1. ?Ngue ti yɛ ninnge nga e wunman be’n be akunndan mɔ e kwla bu’n, ɔ ti kpa ɔ? (An nian foto ng’ɔ o kan like suanlɛ’n bo i bo lɛ’n.)

 WAFA nga Ɲanmiɛn yili klɔ sran’n, ɔ yo ɲɛnmɛn dan. Yɛle kɛ ninnge nga e nin a wunman be le’n, e kwla bu be akunndan. I wie yɛle ninnge kpakpa nga cɛn wie lele e kwla ɲan be’n. Be akunndan mɔ e kwla bu’n ti’n, e kwla fa ajalɛ ng’ɔ ti kpa’n. Zoova si sa nga bé wá jú’n. Yɛ ɔ kan be nun wie’m be ndɛ kle e. E wunman sa sɔ mun. Sanngɛ kɛ mɔ e kwla bu be akunndan’n ti’n, e lafi su kɛ bé jú sakpasakpa.​—2 Kor. 4:18.

2, 3. (a) ?Ninnge benin mun yɛ ɔ fata kɛ e bu be akunndan titi ɔ? (b) ?Kosan benin mun yɛ like suanlɛ nga wá tɛ́ be su ɔ?

² Ninnge nga e wunman be mɔ e bu be akunndan’n, nán be ngba yɛ be kwla ju sakpasakpa ɔ. Wie liɛ’n, ba bla kaan kun kwla bu akunndan. Ɔ yo i kɛ w’a fu abɛbɛ kun su naan ɔ su fɛ i tú kɔ́ sa. Be ɲin jrɛiin nun’n, i sɔ’n kwlá yoman ye. Sanngɛ, maan e kan Samiɛli i nin Ani i ndɛ e nian. Ɔ buli akunndan kɛ cɛn kun’n, ɔ́ fá Samiɛli kɔ́ Ɲanmiɛn sua’n nun lɔ naan ɔ ko di junman lɔ. Ani tali nda kɛ ɔ́ yó sɔ sakpa. Kɛ mɔ i akunndan trannin nda ng’ɔ tali’n su’n ti’n, i sɔ’n wlɛli  i fanngan kɛ ɔ yiɛ i nuan. (1 Sam. 1:22) Maan e bu ninnge nga Ɲanmiɛn seli kɛ ɔ́ yó be’n be akunndan. Sɛ i sɔ yɛ e yo’n, nn ninnge nga bé jú sakpasakpa’n be akunndan yɛ e bu ɔ.​—2 Piɛ. 1:19-21.

³ Laa’n, Ɲanmiɛn i sufuɛ’m be buli ninnge nga Ɲanmiɛn seli kɛ ɔ́ yó be’n be akunndan titi. ?Kɛ be yoli sɔ’n, mmlusuɛ benin yɛ be ɲɛnnin i ɔ? ?Ngue ti yɛ ɔ fata kɛ e bu ninnge kpakpa nga Ɲanmiɛn wá yó mɛ́n i sufuɛ mun’n, be akunndan wie ɔ?

4. ?Ngue ti yɛ Abɛli lafili su kɛ cɛn wie lele sran’m bé ɲán be ti ɔ?

⁴ Sran klikli ng’ɔ lafili Ɲanmiɛn su’n yɛle Abɛli. Kɛ Adam nin Ɛvu be yoli sa tɛ’n, ndɛ nga Zoova kan kleli wuo’n, Abɛli si i. Zoova seli wuo’n kɛ: “Ń fá kpɔlɛ ń wlá a nin bla’n be afiɛn, ń fá wlá ɔ osu’n nin bla’n i osu liɛ’n be afiɛn. Bla’n i osufuɛ’m bé kpɔ́tɔ ɔ ti’n, yɛ ɔ kusu á ká be ja sin.” (Bob. 3:14, 15) Abɛli siman wafa nga ndɛ sɔ’n wá kpɛ́n su’n. Sanngɛ atrɛkpa’n, ɔ buli su akunndan lele. Atrɛkpa’n, ɔ usɛli i wun kɛ: ‘?Wan yɛ ɔ́ wá kpɔ́tɔ wuo’n i ti’n naan fɔ’n w’a tranman sran’m be nun kun ɔn?’ Abɛli lafi su kɛ ndɛ nga Zoova kannin’n, ɔ́ kpɛ́n su. I sɔ’n ti’n, ɔ yili tɛ mannin Zoova. Zoova kusu sɔli i tɛ’n nun klanman.​—An kanngan Bo Bolɛ 4:3-5, ɔ nin Ebre Mun 11:4 be nun.

