Maan e bu aja mɔ Ɲanmiɛn fa cɛli e’n i like dan
Maan e bu aja mɔ Ɲanmiɛn fa cɛli e’n i like dan
“I sɔ’n ti yɛ ɔ fata kɛ yasua kpaci i si nin i nin, yɛ ɔ fɛ i wun mɛntɛn i yi naan be nnyɔn’n be kaci sran wunmuan nin-ɔn.”—BOB. 2:24.
1. ?Ngue ti yɛ ɔ fata kɛ e ɲin yi Zoova ɔ?
Ɔ FATA kɛ e ɲin yi Ɲanmiɛn Zoova m’ɔ kpɛli aja’n i ba’n. Ɔ ti e Yifuɛ’n nin e Min’n ɔ nin e Si m’ɔ o ɲanmiɛn su lɔ’n. I sɔ’n ti be flɛ i kɛ “like kpa kwlaa nga be fa man sran’n, ɔ nin like kpa kwlaa nga be nyɛn i’n” be Manfuɛ. (Zak 1:17; Ngl. 4:11) I sɔ liɛ’n yi i sran klolɛ dan’n i nglo. (1 Zan 4:8) Like kwlaa ng’ɔ kle e’n, ɔ nin i kwlaa ng’ɔ se e kɛ e yo’n, ɔ nin i kwlaa ng’ɔ fa man e’n, e bɔbɔ e kpa yolɛ ti ɔ.—Eza. 48:17.
2. ?Mmla benin yɛ Zoova fa mannin yasua nin bla klikli nga be jali be wun’n niɔn?
2 Biblu’n waan like “kpa” kwlaa sɔ mɔ Ɲanmiɛn fa cɛ sran mun’n, i nun kun yɛle aja’n. (Nya. 19:14) Kɛ Zoova maan Adam nin Ɛvu be jali be wun’n, ɔ mannin be mmla ng’ɔ fata kɛ be fa su naan be aja’n w’a yo ye’n. (An kanngan Matie 19:4-6 nun.) Sɛ ɔ ti kɛ be fali atin nga Ɲanmiɛn kleli be’n su’n, nn be dili aklunjuɛ tititi. Sanngɛ be dili sinnzin. Yɛle kɛ be kpaloli mmla nga Ɲanmiɛn fa mannin be’n. Ɔ maan be wunnin be ɲrun sa fiaan.—Bob. 3:6-13, 16-19, 23.
3, 4. (a) ?Andɛ’n, ngue yɛ sran kpanngban be yo m’ɔ kle kɛ be buman aja’n nin Ɲanmiɛn Zoova be like fi ɔ? (b) ?Like suanlɛ nga nun’n, aja’n i beninfuɛ’n yɛ é wá fa e ɲin é síe su ɔ?
3 Andɛ’n, sran kpanngban be yo kɛ yasua klikli’n nin i yi’n be sa wie. Yɛle kɛ be aja’n nun’n, kɛ bé fá ajalɛ wie’n, be buman Zoova i atin’n i like fi. Wie’m be liɛ’n, be kplinman su kɛ bé já be wun awa ja su. Yɛ wie’m be kusu’n, wafa nga be bɔbɔ be fa bu aja’n yɛ ɔ ti be cinnjin ɔn. (Rɔm. 1:24-32; 2 Tim. 3:1-5) Aja’n ti like mɔ Ɲanmiɛn fa cɛli be ɔ. Sanngɛ be ndɛ nunman nun. Ɔ maan sɛ be buman aja’n i like dan’n, nn Ɲanmiɛn Zoova m’ɔ ti i Manfuɛ’n yɛ be bumɛn i sran ɔn.
4 Ɔ ju wie’n, Ɲanmiɛn i nvle’n nunfuɛ’m be nun wie mun bɔbɔ’n, be ɲin kpa wafa nga Zoova bu aja’n i su. Klistfuɛ wie mɔ be o aja’n nun’n be waan be tranman likawlɛ kun. Annzɛ be ra be wun. Sanngɛ nn be wun ralɛ sɔ’n takaman Biblu’n nun mmla wie fi su. ?É yó sɛ naan y’a fɛmɛn i sɔ ajalɛ’n? ?Wafa sɛ yɛ ndɛ nga Ɲanmiɛn kɛnnin i Bo Bolɛ 2:24 nun’n, ɔ kwla uka Klistfuɛ nga be o aja’n nun’n naan be aja’n w’a taka kpa ɔ? ?Yɛ wafa sɛ yɛ be nga be su bu bian annzɛ bla jalɛ’n i akunndan’n, be kwla siesie be wun ɔn? Biblu’n nun’n, be kannin aja nsan mɔ be yoli ye’n be ndɛ. Aja sɔ’m be kle kɛ ɔ ti cinnjin kpa kɛ be ɲin yi Zoova naan aja’n w’a cɛ kpa. Maan e fa e ɲin e sie be su e nian.
