1. Ano an pagmansay ni apostol Pablo sa mga ministeryal na lingkod?

 AN MGA ministeryal na lingkod nagsasagibo nin mahalagang marhay na gibuhon sa kongregasyon. Malinaw na pinahalagahan na marhay ni apostol Pablo an maimbod na mga lalaking ini. Halimbawa, sa surat niya sa mga Kristiyano sa Filipos, espesipiko niyang kinumusta an mga ministeryal na lingkod kaiba kan kamagurangan sa kongregasyon.​—Fil. 1:1.

2. Ano an namamatian ni Luis manungod sa saiyang asignasyon bilang ministeryal na lingkod?

² Hoben man o may edad na, dakul na bawtisadong brother an ikinakaugmang marhay an paglilingkod bilang ministeryal na lingkod. Halimbawa, si Devan 18 anyos kan manombrahan mantang an brother na si Luis nanombrahan kan siya labing 50 anyos na. Manungod sa namamatian kan dakul na kapwa niya ministeryal na lingkod, arog kaini an sinabi ni Luis: “Dakulang pribilehiyo para sako na gibuhon an trabaho nin sarong ministeryal na lingkod, lalo na pag iniisip ko an pagkamuot na ipinahiling sako kan mga tugang sa kongregasyon!”

3. Anong mga hapot an pag-uulayan ta?

³ Kun saro kang bawtisadong brother asin bako pang ministeryal na lingkod, puwede mo daw na magin pasuhan iyan? Ano an puwedeng makamotibar saimo? Asin anong basado sa Kasuratan na mga kuwalipikasyon an kaipuhan mong maabot? Sa artikulong ini, pag-uulayan ta an simbag sa mga hapot na iyan. Pero, pag-ulayan ta nguna kun ano an papel nin sarong ministeryal na lingkod.

 ANO AN PAPEL NIN SARONG MINISTERYAL NA LINGKOD?

4. Ano an papel nin sarong ministeryal na lingkod? (Hilingon man an ritrato.)

⁴ An ministeryal na lingkod sarong bawtisadong brother na ninombrahan kan banal na espiritu para tabangan an mga elder sa pag-asikaso sa dakul na mahalagang bagay sa laog kan kongregasyon. Sinisigurado kan nagkapirang ministeryal na lingkod na may igong teritoryo asin literatura an mga parahayag para sa ministeryo. An iba nagtatabang sa paglinig asin pagmentenar kan Kingdom Hall. An mga ministeryal na lingkod nagseserbing attendant saka nag-aasikaso kan sound asin video equipment sa mga pagtiripon kan kongregasyon. Mga trabahong nagtatao nin praktikal na tabang an dakul sa ginigibo kan mga ministeryal na lingkod. Pero, panginot na asin an pinakaimportante iyo na an mga ministeryal na lingkod mga tawong espirituwal; namumutan ninda si Jehova saka namumuhay kauyon kan saiyang matanos na mga pamantayan. Asin may hararom na pagkamuot sinda sa saindang mga Kristiyanong tugang. (Mat. 22:​37-39) Paano maaabot nin sarong bawtisadong brother an pasuhan na magin sarong ministeryal na lingkod?

5. Ano an puwedeng gibuhon nin sarong brother tanganing maabot an pasuhan na magin ministeryal na lingkod?

⁵ Sinasambit kan Bibliya an mga kuwalipikasyon kan mga puwedeng nombrahan bilang ministeryal na lingkod. (1 Tim. 3:​8-10, 12, 13) Puwede mong hinguwahon na abuton an pribilehiyong ini paagi sa pag-adal sa basado sa Kasuratan na mga kuwalipikasyon na iyan dangan pagmaigutan na maabot an mga iyan. Alagad, kaipuhan mo ngunang pag-isipan na marhay an saimong mga motibo sa paggibo kaiyan.

ANO AN NAKAKAMOTIBAR SA SAIMO?

6. Ano an dapat na makamotibar sa saimo na magsagibo nin ano man na klase nin paglilingkod sa saimong mga kapagtubod? (Mateo 20:28; hilingon man an ritrato.)