5. ?Kɛ Enɔki buli sa ng’ɔ́ wá ɲán sa tɛ yofuɛ mun’n i akunndan’n, ngue yɛ i sɔ’n wlɛli i fanngan kɛ ɔ yo ɔ?

⁵ Sran kun ekun m’ɔ lafili Ɲanmiɛn su kpa’n yɛle Enɔki. Enɔki blɛ su’n, sran’m be sroman Ɲanmiɛn, be kɛn i wun ndɛ tɛtɛ. Enɔki kannin sa nga Zoova wá yó be’n, be ndɛ yakpa su kleli sran sɔ mun. Ɔ seli be kɛ: “E Min’n nin i anz akpi-akpi kpanngban kpa be bali, kɛ be fa sran’m be kwlaa bla be ja su naan be nga be sro-man Nyanmiɛn’n be sa nga be yoli’n, be fɛ i nuan like man be. Afin sa tɛ yofuɛ sɔ’m bɔ be sro-man Nyanmiɛn’n, be yo Nyanmiɛn sa, yɛ be kɛn i wun ndɛ tɛtɛ.” (Zid 14, 15) Ɲanmiɛn su mɔ Enɔki lafi’n ti’n, ɔ buli blɛ nga sa tɛ yofuɛ’m be su tranman lɛ kun’n, i akunndan.​—An kanngan Ebre Mun 11:5, 6 nun.

6. ?Ngue yɛ atrɛkpa’n, Nowe buli i akunndan titi ɔ?

⁶ Ɲanmiɛn su mɔ Nowe lafi’n ti’n, anannganman su nzue’n w’a kunmɛn i wie. (Ebr. 11:7) Kɛ nzue’n kpɛli’n, Ɲanmiɛn su mɔ Nowe lafi’n ti’n, ɔ yili tɛ mɛnnin i. (Bob. 8:20) Kɛ ɔ́ cɛ́ kɔ́’n, sran’m be wa sacili ekun. Sran sɔ’m be nun kun yɛle Nimrɔdu. I yɛ ɔ yoli asiɛ’n su famiɛn klikli’n niɔn. Nimrɔdu yoli sa nga be yoman Ɲanmiɛn fɛ’n. Sanngɛ, Nowe liɛ’n ɔ lafili Ɲanmiɛn su tititi. (Bob. 10:8-12) Atrɛkpa’n, Nowe buli sa nga cɛn wie lele bé wá jú’n, be akunndan titi. Yɛle kɛ famiɛn wlɛfuɛ’m be su tranman lɛ kun. Yɛ fɔ’n nin wie’n be su tranman lɛ kun. E kusu, maan e bu ninnge kpakpa nga b’a mantan koko’n be akunndan wie.​—Rɔm. 6:23.

7. ?Ngue yɛ Abraamu, nin Izaaki, nin Zakɔbu be buli i akunndan ɔn?

⁷ Atrɛkpa’n, Abraamu, nin Izaaki, yɛ Zakɔbu be buli sa kpakpa nga bé wá jú’n, be akunndan wie. Afin Ɲanmiɛn seli be kɛ ɔ́ sín be anunman’m be nun  ɔ́ yó nvlenvle’m be kwlaa be ye. (Bob. 22:18; 26:4; 28:14) Ɲanmiɛn tali be nda kɛ be osu’n trɛ́ naan bé trán mɛn klanman kun nun. (Bob. 15:5-7) Abraamu, nin Izaaki, nin Zakɔbu be si kɛ ndɛ nga Zoova kan’n, ɔ kpɛn su. Ɔ maan, ɔ yoli be kɛ be anunman’m be o mɛn sɔ’n nun sa. Kɛ Adam nin Ɛvu be yoli sa tɛ’n, Zoova fali ajalɛ naan cɛn wie lele’n, sran’m be ɲan be ti. Kpɛkun, ɔ yiyili ajalɛ sɔ’n nun kleli i sufuɛ mun.

8. ?Ngue ti yɛ Abraamu lafili Zoova su titi ɔ?

⁸ Ɲanmiɛn su mɔ Abraamu lafi’n ti’n, kɛ lika yoli kekle i su bɔbɔ’n, i ɲin yili Ɲanmiɛn. Abraamu nin Ɲanmiɛn i sufuɛ wie’m be buli ninnge nga Ɲanmiɛn seli kɛ ɔ́ yó be’n be akunndan titi. Ɲanmiɛn Ndɛ’n se kɛ “b’a nyan-man ninnge nga i waan ɔ́ fá mán be’n. Be wunnin be mmua lɔ, ɔ maan be klun jɔli.” (An kanngan Ebre Mun 11:8-13 nun) Abraamu si kɛ ndɛ nga Zoova kannin be laa’n, be kpɛnnin su. I sɔ’n ti’n, ɔ lafili su kpa kɛ kasiɛ nga Zoova boli be’n, be kwlaa bé kpɛ́n su kpan.