Nán maan e kpɛ e wiengu bo waka
5, 6. ?Ngue sa yɛ ɔ kwla yoli kekle mannin Zakari nin Elizabɛti ɔ? ?Yɛ kɛ b’a kpɔciman be wiengu le’n, ngue yɛ Ɲanmiɛn fa cɛli be ɔ?
5 Like ng’ɔ ti kpa’n yɛ Zakari nin Elizabɛti be yoli ɔ. Yɛle kɛ be nɲɔn sɔ mɔ be jali be wun’n be ti Zoova i sufuɛ kpa. Zakari dili i Ɲanmiɛn ɲrun jranfuɛ junman’n titi. Yɛ be nɲɔn’n be miannin be ɲin be nantili Ɲanmiɛn Mmla’n su titi. Ɔ ti weiin kɛ ninnge nga ti yɛ ɔ fata kɛ be la Ɲanmiɛn i ase’n be sɔnnin. Sanngɛ sɛ ɔ ti kɛ amun ɔli be wun wunlɛ Zida lɔ’n, nn amun kwla sieli i nzɔliɛ kɛ be leman ba. Elizabɛti i klun ti kpan. Yɛ be nɲɔn’n kusu b’a yo kpɛnngbɛn.—Lik 1:5-7.
6 Laa Izraɛli lɔ’n, ba wulɛ’n ti like cinnjin kpa. Ɔ maan kpɛ sunman’n, awlobo’m be nunfuɛ’m be sɔnnin kpa. (1 Sam. 1:2, 6, 10; Jue. 128:3, 4) I sɔ’n ti’n, blɛ sɔ’n nun’n, sɛ Izraɛlifuɛ yasua kun i yi’n wuman ba’n, ɔ kwla fa gblɛ rɛ i. Sanngɛ Zakari liɛ’n ɔ nin Elizabɛti be kali aja’n nun. I yasua’n nin o, i bla’n nin o, be nun wie fi w’a kunndɛman sran uflɛ i wiengu kun’n bo. Kannzɛ bɔbɔ ba mɔ be lemɛn i ti’n be akunndan’n sanngannin’n, sanngɛ be nɲɔn’n be suli Zoova likawlɛ titi, b’a kpɔcimɛn i le. Blɛ kun juli’n, Zoova wa rali be su dan kpa. Yɛle kɛ ɔ yoli maan be kpɛnngbɛn blɛ’n nun’n, be wa wuli ba yasua kun.—Lik 1:8-14.
7. ?Wafa sɛ yɛ Elizabɛti kleli ekun kɛ ɔ kpɔciman i wun’n niɔn?
7 Sa uflɛ kun nun’n, Elizabɛti kleli kɛ ɔ kpɔcimɛn i wun’n. Kɛ ɔ́ wú i wa Zan’n, nn Zakari kwlaman ijɔ, afin be toli i amunle. Yɛle kɛ i nun mɔ Ɲanmiɛn i anzi kun kannin ba’n i ndɛ kleli i’n, w’a faman su. Sanngɛ Zakari kwla kleli i yi’n kɛ Zoova i anzi’n waan be flɛ ba’n kɛ “Zan.” Be tranfuɛ nin be osufuɛ’m be waan bé fɛ́ i tɔ́n i si Zakari. Sanngɛ Elizabɛti niannin ndɛ nga i wun kannin’n su. I waan: “Cɛcɛ, maan be flɛ i Zan.”—Lik 1:59-63.
8, 9. (a) ?Wafa sɛ yɛ sran kun nin i yi be nantilɛ nanwlɛ su’n, ɔ yo maan aja’n taka kpa ɔ? (b) ?Sa trele benin’m be nun yɛ yasua kun nin i yi be kwla nanti nanwlɛ su ɔ?
