An Pantubos Ibinabantog an Kadakulaan kan Katanosan nin Dios

PAGKATAPOS kan pagrebelde ni Adan asin Eva, idineklarar ni Jehova an saiyang katuyohan na magbangon nin sarong Banhi na lulugadon sa bool. (Genesis 3:15) Ini naotob kan papangyarihon kan mga kaiwal nin Dios na magadan si Jesu-Cristo sa sarong hariging pasakitan. (Galacia 3:​13, 16) Si Jesus mayong kasalan, huli ta sia milagrosong ipinangidam sa matris nin sarong birhen paagi sa kapangyarihan kan banal na espiritu. Kun siring, an saiyang pinabolos na dugo puedeng gamiton bilang halagang pantubos tanganing patalingkason an mga tawo, na nagmana nin kasalan asin kagadanan ki Adan.​—Roma 5:​12, 19.

Mayo nin makakaolang sa makakamhan sa gabos na Dios, si Jehova, sa pag-otob kan saiyang katuyohan. Sa siring, pagkatapos na mahulog an tawo sa kasalan, an halagang pantubos garo man sana ibinayad na sa punto de vista ni Jehova asin sia puedeng magkaigwa nin relasyon sa mga nagtubod sa kaotoban kan saiyang mga panuga. Ini nagpangyari sa makasalan na mga gikan ni Adan, siring ki Enoc, Noe, asin Abraham, na maglakaw sa kaibahan nin asin magin katood pa ngani nin Dios na dai dinidigtaan an saiyang kabanalan.​—Genesis 5:​24; 6:9; Santiago 2:23.

An nagkapirang indibiduwal na nagtubod ki Jehova nakakomiter nin magabat na mga kasalan. Sarong halimbawa si Hadeng David. ‘Paano,’ tibaad ihapot nindo, ‘nahimong padagos na bendisyonan ni Jehova si Hadeng David pagkatapos na makakomiter si David nin pagsambay ki Bat-seba asin dangan papangyarihon an pagkagadan kan saiyang agom, si Urias?’ An sarong mahalagang dahelan iyo an tunay na pagsolsol asin pagtubod ni David. (2 Samuel 11:​1-​17; 12:​1-​14) Basado sa atang ni Jesu-Cristo sa ngapit, napalampas nin Dios an mga kasalan kan nagsosolsol na si David pero napagdanay pa man giraray Nia an Saiyang sadiring hustisya asin katanosan. (Salmo 32:​1, 2) Bilang prueba kaini, ipinapaliwanag kan Biblia kun ano an pinakamarahay na nagibo kan pantubos ni Jesus, arin na baga, an ‘pagpahayag kan sadiring katanosan nin Dios, huli ta saiyang ipinapatawad an mga kasalan na nangyari kan mga nakaagi’ asin “sa presenteng panahon.”​—Roma 3:​25, 26.

Iyo, an katawohan nag-aako nin dakulang mga pakinabang huli sa halaga kan dugo ni Jesus. Basado sa pantubos, an nagsosolsol na mga tawong parakasala puedeng magkaigwa nin dayupot na relasyon sa  Dios. Dugang pa, an pantubos nagbubukas kan dalan para sa pagkabuhay liwat kan mga gadan pasiring sa bagong kinaban nin Dios. Magigin kabilang dian an maimbod na mga lingkod nin Dios na nagadan bago magbayad si Jesus kan pantubos asin pati an dakol na nagadan na ignorante asin dai nagsamba sa Saiya. An Biblia nagsasabi: “Magkakaigwa nin pagkabuhay liwat an mga matanos sagkod an mga bakong matanos.” (Gibo 24:15) Sa panahon na iyan, basado sa pantubos, itatao ni Jehova sa gabos na makinuyog na tawo an buhay na daing katapusan. (Juan 3:36) Ipinaliwanag mismo ni Jesus: “An Dios namoot na gayo sa kinaban na itinao nia an saiyang Aking bugtong, tanganing an lambang nagtutubod sa saiya dai mapahamak kundi magkaigwa nin buhay na daing katapusan.” (Juan 3:16) An gabos na pakinabang na ini makakamtan kan katawohan huli sa probisyon nin Dios na atang na pantubos.

Minsan siring, an pambihirang bagay manongod sa pantubos bakong an mga pakinabang na inaako niato gikan dian. An may mas dakulang importansia iyo an nagigibo kan pantubos ni Cristo para sa ngaran ni Jehova. Iyan nagpapatunay na si Jehova sarong Dios nin sangkap na hustisya na puedeng mangunlabot sa makasalan na mga tawo asin magdanay pa man giraray na dalisay asin banal. Kun dai nagin katuyohan nin Dios na itao an pantubos, mayo kutana nin gikan ni Adan, minsan pa si Enoc, Noe, asin Abraham, na nakalakaw sa kaibanan ni Jehova o nagin saiyang katood. Narealisar ini kan salmista asin isinurat: “Kun mga sala an saimong binabantayan, O Jah, O Jehova, siisay an makakatindog?” (Salmo 130:3) Maninigo nanggad kitang magpasalamat ki Jehova huli sa pagsugo kan saiyang namomotan na Aki sa daga sagkod ki Jesus huli sa boluntad na pagtao kan saiyang buhay bilang pantubos para sa sato!​—Marcos 10:45.