Zezi ?Ɔ dili i mɛn liɛ’n sɛ?

“Min aliɛ’n yɛlɛ sran ng’ɔ sunmannin min’n i klun sa’n yolɛ nin junman ng’ɔ mannin min’n i bo guagualɛ.”—ZAN 4:34.

KƐ ZEZI kán ndɛ ngalɛ’n, sa ng’ɔ o i su’n yi like nga i mɛn dilɛ’n taka su’n i nglo weiin. Zezi nin i sɔnnzɔnfuɛ’m be wlanwlannin Samali nvle mɔ kpɔlɛkpɔlɛ’m be sɔn nun’n i nun nglɛmun lele. (Zan 4:6) Zezi i sɔnnzɔnfuɛ’m be buli i kɛ awe kun i. Ɔ maan be blɛli i aliɛ. (Zan 4:31-33) Wafa nga Zezi fa tɛli be su’n, ɔ yili like ng’ɔ ti i nanndoliɛ’n i nglo. Zezi liɛ’n, Ɲanmiɛn i junman’n i dilɛ’n ti i cinnjin tra aliɛ dilɛ’n lele. Zezi i ijɔlɛ nin i aeliɛ nun’n, ɔ kleli kɛ Ɲanmiɛn i klun sa’n i yolɛ’n yɛ ɔ yoli i cinnjin ɔn. ?Ɲanmiɛn i klun sa yolɛ sɔ’n i wie yɛle benin?

▪ Ɲanmiɛn Sielɛ’n i jasin fɛ’n i bolɛ nin i su like klelɛ’n Biblu’n kannin junman nga Zezi dili’n i ndɛ kɛ: “Jésus wlan-wlan Galile akpasua’n kwlaa su, ɔ kle like [...], ɔ kan Nyanmiɛn i sielɛ’n i jasin fɛ’n kle be.” (Matie 4:23) Zezi w’a boman Ɲanmiɛn Sielɛ’n i jasin fɛ’n w’a kleman sran mun sa ngbɛn. Sanngɛ ɔ kleli be like wie. Yɛle kɛ ɔ yiyili ndɛ’n nun weinwein kleli be naan be fa su. Ɲanmiɛn Sielɛ’n i su yɛ i jasin fɛ’n bolɛ’n takali ɔ.

I nun mɔ Zezi dí i junman’n, ɔ yiyili Ɲanmiɛn Sielɛ’n nun kleli i ndɛ tiefuɛ mun. Kpɛkun ɔ kleli be like nga Sielɛ sɔ’n wá yó’n. Ɲanmiɛn Sielɛ’n i su ndɛ nanwlɛ wie mun, ɔ nin Biblu’n nun ndɛ mma nga Zezi kannin Sielɛ sɔ’n i ndɛ nun’n, be nun wie mun yɛ. Maan e fa e ɲin e sie be su.

▪ Ɲanmiɛn Sielɛ’n ti awa kun m’ɔ o ɲanmiɛn su lɔ ɔ. Zezi yɛ Zoova sieli i kɛ ɔ yo awa sɔ’n i su Famiɛn ɔn.—MATIE 4:17; ZAN 18:36.

▪ Ɲanmiɛn Sielɛ’n yó maan Ɲanmiɛn i dunman’n yó sanwun. Kpɛkun ɔ́ yó maan sran’m bé yó Ɲanmiɛn i klun sa’n asiɛ’n su wa kɛ be mɔ be o ɲanmiɛn su lɔ’n be yo’n sa.—MATIE 6:9, 10.

▪ Zezi seli sa tɛ yofuɛ’n i kɛ: “Min nin wɔ é jú Nyanmiɛn i lika klanman’n nun lɔ.” Kɛ Ɲanmiɛn Sielɛ’n blɛ’n ko ju’n, asiɛ wunmuan’n káci mɛn klanman.—LIK 23:42, 43, NW.

▪ Ɔ cɛ kaan sa’n, Ɲanmiɛn Sielɛ’n blɛ’n jú. Sielɛ sɔ’n wá yó Ɲanmiɛn i klun sa’n asiɛ’n su wa. *—MATIE 24:3, 7-12.

▪ Abonuan sa’m be yolɛ’n Like klikli nga sran’m be si kɛ Zezi yo’n, yɛle kɛ ɔ ti “like klefuɛ.” (Zan 13:13) Sanngɛ afuɛ nsan nin sin ng’ɔ fa dili i junman’n asiɛ’n su wa’n be nun’n, ɔ yoli abonuan sa kpanngban. Like cinnjin nɲɔn ti yɛ ɔ yoli sa sɔ mun ɔn. I klikli’n yɛle kɛ be kleli kɛ Ɲanmiɛn sunmɛnnin i sakpa. (Matie 11:2-6) I nɲɔn su’n yɛle kɛ sa sɔ’m be yili like nga i m’ɔ ti Ɲanmiɛn Sielɛ’n i su Famiɛn’n ɔ́ wá yó’n, i nglo kan. Maan e nian abonuan sa wie m’ɔ yoli be’n.

