?Yalɛ dilɛ dan’n yɛle benin?

YALƐ dilɛ dan’n kwla kun sran. Afin, ɔ yo maan sran’n ɔ ɲanman aliɛ nin nzue nin lawlɛ kpa. Yɛ ɔ kwlá yomɛn i wun are kpɛkun ɔ kwlá wlɛmɛn i mma’m be suklu. Yalɛ’n kan sran ko ju miliar kun. Be nga yalɛ’n kan be sɔ’n be sɔnnin tra sran nga be o sran ble mɛn’n nun wa’n. Ɔ nin i sɔ ngba’n, sran nga be o blɔfuɛ’m be mɛn nga be o Aflansi i bue liɛ’n su lɔ’n, ɔ nin Amlɛnkɛn’m be mɛn’n i nglo lɔ’n, be siman like nga be flɛ i kɛ yalɛ dilɛ dan’n. Ɔ maan, é wá tíe yalɛfuɛ’m be nun wie’m be nuan ndɛ kan.

Mbarusimana nin i yi nin i mma nnun’m be tran sran ble nvle nga be flɛ i kɛ Rwanda’n i nun lɔ. Jɛkuajo kunnin i wa’n i nsiɛn su’n. I waan: “Min si cɛcɛli i asiɛ’n nun nsiɛn fa mannin e. Min liɛ’n ti kaan dan ti’n, n fali min yi nin min mma mun n ɔli blɔfuɛ klɔ. Lɔ’n, e nin min yi e isa yɛbuɛ nin aunɲan e yo i atɛ. E sua’n leman fenɛtri. Polisie’m be lika nun lɔ yɛ e ko sa nzue gbo kun nun ɔn. Cɛn ba kun nun sa’n, e di aliɛ kpɛ kunngba. Sanngɛ cɛn nga y’a ɲanman junman’n, e nuan kanman. Kɛ ɔ ko yo sɔ’n, n fite. Afin kɛ awe ti’n ba’m be sun’n, n kwlá nianman.”

Viktɔr nin Karmɛni be bobo ngbabua nun. Nvle nga be flɛ i Bolivi’n i lika mmuammua kpa yɛ be nin be mma nnun’m be tran ɔn. Be lue suanvuɛn kun. Ɔ ti fa sua. Sua sɔ’n kɛ nzue tɔ’n ɔ gua, yɛ kolan nunman nun. Suklu mma’m be sɔnnin dan ti’n, ɔ fata kɛ Viktɔr bɔbɔ bobo tabli naan i wa bla’n w’a kwla trɛn i sin suklu lɔ. Ɔ nin i yi be nanti kilo blu be ko kunndɛ yie be like dilɛ nin nzue nga be ko nɔn’n i tɔnlɛ liɛ. Karmɛni waan: “E leman kabinɛn. I ti’n nzue ba’n su lɔ yɛ e kɔ atrun ɔn. Lɔ kusu yɛ e wunnzin yɛ e gua wla blo ɔ. Ba’m be ta tukpacɛ tɔ.”

Fransisko nin Ilidia be tran Mozambiki lɔ klɔ kaan kun su. Jɛkuajo kunnin be mma nnun’m be nun kun. Afin dɔɔtrɔfuɛ’m b’a sɔmɛn i nun b’a yomɛn i are. Bian’n nin i yi be gua awie yɛ be ta alenda be lika kan’n nun. Aliɛ kan nga be ɲɛn i’n, ɔ ju be anglo nsan cɛ. Fransisko waan: “Ɔ ju wie’n, nzue tɔman annzɛ awiefuɛ’m be wua e fie’n su ninnge mun. I ti’n n kpɛ blɔfuɛ fefe  n ko yo i atɛ naan m’an ɲan sika kan. Asa ekun’n e nin min yi e nanti dɔ nɲɔn e ko bu yie. E yo trɔ kun atɛ yɛ e fa kun e tɔn like.”

Sɛ be bubu sran nga be o asiɛ wunmuan’n su’n be nun akpasua nso’n, yalɛ’n o be nun akpasua kun su kɛ Mbarusimana nin Viktɔr nin Fransisko be sa. Kɛ ɔ́ yó sɔ’n nn sran miliar kpanngban be liɛ’n be o pɔɔ nun. Kɛ sran sunman be bu i sɔ’n i akunndan’n be waan ɔ timan su. Sran wie’m b’a kunndɛ kɛ bé yó naan yalɛ’n wie. Ndɛ ng’ɔ́ bá lɛ’n wá yíyí like nga be mian be ɲin be yo’n, ɔ nin like nga be lafi su’n be nun.

 [Foto, bue 2, 3]

Karmɛni nin i wa nɲɔn’m be su sa nzue.