“Ipagkatiwala Mo an mga Ini sa Masasarigan na mga Lalaki”
“Ipagkatiwala mo an mga ini sa masasarigan na mga lalaki, asin sinda man magigin lubos na kuwalipikado na magtukdo sa iba.”—2 TIM. 2:2.
KANTA: 123, 53
1, 2. Paano minamansay nin dakul na tawo an saindang trabaho?
SA PARATI, an pagmansay nin dakul na tawo sa saindang sadiri nakadepende sa kun ano an saindang trabaho. Para sa sainda, nakadepende sa posisyon o klase nin trabaho kun baga mahalaga o bakong mahalaga an sarong tawo. Sa ibang kultura, pag nakikimidbidan sa iba, an saro sa inot nindang ihinahapot, “Ano an trabaho mo?”
2 Kun minsan ipinapamidbid kan Bibliya an mga tawo paagi sa pagsambit kan saindang trabaho. Halimbawa, sinambit kaiyan “si Mateo na parasingil nin buhis”; si “Simon, sarong paragibo nin balát”; asin “si Lucas, an namumutan na doktor.” (Mat. 10:3; Gibo 10:6; Col. 4:14) Sinasambit man minsan sa Bibliya kun ano an pribilehiyo o asignasyon kan mga tawo, arog ni Hading David, propeta Elias, asin apostol Pablo. Pinahalagahan kan mga lalaking ini an asignasyon na itinao sa sainda nin Diyos. Dapat man na pahalagahan niyato an ano man na pribilehiyo ta sa paglilingkod ki Jehova.
3. Taano ta kaipuhan na sanayon kan may edad nang mga brother an mas hoben na mga brother? (Hilingon an ritrato sa itaas.)
3 Dakul sa sato an gustong-gusto an satong teokratikong mga asignasyon asin gusto niyatong danay na ginigibo iyan. Pero makamumundo, puon kan panahon ni Adan, naggugurang an kada henerasyon asin nasasalidahan nin bago. (Par. 1:4) An pagbabagong ini nagreresulta sa kakaibang kadipisilan para sa tunay na mga Kristiyano. Nagigin mas mahiwas an gibuhon na paghuhulit kan mga lingkod ni Jehova sa ngunyan, asin minagamit an organisasyon nin bagong mga pamamaagi arog kan modernong teknolohiya tanganing maipaabot sa pinakadakul na tawo an maugmang bareta. Pero kun minsan, nadidipisilan an nagkapirang may edad nang mga brother na makasabay sa mga pagbabagong ini. (Luc. 5:39) Kun bako man totoo ini sa ibang may edad na, mas may kusog asin enerhiya an mas hoben na mga brother kisa sa sainda. (Tal. 20:29) Kaya, mamumuton nanggad asin praktikal kun sasanayon na kan may edad nang mga brother an mas hoben na mga brother tanganing magsaabaga nin dugang na paninimbagan sa kongregasyon.—Basahon an Salmo 71:18.
4. Taano ta nadidipisilan an iba na magdelegar? (Hilingon an kahon na “ Kun Taano ta Habo kan Iba na Magdelegar.”)
4 Dipisil minsan sa mga nasa katungdan na magdelegar nin paninimbagan sa mga mas hoben. Natatakot an iba na tibaad mawara sa sainda an katungdan na pinakamamahal ninda. Nahahadit man an iba na tibaad magkaproblema kun bako sinda an magibo kan asignasyon. Tibaad sabihon man kan iba na mayo sindang panahon para sanayon an iba. Sa ibong na lado, dapat man na matiyagang maghalat an mas hoben na mga brother kun dai pa sinda natatawan nin dugang na paninimbagan.
5. Anong mga hapot an sisimbagon ta sa artikulong ini?
5 Pag-ulayan ta sa duwang anggulo an dapit sa pagdelegar—sa lado kan mga may edad na asin sa lado kan mas hoben na mga brother. Inot, paano matatabangan kan mga may edad na an mga mas hoben na magsaabaga nin dugang na paninimbagan, asin taano ta mahalaga ini? (2 Tim. 2:2) Ikaduwa, taano ta mahalaga na danay na magkaigwa nin tamang sabuot an mga mas hoben mantang nagtatabang asin nakakanuod sinda sa mas eksperyensiyado nang mga brother? Punan ta paagi sa pagtukar kun paano sinanay ni Hading David an saiyang aki para sa sarong mahalagang paninimbagan.
