Tawan nin Atension an Makahulang Tataramon nin Dios

“An makahulang tataramon orog pa niamong nasierto; asin marahay an saindong ginigibo sa pagtao nin atension dian.”​—2 PEDRO 1:19.

1, 2. Anong halimbawa nin falsong mesiyas an puede nindong isaysay?

SA LAOG nin dakol na siglo, an falsong mga mesiyas nagprobar na prediktaran an ngapit. Kan ikalimang siglo C.E., an sarong lalaki na inapod an saiyang sadiri na Moises kinombensir an mga Judio sa isla nin Creta na sia an mesiyas asin mapatalingkas sa sainda sa pan-aapi. Kan aldaw na itinalaga para sa saindang katalingkasan, nagsurunod sinda sa saiya pasiring sa sarong halangkaw na lugar na nadudungawan an Dagat Mediterraneo. Sinabi nia na kaipuhan sana nindang lumukso sa dagat, asin iyan maheheling ninda na mababanga. An kadakol na tuminagbang sa katubigan nagkaralamos, asin duminulag an falsong mesiyas na iyan.

² Kan ika-12 siglo, sarong “mesiyas” an nagtunga sa Yemen. An calef, o namamahala, hinagadan sia nin tanda kan saiyang pagkamesiyas. An “mesiyas” na ini nagproponer na papugotan sia kan calef. Naghula sia nin ensegidang pagkabuhay liwat na maserbing tanda. An calef nag-oyon sa plano​—asin idto an katapusan kan “mesiyas” na iyan.

3. Siisay an tunay na Mesiyas, asin ano an pinatunayan kan saiyang ministeryo?

³ An falsong mga mesiyas asin an mga hula ninda biyong kasudyaanan, alagad an pagtao nin atension sa makahulang tataramon nin Dios nungkang nagreresulta sa pagkadesganar. An tunay na Mesiyas, si Jesu-Cristo, iyo an buhay na kaotoban kan dakol na hula sa Biblia. Halimbawa, sa pagkotar sa hula ni Isaias, an kagsurat kan Ebanghelyo na si Mateo nagsurat: “‘O daga nin Zabulon asin daga nin Neftali, sa gilid kan dalan kan dagat, sa ibong na tampi kan Jordan, Galilea kan mga nasyon! an banwaan na nagtutukaw sa kadikloman nakaheling nin dakulang liwanag, asin an mga nagtutukaw sa lugar nin limpoy nin kagadanan, suminirang an liwanag sa sainda.’ Poon kaidto si Jesus nagpoon na maghulit asin magsabi: ‘Magsorolsol kamo, banwaan, huli ta an kahadean kan kalangitan harani na.’” (Mateo 4:​15-17; Isaias 9:​1, 2) Si Jesus an “dakulang liwanag” na iyan, asin an saiyang ministeryo nagpatunay na sia an Propeta na ihinula ni Moises. An mga habong maghinanyog ki Jesus lalaglagon.​​—Deuteronomio 18:​18, 19; Gibo 3:​22, 23.

4. Paano inotob ni Jesus an Isaias 53:12?

⁴ Inotob man ni Jesus an makahulang mga tataramon sa Isaias 53:12: “Pinabolos nia an saiyang kalag sagkod sa mismong kagadanan, asin ibinilang sia sa mga tampalasan; asin dinara nia an kasalan nin dakol, patin sia nakimaherak manongod sa mga parakasala.” Huling nakaaaram na sa dai na mahahaloy itatao nia bilang pantubos an saiyang buhay bilang tawo, pinakosog ni Jesus an pagtubod kan saiyang mga disipulo. (Marcos 10:45) Pambihira an pagkagibo nia kaini paagi sa transpigurasyon.