8 Andɛ kusu’n, kɛ Zakari nin Elizabɛti sa’n, be nga be o aja’n nun’n, ninnge nga be sunnzunnin’n, nɛ́n i ngba yɛ ɔ kpɛn su ɔ. Kpɛkun sa uflɛ wie’m be tɔ be su. Aja’n nun’n, sɛ yasua’n nin bla’n be nantiman nanwlɛ su’n, be aja’n kwlá yoman ye. Ndalie tralɛ’n nin bian nin bla nna nga be fa fite nzra nun’n i nianlɛ’n, ɔ nin be wiengu bo bla annzɛ bian kunndɛlɛ’n, ɔ nin sa uflɛ wie mun ekun be kwla saci be nanwlɛ su nantilɛ’n. Kusu be nga be o aja’n nun’n sɛ be lafiman be wiengu su kun’n, be wun klolɛ’n kan ase blɛblɛblɛ. Be ɲin mɔ be fa sie i be yi annzɛ be wun i kunngba su’n, ɔ ti kɛ awa wie yɛ be fa sili i awlo’n i wun sa. Ɔ yo maan sran nga be timan kpa’n ɔ nin ninnge uflɛ’m be kwlá wluman lɔ. I liɛ’n, sa tɛ wie kwlá ɲanman be nga be o awlo’n i klun lɔ’n. Ɔ maan kɛ yasua kun nin i yi be kpɔciman be wun’n, be bo sɛ. Kpɛkun be kwla kan be klun ndɛ kle be wiengu. Nanwlɛ, ɔ ti cinnjin kpa kɛ yasua nin bla’n be tran likawlɛ titi.
9 Zoova seli Adam kɛ: ‘I sɔ’n ti yɛ ɔ fata kɛ yasua kpaci i si nin i nin, yɛ ɔ fɛ i wun mɛntɛn i yi naan be nnyɔn’n be kaci sran wunmuan nin-ɔn.’ (Bob. 2:24) ?I sɔ’n i bo’n yɛle benin? Yɛle kɛ wafa nga be nin be janvuɛ nin be osufuɛ’m be nanti’n, ɔ fata kɛ be kaci i kan. Maan be nga be o aja’n nun’n, be fa blɛ be nian be wiengu lika. Ɔ fataman kɛ be janvuɛ nin be osufuɛ’m be yo be cinnjin tra be yi’n annzɛ be wun’n. Kusu ɔ fataman kɛ be man be si annzɛ be nin’m be atin naan be fa be nuan be wlɛ i be awlo’n nun ndɛ’m be nun. Ɔ fata kɛ be nga be o aja’n nun’n be fa be wun be mantan be wiengu. Ɲanmiɛn bɔbɔ yɛ ɔ kan sɔ ɔ.
10. ?Ngue yɛ ɔ́ úka be nga be o aja’n nun’n, naan b’a nanti nanwlɛ su tititi ɔ?
10 Kannzɛ bɔbɔ yasua’n nin i yi’n be Ɲanmiɛn sulɛ’n wafa’n ti ngunminngunmin’n, sɛ be nanti nanwlɛ su’n be ɲan su ye. Aniaan bla kun mɔ i wun’n timan Zoova i sufuɛ’n waan: “Kɛ mɔ Zoova kle min wafa ng’ɔ fata kɛ n lo min wun m man min wun’n naan min ɲin yi i’n ti’n, ń lɛ́ i ase dan kpa. Kɛ mɔ e nantili nanwlɛ su’n ti’n, klolɛ’n nin aɲinyiɛ’n be o e aja’n nun i afuɛ 47 yɛ.” (1 Kor. 7:10, 11; 1 Piɛ. 3:1, 2) I sɔ’n ti’n, maan e mian e ɲin naan e yi’n annzɛ e wun’n si kɛ ɔ kwla lafi e su. Ndɛ nga e kan’n nin sa nga e yo’n nun’n maan e wun annzɛ e yi wun i wlɛ kɛ e liɛ’n, sran’m be nun’n, be ɲɛnmɛn i wunsu. Like nga amun bɔbɔ amun kwla yo naan like fi annzɛ sran fi w’a wluman amun afiɛn’n, amun yo. (An kanngan Nyanndra Mun 5:15-20 nun.) Rɔnu nin Zanɛti mɔ be jali be wun w’a di afuɛ 35, be waan: “Kɛ mɔ like nga Ɲanmiɛn kunndɛ kɛ e yo’n e nian nun e yo’n ti’n, e di aklunjuɛ e aja’n nun.”