SINANAY ASIN TINABANGAN NI DAVID SI SOLOMON
6. Ano an gustong gibuhon ni Hading David, asin ano an simbag ni Jehova dapit diyan?
6 Pagkatapos nin pirang taon na pagburubalyo nin lugar kan siya magdulag, nagin hadi si David asin nag-istar sa sarong komportableng harong. Huling nahiling niyang mayo nin “harong” o templo para ki Jehova, gustong-gusto niyang magtugdok nin saro para idusay sa Saiya. Kaya sinabi niya ki Natan na propeta: ‘Uya nag-iirok ako sa harong na mga sedro, pero an kaban nin tipan ni Jehova [yaon sa sirong kan mga tahob nin tolda].’ Nagsimbag si Natan: ‘Gibuha an gabos na yaon sa saimong puso, huli ta yaon sa saimo an Diyos.’ Pero, iba an simbag ni Jehova. Sinabi niya ki Natan na sabihon ki David: ‘Bako ika an mapatindog sakuya nin harong na sakuyang iirukan.’ Dawa ngani siniyerto ni Jehova ki David na padagos niya ining bebendisyunan, sinabi niya na an aki ni David na si Solomon an matugdok nin templo para sa Saiya. Ano an nagin reaksiyon ni David?—1 Cron. 17:1-4, 8, 11, 12; 29:1.
7. Ano an nagin reaksiyon ni David sa pagbuot ni Jehova?
7 Dai ipinanguri ni David an saiyang tabang, ni pigparaisip an nawarang pagkakataon na maitao sa saiya an onra sa pagtugdok kan templo. Asin iyo man nanggad, an edipisyong iyan namidbid bilang templo ni Solomon, bakong templo ni David. Pero dawa tibaad disganadong marhay si David na dai nagkatotoo an mawot kan saiyang puso, sinuportaran niya an proyekto. Inorganisar niya an mga trabahador asin nagtipon siya nin lansang o batbat, tanso, plata, bulawan, asin mga kahoy na sedro. Dugang pa, pinakusog niya an buot ni Solomon na sinasabi: ‘Ngunyan, aki ko, mapasaimo lugod si Jehova, asin [magin mapanggana] ka lugod, asin patindugon mo an harong ni Jehova na saimong Diyos, siring sa sinabi niya dapit sa saimo.’—1 Cron. 22:11, 14-16.
8. Taano ta puwede kutanang inisip ni David na dai kuwalipikado si Solomon, pero ano an ginibo ni David?
8 Basahon an 1 Cronica 22:5. Puwede kutanang inisip ni David na dai kuwalipikado si Solomon na magkapot nin arog kaiyan kaimportanteng proyekto. Dapat na magin ‘nakakalabing marhay an kagayunan’ kan templo, asin kan panahon na iyan, si Solomon hoben pa asin daing eksperyensiya. Pero, aram ni David na tatabangan ni Jehova si Solomon para maisagibo an asignasyon na itinao Niya digdi. Kaya nagpokus si David sa kun ano an magigibo niya para tabangan an saiyang aki sa pagpreparar kan kadakul na materyales na kakaipuhanon.
MAGIGIN MAUGMA KA SA PAGSASANAY SA IBA
Nakakaugma nanggad na mahiling an mas hoben na mga brother na nagsasaabaga nin dugang na paninimbagan (Hilingon an parapo 9)
9. Paano magigin maugma an may edad nang mga brother sa pagpasa nin paninimbagan sa mga mas hoben? Magtao nin ilustrasyon.
9 Dai dapat pangluyahan nin buot an may edad nang mga brother pag kaipuhan nang ipasa sa mas hoben na mga brother an saindang mga asignasyon. Imbes, kun sinasanay an mga hoben na mag-asikaso nin mga paninimbagan, para iyan sa pinakaikakarahay kan satong gibuhon. Dapat na ikaugmang marhay kan nombradong mga lalaki pag an mga hoben na sinanay ninda magin kuwalipikado nang isaabaga an asignasyon. Bilang ilustrasyon: Isipa an sarong ama na tinutukduan an saiyang aki na magmaneho nin awto. Kan sadit pa an aki, inoobserbaran lang niya an saiyang ama. Kan magdakula na an aki, ipinapaliwanag na sa saiya kan ama kun ano an ginigibo kaini. Dangan, pag umabot na sa tamang edad an aki, nagpupuon na siyang magmaneho mantang nagtatao nin dugang pang instruksiyon an saiyang ama. Maabot an panahon na magigin turnuhan na sinda sa pagmamaneho pero sa kahuri-hurihi, an aki na an mas parating magmamaneho para sa saiyang naggugurang nang ama. Siyertong mauugma an ama sa saiyang aki huling siya na an ipinagmamaneho kaini. Sa kaagid na paagi, magigin maugma man an may edad nang mga brother pag sinanay ninda an mas hoben na mga brother na mag-asikaso kan teokratikong mga paninimbagan.
