Puede Ka daw Bumalyo sa Macedonia?

SA DUONGAN na siudad nin Troas sa Asia Minor, nag-ako si apostol Pablo nin sarong bisyon. Sarong lalaking taga Macedonia an nakimaherak sa saiya: “Bumalyo ka sa Macedonia asin tabangi kami.” Pakaheling tolos ni Pablo kan bisyon na iyan, sia asin an saiyang mga kaibaiba sa pagbiahe ‘nag-isip na inapod sinda nin Dios tanganing ipahayag an maogmang bareta’ sa mga taga Macedonia. An resulta? Sa Filipos, an pangenot na siudad nin Macedonia, nagin mga paratubod si Lidia asin an saiyang kairiba sa harong. Suminunod man an iba pa sa probinsiang iyan kan Roma na Macedonia.—Gibo 16:9-15.

Naheheling man sa mga Saksi ni Jehova ngonyan an kaagid na kaigotan. Dakol an gikan sa boot na nagbalyo, na sinda mismo an naggastos, sa mga lugar na mas dakol an pangangaipo para sa mga parabalangibog kan Kahadean. Halimbawa, minawot ni Lisa na magin mas pangenot sa saiyang buhay an ministeryo. Sia nagbalyo sa Kenya hale sa Canada. Si Trevor asin Emily, na taga Canada man, nagduman sa Malawi na an pasohan pahiwason an saindang ministeryo. Si Paul asin Maggie, na taga Inglatera, minansay an saindang pagretiro bilang marahayon na oportunidad tanganing orog pang paglingkodan si Jehova kaya nagduman sinda sa Sirangan na Aprika. Ika daw mapagsakripisyo? Puede mo daw pag-isipan na bumalyo man? Kun iyo, anong mga prinsipyo sa Biblia asin praktikal na mga suhestion an makakatabang sa saimo na magin mapanggana?

Analisaron an Saimong Sadiri

An sarong bagay na kaipuhan mong isip-isipon iyo an saimong mga motibo. An pinakadakulang togon, an sabi ni Jesus, iyo an: “Kamotan mo si Jehova na saimong Dios sa bilog mong puso asin sa bilog mong kalag patin sa bilog mong isip.” An  mga dahelan sa paglilingkod sa ibang nasyon maninigo na iyo an pagkamoot sa Dios asin an pagmawot na otobon an sugo na gumibo nin mga disipulo. Si Jesus nagsabi pa: “An ikaduwa, na arog kaiyan, iyo ini, ‘Kamotan mo an saimong kapwa nin siring sa saimo man sana.’” An pagkamoot sa kapwa naheheling paagi sa sinserong pagmawot na tumabang. (Mat. 22:36-39; 28:19, 20) Sa parate, an paglilingkod sa ibang nasyon may kalabot na dakol na gibohon asin pagsakripisyo. Bako nanggad iyan pamamasyar. Pagkamoot an dapat na magmotibar sa saimo. Si Remco asin Suzanne na taga Netherlands, na ngonyan naglilingkod sa Namibia, siring kaini an pagkasabi dapit dian, “Kami nagdadanay digdi huli sa pagkamoot.”

Si Willie, na sarong paraataman sa sirkito sa Namibia, nagsabi: “An mga nagbalyo sa ibang nasyon dai nag-asa na pagduman ninda aasikasohon sinda kan mga tugang duman. Sinda nagduman na an nasa isip maglingkod kaiba kan mga tugang, na tinatabangan an mga ini sa paghuhulit.”

Pagkatapos na siyasaton an saimong mga motibo, hapoton an saimong sadiri: ‘Ano an eksperyensia ko na puedeng magin kapakipakinabang sa paglilingkod sa ibang nasyon? Ako daw epektibong ministro? Anong mga lenguahe an tatao ako? Ako daw andam na makanood nin bagong lenguahe?’ Maninigo na ipakipag-olay mo iyan nin sinsero sa saimong pamilya. Ipakipag-olay man iyan sa kamagurangan sa saindong kongregasyon. Asin ipamibi nanggad iyan ki Jehova. An siring na sadiosan na pagsiyasat sa sadiri posibleng makatabang sa saimo na maheling kun baga may abilidad asin determinasyon ka talaga na maglingkod sa ibang nasyon.—Helingon an kahon na  “Midbidon an Saimong Sadiri.”