9. ?Kɛ mɔ Abraamu lafili like nga Ɲanmiɛn waan ɔ́ yó mɛ́n i’n su’n ti’n, ngue yɛ ɔ yoli ɔ?

⁹ Abraamu lafili like nga Ɲanmiɛn waan ɔ́ yó mɛ́n i’n su. I sɔ’n ti’n, ɔ yoli Ɲanmiɛn klun sa. I wie yɛle kɛ, ɔ jasoli Ir m’ɔ ti klɔ dan’n su. Kpɛkun, ɔ yoli aofuɛ nin wlanwlanfuɛ Kanaan mɛn’n nun. Abraamu si kɛ klɔ nga be o Kanaan mɛn’n nun’n, be su kaman lɛ. Afin be su famiɛn’m be suman Zoova. (Zoz. 24:2) Abɛli, nin Enɔki, nin Nowe, nin Abraamu be kwlaa be lafili su kɛ cɛn wie lele’n, Ɲanmiɛn cɛ́n be nga be wuli mun. Kpɛkun, be minndɛli “klɔ kpa nga be wlɛli i sua’m be bo ase kpa’n, bɔ Nyanmiɛn bɔbɔ yɛ ɔ jajali yɛ ɔ kplannin’n.” Yɛle kɛ be ɲin trannin Ɲanmiɛn Sielɛ’n i sin. (Ebr. 11:10) Be buli asiɛ’n m’ɔ́ wá káci mɛn klanman’n i su tranlɛ titi’n, i akunndan. I sɔ’n ti’n, be lafili Ɲanmiɛn su kpa.​—An kanngan Ebre Mun 11:15, 16 nun.

10. ?Kɛ mɔ Sara lafili su kɛ cɛn wie lele ɔ́ ɲán ba kun ti’n, ngue yɛ ɔ yoli ɔ?

¹⁰ Abraamu i yi Sara lafili Zoova su kpa wie. Kɛ ɔ́ ɲán afuɛ 90, nn ɔ nin a wuman ba. Sanngɛ, ɔ lafili su kɛ cɛn wie lele ɔ́ ɲán ba kun. Ɔ maan, ɔ fɛli i wla’n guali Ɲanmiɛn su. Atrɛkpa’n, ɔ buli wafa nga i mma’m bé wá trɛ́ bé káci nvle dan kun’n i akunndan. (Ebr. 11:11, 12) ?Ngue ti yɛ Sara lafili su kɛ ɔ́ yó sɔ sakpa ɔ? Yɛle kɛ Zoova seli i wun Abraamu kɛ: “Ḿ mɛ́n i muae, ń yó maan ɔ́ wá wú ba yasua kun mán wɔ. Yɛ ɔ́ káci nvle-nvle’m be nannan. Yɛ i anunman wie’m bé yó nvle sunman be famiɛn.” (Bob. 17:16) Sakpasakpa, Sara wuli ba yasua kun. Be flɛli i kɛ Izaaki. Abonuan sa sɔ’n ti’n, Sara wunnin i wlɛ kɛ nda nga Zoova tali be’n, be kwlaa bé kpɛ́n su. Sɛ e kusu, e bu ninnge kpakpa nga Zoova seli kɛ ɔ́ yó mán e’n be akunndan’n, é láfi i su kpa.

11, 12. ?Ngue ti yɛ Moizi kloli Zoova kpa ɔ?

¹¹ Moizi lafili Ɲanmiɛn su wie. Be tɛli i Ezipti famiɛn’n i awlo lɔ. Sanngɛ ɔ kloli Zoova kpa. I sɔ’n ti’n, w’a kunndɛman kɛ ɔ́ yó sran dan nin aɲanbeunfuɛ. I si’n nin i nin mɔ be ti Ebre’n, be kannin Zoova i ndɛ be kleli i. Be kleli i kɛ Zoova seli kɛ ɔ́ dé Ebre mun, naan ɔ́ fá be kɔ́ mɛn kun m’ɔ tali nda kɛ ɔ́ fá mán be’n nun. (Bob. 13:14, 15; Tul. 2:5-10) Moizi buli ndɛ sɔ’n i akunndan titi. Ɔ maan, ɔ kloli Zoova kpa.

