“Pinirit Nia Kami”

AN PAGKAMAPAG-ISTIMAR bantog sa mga kadagaan sa Sirangan. Halimbawa, sa India tibaad itao pa ngani kan pamilya an kakanon ninda tanganing mapakakan an dai linalaoman na bisita. An sarong ina sa Iran pirmeng pinapano nin kakanon an repridyeretor tanganing maistimar nia an mga bisita na tibaad dai linalaoman na umabot.

An siring na espiritu nin pagtao na may pagkabukas-palad risang-risa sa tahaw kan dakol na tawong nasambitan sa Biblia. An sarong marahayon na halimbawa iyo si Lidia, na posibleng sarong proselitong Judia na nag-eerok sa Filipos, an mayor na siudad sa distrito nin Macedonia. Sarong aldaw nin sabbath, nanompongan ni apostol Pablo asin kan saiyang nagbibiaheng mga kairiba si Lidia asin an nagkapira pang babae na nagtitiripon sa may salog sa luwas kan Filipos. Binukasan ni Jehova an puso nia mantang si Pablo nagtataram kan okasyon na iyan. Bilang resulta, sia nabautismohan pati an mga miembro kan saiyang kasararo sa harong. Dangan sia nakimaherak sa mga nagbibiahe: “Kun ako ibinibilang nindong maimbod ki Jehova, dumagos kamo sa sakong harong.” An kaibaiba ni Pablo na si Lucas nagsabi: “Pinirit nia kami.”—Gibo 16:11-15.

Arog ni Lidia, an mga Kristiano ngonyan nag-iistimar sa mga kapagtubod, na arog baga kan nagbibiaheng mga paraataman asin kan saindang agom. ‘Pinipirit sinda’ kan mga kag-imbitar. Dangan, an mga nag-iistimar binebendisyonan nin nakakaparigon sa boot na pakikipag-olay asin espirituwal na pakikiasosyar. Minsan ngani an kadaklan na Saksi ni Jehova limitado an kabuhayan, ‘sinusunod ninda an dalan nin pagkamapag-istimar.’ (Roma 12:13; Hebreo 13:2) An saindang espiritu nin pagtao nagpapaogma sa sainda. Tama nanggad si Jesus kan sabihon nia: “Igwang orog na kaogmahan sa pagtao kisa pag-ako.”—Gibo 20:35.