Ikaduwang Cronica 31:1-21
31 Kan matapos na ninda an gabos na ini, an gabos na Israelita na yaon duman nagpasiring sa mga siyudad kan Juda, asin pinarasa ninda an mga sagradong harigi,+ pinurutol an mga sagradong poste,*+ asin ginaraba an mga halangkaw na lugar+ saka an mga altar+ sa bilog na Juda asin Benjamin, siring man sa Efraim asin Manases,+ sagkod na malaglag ninda iyan gabos. Pagkatapos kaiyan, an gabos na Israelita nagbaralik sa saindang mga siyudad, sa kanya-kanya nindang pagsadiri.
2 Dangan inareglar ni Hezekias an mga saserdote sigun sa saindang mga dibisyon+ asin an mga Levita sigun sa saindang mga dibisyon,+ an kada saserdote asin Levita sigun sa asignasyon ninda nin paglilingkod,+ tanganing mag-atang nin mga dulot na pigtututong saka nin mga atang sa pakikikabtang, tanganing maglingkod asin tanganing magpasalamat saka mag-umaw sa may mga trangkahan kan mga patyo* ni Jehova.+
3 Sarong porsiyon kan mga pagsadiri kan hadi an itinao bilang mga iaatang na mga dulot na pigtututong,+ kaiba an pang-aga asin pambangging mga dulot,+ siring man an mga dulot na pigtututong para sa mga Sabbath,+ mga bagong bulan,+ asin mga kapiyestahan,+ sigun sa kun ano an nakasurat sa Katugunan ni Jehova.
4 Dugang pa, ipinagbuot niya sa mga nag-iistar sa Jerusalem na itao sa mga saserdote asin sa mga Levita an kahirasan para sa sainda+ tanganing masunod na marhay kan mga ini an* katugunan ni Jehova.
5 Pagkatapos tulos na mailuwas an pagbuot, nagtao an mga Israelita nin dakulon na inot na bungang mga tipasi, bagong arak, lana,+ saka tangguli,* asin nin gabos na produkto sa uma;+ kadakul nindang dinarang ikasampulong kabtang kan gabos na bagay.+
6 Asin an mga tawo kan Israel asin Juda na nag-iistar sa mga siyudad kan Juda nagdara man nin ikasampulong kabtang kan saindang mga baka saka karnero asin ikasampulong kabtang kan mga banal na bagay+ na pinabanal para ki Jehova na saindang Diyos. Nagdarara sinda kaiyan asin tinipon ninda iyan sa kadakul na tambak.
7 Kan ikatulong bulan+ sinda nagpuon na magtambak kan saindang mga kontribusyon; asin natapos sinda kan ikapitong bulan.+
8 Kan mag-abot si Hezekias saka an mga pamayo* asin mahiling an mga nakatambak, inumaw ninda si Jehova asin binendisyunan an saiyang banwaan na Israel.
9 Hinapot ni Hezekias sa mga saserdote asin sa mga Levita an manungod sa mga nakatambak,
10 asin nagsimbag sa saiya an panginot na saserdoteng si Azarias hali sa pamilya* ni Zadok: “Puon kan magdara sinda nin mga kontribusyon sa harong ni Jehova,+ nagkarakan an banwaan sagkod na mabasog asin kadakul pa man giraray kan nagin sobra, huling binendisyunan ni Jehova an saiyang banwaan, asin an kadakul na ini iyo su nagkatarada.”+
11 Kaya sinabi ni Hezekias sa sainda na mag-andam nin mga kuwartong sarayan*+ sa harong ni Jehova, kaya iinandam ninda an mga iyan.
12 Padagos sindang maimbod na nagdara nin mga kontribusyon, nin mga ikasampulong kabtang,*+ asin nin mga banal na bagay; si Conanias na Levita an itinalagang mamahala sa mga iyan, asin an tugang niyang si Simei an ikaduwa sa saiya.
13 Si Jehiel, Azazias, Nahat, Asahel, Jerimot, Jozabad, Eliel, Ismakias, Mahat, asin Benaias an mga opisyal na nagtatabang ki Conanias asin sa tugang niyang si Simei, sigun sa ipinagbuot ni Hading Hezekias, asin si Azarias an namamahala sa harong kan tunay na Diyos.
14 Asin an mga gikan-sa-buot na dulot+ para sa tunay na Diyos ipinamahala ki Kore na aki ni Imnah, an Levitang bantay sa trangkahan sa bandang sirangan,+ asin siya an nagdidistribwir kan kontribusyon na itinatao para ki Jehova+ asin kan mga kabanal-banaling bagay.+
15 Asin nasa pamamahala niya si Eden, Miniamin, Jesua, Semaias, Amarias, asin Secanias, na nasa mga siyudad kan mga saserdote.+ Sinda an mga pinagtiwalaan na magdistribwir nin pantay-pantay sa saindang mga tugang na nasa mga dibisyon,+ gurang man o hoben.
16 Apuwera pa ini sa mga idinidistribwir sa mga lalaking minapasiring sa harong ni Jehova aroaldaw tanganing maglingkod saka tanganing gibuhon an mga asignasyon kan saindang mga dibisyon asin sa mga idinidistribwir sa mga aki nindang tres anyos pataas; gabos sinda nakalista sa rekord nin mga ginikanan.
17 An mga saserdote siring man an mga Levitang 20 anyos pataas+ nakalista sa rekord nin mga ginikanan sigun sa saindang angkan+ asin sigun sa mga asignasyon kan mga dibisyon ninda.+
18 Kaibang nakalista sa rekord nin mga ginikanan an gabos nindang saradit na aki, an saindang mga agom, mga aking lalaki, asin mga aking babayi, an bilog nindang katiripunan.* (Pirmi nindang sinisigurado na nakapagpabanal sinda huling ipinagkatiwala sa sainda an banal na mga gibuhon.)
19 Nakalista man an mga gikan ni Aaron—an mga saserdoteng nakaistar sa mga pasabsaban na nakapalibot sa mga siyudad ninda.+ Sa gabos na siyudad na iyan, may mga lalaking pinili asin inasignaran na magdistribwir nin mga kahirasan sa mga saserdote asin sa gabos na nakalista sa rekord nin mga ginikanan kan mga Levita.
20 Iyan an ginibo ni Hezekias sa bilog na Juda, asin padagos niyang ginibo kun ano an marahay asin tama sa paghiling ni Jehova na saiyang Diyos, saka nagdanay siyang maimbod sa saiya.
21 Asin an lambang gibuhon na isinagibo niya tanganing hanapon an saiyang Diyos, may koneksiyon man ini sa paglilingkod sa harong kan tunay na Diyos+ o sa Katugunan saka sa pagbuot, isinagibo niya nin bilog na puso, asin nagin mapanggana siya.
Mga Nota
^ Sa literal, “kampo.”
^ O “tanganing lubos na maidusay kan mga ini an saindang sadiri sa.”
^ O “dugos.” Minalataw na bako ining hali sa putyukan kundi sa tagok, o duga, nin prutas.
^ O “prinsipe.”
^ Sa literal, “harong.”
^ O “kuwartong kakanan.”
^ O “ikapu.”
^ O “kongregasyon.”