¹² Ɲanmiɛn Ndɛ’n se kɛ: “Nyanmiɛn su bɔ Moiz lafi’n ti, kɛ ɔ nyinnin’n w’a kplin-man su kɛ be se kɛ ɔ ti Ezipt famiɛn’n i wa bla’n i wa, afin ɔ klo kɛ be kle i nin Nyanmiɛn sran’m be nyrɛnnɛn tra kɛ ɔ di mɛn’n b’ɔ ti le nnyɔn kun like’n. Ɔ wunnin i kɛ finfin nga Krist ti be yo i’n ɔ ti kpa tra Ezipt lɔ like kpakpa’n kwlaa, afin like ng’ɔ́ wá nyɛ́n i cɛn wie’n, i nyin tɛ i mmua lɔ.”​—Ebr. 11:24-26.

13. ?Kɛ mɔ Moizi buli delɛ mɔ Zoova waan ɔ́ dé Izraɛlifuɛ mun’n i akunndan titi ti’n, ngue yɛ ɔ yoli ɔ?

¹³ Izraɛlifuɛ’m be delɛ mɔ Zoova waan ɔ́ dé be’n, Moizi buli i akunndan titi. Ɔ maan, ɔ lafili Zoova su yɛ ɔ kloli i kpa. Kɛ Ɲanmiɛn i sufuɛ onga mun sa’n, Moizi lafili su kɛ cɛn wie lele Ɲanmiɛn dé sran mun naan be su wuman kun. (Ebr. 11:17-19) Moizi wunnin i wlɛ kɛ Zoova klo sran mun dan. I sɔ’n ti’n, ɔ kloli Zoova wie yɛ ɔ lafili i su kpa titi. Moizi suli Zoova lele ɔ fa wuli. (Mml. 6:4, 5) Kɛ Ezipti famiɛn’n kunndɛli kɛ ɔ́ kún Moizi bɔbɔ’n, srɛ w’a kunman Moizi. Ɔ si kɛ sɛ ɔ jran kekle’n, cɛn wie lele Zoova yrɛ́ i su.​—Tul. 10:28, 29.

14. ?Akunndan benin yɛ sran kpanngban be bu ɔ?

¹⁴ Andɛ sran kpanngban be bu ninnge wie mɔ be kwlá ɲanman be’n, annzɛ be kwlá juman le’n, be akunndan. I wie yɛle kɛ, sran wie mɔ be ti yalɛfuɛ’n be bu i kɛ cɛn wie lele’n, bé ɲán be wun naan be su kokoman kun. Sanngɛ, Biblu’n se kɛ Satan i mɛn nga ti “afɛ nin nyrɛnnɛn ngunmin.” (Jue. 90:10) Sran wie’m be liɛ’n, be bu i kɛ cɛn wie lele asiɛ’n su famiɛn’m bé yí afɛ nga be o e su’n. Sanngɛ, Biblu’n se kɛ Ɲanmiɛn Sielɛ’n yɛ ɔ́ yó sɔ ɔ. (Dan. 2:44) Sran kpanngban be bu i kɛ mɛn tɛ nga ká lɛ titi. Sanngɛ, Biblu’n kan kɛ Ɲanmiɛn wá núnnún i. (Sof. 1:18; 1 Zan 2:15-17) Nanwlɛ, sran sɔ mɔ be siman ndɛ nga Ɲanmiɛn kan’n, be lafi klenzua kplɔwa su.

15. (a) ?Kɛ e bu ninnge nga Zoova wá yó be’n be akunndan’n, ngue ti yɛ ɔ ti kpa ɔ? (b) Kan like nga ɔ ɲin o i sin kpa’n i ndɛ.

¹⁵ Zoova seli kɛ cɛn wie lele e liɛ yó ye. Kɛ e bu i sɔ liɛ’n i akunndan’n, e wla gua ase. Yɛ e ɲan wunmiɛn e su i kpa. Maan ɔ yo e kɛ e o ɲanmiɛn su lɔ annzɛ asiɛ’n su wa sa. Sɛ asiɛ’n su wa yɛ é trán’n, maan e bu wafa nga e nin e niaan mun é dí junman mɔ asiɛ’n káci mɛn klanman’n, i akunndan e nian. Be nga bé nían junman sɔ’n su’n, be su mianmian e. E mantanfuɛ’m be kwlaa bé kló Zoova kɛ e bɔbɔ e fa klo i’n sa. E su tɔman tukpacɛ. Cɛn kwlaa é yó juejue. Yɛ like fi su kunman e srɛ. Nanwlɛ, e klun jɔ́ dan. Afin, like kwlaa nga é yó’n, e wiengu’m bé ɲán su ye. Yɛ Zoova kusu ɲán ɲrun. I wie yɛle kɛ, é klé be nga bé cɛ́n nguan’n be like naan be si Zoova. (Zan 17:3; Yol. 24:15) Ninnge sɔ’m be akunndan mɔ e bu’n, ɔ timan laliɛ yɛ e su cɛn ɔn. Be kwlaa bé kpɛ́n su sakpasakpa. Afin Ɲanmiɛn Ndɛ’n kan sɔ.​—Eza. 11:9; 25:8; 33:24; 35:5-7; 65:22.