Kɛ be nuan sɛ’n aja’n taka kpa
11, 12. ?Wafa sɛ yɛ Akilasi nin Prisiyi be dili junman likawlɛ (a) awlo lɔ ɔ, (b) be junman’n i dilɛ’n nun ɔn, yɛ (c) Ɲanmiɛn junman’n i dilɛ’n nun ɔn?
11 Kɛ akoto Pɔlu kɛn i janvuɛ Akilasi nin Prisiyi be ndɛ’n, ɔ boman kun dunman yaciman kun lɛ. Be nɲɔn sɔ mɔ be bo ti kun’n, be kle e ajalɛ kpa. Kɛ Zoova se kɛ maan yasua’n nin i yi’n be kaci ‘sran wunmuan’n,’ i lɛ nun’n be kle e ajalɛ. (Bob. 2:24) Be awlo lɔ nin be junman’n nun, ɔ nin Ɲanmiɛn junman’n i dilɛ’n nun’n be dili junman likawlɛ titi. I wie yɛlɛ kɛ, kpalɛ klikli nga Pɔlu juli Korɛnti lɛ’n, klun ufue su, Akilasi nin Prisiyi be seli i kɛ ɔ tran be awlo lɛ. Ɔ maan blɛ kun nun’n, lɛ yɛ ɔ tran yoli i ninnge mun ɔn. I sin, Efɛzi lɔ’n, be yoli asɔnun aɲia be awlo lɔ. Kpɛkun be dili junman likawlɛ naan b’a uka be nga b’a ba uflɛuflɛ kɛ Apolɔsu sa’n, naan b’a wun Ɲanmiɛn i su nanwlɛ’n i wlɛ weiin kpa. (Yol. 18:2, 18-26) Kɛ lika’n ɔli i ɲrun’n, sran juejuefuɛ nɲɔn sɔ’m be wa ɔli Rɔmu. Lɔ’n be kplinnin su ekun kɛ be yo asɔnun aɲia be awlo lɔ. I sin’n, be wa sali be sin Efɛzi be ko wlali aniaan’m be fanngan.—Rɔm. 16:3-5.
12 Blɛ kun nun’n, Akilasi nin Prisiyi be nin Pɔlu be dili tannin sua yolɛ junman’n likawlɛ. I sɔ’n nun’n be nɲɔn’n be bo yoli kun be dili junman amanniɛn su. (Yol. 18:3) Ɔ ti weiin kɛ Ɲanmiɛn junman mɔ be dili i likawlɛ’n yɛ maan be aja’n nun’n, be fali Zoova sieli i like kwlaa ɲrun ɔn. Maan ɔ yo Korɛnti lɔ o annzɛ Efɛzi lɔ o, annzɛ kusu Rɔmu lɔ o, sran’m be kwlaa be si kɛ Akilasi nin Prisiyi be ‘ti [Pɔlu] i wiengu bɔ ɔ nin be di Krist-Jesus i junman’n.’ (Rɔm. 16:3) Lika kwlaa nga be ɔli lɛ’n, be dili junman likawlɛ naan Ɲanmiɛn Sielɛ’n i jasin fɛ’n i bolɛ junman’n w’a ɔ i ɲrun.
13, 14. (a) ?Ngue ti yɛ be nga be o aja’n nun’n be kwla tran ngunminngunmin ɔn? (b) ?Aja’n nun’n, ngue yɛ yasua’n nin bla’n be kwla yo naan b’a yo kɛ “sran wunmuan” sa ɔ?
