔ’n yó kpa yɛ e wla gúa ase.’ (Kanngan Zeremin 29:11, 12 nun.) Ndɛ sɔ mɔ Biblu’n kan’n ɔ uka e naan y’a kwla jran sa nga be tɔ e su’n be ɲrun kekle. Ɔ yo maan e sa sin bubuman e, yɛ e di aklunjɔɛ.
2. ?Biblu’n se kɛ e ɲrun lɔ’n yó sɛ?
Biblu’n se kɛ cɛn wie lele’n “wie’n su tranman lɛ kun, be su yoman sɛ kun, be su sunman kun, be su wunman ɲrɛnnɛn kun.” (Kanngan Sa Nglo Yilɛ 21:4 nun.) Ninnge nga be yo maan e wla bo e wun’n be su tranman lɛ kun. I wie yɛle yalɛ’n, nin sran lufle bulɛ’n, nin tukpacɛ’n, ɔ nin wie’n. Biblu’n se kɛ klɔ sran’m bé wá trán nguan nun tititi asiɛ m’ɔ́ káci lika klanman’n i su.
3. ?Ngue yɛ á yó naan w’a lafi su kpa kɛ ndɛ nga Biblu’n kan’n ɔ́ kpɛ́n su-ɔ?
Sran kpanngban be kunndɛ kɛ be liɛ yo ye, sanngɛ be siman sɛ ɔ́ yó sɔ sakpa-o. Biblu’n i liɛ’n be kwla lafi i nun ndɛ’n su. Sɛ e “nian Ɲanmiɛn Ndɛ’n nun kpa’n,” é wún kɛ i nun ndɛ’n ti nanwlɛ. (Sa Nga Be Yoli’n 17:11) Kɛ á súan Biblu’n nun like kɔ́’n, e ɲrun lɔ sa’m be su ndɛ nga Biblu’n kan’n sɛ be kwla lafi su annzɛ be kwlá lafiman su’n ɔ bɔbɔ á wún i wlɛ.
SI NDƐ’N NUN KPA EKUN
Sa nga bé wá jú e ɲrun lɔ’n be su ndɛ nga Biblu’n kan’n, ɔ nin wafa nga ndɛ sɔ’n kwla uka sran mun andɛ’n.
4. Biblu’n kle kɛ e kwla tran nguan nun tititi yɛ e su fɛman kun
Sa nga Biblu’n waan bé wá jú mɔ be boboli be su ngua lɛ’n, fa ɔ ɲin sie be su. ?Beninfuɛ’n yɛ ɔ yo ɔ fɛ kpa-ɔ? ?Yɛ ngue ti-ɔ?
An kanngan Biblu’n nun ndɛ mma nga be o ndɛ sɔ’m be wun lɛ’n be nun, yɛ an koko kosan yɛ’m be su yalɛ:
-
?Kɛ a niɛn i sa’n, Biblu’n nun ndɛ nga’m be kwla yo ɔ ye? ?Be kwla uka ɔ awlofuɛ mun nin ɔ janvuɛ mun wie?
Bu wafa nga mɛn klanman’n i nun tranlɛ’n wá yó’n i akunndan kan nian.
|
NINNGE NGA BE SU TRANMAN LƐ KUN’N |
SA NGA BÉ WÁ JÚ’N |
|---|---|
|
|
|
|
|
|
|
|
|
|
5. E ɲrun lɔ sa’m be su ndɛ nga Biblu’n kan’n, ɔ kwla yo e ye
Kɛ sran kpanngban be wun mɛn’n nun sa mun’n, be sa sin bubu be, annzɛ be fa ya bɔbɔ. Sran wie’m be mian be ɲin naan ninnge’m be yo kpa. Maan e nian wafa nga e ɲrun lɔ sa’m be su ndɛ nga Biblu’n kan’n, ɔ uka sran wie mun andɛ’n. An bo VIDEO’N, i sin’n an koko kosan yɛ’m be su yalɛ:
-
?Video’n nun’n, ngue yɛ Rafika wunnin i mɔ w’a yomɛn i fɛ-ɔ?
-
?Kannzɛ bɔbɔ sa ng’ɔ wunnin i’n w’a wieman’n, sanngɛ wafa sɛ yɛ Biblu’n ukɛli i-ɔ?
E ɲrun lɔ sa’m be su ndɛ nga Biblu’n kan’n, ɔ uka e naan e sa sin w’a bubuman e, naan sɛ bɔbɔ sa o e su’n y’a di aklunjɔɛ. An kanngan Ɲanndra Mun 17:22 nin Rɔmunfuɛ Mun 12:12 nun, i sin’n an koko kosan yɛ’m be su yalɛ:
-
?Kɛ a niɛn i sa’n, e ɲrun lɔ sa’m be su ndɛ nga Biblu’n kan’n, ɔ kwla yo ɔ ye dɔ nga su? ?Ngue ti-ɔ?
SRAN WIE’M BE WAAN: “Sa nga Biblu’n se kɛ bé wá jú’n be su kpɛnman su.”
-
?Ngue ti yɛ ɔ ti cinnjin kɛ ɔ bɔbɔ a fa ɔ ɲin sie i sa sɔ’m be su nian sɛ bé kpɛ́n su sakpa-o?
NDƐ’N I KPƆLƐ BOLƐ
Biblu’n nun ndɛ kpanngban be kle kɛ e ɲrun lɔ’n yó kpa. I sɔ’n yo maan e wla gua ase, yɛ e di aklunjɔɛ.
Ndɛ’n i nun flanlɛ
-
?Ngue ti yɛ ɔ fata kɛ sran’m be si ninnge nga Ɲanmiɛn waan ɔ́ yó be’n niɔn?
-
?Sa benin mun yɛ bé wá jú mɔ Biblu’n kan be ndɛ-ɔ?
-
?Kɛ e si e ɲrun lɔ sa’m be su ndɛ nga Biblu’n kan’n, wafa sɛ yɛ i sɔ’n uka e andɛ-ɔ?
NDƐ WIE MUN EKUN
Kɛ e fa e wla e gua like kun su’n, i sɔ’n uka e naan y’a jran sa’m be ɲrun kekle.
Like ng’ɔ ukali sran wie mɔ tukpacɛ kekle wie kle be yalɛ’n.
“?Sɛ tukpacɛ kekle wie kle ɔ yalɛ’n Biblu’n kwla uka wɔ?” (jw.org su ndɛ)
Kɛ á tíe miziki nga’n, maan ɔ yo ɔ kɛ a nin ɔ awlofuɛ mun amun o mɛn klanman mɔ Biblu’n kɛn i ndɛ’n i nun sa.
Sran kun mɔ laa’n i waan ɔ́ yó naan mɛn’n kaci’n, kɛ ɔ wa sili e ɲrun lɔ sa’m be su ndɛ nga Biblu’n kan’n, i bɔbɔ kacili.
“N bumɛn i kun kɛ ɔ fata kɛ n kaci mɛn’n” (Sasafuɛ Tranwlɛ’n nun ndɛ)
Ninnge wie mɔ be kwla yo ɔ fɛ ekun'n
KOSAN NGA SRAN’M BE TA BE USA’N
?Ngue yɛle Biblu’n nun like mɔ Zoova i Lalofuɛ’m be nin sran’m be suan’n?
A kwla fa Biblu’n nga a klo’n naan Zoova i Lalofuɛ kun w’a kle ɔ like. Ɔ osufuɛ mun nin ɔ janvuɛ’m be kwla tran like suanlɛ’n i bo wie. Be deman sika.