10. Ano an pagmansay ni Moises kun dapit sa pagkaigwa nin onra asin awtoridad?
10 Bilang may edad nang mga brother, dapat kitang mag-ingat na dai mag-imon kun natatawan nin asignasyon an iba. Mangnuha an nagin reaksiyon ni Moises kan may mga minagawi na siring sa mga propeta sa kampo nin Israel. (Basahon an Bilang 11:24-29.) Gusto sindang pugulan kan katabang ni Moises na si Josue. Minalataw na inisip kaini na inaagaw ninda an pagigin prominente asin an awtoridad ni Moises. Pero sinabi ni Moises: ‘[Nag-iimon] ka para sa sakuya? [Dai], buuton lugod nin Diyos na magin mga propeta an bilog na banwaan ni Jehova, asin na ibugtak lugod sa sainda ni Jehova an saiyang espiritu!’ Aram ni Moises na si Jehova an nasa likod kan mga nangyari. Imbes na magmawot nin kaumawan sa sadiri, ipinahayag ni Moises na kun puwede sana kutana, gusto niyang tawan man ni Jehova kan balaog na espiritu an gabos Niyang lingkod. Arog ni Moises, nauugma man daw kita pag nag-ako an iba nin mga pribilehiyo na tibaad dapat kutanang para sa sato?
11. Ano an sinabi nin sarong brother mapadapit sa pagpasa niya kan saiyang paninimbagan?
11 Sa ngunyan, kadakul kitang halimbawa nin mga brother na mga dekadang mahigos na nagsaabaga nin mga asignasyon asin sinanay an iba na mag-asikaso nin dugang pang mga paninimbagan. Halimbawa, sarong brother, na an pangaran Peter, an labing 74 taon na naglingkod nin bilog na panahon; an 35 taon kaiyan ginamit niya sa paglilingkod sa sangang opisina sa Europa. Dakul na taon siyang naglingkod bilang paraataman kan Service Department. Pero ngunyan, itinao na an asignasyon na iyan ki Paul, sarong mas hoben na brother na pirang taon na nakatrabaho ni Peter. Kan haputon si Peter kun ano an masasabi niya sa pagbabagong ini sa asignasyon, sinabi niya: “Nauugma ako ta may mga brother na sinanay na mag-ako nin mas dakulang paninimbagan saka mahuhusay sa pag-asikaso sa saindang trabaho.”
PAHALAGAHAN AN MGA MAY EDAD NA
12. Anong leksiyon an dapat tang manudan sa istorya kan Bibliya dapit ki Rehoboam?
12 Pagkagadan ni Solomon, an saiyang aking si Rehoboam an nagsalida sa saiya bilang hadi. Kan kaipuhan ni Rehoboam nin suhestiyon sa kun paano niya isasagibo an saiyang mga paninimbagan, inot niyang dinulok an mga kamagurangan. Pero dai niya sinda sinunod! Imbes, an sinunod niya iyo an suhestiyon kan mas hoben na mga lalaking kaedad niya, na ngunyan saiya nang mga katabang. Kapaha-pahamak an nagin resulta. (2 Cron. 10:6-11, 19) An leksiyon? Sarong kadunungan na hagadon asin ikonsiderar an suhestiyon kan eksperyensiyado nang mga may edad na. Dawa dai man dapat maobligar an mga mas hoben na gibuhon an mga bagay-bagay uyon sa kun paano iyan eksaktong isinasagibo kan nakaagi, dai sinda dapat tulos maghidaling sayumahan an itinataong suhestiyon kan mga may edad na.
13. Ano an madunong na gibuhon nin mas hoben na mga brother kun kaibanan ninda sa gibuhon an may edad nang mga brother?
13 Tibaad an ibang mas hoben na brother iyo na an nagdidirehir ngunyan sa mga gibuhon, kaiba na an mga gibuhon kan may edad nang mga brother. Pero dawa arog kaiyan, sarong kadunungan na hagadon an suhestiyon kan eksperyensiyado asin may edad nang mga brother bago gumibo nin desisyon. Si Paul, na nasambitan kasubago, na nagsalida ki Peter bilang paraataman kan Service Department, nagsabi: “Talagang tinatawan ko nin panahon na maghagad nin suhestiyon ki Kuya Peter, saka dinadagka ko man an iba sa departamento na arog man kaiyan an gibuhon.”
