Mga Hapot Hale sa mga Parabasa

Paano maninigong mansayon nin mga Kristiano an paggamit nin mga tampok kan pagkamundag?

Sa nagkapirang kultura, an mga tampok kan pagkamundag ikinokonektar sa bulan kan pagkamundag nin saro. Personal na desisyon kun baga an sarong Kristiano masulot nin singsing na may partikular na gapong mutya. (Galacia 6:5) Sa paggibo kan desisyon na iyan, igwa nin mahahalagang bagay na dapat na konsideraron.

Ipinaliwanag kan Encyclopaedia Britannica na an tampok kan pagkamundag sarong “gapong mutya na ikinokonektar sa petsa kan pagkamundag nin saro, na sa parate hinohona na an pagsulot kaiyan madara nin marahay na suerte o marahay na salud.” Idinagdag kan reperensiang ini: “An lihis sa natural na mga kapangyarihan haloy nang iinatribwir kan mga astrologo sa nagkapirang gapong mutya.”

Nangorogna kan suanoy na mga panahon dakol an nagtutubod na an tampok kan pagkamundag matao nin marahay na suerte sa nagsusulot kaiyan. Nagtutubod daw kaini an tunay na Kristiano? Dai, huli ta naaaraman nia na kinondenar ni Jehova idtong mga nagbaya saiya asin idtong mga nagtiwala sa “dios nin Marahay na Suerte.”​— Isaias 65:11.

Durante kan Edad Media, an mga parahula nagpili nin mutya para sa kada bulan kan taon. Dinagka ninda an mga tawo na isulot an mutya kan bulan kan saindang pagkamundag, na maprotehir daa sa nagsusulot kaiyan tumang sa kapahamakan. Alagad magigin sala sa Kasuratan para sa mga Kristiano na sumunod sa paggiya kan mga parahula huli ta kinokondenar sinda kan Biblia.​—Deuteronomio 18:​9-​12.

Magigin bako man na angay para sa mga Kristiano na tawan nin espesyal na kahulogan an sarong singsing huli sana ta igwa ini nin tampok kan pagkamundag. An Mga Saksi ni Jehova dai nagseselebrar nin mga kumpleanyo. Ini huli ta an siring na mga selebrasyon nagpopokus nin labi-labing atension sa indibiduwal asin an solamenteng mga kumpleanyo na nakarekord sa Biblia iyo idtong sa mga namamahala na dai naglingkod sa Dios.​—Genesis 40:20; Mateo 14:​6-​10.

May mga tawo na naghohona na an pagsulot nin singsing na may tampok kan pagkamundag igwang marahay na impluwensia sa personalidad kan nagsusulot kaiyan. Minsan siring, an tunay na mga Kristiano dai nagtutubod kaini, nin huli ta naaaraman ninda na “an bagong personalidad” isinosolog sa irarom kan impluwensia kan banal na espiritu nin Dios asin paagi sa pag-aplikar kan mga prinsipyong sono sa Kasuratan.​—Efeso 4:​22-​24.

An motibo sarong importanteng marhay na bagay. Sa pagdedesisyon kun baga masulot nin singsing na may tampok kan pagkamundag, puedeng hapoton nin sarong Kristiano an saiyang sadiri, ‘Boot ko daw na isulot an singsing na ini huli sana ta nagustohan ko an mutya, minsan ngani nanongod na ini inaapod man na tampok kan pagkamundag? O ako daw medyo naimpluwensiahan na kan superstisyosong mga ideya na ikinonektar nin nagkapirang tawo sa siring na mga mutya?’

Maninigong siyasaton nin sarong Kristiano an saiyang puso tanganing madeterminaran an saiyang motibo. “Orog sa gabos na maninigong ingatan, ingatan mo an saimong puso,” sabi kan Kasuratan, “huli ta gikan dian an mga burabod nin buhay.” (Talinhaga 4:23) Sa pagdesisyon nia mapadapit sa mga tampok kan pagkamundag, an lambang Kristiano makikinabang kun kokonsideraron nia an saiyang motibo asin an posibleng mga epekto kan saiyang paggawe sa saiya mismong sadiri asin sa iba.​—Roma 14:13.