Mga Hapot Hale sa mga Parabasa

Mantang pinagbotan an mga Judio na ‘dai magkakan nin ano man na may lebadura’ durante kan Paskua, taano ta naggamit si Jesus nin arak—na sarong produkto nin pag-alsom—kan pinoponan an Memorial kan saiyang kagadanan?—Exodo 12:20; Lucas 22:7, 8, 14-20.

An selebrasyon nin Paskua, na tanda kan lagdoan na pagharale kan mga aki ni Israel sa Egipto, pinonan kan 1513 B.C.E. Kan nagtatao nin mga instruksion para sa pagselebrar kaiyan, si Jehova nagsabi: “Mayo kamong kakakanon na ano man na may lebadura. Sa gabos na erokan nindo makakan kamo nin mga tinapay na mayo nin lebadura.” (Exodo 12:11, 20) An pangangalad na ini nin Dios aplikado sana sa klase nin tinapay na kakakanon durante kan Paskua. Mayong sinambit dapit sa arak.

An pangenot na dahelan kan pangangalad sa lebadura iyo na an mga Israelita naghihidali sa paghale sa Egipto. “Dinara kan banwaan an saindang minasang harina bago pa iyan malagan nin lebadura,” an paliwanag kan Exodo 12:34, “pati an saindang mga ramasan na nakapatos sa saindang mga alikboy na nasa saindang abaga.” An kawaran nin lebadura durante kan suminunod na mga selebrasyon nin Paskua mapagirumdom sa masurunod na kapag-arakian dapit sa mahalagang katunayan na ini.

Pag-abot nin panahon, parate nang minamansay an lebadura bilang simbolo nin kasalan o kalapaan. Halimbawa, sa pagsambit dapit sa sarong imoral na tawo sa laog kan Kristianong kongregasyon, si apostol Pablo naghapot: “Dai daw nindo aram na an kadikit na lebadura nakakapausbog sa bilog na masa?” Dangan sinabi nia: “Halea nindo an daan na lebadura, tangani na kamo magin bagong masa, mantang kamo mayo nin lebadura. Huli ta, sa katotoohan, si Cristo na satuyang paskua inatang na. Bilang resulta otobon ta an kapiestahan, bakong sa daan na lebadura, ni sa lebadura nin karatan asin karigsokan, kundi sa daing lebadurang mga tinapay nin sinseridad asin katotoohan.” (1 Corinto 5:6-8) Solamenteng tinapay na mayo nin lebadura an puedeng magserbing simbolo kan daing kasalan na hawak na tawo ni Jesus.—Hebreo 7:26.

An paggamit nin arak sa selebrasyon nin Paskua idinagdag na sana kan mga Judio kan huri. Posibleng marhay na idinagdag iyan pagkabalik ninda hale sa pagkadistiero sa Babilonya. Mayong nakarekord sa Biblia na pagkontra sa pagkaliwat na ini, asin kun siring puedeng angay na gamiton ni Jesus an arak sa pamanggihan nin Paskua. Siempre, an natural na pag-alsom nin arak kan suanoy na mga panahon laen man sa pag-usbog kan tinapay. Kun dapit sa masa, an pagdagdag nin lebadura kinaipuhan sa pag-usbog. An arak na gibo sa ubas dai nangaipo nin siring na sangkap. An mga sangkap para sa pag-alsom yaon na sa mga ubas. An purong tagok nin ubas dai makukua sa Paskua huli ta nag-alsom na iyan poon sa tig-anihan sa tigrakdag sagkod sa Paskua sa tigsoli.

Huli kaini, an paggamit ni Jesus nin arak bilang emblema sa Memorial dai sa ano man na paagi minakontra sa mga instruksion mapadapit sa lebadura kun Paskua. An ano man na pulang arak na dai linagan nin pampahamis, dai dinagdagan nin inomon na de alkohol, o dai dinagdagan nin mga pampasiram angay na gamiton bilang simbolo kan “mahal na marhay na dugo” ni Cristo.—1 Pedro 1:19.