Imahinara an eksenang ini: Nagmamaneho si David sa sarong lugar na sa hiling niya dai na niya kabisado. Namalisyahan niyang salá su nadumanan niyang lugar ta iba man an nakasurat sa mga karatula saka iba man an mga nahihiling niya sa palibot. Nawawara siya. Siguradong may salá siyang piglikuan kasubago.

Kun ika si David, ano an gigibuhon mo?

Igwa ka nin pirang pagpipilian:

1. Maghapot sa iba kan tamang direksiyon.

2. Maghiling sa mapa, o gumamit nin GPS.

3. Magdiretso ka sana sa pagmaneho, na nag-aasang makukua mo man sana su tamang dalan.

Siyempre, an Opsiyon C an pinakadai makakatabang.

An Opsiyon B an mas may bentaha kisa sa inot. Tutal, puwede ka man talagang maghiling sa mapa o gumamit nin GPS mantang nagbibiyahe para makatabang sa saimo na itukdo an tamang direksiyon.

Kaagid man kaiyan an maitatabang sa saimo kan Bibliya!

An pinakapigbabakal na librong ini puwedeng

• giyahan ka pag may problema ka

• tabangan kang mamidbid an saimong sadiri asin magin mas marahay na tawo

• ipahiling sa saimo kun paano ka magkakaigwa nin pinakamaugmang buhay

Puon kan makataram kita, dakul na kitang mga hapot.

• Taano ta asul an langit?

• Sain hali an mga bituon?

Pagdakula ta, naghahapot na kita kan mga bagay manungod sa mga nangyayari sa kinaban.

• Taano ta may mga nangyayaring maraot?

• Taano ta nagagadan an tawo?

Paano kun an simbag haloy na palan na yaon sa Bibliya?

Dakul an nagsasabi na an Bibliya puro sana mga uruistorya, kaidto pa daa iyan, o dipisilon daang intindihon. Pero an Bibliya daw talaga an problema, o an nadangog ninda manungod sa Bibliya? Salá daw na impormasyon an nakua ninda?

Halimbawa, an huna ninda sinasabi sa Bibliya na an Diyos an nagkokontrol sa kinaban. Pero paano iyan mangyayari? Maribok an kinaban! Pano ini nin mga pagsakit, hilang asin kagadanan, pagtios saka kalamidad. Dai puwedeng mamumuton na Diyos an may kagigibuhan kan gabos na ini.

Gusto mo daw na maaraman an simbag? Tibaad mangalas ka sa sinasabi kan Bibliya manungod sa kun siisay an nagkokontrol sa kinaban!

Nariparo mo gayod na an mga pagirumdom sa brosyur na ini basado sa Bibliya. Kumbinsido an Mga Saksi ni Jehova na an Bibliya nagtatao nin masasarigan na giya. An dahilan iyo na iyan “ipinasabong nin Diyos asin kapaki-pakinabang sa pagtukdo, sa pagsaway, sa pagtanos kan mga bagay-bagay.” (2 Timoteo 3:16, 17) Kaipuhan mo talagang pag-adalan an suanoy pero modernong librong ini!