?E kwla fa e klunklo ajalɛ? ?Annzɛ Ɲanmiɛn yɛ ɔ siesie sa kwlakwla-ɔ?
Ndɛ nga Biblu’n kan’n
Ɲanmiɛn buli e sran, afin ɔ mannin e atin kɛ e fa e klunklo ajalɛ. Ɔ maan nɛ́n i yɛ ɔ siesie sa nga be tɔ e su’n niɔn. Nian ndɛ nga Biblu’n kan’n.
Ɲanmiɛn yili klɔ sran mun kɛ i sa. (Bo Bolɛ 1:26) Nnɛn’m be liɛ’n, like kun yɛ ɔ se be kɛ be yo ninnge mun-ɔn. Sanngɛ e liɛ’n, ɔ timan sɔ. E ti kɛ e Yifuɛ’n sa, e kwla klo sran yɛ e kwla yo sa’n i nuan su sɛsɛ. Kpɛkun e kwla fa e klunklo ajalɛ kɛ e Yifuɛ’n sa.
Sɛ e liɛ yó ye e ɲrun lɔ annzɛ ɔ su yoman ye’n, ɔ o e sa nun. Biblu’n wla e fanngan kɛ e ‘fa [Ɲanmiɛn] i nuan ndɛ’n su’ yɛle kɛ e fɛ i mmla’m be su. I liɛ’n, ‘é ɲán nguan.’ (Mmla’n 30:19, 20) Ɲanmiɛn mianman e kɛ e fɛ i mmla’m be su. Sanngɛ i waan sɛ e klun klo su e fa su’n, e liɛ yó ye. I waan: “Sɛ ɔ ti kɛ amun sie amun su min mmla’m be bo sa’n, nn fɔundi nga amún dí’n, ɔ́ sónji kɛ nzue ba sa.”—Ezai 48:18.
Kɛ e yo like kun’n, sɛ ɔ́ yó ye annzɛ ɔ su yoman ye’n, nán Ɲanmiɛn yɛ ɔ siesie i sɔ liɛ’n niɔn. Sɛ e kunndɛ kɛ e ninnge’m be yo ye’n, ɔ fata kɛ e di junman kekle. Biblu’n se kɛ: “Like kwlaa nga á yó’n, fa ɔ wunmiɛn’n kwlaa gua su yo.” (Akunndanfuɛ’n 9:10) Ɔ se ekun kɛ: “Sran ng’ɔ bo i ɲin ase yo like’n, like ng’ɔ sunnzun kɛ ɔ́ yó’n, ɔ́ yó ye.”—Ɲanndra Mun 21:5.
Kɛ e kwla fa e klunklo ajalɛ’n, i sɔ’n ti like kpa kun yɛ Ɲanmiɛn fa cɛli e-ɔ. Afin e klun klo su e kwla ‘fa e awlɛn’n kwlaa’ e klo i.—Matie 22:37.
?Nán Ɲanmiɛn yɛ ɔ siesie sa kwlaa-ɔ?
Biblu’n kle kɛ Ɲanmiɛn kwla like kwlaa yo. Afin i tinmin’n cɛnnin. (Zɔbu 37:23; Ezai 40:26) Sanngɛ ɔ fɛmɛn i tinmin’n fa siesieman sa kwlaa nga be ju’n. I wie yɛle kɛ Biblu’n se kɛ ‘ɔ trɛli i awlɛn’ Babilɔninfuɛ mɔ be yoman sa kpakpa mun’n be wun. (Ezai 42:14) Andɛ kusu’n, ɔ te trɛ i awlɛn be nga be bɔbɔ be ɲinfu be yo be wiengu’m be abɔlɛ’n be wun wie. Ɔ su yoman sɔ titi.—Jue Mun 37:10, 11.
Ninnge wie mɔ be kwla yo ɔ fɛ ekun'n
SASAFUƐ TRANWLƐ'N
?Sran kun annzɛ like wie yɛ ɔ siesie e ɲrun lɔ sa mun-ɔn?
Sran sunman be kɔ wunnzue yifuɛ nin be nga be ti wun ase’n be sin. Asa’n, be sɔ be nannan nga be wuli’n yɛ be lafi su kɛ kɛ sran wu’n be wu i ekun. Afin be bu i kɛ sran kun annzɛ like wie yɛ ɔ siesie be ɲrun lɔ sa mun-ɔn.
BIBLU’N NUN NDƐ CINNJIN MUN
?E kwla tra Ɲanmiɛn i janvuɛ?
Kɛ ɔ fɛ i laa lele’n, sran’m be kunndɛ kɛ bé sí be Yifuɛ’n. Biblu’n kwla uka e naan y’a yo Ɲanmiɛn i janvuɛ. I janvuɛ tralɛ’n bo i bo nin i dunman’n i silɛ.
SASAFUƐ TRANWLƐ'N
Fa ajalɛ kun
Sran wie’m be bu i kɛ sa ng’ɔ ju be su’n, Ɲanmiɛn dun mmua siesieli be, naan be lemɛn i yowlɛ. ?Sanngɛ, be ndɛ sɔ’n ti su?