An Transpigurasyon Nagpapakosog sa Pagtubod

5. Sa sadiri nindong pananaram, paano nindo ilaladawan an transpigurasyon?

⁵ An transpigurasyon sarong makahulang pangyayari. Si Jesus nagsabi: “An Aki nin tawo nakatalagang dumatong sa kamurawayan kan saiyang Ama kaiba an saiyang mga anghel . . . Totoong ako nagsasabi sa saindo na igwa nin nagkapira sa mga uya digdi na sa ano man na paagi dai magnanamit nin kagadanan sagkod na dai nguna ninda maheling an Aki nin tawo na minadatong sa saiyang kahadean.” (Mateo 16:​27, 28) Aktuwal daw na naheling kan nagkapirang apostol si Jesus na nagdatong sa saiyang Kahadean? An Mateo 17:​1-7 nagsasabi: “Pakalihis nin anom na aldaw ipinag-iba ni Jesus si Pedro asin si Santiago patin si Juan na tugang nia asin dinara sinda sa sarong halangkaw na bukid na sinda sana. Asin sia naliwat sa atubangan ninda.” Pambihira nanggad na pangyayari! “An saiyang  lalauogon nagsirang na siring sa aldaw, asin an saiyang pan-ibabaw na mga gubing nangintab na siring sa liwanag. Asin, uya! nagtunga sa sainda si Moises asin si Elias, na nakikipag-olay sa saiya.” Siring man, “an sarong maliwanag na panganoron linindongan sinda,” asin nadangog ninda an mismong tingog nin Dios na nagsasabi: “‘Ini an sakong Aki, an namomotan, na sakong inoyonan; maghinanyog kamo sa saiya.’ Kan madangog ini an mga disipulo nagralaob asin nagkatarakot na marhay. Dangan nagrani si Jesus asin, tinitikwil sinda, nagsabi: ‘Buhat asin dai kamo matakot.’”

6. (a) Taano ta inapod ni Jesus na bisyon an transpigurasyon? (b) Patanaw nin ano sa ngapit an transpigurasyon?

⁶ An makangingirhat na pangyayaring ini posibleng marhay na nangyari duman sa saro kan mga palabang bukid sa Bukid nin Hermon, kun saen nagpalihis nin banggi si Jesus asin an tolong apostol. An transpigurasyon minalataw na nangyari sa banggi, na nangorognang nagpalinaw kaiyan. An sarong dahelan kaya inapod iyan ni Jesus na bisyon iyo na an haloy nang gadan na si Moises asin Elias bakong presente sa literal. Solamente si Cristo an aktuwal na yaon duman. (Mateo 17:​8, 9) An siring na nakasusulang paheling nagtao ki Pedro, Santiago, asin Juan nin pambihirang patanaw sa ngapit kan mamuraway na presensia ni Jesus na may kapangyarihan sa Kahadean. Si Moises asin Elias nakaaagid sa linahidan na mga kapwa paramana ni Jesus, asin mapuersang idinodoon kan bisyon an saiyang patotoo manongod sa Kahadean asin sa saiyang maabot na pagkahade.

7. Paano niato naaaraman na malinaw pang natatandaan ni Pedro an transpigurasyon?

⁷ An transpigurasyon nakatabang na mapakosog an pagtubod kan tolong apostol na magkakaigwa nin pangenot na kabtang sa Kristianong kongregasyon. An nagliliwanag na lalauogon ni Cristo, an saiyang nagkikinang na gubing, asin an mismong tingog nin Dios na nagpapahayag na si Jesus iyo an Saiyang namomotan na Aki na maninigo nindang hinanyogon​—inotob kaini gabos an katuyohan kaiyan sa pinakaepektibong paagi. Alagad an bisyon dai dapat na iestorya kan mga apostol sa siisay man sagkod na dai pa binubuhay liwat si Jesus. Pakalihis nin mga 32 na taon, an bisyon na ini malinaw pa sa isip ni Pedro. Nasasambitan iyan asin an kahulogan kaiyan, sia nagsurat: “Bako, bakong paagi sa pagsunod sa mga putik na osipon na tinugdas sa katusohan na ipinamidbid mi sa saindo an kapangyarihan asin presensia kan satong Kagurangnan na Jesu-Cristo, kundi paagi sa pagigin mga saksing nakaheling sa saiyang kamurawayan. Huli ta sia nag-ako gikan sa Dios na Ama nin onra asin  kamurawayan, kan an mga tataramon na siring kaini itao sa saiya kan kahangahangang kamurawayan: ‘Ini an sakong aki, an sakong namomotan, na sako mismong inooyonan.’ Iyo, an mga tataramon na ini nadangog niamo na itinao gikan sa langit mantang kami kaibanan nia sa banal na bukid.”​—2 Pedro 1:​16-18.

