Ikaduwang Cronica 11:1-23
11 Pagkaabot ni Rehoboam sa Jerusalem, tinipon niya tulos an mga lalaki kan tribo* ni Juda asin Benjamin,+ 180,000 na sinanay* na parapakilaban, tanganing makipaglaban sa Israel para maibalik ki Rehoboam an kahadian.+
2 Dangan an tataramon ni Jehova uminabot ki Semaias+ na lalaking lingkod kan tunay na Diyos, na an sabi:
3 “Sabihon mo sa hadi kan Juda na si Rehoboam na aki ni Solomon asin sa bilog na Israel na nasa Juda saka Benjamin,
4 ‘Ini an sabi ni Jehova: “Dai kamo makipaglaban sa saindong mga tugang. Magpuruli na kamo sa kanya-kanya nindong harong, ta ako an nagpangyari kaini.”’”+ Kaya sinunod ninda an tataramon ni Jehova asin nagpuruli sinda, asin dai na sinda nagsalakay ki Jeroboam.
5 Nag-istar si Rehoboam sa Jerusalem asin nagtugdok siya sa Juda nin mga siyudad na may matibay na depensa.
6 Kaya pinasarig niya an Betlehem,+ Etam, Tekoa,+
7 Bet-zur, Soco,+ Adulam,+
8 Gat,+ Maresah, Zif,+
9 Adoraim, Lakis,+ Azeka,+
10 Zora, Aijalon,+ asin Hebron.+ Iyan an mga siyudad na pinasarig niya sa Juda asin Benjamin.
11 Pinakusog man niya an mga siyudad na may matibay na depensa asin nagtalaga siya diyan nin mga komandante asin sinuplayan an mga iyan nin kakanon, lana, saka arak,
12 asin binugtakan niya nin darakulang kalasag saka mga garod* an gabos na manlain-lain na siyudad; pinakusog niyang marhay an mga iyan. Asin nagpadagos na nasa pamamahala niya an Juda asin Benjamin.
13 Nagharali sa gabos nindang teritoryo an mga saserdote saka an mga Levita na nasa bilog na Israel, asin kuminampi sa saiya.
14 Binayaan kan mga Levita an saindang mga pasabsaban saka mga pagsadiri+ asin nagpasiring sa Juda asin Jerusalem, huling si Jeroboam saka an mga aki niya pinahali sinda sa paglilingkod bilang mga saserdote ni Jehova.+
15 Dangan nagnombra si Jeroboam nin sadiri niyang mga saserdote para sa mga halangkaw na lugar+ asin para sa mga demonyo na itsurang kanding*+ asin para sa mga estatuwa nin ugbon na baka na ginibo niya.+
16 Asin an mga hali sa gabos na tribo nin Israel na determinado an puso na hanapon si Jehova na Diyos kan Israel nagsurunod sa mga saserdote saka mga Levita pasiring sa Jerusalem tanganing mag-atang ki Jehova na Diyos kan saindang mga apuon.+
17 Sa laog nin tulong taon, pinakusog ninda an kahadian kan Juda asin sinuportaran si Rehoboam na aki ni Solomon, huling naglakaw sinda sa dalan ni David asin ni Solomon sa laog nin tulong taon.
18 Dangan inagom ni Rehoboam si Mahalat na aki ni Jerimot na aki ni David. An ina ni Mahalat iyo si Abihail na aki ni Eliab+ na aki ni Jesse.
19 Pag-abot nin panahon, nagkaigwa siya nin mga aki ki Mahalat: si Jeus, Semarias, asin Zaham.
20 An sunod niyang inagom iyo si Maaca na makuapo ni Absalom.+ Pag-abot nin panahon, nagkaigwa siya nin mga aki ki Maaca: si Abias,+ Atai, Ziza, asin Selomit.
21 Mas namutan ni Rehoboam si Maaca na makuapo ni Absalom kisa sa gabos na iba pa niyang agom saka sekondaryong agom;*+ 18 kaya an agom niya saka 60 an saiyang sekondaryong agom, asin nagkaigwa siya nin 28 aking lalaki saka 60 aking babayi.
22 Kaya ninombrahan ni Rehoboam si Abias na aki ni Maaca na magin pamayo asin lider kan saiyang mga tugang, ta plano niyang gibuhon siyang hadi.
23 Alagad, huminiro siyang may pakasabot asin isinugo* niya an nagkapira sa saiyang mga aking lalaki pasiring sa gabos na rehiyon kan Juda asin Benjamin, sa gabos na siyudad na may matibay na depensa,+ asin tinawan niya sinda nin abundang probisyon saka ikinua nin dakul na agom.
Mga Nota
^ Sa literal, “an harong.”
^ Sa literal, “pinili.”
^ O “budyak.”
^ Sa literal, “sa mga kanding.”
^ Sa Ingles, concubine.
^ O “sinuruway-suway.”
