1. ?Ngue ti yɛ ɔ ti cinnjin kɛ e siesie e wun e sie ka naan sanvuɛsa wie w’a ju-ɔ?

 KPƐ sunman’n, sɛ e dun mma siesie e wun kwlaa naan sa kun w’a ju’n e kwla ɲan e ti. I wie yɛle kɛ kɛ sanvuɛsa wie tɔ’n be nga be dun mmua be siesieli be wun ka naan w’a ju’n be kwla fite nun, yɛ be kwla uka sran uflɛ. Abloki lɔ anuannzɛ kun m’ɔ uka sran mun’n, ɔ seli kɛ: “Be wun siesielɛ’n ɔ de sran.”

2. ?Ngue ti yɛ ɔ fata kɛ e buabua e wun e minndɛ ɲrɛnnɛn dan’n niɔn? (Matie 24:44)

² “Ɲrɛnnɛn dan’n” ɔ́ ká lɛ jú kpɛ kunngba. (Mat. 24:21) Sanngɛ ɲrɛnnɛn dan’n timan kɛ sanvuɛsa’m be sa. Afin i liɛ’n e si kɛ ɔ́ jú. I afuɛ kɔe 2.000 yɛ, Zezi seli i sɔnnzɔnfuɛ’m be kɛ be siesie be wun be minndɛ cɛn sɔ’n. (An kanngan Matie 24:44 nun.) Sɛ e buabua e wun dɔ nga su’n, blɛ sɔ’n nun’n é kwlá jrán kekle, kpɛkun é úka e wiengu mun naan be yo sɔ wie.—Lik. 21:36.

3. ?Wafa sɛ yɛ e awlɛn tralɛ’n, nin aunnvɔɛ silɛ’n, ɔ nin e wiengu klolɛ’n be kwla uka e naan y’a fin ɲrɛnnɛn dan’n nun y’a fite-ɔ?

³ Maan e kan nzuɛn nsan mɔ be kwla uka e naan y’a siesie e wun y’a minndɛ ɲrɛnnɛn dan’n be ndɛ. ?Sɛ be se e kɛ e se sran’m be kɛ Ɲanmiɛn wá dí be jɔlɛ naan be tanndan e ɲrun’n, ngue yɛ é yó-ɔ? (Ngl. 16:21) Blɛ sɔ’n nun’n, sɛ y’a traman e awlɛn’n yɛ sɛ y’a lafiman su kɛ Zoova sásá e’n, e su kwlá yoman like nga Zoova se e kɛ e yo’n. ?Sɛ aniaan wie’m be sa nun ninnge wie’m be fi be sa annzɛ i kwlaa fi be sa’n, ngue yɛ é yó-ɔ? (Aba. 3:17, 18) Blɛ sɔ’n nun’n, ɔ́ yó cinnjin kɛ e si be aunnvɔɛ naan e ti be wun ɲanman nun. ?Kɛ nvlenvle’m be bo wá yó kun mɔ bé fá alɛ wlá e sin’n, sɛ ɔ fata kɛ e nin aniaan wie mun e tran likawlɛ blɛ wie nun’n, ngue yɛ é yó-ɔ? (Eze. 38:10-12) Blɛ sɔ’n  nun’n, ɔ́ yó cinnjin kɛ e klo e niaan mun tankaan kpa naan y’a kwla jran kekle.

4. ?Wafa sɛ yɛ Biblu’n nun ndɛ’n kle kɛ ɔ fata kɛ e tra e awlɛn, e si sran aunnvɔɛ, yɛ e klo sran kpa ekun e tra laa-ɔ?

⁴ Ɲanmiɛn Ndɛ’n wla e fanngan kɛ e tra e awlɛn, e si sran aunnvɔɛ, kpɛkun e klo sran. Liki 21:19 se kɛ: “Sɛ amun jran kekle’n, amún ɲán nguan.” Kolɔsufuɛ Mun 3:12 kusu se kɛ: “Maan amun si sran aunnvɔɛ.” Kpɛkun 1 Tesalonikifuɛ Mun 4:9, 10 se kɛ: “Ɲanmiɛn kle amun kɛ ɔ fata kɛ amun klo amun wiengu. […] Sanngɛ aniaan mun, é srɛ́ amun kpa kɛ amun yo sɔ tra su.” Klisifuɛ nga be kannin ndɛ sɔ’n be kleli be’n be yi nzuɛn sɔ’m be nglo laa. Sanngɛ ɔ fata kɛ be mian be ɲin naan be yo sɔ kpa tra laa’n. I sɔ yɛ ɔ fata kɛ e kusu e yo-ɔ. Maan e nian wafa nga Klisifuɛ klikli’m be yili nzuɛn sɔ’m be tinuntinun be nglo’n. I sɔ’n yó maan é kwlá nían be ajalɛ’n su naan y’a buabua e wun y’a minndɛ ɲrɛnnɛn dan’n.

