Sa seryeng ini nin mga artikulo, naaraman ta an mga bagay na nakatabang sato na masimbag an hapot na, Siisay an Diyos? Nanudan ta sa Bibliya na Jehova an pangaran niya asin na an pagkamuot an pinakanangungurog niyang kuwalidad. Naaraman ta man kun ano an mga ginibo niya asin kun ano pa an gigibuhon niya para sa kapakinabangan kan katawuhan. Dakulon pa kitang puwedeng manudan manungod sa Diyos, pero tibaad maihapot mo, anong mga pakinabang an makakamtan ko sa pagmidbid sa Diyos?

Nanunuga si Jehova na “kun hahanapon mo siya, itutugot niyang manumpungan mo siya.” (1 Cronica 28:9) Isip-isipon an marahayon na pribilehiyo na makakamtan mo mantang hinahanap mo asin namimidbid an Diyos—an “magin dayupot na amigo” ni Jehova! (Salmo 25:14) Ano an mga pakinabang kan pakikiamigo mo sa saiya?

Tunay na kaugmahan. Ilinaladawan si Jehova bilang an “maugmang Diyos.” (1 Timoteo 1:11) An pagigin dayupot sa saiya asin pag-arog sa saiyang mga kuwalidad matao saimo nin tunay na kaugmahan, na makakatabang sa saimo sa emosyonal, mental, asin sa pisikal na paagi. (Salmo 33:12) Magkakaigwa ka man nin maugmang buhay—paagi sa paglikay sa mga nakakaraot na istilo nin pamumuhay, pag-ataman sa salud, asin pagpapadanay nin marahay na relasyon sa iba. Siguradong mauyon ka sa sinabi kan salmista: “An pagrani sa Diyos marahay sa sako.”​—Salmo 73:28.

Personal na pagmalasakit asin atensiyon. Nanuga si Jehova sa saiyang mga lingkod: “Tatawan taka nin sadol mantang nakahiling ako sa saimo.” (Salmo 32:8) Nangangahulugan iyan na si Jehova nagtatao nin personal na atensiyon asin pagmalasakit sa saiyang mga lingkod saka ibinabagay niya iyan sa pangangaipo kan lambang indibidwal. (Salmo 139:1, 2) Pag igwa ka na nin marahay na relasyon ki Jehova, mamamati mo na yaon siya pirmi para tabangan ka.

Sarong marahayon na puturo. Apuwera sa iinaalok saimo na sarong maugma asin nakakakontentong buhay ngunyan, iinaalok man sa saimo kan Diyos na Jehova an sarong marahayon na puturo. (Isaias 48:17, 18) An Bibliya nagsasabi: “Ini nangangahulugan nin buhay na daing katapusan, na mamidbid ninda ika, an iyo sanang tunay na Diyos, asin an saro na saimong isinugo, si Jesu-Cristo.” (Juan 17:3) Sa masakit na mga panahon na ini, an paglaom na itinatao nin Diyos puwedeng magin garo angkla na nagpapadanay sa sato sa pagigin “sigurado asin marigon.”​—Hebreo 6:19.

Nagkapira sana ini sa mga importanteng dahilan kun taano ta mahalaga na mas mamidbid mo an Diyos asin magkaigwa nin personal na relasyon sa saiya. Puwede kang makipag-ulay sa saro sa mga Saksi ni Jehova o buksan an jw.org para sa dagdag na impormasyon.