8. (a) Nakasentro sa ano an ipinahayag nin Dios mapadapit sa saiyang Aki? (b) Ano an ipinarisa kan panganoron na naheling sa transpigurasyon?

⁸ Pinakamahalaga an ipinahayag nin Dios: “Ini an sakong Aki, an namomotan, na sakong inoyonan; maghinanyog kamo sa saiya.” An mga tataramon na ini nakasentro ki Jesus bilang an pinatukaw nin Dios na Hade, na sa saiya an gabos na linalang dapat na magkuyog. An nakalilindong na panganoron nagparisa na an kaotoban kan bisyon na ini dai maheheling. Iyan mamamansayan sana paagi sa mga mata nin pakasabot kan mga nakarerekonoser kan “tanda” kan dai naheheling na presensia ni Jesus na may kapangyarihan sa Kahadean. (Mateo 24:3) Sa katunayan, an instruksion ni Jesus na dai iestorya sa siisay man an bisyon sagkod na sia dai pa minabangon hale sa mga gadan nagpapaheling na an paglangkaw asin pagpamuraway sa saiya mangyayari pakatapos kan saiyang pagkabuhay liwat.

9. Taano ta maninigo na mapakosog kan transpigurasyon an satong pagtubod?

⁹ Pakasambit kan transpigurasyon, si Pedro nagsabi: “Bilang resulta an makahulang tataramon orog pa niamong nasierto; asin marahay an saindong ginigibo sa pagtao nin atension dian na siring sa sarong ilawan na nagliliwanag sa madiklom na lugar, sagkod na mamanaag an aldaw asin an bitoon sa aga sumirang na, sa saindong puso. Huli ta ini aram na nindo kan enot pa, na daing hula nin Kasuratan na hale sa ano man na sadiring pakahulogan. Huli ta an hula dai kasuarin man dinara paagi sa kabotan nin tawo, kundi an mga tawo nagtaram hale sa Dios mantang sinda pinahihiro kan banal na espiritu.” (2 Pedro 1:​19-21) Idinodoon kan transpigurasyon an pagkamasasarigan kan makahulang tataramon nin Dios. Dapat tang tawan nin atension an tataramon na iyan asin bakong an “mga putik na osipon na tinugdas sa katusohan” na dai sinusuportaran o inooyonan nin Dios. An satong pagtubod sa makahulang tataramon maninigo na mapakosog kan transpigurasyon huli ta an patanaw na bisyon na iyan kan kamurawayan asin kapangyarihan ni Jesus sa Kahadean nagin nang sarong katunayan. Iyo, igwa kita nin dai manenegaran na ebidensia na si Cristo presente na ngonyan bilang makapangyarihan na langitnon na Hade.

Kun Paano Minasirang an Bitoon sa Aga

10. Siisay o ano an “bitoon sa aga” na nasambitan ni Pedro, asin taano ta siring an simbag nindo?

¹⁰ Si Pedro nagsurat: “Marahay an saindong ginigibo sa pagtao nin atension [sa makahulang tataramon] na siring sa sarong ilawan na nagliliwanag sa madiklom na lugar, sagkod na mamanaag an aldaw asin an bitoon sa aga sumirang na.” Siisay o ano an “bitoon sa aga”? An tataramon na “bitoon sa aga” sarong beses sanang minalataw sa Biblia, asin magkapareho iyan nin kahulogan kan “bitoon sa makaaga.” An Kapahayagan 22:16 inaapod si Jesus-Cristo na “an maliwanag na bitoon sa makaaga.” May mga panahon sa sangtaon na an mga bitoon na iyan iyo an ultimong minasirang sa sirangan. An mga iyan minasirang bago maheling an saldang, asin sa siring ipinapaisi kaiyan an pagpoon nin sarong bagong aldaw. Ginamit ni Pedro an tataramon na “bitoon sa aga” sa pag-apod ki Jesus pakatapos na akoon Nia an kapangyarihan sa Kahadean. Kan panahon na idto, si Jesus suminirang sa bilog na uniberso, kabale an satong daga! Bilang an Mesiyanikong Bitoon sa Aga, ipinapaisi nia an pagpoon nin sarong bagong aldaw, o panahon, para sa makinuyog na katawohan.