14. Ano an manunudan niyato sa pagtinabangan ni Timoteo asin ni apostol Pablo?
14 Si Timoteo sarong mas hoben na lalaki na nakaibanan ni apostol Pablo sa gibuhon nin dakul na taon. (Basahon an Filipos 2:20-22.) Nagsurat si Pablo sa mga taga Corinto: “Isinusugo ko diyan sa saindo si Timoteo, huli ta siya an sakuyang namumutan asin maimbod na aki sa paglilingkod sa Kagurangnan. Ipapagirumdom niya sa saindo an sakuyang mga pamamaagi kun manungod sa paglilingkod ki Cristo Jesus, siring kan ginigibo ko sa sakong pagtutukdo sa lambang kongregasyon sain man na lugar.” (1 Cor. 4:17) Mahihiling sa halipot na tataramon na ini an dayupot na pagtinabangan ni Pablo asin Timoteo. Nagtao nin panahon si Pablo tanganing itukdo ki Timoteo an saiyang “mga pamamaagi kun manungod sa paglilingkod ki Cristo Jesus.” Nakanuod na marhay si Timoteo saka namutan siya ni Pablo, asin nagtiwala si Pablo na matatabangan ni Timoteo an mga tugang sa Corinto sa saindang espirituwal na mga pangangaipo. Magayon nanggad na halimbawa ini para sa mga elder ngunyan mantang sinasanay ninda an iba na mangataman sa kongregasyon!
GABOS KITA MAY MAHALAGANG KABTANG
15. Paano kita matatabangan kan sadol ni Pablo sa mga Kristiyano sa Roma kun magin apektado kita kan mga pagbabago?
15 Nakakaugma nanggad na mahiling sa panahon niyato na nag-uuswag sa dakul na paagi an daganon na kabtang kan organisasyon ni Jehova. Pero an pag-uswag na ini nangangaipo man nin pagbabago. Kun magin apektado kita kan mga pagbabagong ini, lugod na magin kitang mapakumbaba asin magpokus bako sa kun ano an ikakarahay niyato kundi an ikakarahay kan gibuhon na pang-Kahadian. Kun gigibuhon ta ini, mapagdadanay niyato an pagkasararo. Si Pablo nagsurat sa mga Kristiyano sa Roma: “Sinasabihan ko an lambang saro diyan sa saindo na dai magin sobra an hiling sa sadiri, kundi ipahiling nindo na igwa kamo nin tultol na isip, uyon sa pagtubod na itinao nin Diyos sa kada saro sa saindo. Huli ta kun paanong an sarong hawak igwa nin dakul na kabtang, alagad an mga kabtang na iyan bakong parareho an gamit, kita man, maski dakul, sarong hawak na kasaro ni Cristo, alagad bilang mga indibidwal, kita mga kabtang na magkakoronektar sa lambang saro.”—Roma 12:3-5.
16. Ano an magigibo kan mga may edad na asin mas hoben na mga brother pati kan agom ninda tanganing magdanay na matuninong saka nagkakasararo an organisasyon ni Jehova?
16 Kaya, ano man an kamugtakan niyato, lugod na maghinguwa kitang mas mapauswag an intereses kan kahanga-hangang Kahadian ni Jehova. Kamo na mga may edad nang brother, tabi sanayon an mga mas hoben sa saindo na manudan kun ano an saindong ginigibo. Kamo na mas hoben na mga brother, mag-ako nin paninimbagan, magin hababa an buot, asin danay na irespeto an mga may edad na. Asin kamo na mga agom na babayi, tabi na arugon si Priscila, an agom ni Aquila, na maimbod na inibanan asin sinuportaran an saiyang agom kan magbago an saindang kamugtakan.—Gibo 18:2.
17. Anong pagtitiwala igwa si Jesus para sa saiyang mga disipulo, asin sa anong gibuhon niya sinda sinanay?
17 Si Jesus an nagtao kan pinakamarahay na halimbawa kun dapit sa pagsasanay sa iba na magsaabaga nin dugang pang paninimbagan. Aram niya na matatapos an saiyang ministeryo sa daga asin iba na an mapadagos kan saiyang gibuhon. Dawa bakong perpekto an saiyang mga disipulo, nagtiwala siya sa sainda asin sinabi sa sainda na magibo sinda nin mga bagay na labi pa kisa kan nagibo niya. (Juan 14:12) Sinanay niya sindang marhay, asin pinalakop ninda an maugmang bareta sa gabos na nasyon sa kinaban na aram ninda kaidto.—Col. 1:23.
18. Anong paglaom an naghahalat sa sato, asin anong gibuhon an igwa kita sa ngunyan?
18 Pagkatapos niyang magadan bilang atang, binuhay liwat si Jesus pasiring sa langit na diyan tinawan siya nin dugang pang gibuhon asin awtoridad na “mas halangkaw na gayo sa lambang gobyerno asin awtoridad asin kapangyarihan asin pamamahala.” (Efe. 1:19-21) Kun magadan kitang maimbod bago an Armagedon, bubuhayon kita liwat sa sarong matanos na bagong kinaban, kun sain kadakul nin nakakaugmang gibuhon na naghahalat sa sato. Pero ngunyan, igwa nin mahalagang marhay na gibuhon na gabos kita puwedeng makikabtang—an paghulit kan maugmang bareta asin paggibo nin mga disipulo. Lugod gabos kita, hoben o may edad na, padagos na “dakul an ginigibo sa gibuhon kan Kagurangnan.”—1 Cor. 15:58.