⁶ An nakamotibar sa satong pinakanangungurog na arugan, si Jesu-Cristo, iyo an pagkamuot—pagkamuot sa saiyang Ama asin pagkamuot sa mga tawo. An pagkamuot na iyan nakapahiro sa saiya na magmaigot asin gumibo para sa iba nin mga bagay na ibinibilang na menos kan nagkapira. (Basahon an Mateo 20:28; Juan 13:​5, 14, 15) Kun pagkamuot an nakakamotibar sa saimo, bebendisyunan ka ni Jehova asin tatabangan ka niyang maabot an saimong pasuhan na makuwalipikar bilang ministeryal na lingkod.​—1 Cor. 16:14; 1 Ped. 5:5.

7. Taano ta dapat likayan nin sarong brother an pagmawot na umawon asin hangaan kan iba?

⁷ Sa kinaban, hinahangaan an mga tawong ilinalangkaw an saindang sadiri. Bakong arog kaiyan  sa organisasyon ni Jehova. An sarong brother na motibado nin pagkamuot, arog kaidto ni Jesus, dai nagmamawot na magkamit nin kapangyarihan, awtoridad sa iba, o katungdan. Kun nonombrahan sa kongregasyon an arog kaiyan na ambisyosong tawo, posibleng marhay na magsayuma siyang gumibo nin hababang mga trabaho na kaipuhan tanganing mapangatamanan an mahalagang marhay na mga karnero ni Jehova. Tibaad isipon niyang hababaon man para sa arog niya an siring na trabaho. (Juan 10:12) Dai bebendisyunan ni Jehova an mga paghihinguwa nin siisay man na mapalangkaw an motibo, na an mawot iyo na umawon asin hangaan siya kan iba.​—1 Cor. 10:​24, 33; 13:​4, 5.

8. Anong sadol an itinao ni Jesus sa saiyang mga apostol?

⁸ May mga pagkakataon na maski an pinakadayupot na mga kairiba ni Jesus naghinguwang mag-abot nin mga pribilehiyo na may salang motibo. Pag-isipan an sarong pangyayari na kalabot an duwa sa mga apostol ni Jesus—si Santiago asin Juan. Nakiulay sinda ki Jesus na tawan sinda nin espesyal na posisyon sa saiyang Kahadian. Dai sinda kinomendaran ni Jesus sa saindang ambisyon. Imbes, sinabi niya sa gabos niyang 12 apostol: “An siisay man na gustong magkaigwa nin dakulang awtoridad sa saindo dapat na magin lingkod nindo, asin an siisay man na gustong magin panginot sa saindo dapat na magin uripon kan gabos.” (Mar. 10:​35-37, 43, 44) An mga brother na nag-aabot nin sarong pribilehiyo na may tamang motibo—an paglingkudan an iba—magigin bendisyon sa kongregasyon.​—1 Tes. 2:8.

ANO AN MAKAKAPAKUSOG KAN PAGMAWOT MO?

9. Paano mo mapapakusog an saimong pagmawot na mag-abot nin pribilehiyo?

⁹ Siyempre, namumutan mo si Jehova asin gusto mong paglingkudan an iba. Dawa arog kaiyan, tibaad mayo ka kan pagmawot na gibuhon an mga trabahong ginigibo nin sarong ministeryal na lingkod. Paano mo mapapakusog an pagmawot mong maglingkod? Isip-isipon an kaugmahan na puwede mong mamatian sa paglilingkod sa mga tugang. Sinabi ni Jesus: “Igwang urog na kaugmahan sa pagtao kisa sa pag-ako.” (Gibo 20:35) Namuhay siya kauyon kan prinsipyong ini. Nakamati siya nin tunay na kaugmahan sa paglilingkod sa iba, asin puwede mo man iyan mamatian.