11. (a) Taano ta dai boot sabihon kan 2 Pedro 1:​19 na “an bitoon sa aga” minasirang sa aktuwal na puso nin tawo? (b) Paano nindo ipaliliwanag an 2 Pedro 1:​19?

¹¹ An dakol na traduksion nin Biblia sinusuportaran an ideya na an mga tataramon ni apostol Pedro na nasusurat sa 2 Pedro 1:​19 nanonongod sa pisikal na puso nin tawo. An puso nin adulto may gabat sanang 250 sagkod 300 gramos. Paano makasisirang si Jesu-Cristo​—na ngonyan sarong mamuraway na inmortal na espiritung linalang sa langit​—sa sadit na mga organong ini nin tawo? (1 Timoteo 6:​16) Siempre, an satong piguratibong puso imbuelto digdi, ta paagi kaiyan kita nagtatao nin atension sa makahulang tataramon nin Dios. Alagad helinga nin maingat an 2 Pedro 1:​19, asin maheheling nindo na an New World Translation naggagamit nin koma tanganing iseparar an nagpapaliwanag na fraseng “sagkod na mamanaag an aldaw asin an bitoon sa aga sumirang na” sa naenot na mga tataramon sa bersikulo asin sa pananaram na “sa saindong puso.” An bersikulong ini puedeng sabihon sa paaging ini: ‘An makahulang tataramon orog pa niamong nasierto; asin marahay an saindong ginigibo sa pagtao nin atension dian na siring sa sarong ilawan na nagliliwanag  sa madiklom na lugar, an boot sabihon, sa saindong puso, sagkod na mamanaag an aldaw asin an bitoon sa aga sumirang na.’

12. Ano an kamugtakan kan mga puso nin tawo sa pankagabsan, alagad ano an totoo dapit sa tunay na mga Kristiano?

¹² Ano an kamugtakan kan piguratibong mga puso nin makasalan na katawohan sa pankagabsan? Tara, an saindang puso nasa espirituwal na kadikloman! Minsan siring, kun kita tunay na mga Kristiano, garo man sana kita igwa nin ilawan na nagliliwanag sa satong puso, na kun mayo magigin madiklom. Siring sa ipinaririsa kan mga tataramon ni Pedro, paagi sa pagtao nin atension sa nagliliwanag na makahulang tataramon nin Dios na an tunay na mga Kristiano magdadanay na alisto asin naliliwanagan sa pagpoon nin sarong bagong aldaw. Maaaraman ninda an katunayan na an “Bitoon sa Aga” suminirang na, bakong sa pisikal na puso nin tawo, kundi sa atubangan nin gabos na linalang.

13. (a) Taano ta makasesegurado kita na an Bitoon sa Aga suminirang na? (b) Taano ta kayang tagalan kan mga Kristiano an masakit na mga kamugtakan na ihinula ni Jesus para sa satong kaaldawan?