5. ?Ngue yɛ ɔ ukali Klisifuɛ klikli mun naan b’a jran kekle-ɔ?

⁵ Ɔ yoli cinnjin kɛ Klisifuɛ klikli’m be tra be awlɛn. (Ebr. 10:36) Kɛ sran kwlaa sa’n, sa sunman tɔli be su. Yɛ kɛ mɔ be ti Klisifuɛ’n ti’n sa uflɛ wie mun ekun be tɔli be su. Be kleli be nun sunman be yalɛ. Wie liɛ’n Zifu’m be Ɲanmiɛn sulɛ wafa ng’ɔ timan su’n be su kpɛnngbɛn mun yɛ be kleli be yalɛ-ɔ. Wie liɛ kusu’n, Rɔmun siefuɛ mun yɛ be kleli be yalɛ-ɔ. Wie’m be liɛ’n, be bɔbɔ be awlofuɛ mun yɛ be tanndannin be ɲrun-ɔn. (Mat. 10:21) Asa’n, ɔ fata kɛ be nian be wun su be nga be nin Ɲanmiɛn b’a bu mɔ be o asɔnun’n nun’n be lika. Afin i sɔfuɛ’m be kunndɛ kɛ bé yó naan asɔnun’n nunfuɛ’m be bubu be wun nun. (Yol. 20:29, 30) I kwlaa sɔ’n nun’n Klisifuɛ sɔ’m be trali be awlɛn be jrannin kekle. (Ngl. 2:3) ?Ngue yɛ ɔ ukali be-ɔ? Be buli be nga Biblu’n kan be ndɛ kɛ be trali be awlɛn be suli Ɲanmiɛn’n be su akunndan. Sran sɔ’m be nun kun yɛle Zɔbu. (Zak. 5:10, 11) Kpɛkun be srɛli Ɲanmiɛn kɛ ɔ man be wunmiɛn. (Yol. 4:29-31) Asa’n, be fali be ɲin be sieli i like nga sɛ be tra be awlɛn be su Ɲanmiɛn’n bé ɲɛ́n i’n i su.—Yol. 5:41.

6. ?Ngue yɛ Merita i su ndɛ’n kle e-ɔ?

⁶ E kusu sɛ e suan be nga be kle ajalɛ kpa mɔ Biblu’n nin e fluwa’m be kan be ndɛ’n be su like naan e bu su akunndan’n, é kwlá trá e awlɛn wie. I sɔ’n ukali e niaan bla kun mɔ be flɛ i kɛ Merita m’ɔ tran Albania lɔ’n. I osufuɛ’m be kleli i yalɛ tɛtɛ kpa sanngɛ ɔ kwla jrannin kekle. Ɔ seli kɛ: “Kɛ n suannin Zɔbu i su like Biblu’n nun’n i sɔ’n wlali min fanngan kpa. N wunnin kɛ ɔ fɛli dan. Yɛ ɔ siman sa nga ti yɛ ɔ wunnin ɲrɛnnɛn’n. Ɔ nin i sɔ’n ngba’n, ɔ seli kɛ: ‘N su yaciman seiin nantilɛ le naan m’an fa wu.’ (Zɔb. 27:5) Kɛ n fa min su sa’n n sunnzun Zɔbu liɛ’n, n wun kɛ min liɛ’n ti sɔsɔ. Kpɛkun min liɛ’n n si sran nga ti yɛ n wun ɲrɛnnɛn’n.”

7. ?Kannzɛ bɔbɔ sa kekle wie nunman e su dɔ nga su’n, sanngɛ ngue yɛ ɔ fata kɛ e suɛn i yolɛ-ɔ?