▪ Ɔ yoli maan jenvie’n jrannin diin kpɛkun aunmuan dan’n jrannin.—MARK 4:39-41.

▪ Ɔ yoli tukpacifuɛ’m be juejue. Tukpacifuɛ sɔ wie’m be ti aɲinsifuɛ, wie’m be ti sutrefuɛ yɛ wie’m be ti cɛcɛwafuɛ.—LIK 7:21, 22.

▪ Ɔ yoli maan kpaun’n wa sɔnnin naan sran kpanngban mɔ awe kun be’n b’a di, naan be ku w’a yi.—MATIE 14:17-21; 15:34-38.

 ▪ Ɔ cɛnnin sran nsan mɔ be wuli’n.—LIK 7:11-15; 8:41-55; ZAN 11:38-44.

Kɛ Famiɛn kun m’ɔ le kwlalɛ kɛ ngalɛ’n sa’n wá síe asiɛ’n, wafa nga mɛn dilɛ’n yó fɛ’n maan e bu i akunndan kan e nian!

▪ Ɲanmiɛn Zoova i sran’n i wafa ng’ɔ ti’n i nglo yilɛ’n Sran fi siman Zoova i su like kle kɛ Ɲanmiɛn bɔbɔ i Wa mɔ be flɛ i Zezi Klist’n sa. Zezi m’ɔ ti Ɲanmiɛn i ‘Wa Kpɛn bɔ i kpa’n tra like ng’ɔ yili be’n be kwlaa’n,’ ɔ nin Zoova be trannin ɲanmiɛn su lɔ cɛli kpa. Sran uflɛ fi nin Ɲanmiɛn b’a tranman b’a cɛman kɛ i sa. (Kolɔsfuɛ Mun 1:15) Ɔ maan nanwlɛ, ɔ kwla suannin i Si i akunndan bulɛ’n wafa’n nin i klun sa’n ɔ nin i mmla mun kpa.

I sɔ’n ti’n, Zezi kwla seli kɛ: “Sran fi si-man Nyanmiɛn Wa’n, saan i Si kunngba cɛ yɛ ɔ si i-ɔ, yɛ sran fi si-man Nyanmiɛn Wa’n i Si’n, saan Ba’n bɔbɔ ɔ nin sran ng’ɔ klo kɛ ɔ́ fɛ́ i Si kle i’n, i yɛ ɔ si i-ɔ.” (Lik 10:22) I nun mɔ Zezi te yo klɔ sran asiɛ’n su wa’n, i klunklo su, ɔ yili i Si i sran’n i wafa ng’ɔ ti’n i nglo juejue su. Zezi i ijɔlɛ’n nin i like klelɛ’n be leman wunsu. Afin i nun m’ɔ o Ɲanmiɛn mɔ like fi nunmɛn i sin’n i wun lɔ’n, ninnge ng’ɔ suannin’n, ɔ jrannin su yɛ ɔ kleli like sɔ’n niɔn.—Zan 8:28.

I nun mɔ Zezi o asiɛ’n su wa’n, ɔ fali i Si i su like ng’ɔ suɛnnin i ɲanmiɛn su lɔ’n, ɔ kleli klɔ sran mun. Wafa ng’ɔ fa kannin ndɛ’n ɔ yoli maan sran mɔ be ngwlɛlɛ’n junman lika fi’n, be kwla wunnin i wlɛ, yɛ be kwla nantili su.

Wafa nga Zezi yili i Si i sran’n i wafa ng’ɔ ti i nglo’n be nun cinnjin nɲɔn yɛ.

▪ Zezi i like klelɛ’n nun’n, ɔ kleli sran mun Zoova i su ndɛ nanwlɛ’n. Ɔ kleli be Zoova i dunman’n ɔ nin like nga i waan ɔ́ yó’n ɔ nin i mmla mun.—ZAN 3:16; 17:6, 26.

▪ Ninnge nga Zezi yoli’n be yili Zoova i nzuɛn klanman’n i nglo. Kɛ mɔ Zezi fɛ i Si dan’n ti’n, ɔ kwla kannin ndɛ wie mɔ i bo’n yɛlɛ kɛ: ‘Sɛ a kunndɛ kɛ á sí wafa nga min Si ti’n nian min.’—ZAN 5:19; 14:9.

Wafa nga Zezi fa dili i mɛn’n, ɔ yo ɲɛnmɛn. Sɛ e suan sa nga ti yɛ ɔ wuli’n i su like’n, yɛ sɛ e nian like nga e suannin’n su e nanti’n, é ɲán su mmlusuɛ dan kpa.

[Ja ngua lɛ ndɛ’n]