13 Sɛ yasua kun nin i yi be ɲin o like kunngba’n i sin’n, naan be bo yo kun be yo ninnge mun’n, be aja’n taka sakpa. (Aku. 4:9, 10) Sanngɛ ng’ɔ yo kɛnsrɛn kan’n yɛle kɛ andɛ’n, be nga be o aja’n nun’n, be nun sunman be faman blɛ be yoman ninnge mun likawlɛ. Junman dilɛ’n ti’n, sran kun kɔ wa sran kun kɔ wa. Yɛ be junman sɔ’n fa be blɛ’n i dan lika. Wie’m be kusu be junman’n ti’n, be tu ajalɛ tikatika be kɔ mmua. Annzɛ kusu be kɔ sika kunndɛlɛ nvle uflɛ nun, naan b’a kwla blɛ be osufuɛ mun wie. Awlo lɔ bɔbɔ’n, televiziɔn nianlɛ, annzɛ be ɲin su yiyilɛ ninnge mun nin be wun kpinngbinlɛ’n, annzɛ video nun ngowa kanlɛ’n annzɛ ɛntɛnɛti’n be ti’n, sran wie’m be nin be yi’m be tran ngunminngunmin. ?Kɛ amun yo sɔ amun awlobo’n nun lɔ ɔ? ?Sɛ ɔ ti sɔ’n niɔn, amun kwla fa ajalɛ naan amun nin amun wun annzɛ amun yi amun a ɲan blɛ b’a yo ninnge mun likawlɛ? Wie liɛ’n, sɛ bla’n tɔ́n aliɛ o, sɛ ɔ́ wúnnzin talie nun o, annzɛ kusu sɛ ɔ́ núnnún sua’n nun o, amun kwla ukɛ i. Asa ekun’n, ba’m be lika nianlɛ’n nun o, amun si nin amun nin kpɛnngbɛn’m be lika nianlɛ’n nun o, amun kwla suan amun wiengu bo.
14 Like ng’ɔ ti cinnjin kpafuɛ’n, yɛle kɛ Zoova i sulɛ’n nun’n, amun fa blɛ yo ninnge mun likawlɛ titi. Amun kwla nian fluwa Maan e nian Ɲanmiɛn Ndɛ’n nun cɛn kwlaa i nun likawlɛ. Kpɛkun amun kwla su Ɲanmiɛn awlo lɔ likawlɛ. Sɛ amun yo sɔ’n, amun awlobofuɛ’m be akunndan’n yó kun yɛ be nuan sɛ́. Amun kwla bo jasin fɛ’n annzɛ amun kwla di atin bofuɛ junman’n likawlɛ. Kannzɛ bɔbɔ afuɛ nuan kun nun’n, anglo kunngba cɛ yɛ amun kwla fa di i sɔ junman’n, maan amun di. (An kanngan 1 Korɛntfuɛ Mun 15:58 nun.) Aniaan bla kun nin i wun be dili atin bofuɛ junman’n likawlɛ. I waan: “Wafa kun mɔ e nin min wun e kwla yo ninnge mun likawlɛ’n, yɛle jasin fɛ’n bolɛ’n. Kpɛkun blɛ sɔ’n nun’n e kwla koko yalɛ. Kɛ mɔ e sran nɲɔn’n e kunndɛ kɛ é úka sran mun naan be si Ɲanmiɛn’n ti’n, e nin i e bo yoli kun junman’n i dilɛ’n nun. E nin min wun e afiɛn’n wa mantannin kpa kɛ sran kun nin i janvuɛ kpa wie sa.” Kɛ amún mían amun ɲin bé yó ninnge kpakpa mun likawlɛ’n bé kɔ́’n, nn ninnge nga be ti amun cinnjin’n ɔ nin amun aeliɛ’n bé yó kun blɛblɛblɛ. Kpɛkun kɛ Akilasi nin Prisiyi be sa’n, amun nin amun yi annzɛ amun wun amún bú akunndan yɛ amún yó ninnge mun kɛ sran mɔ be ti ‘sran wunmuan’n’ sa.
Maan e nanti Ɲanmiɛn i mmla’n su
15. ?Sɛ aja kun yó ye’n, ɔ fin ngue? An yiyi nun.
15 Zezi wunnin i wlɛ kɛ ɔ ti cinnjin kɛ Ɲanmiɛn sie be nga be o aja’n nun’n. I nun mɔ Zoova maan yasua nin bla klikli’n bé já be wun’n, Zezi wunnin nun. Ɔ wunnin kɛ, kɛ Adam nin Ɛvu be fa Ɲanmiɛn i mmla’n su’n, be di aklunjuɛ. Kpɛkun kɛ b’a faman su kun’n, sa ng’ɔ ɲannin be’n ɔ wunnin i wie. Ɔ maan kɛ Zezi klé sran’m be like’n, ɔ flannin i Si i ndɛ ng’ɔ o Bo Bolɛ 2:24 nun’n, i nun. Ɔ kan guali su ekun kɛ: “Like nga Nyanmiɛn kan be bo nun’n, nán maan sran fi ti be nun.” (Mat. 19:6) I sɔ’n ti’n, andɛ bɔbɔ’n, like nga ti yɛ e aja’n kwla yo ye’n, yɛle e ɲin m’ɔ yi Zoova’n. I sɔ’n nun’n, Zozɛfu nin Mali mɔ be tali Zezi’n be kleli e ajalɛ klanman kpa kun.
