Mɛn’n nun sa’m be tin sran’m be su dan. I sɔ’n ti’n, sran kpanngban be sa sin bubu be. ?Kɛ ɔ ko yo sɔ’n, ngue yɛ be yo-ɔ?

• Be nun wie’m be kunndɛman kɛ bé bú e ɲrun lɔ sa’m be akunndan kaan sa bɔbɔ.

• Wie’m be liɛ’n, be nɔn nzan annzɛ drɔgi naan be wla fi be su sa’m be su.

• Wie mun bɔbɔ’n, be waan wie’n flunman tra nguan’n. Be usa be wun kɛ: “?Ngue ti yɛ ń trán nguan nun ekun yɛ?”

• Sa nga be o ɔ su’n be kwla wie cɛn kun.

• Kannzɛ bɔbɔ ɔ su sa’m b’a wieman’n, a kwla yo ninnge wie mun naan w’a jran kekle.

• Biblu’n maan e kwla fa e wla e guɛ i like kpa kun su. Like sɔ’n yɛle kɛ mɛn’n nun sa’m bé wíe.

Biblu’n se kɛ: “Nán amun koko ainman liɛ’n i ti le, afin ngokɔɛ uflɛ o lɛ ainman. Ɔ le cɛn kun nin i nun ndɛ.”—Matie 6:34.

Ɔ le cɛn kun nin i nun afɛ. Ɔ maan nán koko ainman liɛ ti. Ɔ timɛn i ti’n, a su kwlá yoman ninnge ng’ɔ fata kɛ a yo be andɛ’n.

Sɛ sa kun nin-a juman’n, nán koko i ti. Sɛ a yo sɔ’n, ɔ wla bó ɔ wun dan. Kpɛkun a su kwlá faman ɔ wla guɛmɛn i like kpa kun su sa le.

Laa jue tofuɛ kun srɛli Ɲanmiɛn kɛ: “Ɔ ndɛ’n ɔ ti kɛ kannin sa, ɔ kpaja min bo. Ɔ kpaja min bo, yɛ ɔ kpaja min atin’n su.” (Jue Mun 119:105) Nian like nga ti yɛ Biblu’n m’ɔ ti Ɲanmiɛn Ndɛ’n ti kɛ kannin sa’n.

Sɛ lika’n lu’n, e fa kannin e kpaja e bo naan y’a kwla wun e bo. I wafa kunngba’n, blɛ kekle nun’n Biblu’n kwla uka e naan y’a fa ajalɛ kpa.

Asa’n, e kwla fa kannin’n e kpaja e ɲrun atin’n su. I wafa kunngba’n, Biblu’n kwla uka e naan y’a si e ɲrun lɔ sa mun.