PAKALIHIS nin pirang aldaw na maduros asin mauran, mainit na asin maliwanag kan Lunes, Setyembre 1, 1919. Pagkahapon, sa pambukas na sesyon kan kumbensiyon sa Cedar Point, Ohio, U.S.A., mayo pang 1,000 delegado an yaon sa awditoryum na may 2,500 na tukawan. Kan banggi na, labing 2,000 pa an nag-arabot sakay nin bangka, awto, asin arkiladong mga tren. Kan Martes, duminakul pang marhay an nag-atender kaya sa luwas na kan awditoryum ginibo an natatadang programa kan kumbensiyon, sa irarom kan haralangkaw asin magagayon na kahoy.

Natatamaan kan sinag kan saldang an mga dahon asin garo disenyo an mga anino kaiyan sa bado kan mga lalaki. Ipinapalid-palid kan huyop-huyop hali sa Lake Erie an mga balukag sa kupya o kalo kan mga babayi. Sinabi nin sarong brother: “Sa magayunon, garo parkeng kapalibutan na harayo sa ribok kan daan na kinaban, talagang garo kami nasa paraiso kaidto.”

Pero mas magayon pa sa kapalibutan an kaugmahan na mahihiling sa mga lalawgon kan mga nag-atender. An sabi nin sarong peryodiko duman: “Gabos garo debotadong marhay, pero masisinggaya saka mauugmang tawo sinda.” Lalo nang mas nakakaugma para sa mga Estudyante sa Bibliya na makaibanan an mga kapwa Kristiyano pagkatapos kan grabeng mga pagbalo sa nakaaging pirang taon: pagkontra sa panahon kan giyera; mamundong pagkabaranga sa mga kongregasyon; an pagpasara kan Bethel sa Brooklyn; an pagkapreso kan dakul para sa kapakanan kan Kahadian, kaiba an walong brother na nanginginot sa gibuhon na sinentensiyahan nin sagkod sa 20 taon na pagkapreso. *

Huli sa pangluluya nin buot asin pagkaribaraw sa masakit na mga taon na idto, an iba sa mga Estudyante sa Bibliya nagpundo na sa pagpatotoo. Pero an dakul, ginibo an pinakamakakaya ninda na maghulit dawa may mga pagbabawal hali sa awtoridad. Halimbawa, arog kan parating mangyari, sarong imbestigador an nagreport na sa ibong kan istriktong mga patanid, ininsistir pa man giraray kan mga Estudyante sa Bibliya na saiyang inusisa na “mapadagos [sinda] sa paghuhulit kan tataramon nin Diyos sagkod sa katapusan.”

Sa bilog na panahon nin pagbalo, an maimbod na mga Estudyante sa Bibliya ‘naghihiling sa panginginot kan Kagurangnan, namimibi sa gabos na panahon para sa paggiya kan Ama.’ Ngunyan, magkairibanan sinda liwat sa maugmang asembleya sa Cedar Point. Arog kan iniisip nin dakul, sarong sister an naghapot kun paano ninda “pupunan na paandaron an awto kan aktibong paglilingkod para maghagunghong giraray iyan.” Urog kisa ano pa man, gusto na nindang maghulit!

Sa bilog na semana, napapaisip an mga delegado kun ano an kahulugan kan mga letrang “GA” na nakaimprenta sa mga programa ninda sa kumbensiyon, welcome card, asin karatula sa palibot kan awditoryum. Sa katapos-tapusi, kan Biyernes, na inapod na “Co-Laborers’ Day,” ihinayag ni Joseph F. Rutherford an kahulugan kan misteryosong mga letrang iyan sa 6,000 na nag-atender sa kumbensiyon. An “GA” nangangahulugan na The Golden Age—sarong bagong magasin na gagamiton sa ministeryo. *

Mapadapit sa kapwa niya linahidan na mga Kristiyano, sinabi ni Brother Rutherford: “Paagi kan saindang mata nin pagtubod nahihiling ninda sa ibong kan panahon nin kariribukan an Golden Age (Panahon nin Dakulang Kaugmahan Asin Prosperidad) kan mamuraway na pamamahala kan Mesiyas. . . . Ibinibilang nindang panginot na obligasyon saka pribilehiyo an pag-anunsiyar sa kinaban kan pag-abot kan Golden Age. Kabtang iyan kan sugo sa sainda nin Diyos.”