⁷ Like kun ekun mɔ e kwla yo naan y’a tra e awlɛn’n, yɛle kɛ maan e kan e klun ndɛ e kle Zoova titi. (Fip. 4:6; 1 Tes. 5:17) Atrɛkpa’n, sa kekle wie nunman ɔ su dɔ nga su. ?Sanngɛ blɛ kwlaa nga ɔ wla bo ɔ wun annzɛ ɔ akunndan’n sanngan’n a tu ɔ klun srɛ Zoova? Sɛ sa nga be tɔ e su aliɛ ba kwlaa nun’n be nun’n e srɛ Zoova titi’n, kɛ sa kekle wie’m bé wá tɔ́ e su e ɲrun lɔ’n, e su sisiman e bo naan y’a yo sɔ. Kpɛkun é láfi su kɛ Zoova si blɛ nga i nun yɛ ɔ fata kɛ ɔ uka e’n nin like ng’ɔ fata kɛ ɔ fa man e’n.—Jue. 27:1, 3.

8. ?Wafa sɛ yɛ Mira i su ndɛ’n kle kɛ sɛ e jran kekle dɔ nga su’n é kwlá jrán kekle e ɲrun lɔ-ɔ? (Zaki 1:2-4) (An nian foto’n wie.)

⁸ Sɛ dɔ nga su’n e jran sa’m be ɲrun kekle’n, i sɔ’n yó maan ɲrɛnnɛn dan’n nun’n e su yaciman Zoova sulɛ. (Rɔm. 5:3) ?Ngue ti  yɛ e kwla se sɔ-ɔ? Aniaan kpanngban be sieli i nzɔliɛ kɛ, kɛ be jrannin kekle sa wie’m be nun’n, i sɔ’n ukali be naan b’a jran sa uflɛ wie’m be ɲrun kekle wie. I sɔ’n yoli maan be lafili su kpa kɛ Zoova kunndɛ kɛ ɔ́ úka be. Ɔ maan be kwla jrannin sa uflɛ m’ɔ tɔli be su’n i ɲrun kekle. (An kanngan Zaki 1:2-4 nun.) Be flɛ aniaan bla kun kɛ Mira. Ɔ tran Albania. Wafa ng’ɔ jrannin kekle sa wie’m be ɲrun laa’n ɔ ukɛli i naan w’a kwla jran kekle sa uflɛ wie’m be ɲrun. I waan ɔ ju wie’n ɔ se i wun kɛ i kunngba yɛ i su sa’m be sɔnnin sɔ-ɔ. Sanngɛ kɛ ɔ yo sɔ’n ɔ bu wafa nga Zoova ukɛli i laa’n i akunndan. Kpɛkun ɔ se i wun kɛ: ‘Ɔ fata kɛ n lafi Ɲanmiɛn kpa titi. Nán maan ukalɛ mɔ Zoova ukali min afuɛ kwlaa nga be sinnin lɛ be nun’n ɔ yo ngbɛn.’ Ɔ kusu a kwla bu wafa nga Zoova ukali wɔ naan w’a kwla jran kekle’n i su akunndan. Blɛ kwlaa nga a jran sa wie ɲrun kekle’n Zoova sie i nzɔliɛ, yɛ ɔ́ yrá ɔ su. (Matie 5:10-12) Kɛ ɲrɛnnɛn dan’n wá bó i bo’n, kɛ mɔ w’a jran sa wie’m be ɲrun kekle laa’n, i sɔ’n wlá ɔ fanngan naan w’a jran kekle.

9. ?Wafa sɛ yɛ Klisifuɛ nga be o Antiɔsu m’ɔ o Siri mɛn’n nun lɔ’n be kleli kɛ be si sran aunnvɔɛ-ɔ?

⁹ Kɛ awe kpɛnnin Zide lɔ’n, sa ng’ɔ juli Klisifuɛ’m be su’n maan e kɛn i ndɛ kan. Kɛ aniaan nga be o Antiɔsu m’ɔ o Siri mɛn’n nun lɔ’n be tili i kɛ awe kpɛnnin Zide lɔ’n, aniaan nga be o lɔ’n be yoli be annvɔ. Sanngɛ b’a kɛmɛn i sɔ’n su. Be yoli ninnge wie mun fa ukali be. Be “fali ajalɛ kɛ like nga sran kun kwla man’n, ɔ fa man naan be fa ko man aniaan nga be o Zide lɔ’n, naan be fa uka be sa su.” (Yol. 11:27-30) Kannzɛ aniaan nga awe’n kpɛnnin be mɛn’n nun’n be tran mmua kpa’n, sanngɛ Klisifuɛ nga be o Antiɔsu lɔ’n, be kunndɛli kpa kɛ bé úka be.—1 Zan 3:17, 18.