10. Paano ipinahiling ni Jesus na maugma siyang maglingkod sa iba? (Marcos 6:​31-34)

¹⁰ Pag-isipan an sarong halimbawa kun paano ipinahiling ni Jesus na maugma siyang maglingkod sa iba. (Basahon an Marcos 6:​31-34.) May pangyayari kaidto na pagal-pagal si Jesus saka an mga apostol niya. Pasiring sinda kaidto sa sarong puwerang lugar para magpurupahingalo. Pero nagkairinot sa sainda duman an mga tawo asin naglalaom na tutukduan sinda ni Jesus. Puwede kutang nagsayuma sa sainda si Jesus. Tutal, siya saka an mga kairiba niya “dai na [nin] libreng panahon maski sa pagkakan.” O puwede kutang tinukduan niya an mga tawo nin mga saro o duwa lang na katotoohan tapos pinapuli niya na sinda. Pero huling motibado siya nin pagkamuot, “nagpuon siyang magtukdo sa sainda nin dakul na bagay.” Asin padagos niya sindang tinukduan sagkod “hapon nang marhay.” (Mar. 6:35) Ginibo niya iyan, bakong dahil kaipuhan, kundi dahil “nahirak siyang marhay sa sainda.” Gusto niya sindang tukduan huling namumutan niya sinda. An paglilingkod sa iba nagtao ki Jesus nin dakulang kaugmahan.

11. Paano ni Jesus pinaglingkudan sa praktikal na paagi an mga nagdadangog sa saiya? (Hilingon man an ritrato.)

¹¹ Sa paglilingkod ni Jesus sa mga tawong idto, bako lang pagtutukdo an ginibo niya para sa sainda. Inasikaso niya man an saindang pisikal na mga pangangaipo. Naggibo siya nin milagro para magkaigwa nin kakanon an mga tawo dangan isinugo niya an saiyang mga disipulo na idistribwir iyan. (Mar. 6:41) Sa paggibo kaiyan, tinukduan niya an saiyang mga disipulo kun paano maglingkod sa iba. Ipinahiling niya man sa sainda na mahalaga an praktikal na mga paagi nin paglilingkod sa iba arog kan mga trabahong tibaad isagibo nin mga ministeryal na lingkod. Imahinara kun gurano kaugma  an mga apostol sa pakikikabtang ninda kaiba ni Jesus sa milagrosong pagdistribwir na ini nin kakanon sagkod na an “gabos . . . nagkarakan saka nagkabarasog”! (Mar. 6:42) Siyempre, bako lang ini an pagkakataon na ininot ni Jesus an kapakanan kan iba kisa kan sa saiya. Ginamit niya an bilog niyang buhay digdi sa daga tanganing maglingkod sa mga tawo. (Mat. 4:23; 8:16) Nakamati si Jesus nin kaugmahan asin pagkakontento sa pagtutukdo sa iba asin sa mapakumbabang pag-asikaso sa mga pangangaipo ninda. Daing duda na makakaeksperyensiya ka man nin dakulang kaugmahan mantang daing pagkamakasadiri mong hinihinguwang abuton an pasuhan na magin ministeryal na lingkod.

12. Taano ta mayo nin siisay man sa sato an may dahilan na mag-isip na mayo kitang maitatabang sa kongregasyon?

¹² Kun iniisip mo na mayo kang ano man na pambihirang kakayahan o abilidad, dai madisganar. Siguradong igwa ka nin mga kuwalidad na magagamit mo para magin kapaki-pakinabang ka sa kongregasyon. Tibaad makatabang sa saimo kun may pagpamibi mong iisip-isipon an sinabi ni Pablo na mababasa sa 1 Corinto 12:​12-30. An mga tataramon ni Pablo malinaw na nagpapahiling na arog kan lambang iba pang lingkod ni Jehova, igwa ka nin mahalagang marhay na papel na kaipuhan sa kongregasyon. Kun sa ngunyan dai mo pa naaabot an mga kuwalipikasyon para magin sarong ministeryal na lingkod, dai sumuko. Imbes, gibuhon an gabos mong makakaya na magin kapaki-pakinabang ki Jehova asin sa mga tugang. Makakasigurado ka na ikokonsiderar kan mga elder an mga kakayahan mo asin tibaad tawan ka ninda nin asignasyon na kaya mong magibo.​—Roma 12:​4-8.