¹³ An Bitoon sa Aga suminirang na! Makasesegurado kita dian paagi sa pagtao nin atension sa dakulang hula ni Jesus mapadapit sa saiyang presensia. Ngonyan, naeeksperyensiahan ta an kaotoban kaiyan sa mga pangyayari na arog baga kan daing kaagid na mga guerra, gutom, linog, asin pambilog na kinaban na paghuhulit kan maogmang bareta. (Mateo 24:​3-​14) Minsan ngani an masakit na mga kamugtakan na ihinula ni Jesus nakakaapektar man sa sato bilang mga Kristiano, natatagalan niato iyan na may katoninongan asin kagayagayahan nin puso. Taano? Huli ta kita nagtatao nin atension sa makahulang tataramon nin Dios asin igwa nin pagtubod sa panuga nia para sa ngapit. Aram ta na kita yaon na sa tata kan pinakamarahay na panahon huli ta kita nasa poro nang marhay kan “panahon kan katapusan”! (Daniel 12:4) An kinaban yaon sa masakit na marhay na kamugtakan na ihinula sa Isaias 60:2: “Uya! an kadikloman mismo makalalakop sa daga, asin an mahibog na kaduloman sa mga nasyon.” Paano an saro makakaagi sa kadikloman na ini? An saro dapat na mapakumbabang magtao nin atension sa makahulang tataramon nin Dios ngonyan, bago magin huri an gabos. An mga tawong sadiosan an puso kaipuhan na dumolok ki Jehova Dios, an Gikanan nin buhay asin liwanag. (Salmo 36:9; Gibo 17:28) Solamente paagi sa paggibo kaini na an siisay man magkakaigwa nin totoong kaliwanagan asin kan paglaom na magkamit kan makangangalas na ngapit na katuyohan nin  Dios para sa makinuyog na katawohan.​​—Kapahayagan 21:​1-5.

“An Liwanag Nagdatong sa Kinaban”

14. Ano an dapat tang gibohon tanganing maeksperyensiahan an kaotoban kan makangangalas na mga hula sa Biblia?

¹⁴ Linilinaw kan Kasuratan na si Jesu-Cristo namamahala na ngonyan bilang Hade. Huli sa pagtukaw nia sa kapangyarihan kan 1914, may maootob pang makangangalas na mga hula. Tanganing maeksperyensiahan an kaotoban kaiyan, kita dapat na magin mahoyo na naggigibo nin pagtubod ki Jesu-Cristo, na pinagsosolsolan an makasalan na mga gibo asin an mga kasalan na nakomiter dahelan sa pagkadaing aram. Siempre, an mga namomoot sa kadikloman dai mag-aako nin buhay na daing katapusan. Si Jesus nagsabi: “Ini an basehan nin paghokom, na an liwanag nagdatong sa kinaban alagad an mga tawo namoot sa kadikloman imbes na sa liwanag, huli ta an saindang mga gibo maraot. Huli ta an nagsasagibo nin marigsok na mga bagay naoongis sa liwanag asin dai minadolok sa liwanag, tanganing an saiyang mga gibo dai masagwe. Alagad an naggigibo nin totoo minadolok sa liwanag, tanganing an saiyang mga gibo mahayag na ginibong kaoyon sa Dios.”​—Juan 3:​19-21.

15. Ano an mangyayari kun iignorohon ta an kaligtasan na ginibong posible nin Dios paagi sa saiyang Aki?

¹⁵ An espirituwal na liwanag nagdatong sa kinaban paagi ki Jesus, asin an paghinanyog sa saiya mahalagang marhay. Si Pablo nagsurat: “An Dios, na kaidtong haloy nang panahon nagtaram sa dakol na pangyayari asin sa dakol na paagi sa satong mga apoon paagi sa mga propeta, sa katapusan kan mga aldaw na ini nagtaram sa sato paagi sa sarong Aki, na ninombrahan niang paramana kan gabos na bagay.” (Hebreo 1:​1, 2) Ano an mangyayari kun sasayumahan ta an kaligtasan na ginibong posible nin Dios paagi sa saiyang Aki? Si Pablo padagos na nagsabi: “Kun an tataramon paagi sa mga anghel nagin marigon, asin an lambang paglapas asin kasumbikalan nag-ako nin balos sono sa hustisya; paano kita makakadulag kun mapabayaan niato an dakulaon na kaligtasan na iyan pinonan na itaram paagi sa satong Kagurangnan asin pinatotoohan sato kan mga nakadangog sa saiya, mantang an Dios uminiba sa pagpatotoo paagi sa mga tanda siring man sa mga anino asin manlaenlaen na makapangyarihan na gibo patin paagi sa pagwaras nin banal na espiritu sono sa saiyang kabotan?” (Hebreo 2:​2-4) Iyo, si Jesus mahalagang marhay sa pagbalangibog kan makahulang tataramon.​—Kapahayagan 19:10.