10. ?Kɛ sanvuɛsa wie tɔ e niaan’m be su’n, wafa sɛ yɛ e kwla kle kɛ e si be aunnvɔɛ-ɔ? (An nian foto’n wie.)

¹⁰ E kusu’n, kɛ sanvuɛsa tɔ e niaan’m be su’n e kwla kle kɛ e si aunnvɔɛ. I wie yɛle kɛ e kwla se asɔnun kpɛnngbɛn’m be kɛ e kunndɛ kɛ e nin aniaan nga be uka be nga sanvuɛsa’n tɔli be su’n é dí junman. Annzɛ kusu e kwla man like e fa suan junman nga be di i mɛn wunmuan’n nun’n i bo. Annzɛ e kwla srɛ Ɲanmiɛn e man aniaan nga sa o be su’n. b (Ɲan. 17:17) Afuɛ 2020 nun’n, Koronavirisi blɛ’n nun’n, be sieli Komite 950 tra su mɛn wunmuan’n nun naan be uka aniaan mun. É yó aniaan nga be o komite sɔ’m be nun’n be mo. Kɛ mɔ aniaan sɔ’m be klo be niaan mun’n ti’n, be ukali be naan b’a ɲan ninnge nga be sa mian be wun’n. Asa’n be ukali be naan b’a kwla su Ɲanmiɛn kpa. Wie liɛ bɔbɔ’n be kplan be sua mun, annzɛ be kplan Ɲanmiɛn sulɛ sua’m be uflɛ.—An nian 2 Korɛntifuɛ Mun 8:1-4 nun.

11. ?Kɛ e kle kɛ e si aunnvɔɛ’n, wafa sɛ yɛ i sɔ’n manman e Si m’ɔ o ɲanmiɛn su lɔ’n niɔn?

¹¹ Kɛ sanvuɛsa ju mɔ e kle kɛ e si e niaan’m be aunnvɔɛ’n, sran’m be sie i nzɔliɛ. I wie yɛle kɛ afuɛ 2019 nun’n, aunmuan dan kun sacili Ɲanmiɛn Sielɛ Sua kun m’ɔ o Baamasi lɔ’n. Kɛ bé kplɛ́n i uflɛ’n be seli bian kun m’ɔ timan Zoova i Lalofuɛ m’ɔ di sua kplanlɛ junman’n i kɛ ɔ bo ninnge nga be miɛn i wun’n i gua kle be. Bian’n seli be kɛ: “Ń má fá […] ninnge nga be fa kplan sua’n ń mán amun ngbɛn. Amun su tuaman like fi. […] N kunndɛ kɛ ń súan amun anuannzɛ’n i bo. Wafa nga amun kle kɛ amun si amun wiengu’m be aunnvɔɛ’n ɔ yo ɲɛnmɛn.” Andɛ’n  sran sunman be siman Zoova. Sanngɛ be nun kpanngban be sie ninnge nga Zoova i Lalofuɛ’m be yo’n i nzɔliɛ. Nanwlɛ kɛ e si kɛ ninnge nga e yo be’n ti’n sran’m be kunndɛ kɛ bé sí Ɲanmiɛn m’ɔ ‘ti aunnvɔɛ sifuɛ dan’n,’ i sɔ’n yo e fɛ.—Efɛ. 2:4.

12. ?Sɛ e kle kɛ e si sran aunnvɔɛ andɛ’n wafa sɛ yɛ i sɔ’n úka e ɲrɛnnɛn dan’n nun-ɔn? (Sa Nglo Yilɛ 13:16, 17)

¹² ?Ngue ti yɛ e kwla se kɛ ɲrɛnnɛn dan’n nun’n e wiengu’m be aunnvɔɛ silɛ’n ɔ́ yó cinnjin-ɔn? Biblu’n se kɛ be nga be waan be suanman awa wie fi bo’n, bé klé be yalɛ dɔ nga su ɔ nin ɲrɛnnɛn dan’n nun. (An kanngan Sa Nglo Yilɛ 13:16, 17 nun.) Atrɛkpa’n e niaan’m bé mían ninnge kpanngban wun. Kɛ e Min Zezi bá m’ɔ́ wá dí sran’m be jɔlɛ’n e kunndɛ kɛ ɔ sie i nzɔliɛ kɛ e si sran aunnvɔɛ. I liɛ’n, ɔ́ sé e kɛ e bla naan ‘e wa di Ɲanmiɛn Sielɛ’n i aja’n wie.’—Matie 25:34-40.

