Talinhaga 5:1-23
5 Aki ko, tawan mong atensiyon an sakong kadunungan.
Magdangog kang marhay* sa sakong pakasabot,+
2 Tanganing mabantayan mo an saimong mga kakayahan na mag-isipAsin maingatan kan saimong mga ngabil an kaaraman.+
3 Huli ta an mga ngabil nin babaying pakawala* siring sa anira na may nagtuturong tangguli,*+Asin an nguso niya mas mahalnas pa kisa sa lana.+
4 Alagad sa kahuri-hurihi, kasingpait siya nin tanom na ahenho*+Asin kasingtarom nin espadang mag-inibong an tarom.+
5 An saiyang mga bitis pababa sa kagadanan.
An saiyang mga lakad diretso sa Lubungan.*
6 Dai niya pinag-iisipan an dalan nin buhay.
Sige niyang lagaw-lagaw asin dai niya aram kun sain maduman.
7 Kaya, mga aki ko, magdangog kamo sa sakoAsin dai kamo sumuway sa mga sinasabi ko.
8 Rumayo ka sa saiya;Dai ka magrani sa entrada kan harong niya,+
9 Tanganing dai mo maiwara an respeto kan iba+Ni mag-ani nin mga taon nin pagdusa;+
10 Tanganing dai ubuson nin mga estranghero an saimong kayamanan*+Asin an pinagpagalan mo dai mapaduman sa harong nin sarong dayuhan.
11 Ta kun dai, maagrangay ka sa katapusan kan saimong buhayPag an saimong laman asin hawak* mangruluya na+
12 Asin magsabi ka: “Kun dai ko kuta ikinaungis an disiplina!
Kun dai kuta hinamak kan puso ko an pagsagwi!
13 Dai ako nagdangog sa boses kan sakong mga instruktorO nagtaong atensiyon sa sakong mga paratukdo.
14 Naggagati-gati na ako sa lubos na kapahamakanSa tahaw kan bilog na katiripunan.”*+
15 Mag-inom ka nin tubig hali sa sadiri mong kalot na istakanAsin nin nagsusulog na tubig* hali sa sadiri mong bubon.+
16 Dapat daw na makawarak sa luwas an saimong mga burabodAsin makawarak sa mga plasa an saimong mga tubig na nagbubulos?+
17 Magin para sana sa saimo an mga iyan,Asin bakong para sa mga estranghero na saimong kaibanan.+
18 Lugod na bendisyunan an saimong burabod,*Asin lugod na maggaya-gaya ka sa babaying agom mo na puon kan hoben ka pa,+
19 Sarong mapagpadabang babaying usa, sarong magayon na kanding-bukid.*+
Lugod na an saiyang daghan makapaugma sa saimo* sa gabos na panahon.
Lugod na pirmi kang mabihag kan saiyang pagkamuot.+
20 Kaya aki ko, taano ta magpapaakit ka sa babaying pakawala*O makugos sa babaying imoral?*+
21 Huli ta an mga dalan nin tawo nasa atubangan ni Jehova;Sinisiyasat Niya an gabos na agihan niya.+
22 An sarong maraot nasisilo kan sadiri niyang mga pagkakasala,Asin madadakop siya sa mga lubid kan sadiri niyang kasalan.+
23 Magagadan siya huli sa kawaran nin disiplinaAsin malalagalag huli sa sobrang kamangmangan niya.
Mga Nota
^ Sa literal, “Ikiling mo an saimong talinga.”
^ O “dugos.”
^ O “kusog.”
^ O “lawas.”
^ Sa literal, “Sa tahaw kan katiripunan asin kan kongregasyon.”
^ O “nin preskong tubig.”
^ O “gikanan nin tubig.”
^ O “magtao sa saimo nin masiramon na pagmati.”
^ O “ibex.”
