PAKATAPOS kan panahon ni Samson, si Samuel naglingkod bilang propeta asin hokom sa Israel. Nagpaparasabi sa saiya an mga Israelita na gusto nindang magin arog kan ibang mga nasyon asin magkaigwa nin tawong hade na mamamahala sa sainda. Minsan ngani an kahagadan na ini insulto ki Jehova, sinabihan nia si Samuel na sunodon iyan. Pinili nin Dios na magin hade an sarong mapakumbabang lalaki na an ngaran Saul. Pero pag-abot nin panahon, si Hadeng Saul nagin maabhaw asin bakong makinuyog. Isinikwal sia ni Jehova bilang hade asin sinabi Nia ki Samuel na magnombra nin iba​—an sarong hoben na lalaki na an ngaran David. Pero, maagi pa an mga taon bago magin hade si David.

Posibleng marhay na kan tinedyer pa si David, dinalaw nia an mga tugang niang lalaki na kabilang sa hukbo ni Saul. An bilog na hukbo natakot sa sarong parapakilaban kan kaiwal, an higante na an ngaran Goliat, na padagos na nagduduhagi sa sainda asin sa saindang Dios. Huling naanggot na gayo si David, inako nia an angat kan higante na maglaban sindang duwa. Minsan ngani an armas sana kan hoben na lalaki sarong lagpitaw asin pira sanang gapo, hinampang nia an saiyang kalaban, na haros tolong metro an langkaw. Kan tuyatuyaon ni Goliat si David, sia nagsimbag na nakakalabi an armas nia kisa kan sa higante, huling si David nakikipaglaban sa ngaran ni Jehova Dios! Pinabagsak ni David si Goliat paagi sa saro sanang gapo dangan pinugotan nia ini paagi sa espada mismo kan higante. An hukbo nin mga Filisteo nagdurulag huli sa grabeng takot.

Kan primero, hinangaan ni Saul an kosog nin boot ni David asin ibinugtak nia an hoben na lalaking ini na iyo an mangenot sa saiyang hukbo. Alagad si Saul nauri nin grabe huli sa mga panggagana ni David. Kinaipuhan ni David na dumulag tanganing iligtas an saiyang buhay asin mamuhay bilang dulag sa laog nin dakol na taon. Sa ibong kaiyan, si David nagdanay na maimbod sa hade na nagmamaigot na gadanon sia, na nangangatanosan na si Hadeng Saul ninombrahan ni Jehova Dios. Sa katapustapusi, si Saul nagadan sa ralaban. Dai nahaloy pakatapos kaiyan, si David nagin hade, siring kan ipinanuga ni Jehova.

Bilang hade, mawot na marhay ni David na magtogdok nin templo para ki Jehova. Minsan siring, sinabi ni Jehova ki David na saro sa mga magikan sa saiya an magibo kaiyan. Sia palan iyo an aki ni David na si Salomon. Pero, binalosan nin Dios si David paagi sa nakakapukaw sa boot na pakipagtipan sa saiya: Magikan sa saiyang lahi an sarong dinastiya nin mga hade na daing kapareho. Sa katapustapusi, magikan dian an Paraligtas, o Banhi, na ipinanuga sa Eden. Sia iyo an magigin Mesiyas, na nangangahulogan na “Linahidan,” ninombrahan nin Dios. Ipinanuga ni Jehova na an Mesiyas an magigin Namamahala sa gobyerno, o Kahadean, na magdadanay sagkod lamang.

Huli sa odok na pagpasalamat, si David nagtipon nin kadakol na materyales sa pagtogdok asin mahal na marhay na mga metal para sa itotogdok na templo. Sia naggibo man nin dakol na ipinasabong na salmo. Kan madali nang magadan si David, sia nagsabi: “An espiritu ni Jehova iyo an nagtaram paagi sa sako, asin an saiyang tataramon namugtak sa sakong dila.”​—2 Samuel 23:2.

​—Basado sa 1 Samuel; 2 Samuel; 1 Cronica; Isaias 9:7; Mateo 21:9; Lucas 1:32; Juan 7:42.