Fluwa nun kannganfuɛ’m be usa kɛ...

?Klistfuɛ kpa’m be kwlaa yɛ bé kɔ́ ɲanmiɛn su ɔ?

▪ Sran kpanngban be kanngannin Zezi i ndɛ yɛ’n m’ɔ cici sran wla’n. I waan: ‘Nyanmiɛn kloli mɛn’n lele ɔ fɛ i Wa kunngba cɛ’n mannin naan sran kwlaa ng’ɔ lafi i su’n w’a mlin-man, sanngɛ ɔ nyan anannganman nguan.’ (Zan 3:16) ?Zezi i ndɛ sɔ’n kle kɛ i Si Ɲanmiɛn Zoova i sufuɛ kpa’m be ngba bé kɔ́ ɲanmiɛn su bé kó dí aklunjuɛ lɔ tititi?

Maan e fa e ɲin e sie i Zezi i ndɛ yɛ’n su. I waan: “Sran fi nian ɔ-man nyanmiɛn su lɔ le san m bɔ n kacili Sran’n bɔ n fin lɔ bali’n.” (Zan 3:13) I ndɛ sɔ’n kle kɛ laa Ɲanmiɛn sufuɛ kpa mun kɛ Nowe nin Abraamu nin Moizi yɛ Davidi sa’n, b’a ɔman ɲanmiɛn su. (Sa Nga Be Yoli’n 2:34) ?Yɛ nn nin yɛ be kwlaa sɔ’m be ɔli ɔ? Sɛ e waan é kpɛ́ i kpo’n, é sé kɛ Ɲanmiɛn sufuɛ kpa sɔ’m be o ndia’n nun. B’a wu. Be wunman sa fi wlɛ kun yɛ be su minndɛ kɛ Ɲanmiɛn cɛn be.—Akunndanfuɛ’n 9:5, 6; Sa Nga Be Yoli’n 24:15.

Sran klikli ng’ɔ kannin kɛ sɛ sran wie’m be wu’n bé kó trán ɲanmiɛn su lɔ’n, yɛle Zezi. Ɔ seli i akoto’m be kɛ ɔ́ kó síesíe tranwlɛ ɲanmiɛn su lɔ mán be. (Zan 14:2, 3) Blɛ sɔ’n nun’n, nn Ɲanmiɛn sufuɛ’m be nin a timɛn i sɔ ndɛ liɛ’n le. I sin’n, akoto Pɔlu yiyili nun kɛ, kɛ Zezi wuli mɔ be cɛnnin i ɲanmiɛn su lɔ’n, ɔ ‘kpɛli atin mannin [i sɔnnzɔnfuɛ mun yɛ atin sɔ’n] tannin-man mlɔnmlɔn.’ Sran fi nin a sinmɛn i sɔ atin’n nun le.—Ebre Mun 10:19, 20.

?I sɔ’n kle kɛ, kɛ ɔ fɛ i lɛ’n, Ɲanmiɛn sufuɛ kpa’m be kwlaa bé kó ɲanmiɛn su? Cɛcɛ, afin saan sran wie mɔ bé kó dí junman ɲanmiɛn su lɔ mun yɛ ɔ fata kɛ be cɛn be lɔ ɔ. Kɔnguɛ kasiɛn nga Zezi nin i akoto’m be trannin asiɛ’n su wa’n, ɔ seli be kɛ i Sielɛ m’ɔ o ɲanmiɛn su lɔ’n nun’n, ‘ɔ́ síe be bia su maan bé fá Izraɛl nvle blu-nin-nnyɔn mun bá be ja su.’ Ɔ maan junman nga bé dí’n, yɛle kɛ be nin Zezi bé dí famiɛn.—Lik 22:28-30.

Klɔ sran uflɛ’m be kusu bé kwlá dí junman ɲɛnmɛn sɔ’n wie kɛ akoto mun sa. Aolia nun’n, akoto Zan wunnin Zezi nin sran wie mɔ be cɛnnin be ɲanmiɛn su lɔ’n. Zan tili i kɛ sran sɔ’m be ti “Nyanmiɛn’n i awlo sran bɔ be trɛn i nyrun. Be yɛ bé síe sran mun asiɛ’n su wa-a.” (Sa Nglo Yilɛ 3:21; 5:10) ?Sran sɔ’m be ti sran nɲɛ ɲanmiɛn su lɔ? Kɛ nvle kwlaa nun sa’n, be nga be o awa’n nun’n b’a sɔnman. I kunngba’n yɛle Ɲanmiɛn Sielɛ’n i liɛ’n. Zezi m’ɔ ti Ɲanmiɛn i Bua Gbanflɛn’n ɔ nin sran 144.000 mɔ ‘be kpɔli be ti sran’m be nun’n,’ bé dí famiɛn.—Sa Nglo Yilɛ 14:1, 4, 5.

Ɔ ti su kɛ, kɛ e fa sran 144.000 e sunnzun laa Ɲanmiɛn i sufuɛ kpa nin andɛ liɛ mun’n, e wun kɛ be juman lika fi. Sanngɛ e wun i sɔ liɛ’n i wlɛ afin be cɛn sran 144.000 be ɲanmiɛn su lɔ kɛ be ko di Ɲanmiɛn i junman trele kun. ?Sɛ e waan é kplán sua’n, e asa liɛ’n su lɔ sran kwlaa nga be si sua kplan mun yɛ é fá be ɔ? Cɛcɛ e su faman be ngba. Saan be ng’ɔ fata kɛ be di junman’n yɛ é fá be ɔ. I kunngba’n, nán Ɲanmiɛn i sufuɛ kpa’m be ngba yɛ Ɲanmiɛn man be cenjele like ngunmin kun kɛ be nin Klist be ko di famiɛn ɲanmiɛn su lɔ ɔ.

Ɲanmiɛn su lɔ awa sɔ’n ɔ́ yó maan Ɲanmiɛn i klun sa klikli’n kpɛ́n su klɔ sran’m be lika. Yɛle kɛ asiɛ’n káci mɛn klanman yɛ sran kpanngban kpa bé dí aklunjuɛ tititi asiɛ’n su. Junman nga sran’m bé dí naan asiɛ’n kaci mɛn klanman’n, Zezi nin sran 144.000 nga be nin i dí famiɛn’n, bé nían su. (Ezai 45:18; Sa Nglo Yilɛ 21:3, 4) Be nga bé trán asiɛ’n su sɔ’n, be wie mun yɛle be nga Ɲanmiɛn i wla o be su m’ɔ́ cɛ́n be’n.—Zan 5:28, 29.

Maan ɔ yo laa Zoova i sufuɛ kpa mun o annzɛ andɛ liɛ mun o, be ngba be kwla ɲan like ɲɛnmɛn nga Ɲanmiɛn fa cɛli e’n mɔ yɛle anannganman nguan’n. (Rɔmfuɛ Mun 6:23) Be nun kaan sa bé kó dí junman ngunmin kun ɲanmiɛn su lɔ. Kpɛkun be nun sunman bé trán mɛn klanman’n nun asiɛ’n su.