An The Golden Age na “sarong Babasahon nin Katotoohan, Paglaom, asin Kumbiksiyon,” gagamiton para punan an bagong pamamaagi nin pagpapalakop sa katotoohan—an kampanya sa pag-alok nin subskripsiyon sa harong-harong. Kan haputon kun pira an gustong magpartisipar sa kampanya, nagtirindog an gabos na nag-atender. Dangan, nagkaranta sindang “may kaugmahan asin kaigutan na mahihiling sana sa mga parasunod ni Jesus”: “Ipadara mo an liwanag asin katotoohan, O Kagurangnan.” Sinabi ni J. M. Norris: “Nungka kong malilingawan iyan huling garo nayugyug an mga kahoy sa kusog kan pagkanta mi.”

Pagkatapos kan sesyon, pirang oras na nagpila an mga delegado para magin saro sa mga inot na makakua nin subskripsiyon. Namatian kan dakul an arog kan ki Mabel Philbrick na nagsabi: “Nakakaugmang maaraman na igwa na giraray kaming gibuhon!”

Mga 7,000 na Estudyante sa Bibliya an nag-andam na humiro. Detalyadong ipinaliwanag kan flier na Organization Method asin kan buklet na To Whom the Work Is Entrusted (Kun Kiisay Ipinagkatiwala an Gibuhon) an mga detalye: Sarong bagong Service Department sa headquarters an magiya sa gibuhon. Dapat na magbilog nin Komite sa Paglilingkod sa kongregasyon asin magnombra nin sarong direktor na mapaabot kan mga instruksiyon. Babarangaon an mga teritoryo sa mga seksiyon na kada saro igwa nin 150 sagkod 200 na harong. Sarong Pagtiripon sa Paglilingkod an gigibuhon kada Huwebes na banggi para maiistorya kan mga tugang an mga eksperyensiya ninda asin maitao an saindang report nin paglilingkod.

“Pagpuli mi sa harong, nagin sibot kami gabos sa kampanya para sa pag-alok nin subskripsiyon,” an sabi ni Herman Philbrick. Sain man na lugar, nakanumpong sinda nin mga gustong magdangog. “Garo baga pagkatapos kan giyera saka grabeng pagmundo, gabos maugmang inako an ideya nin sarong panahon nin dakulang kaugmahan asin prosperidad,” an sabi ni Beulah Covey. Si Arthur Claus nagsurat: “Nasurpresang marhay an bilog na kongregasyon sa kadakul na nagkua nin subskripsiyon.” Sa laog nin duwang bulan puon kan iluwas an inot na isyu kan The Golden Age, haros kabangang milyon na sampol na kopya an naipasakamot asin 50,000 na an may subskripsiyon kaiyan.

Kan huri, mapadapit sa artikulong “Gospel of the Kingdom,” sa isyu kan The Watch Tower na Hulyo 1, 1920, sinabi ni A. H. Macmillan na ini an kainot-inuting artikulo na diyan dinadagka kan organisasyon an gabos na tugang sa bilog na kinaban na ihulit an dapit sa Kahadian nin Diyos. Sinadol kan artikulong iyan an gabos na linahidan na Kristiyano na “magpatotoo sa kinaban na harani na an kahadian nin langit.” Sa mga tugang ni Cristo “ipinagkatiwala an gibuhon,” asin kaiba ninda ngunyan an minilyon na maigot na naghuhulit kan tataramon mantang naghahalat kan panahon nin dakulang kaugmahan asin prosperidad sa irarom kan Mesiyanikong Kahadian.