Tama Asin Sala: An Bibliya—Sarong Masasarigan na Giya

I-PLAY

Dai kita makakasigurado na magigin marahay an resulta kan satong mga desisyon sa kun ano tama asin sala kun ibinabase ta sana an mga iyan sa namamati ta o sa namamati kan ibang tawo. Ipinapahiling kan Bibliya kun taano ta arog kaiyan, pero may urog pang sinasabi iyan. Mababasa diyan an masasarigan na giya sa moral, na makakatabang sa sato na magkaigwa nin maugma asin nakakakontentong buhay.

KAIPUHAN TA NIN PAGGIYA HALI SA DIYOS

Sa Bibliya, sinasabi kan Diyos na Jehova a na katuyuhan niya na an mga tawo magpagiya sa saiya, bako na giyahan an sadiri ninda. (Jeremias 10:23) Iyan an dahilan kaya itinao niya an mga giya sa moral na mahihiling sa Bibliya. Namumutan niya an mga tawo asin habo niya na makagibo kita nin bakong madunong na mga desisyon na puwedeng makakulog sa sato asin makapadipisil sa satong buhay. (Deuteronomio 5:29; 1 Juan 4:8) Urog pa diyan, bilang satong Kaglalang, igwa siya kan kadunungan asin kaaraman na makakatao sa sato nin pinakamarahay na paggiya sa moral. (Salmo 100:3; 104:24) Pero, dai nanggad pipiriton nin Diyos an mga tawo na mamuhay kauyon kan saiyang mga pamantayan.

Itinao ni Jehova sa inot na lalaki asin babayi, si Adan asin Eva, an gabos na kaipuhan ninda para magin tunay na maugma. (Genesis 1:28, 29; 2:8, 15) Nagtao man siya sa sainda nin simpleng mga instruksiyon na inaasahan niyang susunudon ninda. Alagad, tinugutan niya sinda na pumili kun baga susunudon ninda o dai an mga instruksiyon na idto. (Genesis 2:9, 16, 17) Nakakamundo, pinili ni Adan asin Eva na mamuhay kauyon kan sadiri nindang mga pamantayan imbes na kauyon kan mga pamantayan nin Diyos. (Genesis 3:6) Ano an nagin resulta? Nagin maugma daw an mga tawo na sinda an nagdedesisyon para sa sadiri ninda kun ano an tama asin sala? Dai. Pinapatunayan kan kasaysayan na an dai pagsunod sa mga pamantayan nin Diyos dai nagtatao nin nagdadanay na katuninungan asin kaugmahan.—Eclesiastes 8:9.

Nagtatao an Bibliya nin paggiya na makakatabang sa sato na makagibo nin madunong na mga desisyon sa kun ano an tama asin sala, sain man kita nakaistar o ano man an dinakulaan ta. (2 Timoteo 3:16, 17; hilingon an kahon na “ Sarong Libro Para sa Gabos na Tawo.”) Pag-isipan kun paano ini nagigibo kan Bibliya.

Makanuod nin urog pa kun taano ta an Bibliya tama sanang apudon na “tataramon nin Diyos.”—1 Tesalonica 2:13. Hilingon an video na Siisay an Awtor kan Bibliya? sa jw.org.

KUN TAANO TA INIISIP KAN IBA NA DAI SINDA MATATABANGAN KAN BIBLIYA

May mga tawo na nagsasabi na bakong marahay na mapagkukuanan nin giya sa moral an Bibliya. Uni an pirang bagay na tibaad sinasabi kan mga tawo.

Tibaad may magsabi: “Magkakorontrahan man an laog kan Bibliya.”

An totoo: Sa inot na hiling, garo baga nagkokorontrahan an ibang mga bersikulo sa Bibliya. Pero kun sisiyasaton an konteksto kaiyan, mga impormasyon asin kaugalian na base sa kasaysayan, punto de-vista kan kagsurat, asin an iba pang impormasyon, mahihiling na magkauyon an mga iyan.

Para sa nagkapirang espesipikong halimbawa, basahon an artikulong “May Pagkakasalungatan ba sa Bibliya?” sa jw.org/tl.

Tibaad may magsabi: “An mga tawo na nagsasabing sinusunod ninda an Bibliya naggigibo man nin maraot, kaya bako iyan marahay na giya sa moral.”