16, 17. ?Kɛ e kan like nga e wla o su kɛ é ɲɛ́n i’n i ndɛ’n, ngue ti yɛ i sɔ’n ti kpa ɔ?

¹⁶ Maan e kan like nga e ɲin o i sin kɛ é yó i mɛn uflɛ nun’n, i ndɛ kle e niaan Klistfuɛ mun. Kɛ e yo sɔ’n, mɛn uflɛ’n i nun tranlɛ’n yoman e ɲrun paloo.  Like trele nga e tinuntinun é wá yó be mɛn uflɛ nun lɔ’n, e simɛn i. Sanngɛ, kɛ e kan like nga e ɲin o i sin kɛ é yó’n i ndɛ’n, e kle kɛ e lafi kasiɛ nga Zoova boli be’n be su. Kpɛkun, “e wla e wun fanngan” blɛ kekle nga nun. I sɔ yɛ Pɔlu nin Klistfuɛ nga be o Rɔmu lɔ’n, be yoli ɔ.​—Rɔm. 1:11, 12.

¹⁷ Kɛ e bu ninnge nga Zoova waan ɔ́ yó be’n be akunndan’n, e kokoman sa nga be o e su’n be ti ngboko. Ngokɔɛ’n ti’n, cɛn kun Piɛli seli Zezi kɛ: “Nian, y’a yaci e ninnge’n kwlaa y’a su ɔ su. ?Nguɛ yɛ é nyɛ́n i-ɔ?” Zezi kunndɛ kɛ Piɛli nin i wiengu’m be bu like nga cɛn wie lele bé wá yó’n i akunndan. I sɔ’n ti, ɔ tɛli i su kɛ: “Nanwlɛ, kɛ bé wá bó mɛn’n i uflɛ ekun’n, bɔ m bɔ n kacili Sran’n ń yí n famiɛn nglo bɔ ń trán m bia’n su’n, amun bɔ an suli n su’n, amun kusu an wá trán bia blu-nin-nnyɔn su, amún dí Izraɛl nvle blu-nin-nnyɔn’m be jɔlɛ. Yɛ sran kwlaa nga min ti ɔ yaci sɛ i awlo o, sɛ i niaan bian o, sɛ i niaan bla o, sɛ i si o, sɛ i nin o, sɛ i wa o, sɛ i asiɛ o, ɔ́ nyán be wunsu kpɛ ya, yɛ ɔ́ nyán anannganman nguan.” (Mat. 19:27-29) Piɛli nin i wiengu’m be nin Zezi bé wá dí famiɛn ɲanmiɛn su lɔ, yɛ bé yó klɔ sran’m be ye. I sɔ liɛ’n yɛ ɔ fata kɛ be bu i akunndan ɔn.

18. ?Kɛ e bu blɛ mɔ Zoova wá yía kasiɛ ng’ɔ boli be’n be nuan’n i akunndan titi’n, ngue ti yɛ i sɔ’n ti kpa ɔ?

¹⁸ Like suanlɛ nga nun’n, e wunnin like nga ti yɛ Zoova i sufuɛ’m be lafili i su kpa’n. Abɛli buli like nga Zoova wá yó’n i akunndan. Kɛ m’ɔ lafili Zoova su ti’n, ɔ yoli i klun sa. Abraamu buli blɛ nga i “osu’n” i wun ndɛ nga Zoova kannin’n, ɔ́ kpɛ́n su’n i akunndan. I sɔ’n ti, kannzɛ lika’n yoli kekle i su’n, sanngɛ i ɲin yili Zoova. (Bob. 3:15) Moizi buli “like ng’ɔ́ wá nyɛ́n i cɛn wie’n,” i akunndan titi. I sɔ’n ti’n, ɔ lafili Zoova su yɛ ɔ kloli i kpa. (Ebr. 11:26) Maan e kusu, e bu blɛ mɔ Zoova wá yía kasiɛ ng’ɔ boli be’n be nuan’n i akunndan titi. I liɛ’n, é láfi Zoova su yɛ é kló i kpa. Like suanlɛ ng’ɔ́ bá lɛ’n wá klé e ninnge wie mun ekun mɔ e kwla bu be akunndan’n.