‘Hanapon Nindo Kun Siisay an Maninigo’

AN DAMASCO sarong maoswag na siudad kan enot na siglo kan satong Komun na Kapanahonan. Napapalibotan nin mga tatamnan, garo iyan sarong oasis para sa mga karaban na nag-aarabot hale sa mga kadagaan sa sirangan. Dai nahaloy pagkagadan ni Jesu-Cristo, nagkaigwa nin Kristianong kongregasyon sa Damasco. Kabilang sa mga miembro kaini an mga Judio na posibleng nagin mga parasunod ni Jesus durante kan Kapiestahan nin Pentecostes sa Jerusalem kan 33 C.E. (Gibo 2:​5, 41) An nagkapirang disipulo hale sa Judea tibaad nagbalyo sa Damasco kan magpoon an paglamag kasunod kan paggapo ki Esteban.​—Gibo 8:1.

Posible na kaidtong 34 C.E., an sarong Kristiano sa Damasco na an ngaran Ananias nag-ako nin pambihirang asignasyon. An Kagurangnan nagsabi sa saiya: “Buhat, pumaduman ka sa kalyeng inaapod Tanos, asin sa harong ni Judas hanapon mo an sarong tawo na an ngaran Saulo, taga Tarso. Huli ta, uya! sia namimibi.”​—Gibo 9:11.

An kalye na inaapod Tanos mga saro may kabangang kilometro an laba asin minaagi sa sentro kan Damasco. Sa kaiba digding ika-19 siglong inukit, maiimahinar niato kun ano an itsura kan kalye kan suanoy na mga panahon. Huli sa pagkagibo kaiyan, tibaad haloy-haloy na hinanap ni Ananias an harong ni Judas. Minsan siring, nasumpongan iyan ni Ananias asin huli sa saiyang pagsongko si Saulo nagin nang si apostol Pablo, sarong maigot na parabalangibog kan maogmang bareta.​—Gibo 9:​12-​19.

Isinugo ni Jesus an saiyang mga disipulo asin sinabihan sinda na ‘hanapon kun siisay an maninigo’ kan maogmang bareta. (Mateo 10:11) Minalataw na literal na hinanap ni Ananias si Saulo. Arog ki Ananias, maogmang hinahanap kan Mga Saksi ni Jehova an mga maninigo asin naoogmang marhay kun inaako kan mga tawo an maogmang bareta kan Kahadean. Nagigin kapakipakinabang an gabos na paghihingoa huli sa pakanompong sa sainda.​—1 Corinto 15:58.

[Ritrato sa pahina 32]

An “kalye na inaapod Tanos” sa presenteng aldaw

[Picture Credit Line sa pahina 32]

Hale sa librong La Tierra Santa, Tomo II, 1830