An totoo: Bako an Bibliya an dapat basulon sa maraot na ginigibo kan mga dai nagsasabuhay sa mga katukduan kaiyan. Ihinula diyan na dakul na tawo—kaiba na an mga lider nin relihiyon—na nagsasabing sinusunod an Bibliya an magawi na kontra sa itinutukdo kaiyan. Sinasabi man diyan na bilang resulta, an mga katukduan sa Bibliya “pagtataraman nin maraot.”—2 Pedro 2:1, 2.

Para sa sarong halimbawa kun paano an dakul na lider nin relihiyon dai nasusunod an mga itinutukdo kan Bibliya, basahon an artikulong “Negosyo Lang Ba ang Relihiyon?” sa jw.org/tl.

Tibaad may magsabi: “An mga tawong nagsusunod sa Bibliya daing respeto sa mga tawong ibang-iba sa sainda.”

An totoo: Dinadagka kan Bibliya na trataron nin may paggalang an iba. Dai kaiyan inuuyunan na. . .

ibilang an sadiri na mas urog kisa sa iba.—Filipos 2:3.
trataron nin daing respeto an mga tawong iba an mga paniniwala o tinutubod.—1 Pedro 2:17.
piriton an iba na akuon an pagmansay kan saro.—Mateo 10:14.

Ipinapahiling kan Bibliya na pirming mabuot asin patas an pagtratar kan Diyos sa mga tawo asin iyan man an gusto kan Diyos na gibuhon ta.—Roma 9:14.

Para sa dagdag na impormasyon, basahon sa jw.org an artikulong “Pagpapahunod—Kun Paano Makakatabang an Bibliya.”

KUN PAANO IPINAPAHILING KAN BIBLIYA AN PAGGIYA NIN DIYOS

Sinasabi sa Bibliya an manungod sa pagtratar ni Jehova sa mga tawo puon pa sa kapinunan. Makakatabang sa sato an mga laog diyan para masabutan ta kun ano an pagmansay nin Diyos sa kun ano an tama asin sala, sa kun ano an kapaki-pakinabang asin an nakakaraot. (Salmo 19:7, 11) An mga leksiyon na manunudan ta diyan totoo asin talagang makakatabang sa sato sa pang-aroaldaw tang buhay na makagibo nin madunong na mga desisyon sa kun ano an tama asin sala.

Halimbawa, pag-isipan an sadol na yaon sa Talinhaga 13:20: “An saro na naglalakaw kaiba kan mga madunong magigin madunong, pero an saro na nakikiiba-iba sa mga mangmang mapapahamak.” Kun paanong aplikado an prinsipyong iyan kaidto, aplikado pa man giraray iyan sa panahon ta ngunyan. Dakul nin praktikal asin kapaki-pakinabang na mga prinsipyo an Bibliya.—Hilingon an kahon na “ An Dai Nalulumang Kadunungan kan Bibliya.”

Pero tibaad maisip mo, ‘Paano ako makakasigurado na matatabangan ako ngunyan kan mga giya sa moral na yaon sa Bibliya?’ Pag-uulayan sa sunod na artikulo an pirang mga eksperyensiya.

a Jehova an personal na pangaran nin Diyos.—Salmo 83:18.

AN DAI NALULUMANG KADUNUNGAN KAN BIBLIYA

Baga man haros 2,000 na taon na an nakaagi kan matapos isurat an Bibliya, kapaki-pakinabang pa man giraray iyan ngunyan. Dai man nagbago an gusto kan mga tawo—an magkaigwa nin maugma asin nakakakontentong buhay. (Eclesiastes 1:9) Matatabangan kita kan dai nalulumang kadunungan kan Bibliya na makamtan iyan.

Pagigin Onesto o Sadiyosan

“Mawot [niyato] na gumawi [kita] nin sadiyosan sa gabos na bagay.”—Hebreo 13:18.
“An saro na naghahabon, dai na maghabon pa; imbes, magpagal siya.”—Efeso 4:28.

Relasyon sa Iba

“Padagos na hanapon kan lambang saro, bako an para sa sadiri niyang kapakinabangan, kundi an para sa ibang tawo.”—1 Corinto 10:24.
“Padagos na pagpasensiyahan an lambang saro asin lubos na patawadon an lambang saro.”—Colosas 3:13.

Paggibo nin mga Desisyon

“An tawong inosente sa buhay pinapaniwalaan an lambang tataramon, pero an saro na alisto an isip pinag-iisipan an lambang lakad.”—Talinhaga 14:15.
“An saro na alisto an isip nahihiling an peligro asin minatago, pero an daing eksperyensiya minadiretso sana asin sinasapar an mga konsekwensiya.”—Talinhaga 22:3.

AN TORRENGBANTAYAN