13. Ano an totoo manungod sa kadaklan sa mga kuwalipikasyon para sa nombradong mga lalaki?

¹³ Pag-isipan an saro pang dahilan kun taano ta dapat mong hinguwahon na makuwalipikar bilang ministeryal na lingkod: An kadaklan sa mga kuwalipikasyon aplikado sa gabos na Kristiyano. Sa katunayan, an gabos na Kristiyano dapat na rumani ki Jehova, maeksperyensiyahan an kaugmahan sa pagtao, asin magin marahay na halimbawa kun manungod sa Kristiyanong pamumuhay. Anong espesipikong mga bagay an puwedeng gibuhon nin sarong brother para maabot an pasuhan na iyan?

KUN PAANO MAAABOT AN PASUHAN

14. Ano an buot sabihon kan pagigin “seryoso”? (1 Timoteo 3:​8-10, 12)

¹⁴ Pag-ulayan ta na ngunyan an nagkapira sa mga kuwalipikasyon na sinambit sa 1 Timoteo 3:​8-10, 12. (Basahon.) An sarong ministeryal na lingkod dapat na “seryoso.” An ekspresyon na iyan puwede man na itradusir na “maninigo sa paggalang,” “may dignidad,” o “onorable.” Dai ini nangangahulugan na dai ka na lamang puwedeng magngirit o magpangirit. (Ecl. 3:​1, 4) Alagad, dapat mong seryosuhon an gabos mong responsabilidad. Kun midbid ka bilang mapagtitiwalaan asin maaasahan, makukua mo an respeto kan kongregasyon.

15. Ano an buot sabihon kan pagigin “bakong magkaiba an mga pigsasabi” asin pagigin “bakong mahanab sa materyal na pakinabang”?

 ¹⁵ An pagigin “bakong magkaiba an mga pigsasabi” nangangahulugan na ika sinsero, sadiyosan, asin mapagtitiwalaan. Inuutob mo an mga sinasabi mong gigibuhon mo, saka dai mo dinadaya an iba. (Tal. 3:32) An pagigin “bakong mahanab sa materyal na pakinabang” nangangahulugan na onesto ka sa mga transaksiyon sa negosyo saka sa pagkapot nin kuwarta. Dai mo aaprobetsaran an marahay na relasyon mo sa mga kapwa mo Kristiyano tanganing magkakuwarta.

16. (a) Ano an buot sabihon kan “dai nagpapangana sa arak”? (b) Ano an buot sabihon kan pagkaigwa nin “malinig na konsiyensiya”?

¹⁶ An “dai nagpapangana sa arak” nangangahulugan na dai ka nagpapasobra sa mga inumon na de-alkohol asin bako kang midbid na sarong parainom. An pagkaigwa nin “malinig na konsiyensiya” nangangahulugan na namumuhay ka kauyon kan mga pamantayan ni Jehova. Dawa ngani bako kang perpekto, igwa ka kan katuninungan na resulta kan pagkaigwa mo nin marahay na relasyon sa Diyos.

17. Paano maipapahiling nin sarong brother na mapagtitiwalaan siya mantang ‘pinupurbaran siya kun baga maninigo siya sa pribilehiyo’? (1 Timoteo 3:10; hilingon man an ritrato.)