13. ?Kɛ nga Rɔmunfuɛ Mun 15:7 fa kan’n sa’n, ngue yɛ ɔ ukali Klisifuɛ klikli mun naan b’a klo be wiengu tankaan kpa-ɔ?

¹³ Klisifuɛ klikli’m be blɛ su’n, sran’m be sieli i nzɔliɛ kɛ be klo be wiengu. Sanngɛ i sɔ yolɛ’n w’a yoman pɔpɔ. Maan e kan asɔnun ng’ɔ o Rɔmun lɔ’n i ndɛ kan. Asɔnun sɔ’n i nunfuɛ’m be ti fanunfanun. Wie’m be ti Zifu. Kɛ ɔ fɛ i be kaan nun lele’n be kleli be Moizi mmla’n i su nantilɛ. Wie’m be timan Zifu, yɛ be ninnge yolɛ wafa’n nin Zifu’m be liɛ’n timan kun. Wie’m be ti kanga, yɛ wie mun bɔbɔ be le kanga. ?Kɛ mɔ be ti sran fanunfanun sɔ’n niɔn, ngue yɛ ɔ ukali be naan b’a klo be wiengu tankaan kpa-ɔ? Akoto Pɔlu wlali be fanngan kɛ ‘be sɔ be wiengu nun.’ (An kanngan Rɔmunfuɛ Mun 15:7 nun.) Yɛle kɛ maan be yo be niaan’m be kpa. I lɛ nun’n be kwla sɔ be nun be awlo lɔ, annzɛ be tra be janvuɛ. I wie yɛle kɛ, kɛ Onezimun m’ɔ ti Filemɔn i kanga’n wanndili m’ɔ́ sɛ́ i sin’n, akoto Pɔlu seli Filemɔn kɛ ‘ɔ sɔ i nun.’ (Flm. 17) Prisiyi nin Akila be kusu be sɔli Apolɔsu m’ɔ siman Ɲanmiɛn ndɛ’n i kpa kɛ be sa’n i nun. Yɛle kɛ be fali be wun be mɛntɛnnin i. (Yol. 18:26) Aniaan sɔ’m b’a seman kɛ, kɛ mɔ be ti sran fanunfanun’n ti’n bé búbú be wun nun. Sanngɛ be sɔli be wiengu nun.

14. ?Wafa sɛ yɛ Ana nin i wun’n be kleli kɛ be klo be wiengu mun-ɔn?

¹⁴ E kusu sɛ e tra e niaan’m be janvuɛ’n é klé kɛ e klo be kpa. Yɛ be kusu bé klé kɛ be klo e wie. (2 Kor. 6:11-13) Maan e kan Ana nin i wun’n be ndɛ. Kɛ be ɔli ngaliɛ dilɛ junman’n i dilɛ Sran ble mɛn’n i wia afiliɛ lɔ lika’n nun’n, w’a cɛman yɛ Koronavirisi’n boli i bo-ɔ. Tukpacɛ’n ti’n, be nin aniaan’m be kwlá yoman aɲia mun likawlɛ. ?Wafa sɛ yɛ bé yí i nglo kɛ be klo aniaan mun-ɔn? Be nin aniaan wie’m be kokoli yalɛ ɛntɛnɛti su, yɛ be seli be kɛ be kunndɛ kɛ bé sí be kpa. I sɔ’n yoli aniaan’m be fɛ kpa, ɔ maan aniaan’m be klɛli be mesazi yɛ be flɛli be tikatika. ?Ngue ti yɛ aniaan bla sɔ’n nin i wun’n be miannin be ɲin kpa naan b’a si aniaan mun-ɔn? Ana seli kɛ: “Klolɛ nga aniaan’m be yili i nglo min bɔbɔ nin min osufuɛ mun e lika blɛ kwlaa nun’n, ɔ yoli maan n klo kpa kɛ ń yí klolɛ’n i nglo min wiengu’m be lika.”

15. ?Ngue yɛ Vanesa i su ndɛ’n kle e aniaan’m be klolɛ’n su? (An nian foto’n wie.)

