Tunay na Tabang Para sa mga Dukha

KAN si Jesu-Cristo, an Aki nin Dios, yaon sa daga, nagpaheling sia nin tunay na interes sa pagtabang sa mga dukha. Mapadapit sa ministeryo ni Jesus, an sarong nakaheling mismo nagsabi: “An mga buta nakaheheling na liwat, asin an mga pilay naglalakaw, an mga daoton nalilinigan asin an mga bungog nakadadangog, asin an mga gadan binubuhay liwat, asin an mga dukha pinapahayagan kan maogmang bareta.” (Mateo 11:5) Minsan siring, kumusta an minilyon na dukha ngonyan? Igwa daw nin ano man na maogmang bareta para sa sainda? Iyo, igwa nin mensahe nin paglaom!

Minsan ngani an mga dukha sa parate dai iniintindi asin nalilingawan kan kinaban sa pankagabsan, an Tataramon nin Dios, an Biblia, nanunuga: “Bakong pirme na lilingawan an dukha, ni na mapapara an paglaom kan mga mahoyo.” (Salmo 9:18) An nakararangang mga tataramon na ini maootob kun salidahan na kan Kahadean nin Dios, na sarong tunay na langitnon na gobyerno, an gabos na pamamahala nin tawo. (Daniel 2:44) Bilang Hade kan langitnon na gobyernong iyan, “maheherak [si Jesus] sa hababa asin sa dukha, asin an kalag kan mga dukha saiyang ililigtas. Gikan sa pan-aapi asin sa kadahasan saiyang tutuboson an saindang kalag, asin an saindang dugo magigin mahalagang marhay sa saiyang mga mata.”​—Salmo 72:​13, 14.

Ano an magigin kamugtakan sa pagbuhay kun si Cristo mamahala na sa daga? Kakamtan kan mga mabubuhay sa irarom kan pambilog na kinaban na pamamahala ni Cristo an bunga kan saindang pagpapagal. An Biblia nagsasabi sa Miqueas 4:​3, 4: “Sinda totoong magtutukaw, an lambang saro sa sirong kan saiyang ubas asin sa sirong kan saiyang higuerra, asin mayo nin siisay man na magpapatakig sa sainda; huli ta an mismong ngoso ni Jehova nin mga hukbo iyo an nagtaram kaiyan.” Reresolberan pa ngani kan Kahadean nin Dios an mga problema na helang asin kagadanan. (Isaias 25:8) Kanigoan an magigin kalaenan kan kinaban na iyan! Puede niatong tubodon an mga panugang ini sa Biblia huli ta an Dios mismo an nagpasabong kaiyan.

Apuera sa pagtao nin mensahe nin paglaom, tinatabangan kita kan Biblia na makaya an pan-aroaldaw na mga problema, arog kan kun paano panggaganahan an kawaran nin paggalang sa sadiri, na tibaad huli sa pagigin dukha. Aram kan daing sukat na Kristiano basado sa saiyang pag-adal kan Biblia na sia mahalagang marhay sa pagheling nin Dios kapareho man nin sarong Kristianong mayaman. An libro sa Biblia na Job nagsasabi na an Dios “dai nagtao nin orog na konsiderasyon sa mahal na tawo kisa dukha, huli ta sinda gabos gibo kan saiyang mga kamot.” (Job 34:19) Pareho sindang namomotan nin Dios.​—Gibo 10:​34, 35.