¹⁷ An ‘pinurbaran kun baga maninigo sa pribilehiyo’ nangangahulugan na naipahiling mo nang puwede kang pagkatiwalaan nin paninimbagan. Kun siring, pag tinatawan ka kan mga elder nin asignasyon, maingat mong sunudon an saindang mga instruksiyon asin an mga paggiyang itinatao kan organisasyon. Siyertuhon na nasasabutan mo kun ano an mga kalabot sa asignasyon na iyan asin kun nuarin iyan dapat na matapos. Mantang maigot mong inaasikaso an lambang asignasyon, maririsa asin maaapresyar kan mga tugang sa kongregasyon an saimong pag-uswag. Mga elder, magin alisto na sanayon an bawtisadong mga brother. (Basahon an 1 Timoteo 3:10.) Igwa daw sa kongregasyon nindo nin bawtisadong mga brother na 10 sagkod sa 14 anyos an edad o mas hoben pa? Marahay na arugan daw sinda pag-abot sa rutina ninda sa personal na pag-adal? Regular daw sindang nagkokomento sa mga pagtiripon asin nakikikabtang sa ministeryo sa langtad? Kun iyo, tawan sinda nin mga asignasyon na angay sa edad asin kamugtakan ninda. Paagi kaiyan, an hoben na mga brother na ini ‘mapupurbaran kun baga maninigo sinda sa pribilehiyo.’ Dangan pag-abot kan panahon na nasa huring mga taon na sinda nin pagigin tin-edyer, posibleng marhay na makuwalipikar na sindang magin ministeryal na lingkod.

18. Ano an buot sabihon kan mga tataramon na “mayo nin mairereklamo laban sa sainda”?

¹⁸ An mga tataramon na “mayo nin mairereklamo laban sa sainda” nangangahulugan na mayo nin ano man na balidong akusasyon nin magabat na pagkakasala an mairereklamo laban sa saimo.  Siyempre, an mga Kristiyano tibaad akusaran nin bakong totoo. Nangyari iyan ki Jesus, asin ihinula niya na maeeksperyensiyahan man iyan kan mga parasunod niya. (Juan 15:20) Dawa arog kaiyan, kun pinapagdanay mong malinig an saimong paggawi, arog ni Jesus, magkakaigwa ka nin marahayon na reputasyon sa kongregasyon.​—Mat. 11:19.

19. Ano an buot sabihon kan pagigin “agom nin sarong babayi”?

¹⁹ “Agom nin sarong babayi.” Kun ika may agom, dapat mong pangaptan an orihinal na pamantayan ni Jehova sa pag-aguman—sarong lalaki saka sarong babayi. (Mat. 19:​3-9) An sarong Kristiyanong lalaki dapat na nungkang magkomiter nin seksuwal na imoralidad. (Heb. 13:4) Pero urog pa diyan an kalabot. Dapat na maimbod ka sa saimong agom, na dai nagtatao nin bakong maninigong atensiyon sa ibang mga babayi.​—Job 31:1.

20. Paano ipinapahiling nin sarong lalaki na pinapanginutan niya an saiyang pamilya “sa mahusay na paagi”?

²⁰ “Pinapanginutan an saiyang mga aki asin an saiyang pamilya sa mahusay na paagi.” Kun saro kang payo nin pamilya, dapat mong seryosuhon an saimong mga paninimbagan. Regular na magkondukta nin pampamilyang pagsamba. Sagkod na posible, parating makikabtang sa ministeryo kaiba an lambang miyembro kan saimong pamilya. Tabangan an saimong mga aki na magkaigwa nin personal na relasyon ki Jehova. (Efe. 6:4) Kun inaasikaso nin sarong lalaki an saiyang pamilya, ipinapahiling kaiyan na kaya niyang asikasuhon an kongregasyon.​—Ikumparar an 1 Timoteo 3:5.

21. Kun bako ka pang ministeryal na lingkod, ano an puwede mong gibuhon?

²¹ Kun bako ka pang ministeryal na lingkod, pag-isipan tabi na may kaibang pagpamibi an mga pinag-ulayan sa artikulong ini. Pag-adalan an mga kuwalipikasyon para sa mga ministeryal na lingkod asin magmaigot na maabot an mga iyan. Isip-isipon kun gurano mo kanamumutan si Jehova saka an saimong mga tugang. Pakusugon an saimong pagmawot na paglingkudan sinda. (1 Ped. 4:​8, 10) Hinguwahon na maabot an pasuhan na iyan asin maeeksperyensiyahan mo an kaugmahan na resulta kan paglilingkod mo sa saimong espirituwal na pamilya. Lugod na abundang bendisyunan ni Jehova an mga paghihinguwa mong abuton an pasuhan na magin ministeryal na lingkod!—Fil. 2:13.