¹⁵ Andɛ’n, asɔnun nga aniaan sunman be o nun’n i nunfuɛ’m be finwlɛ’n timan kun, yɛ ɔ le sran kun nin i ninnge yolɛ wafa. Sɛ e kunndɛ kɛ é kló aniaan kwlaa sɔ mun’n, ɔ fata kɛ e fa e ɲin e sie i be nzuɛn kpa’n su. Aniaan kun m’ɔ suan Vanesa’n tran Nuvɛli Zelandi lɔ. Ɔ seli kɛ blɛ wie nun’n, kɛ ɔ ko yo naan ɔ nin aniaan wie mun b’a ti be wun aniɛn’n ɔ yoli kekle. Sanngɛ w’a seman kɛ ɔ  nin aniaan sɔ’m be nantiman kun. Ɔ miɛnnin i ɲin naan ɔ nin be b’a yo ninnge wie mun likawlɛ. I sɔ yolɛ’n ukɛli i naan w’a si like nga ti yɛ Zoova klo aniaan sɔ mun’n. Ɔ seli kɛ: “Siɛn mɔ min wun ti akpasua sunianfuɛ’n, e nin aniaan kpanngban kpa ekun mɔ e ninnge yolɛ wafa’n timan kun’n, e yo ninnge mun likawlɛ. N sieli i nzɔliɛ kɛ, kɛ ɔ ko yo naan e nin be e nuan w’a sɛ’n, ɔ timan kekle. Siɛn’n, kɛ n wun kɛ e kwlaa e ninnge yolɛ wafa’n timan kun’n, i sɔ’n yo min fɛ. Zoova kusu klo i sɔ’n wie. Afin i sufuɛ’m be ti fanunfanun.” Kɛ e mian e ɲin naan y’a bu e niaan mun kɛ nga Zoova fa bu be’n sa’n, e kle kɛ e klo be.—2 Kor. 8:24.

16. ?Ngue ti yɛ e niaan’m be klolɛ’n yó cinnjin kpa ɲrɛnnɛn dan’n nun-ɔn? (An nian foto nin desɛn’n wie.)

¹⁶ E niaan’m be klolɛ’n ɔ́ yó cinnjin kpa ɲrɛnnɛn dan’n nun. ?Kɛ ɲrɛnnɛn dan’n wá bó i bo’n, wafa sɛ yɛ Zoova wá sásá e-ɔ? Kɛ be fali alɛ wlali Babilɔninfuɛ’m be sin’n, ndɛ nga Zoova kan kleli i sufuɛ mun’n yɛ: “Min nvlefuɛ mun, amun wɔ, amun wlu amun sua ba’m be nun, yɛ amun to amun sin anuan. Amun fia lɔ kan lele maan ya dan’n sin.” (Eza. 26:20) Atrɛkpa’n, ɲrɛnnɛn dan’n nun’n like kunngba’n yɛ é wá yó-ɔ. “Sua ba” nga be kan be ndɛ lɛ’n atrɛkpa’n yɛle e asɔnun bo mun. Zoova ta e nda kɛ, sɛ e nin e niaan mun e su i likawlɛ titi’n ɲrɛnnɛn dan’n nun’n ɔ́ sásá e. I sɔ’n ti’n maan dɔ nga su’n e mian e ɲin kpa naan e nin e niaan mun e tran klanman, yɛ e klo be tankaan kpa. I sɔ yolɛ’n yɛ maan atrɛkpa’n é ɲán e ti-ɔ.

17. ?Sɛ e buabua e wun dɔ nga su’n, ngue yɛ é kwlá yo i ɲrɛnnɛn dan’n nun-ɔn?

¹⁷ “Zoova i cɛn dan’n” nun’n ɲrɛnnɛn’n wá yó dan. (Sof. 1:14, 15) Zoova i sufuɛ’m bé wá wún be ɲrun wie. Sanngɛ sɛ e siesie e wun dɔ nga su’n, blɛ sɔ’n nun’n e wla gúa ase, yɛ é kwlá úka e wiengu. Kannzɛ sa nga bé wá tɔ́ e su’n bé yó sɛ yó sɛ’n é kwlá trá e awlɛn. Blɛ sɔ’n nun’n sɛ e wun kɛ e niaan’m be su fɛ’n, kɛ mɔ e si be aunnvɔɛ’n ti’n é úka be, yɛ é mán be ninnge nga be sa mian be wun’n. Kpɛkun kɛ mɔ e klo e niaan mun tankaan kpa’n ti’n é fá e wun é mántan be titi. Ɔ maan Zoova mán e nguan m’ɔ leman awieliɛ’n. Sanvuɛsa fi su ɲanman e kun, yɛ e su wunman ɲrɛnnɛn kun.—Eza. 65:17.