16. ?Wafa sɛ yɛ Zozɛfu nin Mali be awlobo tranlɛ’n nun’n, be nantili Ɲanmiɛn i mmla’n su ɔ?
16 Zozɛfu yoli Mali i aklunye yɛ i ɲin yili i. Kɛ ɔ tili i kɛ Mali w’a wunnzɛ’n, kannzɛ bɔbɔ blɛ sɔ’n nun’n Ɲanmiɛn i anzi’n nin a yiyiman sa ng’ɔ juli Mali su’n i nun nin a klemɛn i’n, sanngɛ w’a kunndɛman kɛ ɔ́ yó i wannzo. (Mat. 1:18-20) Be nɲɔn’n be nantili awa i mmla’n nin Moizi Mmla’n be su. (Lik 2:1-5, 21, 22) Kpɛkun, kannzɛ bɔbɔ afuɛ kwlaa nun’n, yasua’m be ngunmin cɛ yɛ ɔ fata kɛ be ɔ Zerizalɛmu cɛn dilɛ cinnjin’m be bo’n, sanngɛ Zozɛfu nin Mali nin be awlobofuɛ’m be ɔli wie. (Mml. 16:16; Lik 2:41) I sɔ’n nun’n ɔ nin ninnge uflɛ nun’n, Ɲanmiɛn sufuɛ nɲɔn sɔ’m be miannin be ɲin naan Zoova i klun jɔ be wun. Yɛ be kleli kɛ be ɲin yi Ɲanmiɛn i ninnge mun. Ɔ maan i nun mɔ Zezi o asiɛ’n su wa’n, sɛ Zoova kpali be kɛ be niɛn i lika’n, ɔ ti su.
17, 18. (a) ?Wafa sɛ yɛ Ɲanmiɛn kwla sie yasua kun nin i yi be awlobo tranlɛ’n nun ɔn? (b) ?I su mmlusuɛ benin yɛ bé ɲɛ́n i ɔ?
17 ?Amun kusu amun awlobo tranlɛ’n nun’n, amun nanti Ɲanmiɛn i mmla’n su wie? ?Yɛle kɛ, ka naan amun a fa ajalɛ cinnjin mun’n, an dun mmua kunndɛ be su ndɛ nga Biblu’n kan’n? ?Yɛ amun dun mmua srɛ Ɲanmiɛn? ?Kpɛkun amun dun mmua usa ngwlɛlɛ afɛ Klistfuɛ nga be ɲin w’a ti Ɲanmiɛn ninnge’m be nun’n be sa nun? ?Annzɛ kusu amun bɔbɔ amun akunndan liɛ’n, annzɛ amun osufuɛ nin amun janvuɛ’m be liɛ’n su yɛ amun jran ɔn? ?Aja’n nin awlobo tranlɛ’n be su afɔtuɛ kpakpa nga Sran kpa nanwlɛfuɛ m’ɔ si ngwlɛlɛ’n ɔ man e Biblu’n i akua’m be nun’n, amun mian amun ɲin be nanti be su? ?Annzɛ kusu ninnge nga amun tranwlɛ’n nun lɔ sran’m be tɛ i yo’n, i wie yɛ amun yo ɔ? ?Amun srɛ Ɲanmiɛn likawlɛ yɛ amun kle sran Biblu’n nun like likawlɛ titi? ?Ɲanmiɛn sulɛ’n nun’n amun sunnzunnin kɛ amún yó like wie? ?Amun bu awlobo ninnge’m be nun cinnjinfuɛ’m be akunndan likawlɛ?
18 Rɛmɔn dili i aja’n su aklunjuɛ afuɛ lele 50. Kɛ ɔ bu i akunndan’n, i waan: “Ɔ leman sa kun sa mɔ y’a kwlá ɲɛnmɛn i trawlɛ ɔ. Afin e nin Zoova e yoli kɛ ‘nyanman nga be fali nyanman nsan yɛ be fa wɔli’n’ sa.” (An kanngan Akunndanfuɛ’n 4:12 nun.) Ndɛ kunngba’n yɛ Danni nin Trina be kannin ɔn. Be waan: “Kɛ mɔ e nɲɔn’n e suli Zoova likawlɛ’n ti’n, e aja’n takali kpa trali laa’n.” Danni nin Trina be di be aja’n su aklunjuɛ i afuɛ 34 tra su yɛ. Sɛ amun aja’n nun’n Zoova sie amun tititi’n, ɔ́ úka amun naan amun aja’n w’a yo ye. Yɛ ɔ́ rá amun su kpa.—Jue. 127:1.