16. Taano ta puede kitang magkaigwa nin lubos na pagtubod sa gabos na hula ni Jehova Dios?

¹⁶ Siring sa nasambit, si Pedro nagsabi: “Daing hula nin Kasuratan na hale sa ano man na sadiring pakahulogan.” Kun basta mga tawo sana dai makagigibo nin totoong hula, alagad puede kitang magkaigwa nin lubos na pagtubod sa gabos na hula nin Dios. An mga ini hale ki Jehova Dios mismo. Paagi sa banal na espiritu pinangyari nia na masabotan kan saiyang mga lingkod kun paano naootob an mga hula sa Biblia. Tunay nanggad, nagpapasalamat kita ki Jehova na naheling ta an kaotoban kan dakol na siring na hula poon kan taon 1914. Asin biyo kitang segurado na an natatadang mga hula manongod sa katapusan kan maraot na sistemang ini nin mga bagay maootob gabos. Mahalagang marhay na padagos niatong tawan nin atension an mga prediksion nin Dios mantang pinasisirang ta an satong liwanag. (Mateo 5:​16) Kanigoan an pasasalamat niato na si Jehova ‘pinasisilyaban kita nin liwanag sa grabeng kadikloman’ na nakatatahob sa daga ngonyan!​—Isaias 58:10.

17. Taano ta kaipuhan ta an espirituwal na liwanag hale sa Dios?

¹⁷ An pisikal na liwanag nagpapangyari sa sato na makaheling. Pinagigin posible man kaiyan an pagtalubo nin mga pananom na nagtatao sa sato nin kadakol na laen-laen na kakanon. Dai kita puedeng mabuhay na mayo nin pisikal na liwanag. Paano man an espirituwal na liwanag? Tinatawan kita kaiyan nin giya asin ipinaheheling sa sato an ngapit na ihinula sa Tataramon nin Dios, an Biblia. (Salmo 119:105) Si Jehova Dios mamomoton na ‘isinusugo an saiyang liwanag asin an saiyang katotoohan.’ (Salmo 43:3) Segurado na maninigo kitang magpaheling  nin hararom na apresasyon sa siring na mga probisyon. Gibohon ta kun siring an satong pinakamakakaya na ilaog sa isip an liwanag kan “mamuraway na kaaraman dapit sa Dios” tanganing maliwanagan kaiyan an satong piguratibong puso.​—2 Corinto 4:6; Efeso 1:​18.

18. Ano an andam nang gibohon ngonyan kan Bitoon sa Aga ni Jehova?

¹⁸ Kanigoan an kaogmahan niato na maaraman na kan 1914, si Jesu-Cristo, an Bitoon sa Aga, suminirang sa bilog na uniberso asin pinonan na otobon an bisyon kan transpigurasyon! An Bitoon sa Aga ni Jehova yaon na ngonyan, andam nang gibohon an katuyohan nin Dios bilang dugang na kaotoban kan transpigurasyon​—an “ralaban kan dakulang aldaw nin Dios na Makakamhan sa gabos.” (Kapahayagan 16:​14, 16) Pakatapos na paraon an daan na sistemang ini, ootobon ni Jehova an saiyang panuga na “bagong kalangitan asin sarong bagong daga” na dian puede niato siang omawon sagkod lamang bilang an Soberanong Kagurangnan kan uniberso asin an Dios nin totoong hula. (2 Pedro 3:13) Sagkod sa marahayon na aldaw na iyan, padagos kitang maglakaw sa liwanag nin Dios paagi sa pagtao nin atension sa makahulang tataramon nin Dios.

Ano an Isisimbag Nindo?

• Paano nindo ilaladawan an transpigurasyon ni Jesus?

• Paano nagpapakosog sa pagtubod an transpigurasyon?

• Siisay o ano an Bitoon sa Aga ni Jehova, asin kasuarin iyan suminirang?

• Taano ta maninigo niatong tawan nin atension an makahulang tataramon nin Dios?

[Mga Hapot Para sa Pag-adal]

[Ritrato sa pahina 13]

Ikapaliliwanag daw nindo an kahulogan kan transpigurasyon?

[Ritrato sa pahina 15]

An Bitoon sa Aga suminirang na. Aram daw nindo kun paano asin kasuarin?