Maan e bu aja’n i like dan titi
19. ?Ngue ti yɛ Ɲanmiɛn fali aja’n cɛli e ɔ?
19 Andɛ’n, like ng’ɔ ti sran sunman be cinnjin yɛle be ngunmin be aklunjuɛ dilɛ. Sanngɛ Zoova i sufuɛ’m be timan sɔ mlɔnmlɔn. Be si kɛ Ɲanmiɛn fali aja’n cɛli e naan i klun sa’n w’a kpɛn su. (Bob. 1:26-28) Sɛ ɔ ti kɛ Adam nin Ɛvu be buli like sɔ mɔ Ɲanmiɛn fa cɛli be’n i like dan’n, nn asiɛ’n wunmuan’n kacili mɛn klanman. Asa ekun’n, sɛ ɔ ti kɛ be yoli sɔ’n nn sran sɛsɛfuɛ mɔ be su Ɲanmiɛn’n be kwla dili aklunjuɛ mɛn sɔ’n nun.
20, 21. (a) ?Ngue ti yɛ ɔ fata kɛ e bu aja’n i like dan ɔn? (b) ?Le mɔcuɛ ng’ɔ́ bá lɔ’n nun’n, ngue like yɛ é wá súan ɔn?
20 I kwlaa yoli o, Ɲanmiɛn i sufuɛ’m be liɛ’n, aja’n ti Zoova i manmanlɛ like. (An kanngan 1 Korɛntfuɛ Mun 10:31 nun.) Kɛ nga e fa wunnin i sa’n, aja’n nun’n, kɛ be kpɛman be wiengu bo waka’n, mɔ be nuan sɛ’n, mɔ be nanti Ɲanmiɛn i mmla’n su’n, i sɔ’n yo maan Zoova i klun jɔ be wun. Yɛ be aja’n i bo’n wla ase kpa. Ɔ maan sɛ e su kpɛ aja’n i wun atin o, sɛ e kunndɛ kɛ e aja’n i bo’n wla ase kpa o, annzɛ sɛ e kunndɛman kɛ e aja’n saci’n, like ng’ɔ fata kɛ e dun mmua e yo’n, yɛle kɛ e bu aja’n i kɛ ɔ nin i fata’n sa. Yɛle kɛ Ɲanmiɛn yɛ ɔ siesieli ɔ. Sɛ i sɔ liɛ’n tran e klun’n, ɔ́ yó maan é mían e ɲin naan ajalɛ kwlaa nga é fá be aja’n nun’n, b’a taka Ɲanmiɛn Ndɛ’n su. I liɛ’n, é klé kɛ nán aja’n i ngunmin yɛ e bu i like dan ɔn. Sanngɛ e bu Ɲanmiɛn Zoova m’ɔ ti aja’n i Manfuɛ’n i sran wie.
21 Nán aja’n i kunngba yɛ Zoova fa cɛ e ɔ. Asa kusu nɛ́n i kunngba ti yɛ e kwla di aklunjuɛ ɔ. Like suanlɛ ng’ɔ́ bá lɔ’n nun’n, é wá wún like cinnjin kun ekun mɔ Zoova fa mannin e’n. Like sɔ’n yɛle blɛ mɔ e nin a jaman bian annzɛ bla’n.
?Amún tɛ́ su sɛ?
• ?Kɛ Klistfuɛ nga be o aja’n nun’n, be kpɔciman be wiengu’n, be aja’n yo sɛ?
• ?Ngue ti yɛ kɛ be nga be o aja’n nun’n be nuan sɛ be di junman likawlɛ’n, be aja’n i bo’n wla ase kpa ɔ?
• ?Wafa sɛ yɛ be nga be o aja’n nun’n, be kwla nanti Ɲanmiɛn i mmla’n su ɔ?
• ?Wafa sɛ yɛ e kwla bu Zoova m’ɔ ti aja’n i Manfuɛ’n i sran ɔn?
[Kosan mun]
[Foto mun, bue 18]
Sɛ be nga be o aja’n nun be di junman likawlɛ’n, ɔ uka be naan be nuan w’a sɛ.