 Kun Saen Maglilingkod

Si Pablo pinaduman sa Macedonia paagi sa sarong bisyon. Ngonyan, si Jehova dai naggagamit nin mga milagro tanganing direhiran kita. Pero, paagi sa magasin na ini asin iba pang publikasyon, naaaraman kan mga lingkod nin Dios an dakol na teritoryo na nangangaipo nin dakol na parahayag. Kaya magpoon ka paagi sa paglista kan siring na mga lugar. Kun mayo ka sa kamugtakan na makanood nin bagong lenguahe o dai magigin permanente an pag-istar mo sa ibang nasyon, pag-isipan an paglilingkod sa nasyon na tatao ka na kan pangenot na lenguahe. Dangan, aramon an mga bagay na arog baga kan mga kahagadan sa pagkua nin visa, transportasyon, seguridad, kamugtakan sa pagbuhay, asin klima. Puedeng makatabang sa saimo an pakipag-olay sa mga naggibo na kan lakdang na iyan. Ipamibi iyan. Girumdomon na si Pablo asin an saiyang mga kaibaiba “binawalan kan banal na espiritu na ihulit an tataramon sa distrito nin Asia.” Minsan ngani pinagmaigotan nindang magduman sa Bitinia, “dai sinda tinogotan kan espiritu ni Jesus” na gibohon iyan. Kaagid kaiyan, tibaad mangaipo nin sarong peryodo nin panahon tanganing madeterminaran kun saen ka talaga makakatabang.—Gibo 16:6-10.

Sa puntong ini tibaad igwa ka na nin pirang realistikong pagpipilian. Kun pinaplano mong maglingkod sa ibang nasyon, magsurat sa mga sangang opisina kan Mga Saksi ni Jehova sa mga nasyon na iniisip-isip mo. Sabihon an saimong teokratikong mga pribilehio kan nakaagi asin sa presente saka an ano man na tibaad espesipikong mga hapot mo, arog baga kan manongod sa kamugtakan sa pagbuhay, mga klase nin istaran na puede mong makua, kun igwa nin mga ospital, asin mga oportunidad para sa sekular na trabaho. Dangan itao mo an surat o mga surat sa komite sa paglilingkod sa saindong kongregasyon. Iiiba ninda an saindang surat nin rekomendasyon asin iyan direkta nindang ipapadara sa mga sangang opisina na sinabi mo. An mga simbag posibleng marhay na makatabang sa saimo na magdesisyon kun saen ka magigin epektibong marhay.

Si Willie, na nasambitan sa enotan, nagsabi: “An mga nagin mapanggana sa parate nagdalaw nguna sa nasyon asin naghanap nin mga lugar na puede talaga sindang magin maogma. Inadmitir nin sarong mag-agom na madedepisilan sinda kun maistar sinda sa lugar na harayo sa siudad. Kaya nag-istar sinda sa sarong sadit na banwaan na nangangaipo nin mga parahayag alagad puede sindang magin maogma sono sa pamantayan nin pamumuhay na gusto ninda.”

Pag-atubang sa Bagong mga Kadepisilan

An paghale sa pinagkatodan nang lugar asin pagpasiring sa bago nanggad na lugar daing duda na magtatao sa saimo nin nagkapirang kadepisilan. “An kapungawan puedeng magin depisilon nanggad,” an sabi ni Lisa, na nasambitan sa enotan. Ano an nakatabang sa saiya? An pagigin dayupot sa mga tugang sa lokal na kongregasyon sa bago niang istaran. Ginibo niang pasohan na magin pamilyar sa ngaran kan gabos na tugang. Tanganing magibo ini, sia nag-aabot nin amay sa mga pagtiripon asin dai tolos nagpupuli pagkatapos  kaiyan tanganing makipag-olay sa mga tugang. Si Lisa nag-iiba sa ibang parahayag sa ministeryo, nag-iimbitar sa saiyang harong nin dakol na tugang, asin nagkaigwa nin bagong mga katood. Sia nagsabi: “Dai ko pinagbabasolan an mga pagsasakripisyo. Talagang binendisyonan ako ni Jehova.”

Pagkatapos na padakulaon an mga aki, binayaan ni Paul asin Maggie an saindang harong na 30 taon na nindang inistaran. Si Paul nagsaysay: “Bako nanggad pasil na talikdan an mga rogaring. An talagang depisil iyo an pagbaya sa pamilya, na mas depisil kisa sa inantisipar mi. Nagparahibi kami sa eroplano. Madalion isipon na, ‘Dai mi nanggad kayang gibohon ini.’ Alagad nagsarig kami ki Jehova. An pagkaigwa nin bagong mga katood nagtatao sa saimo nin orog pang determinasyon na magpadagos.”

Si Greg asin Crystal nagdesisyon na bumalyo sa Namibia hale sa Canada huli ta tatao sindang magtaram nin Ingles, an opisyal na lenguahe kan nasyon. Pero, paghaloyhaloy naheling ninda kun gurano kapakipakinabang na makanood nin lokal na lenguahe. “Kun beses, nadedesganar kami. Minsan siring, kan manodan niamo an lokal na lenguahe saka sana niamo nasabotan an kultura. An dayupot na pakikiasosyar sa lokal na mga tugang nakatabang sa samo na makibagay sa samong bagong kamugtakan.”

An siring na kapakumbabaan asin pagigin andam puede man na magkaigwa nin positibong epekto sa lokal na mga tugang. Maogmang ginigirumdom ni Jenny an mga pamilyang nagbalyo sa Irlandia, na duman sia nagdakula. “Sinda an mga mapag-istimar,” an sabi nia. “Nagduman talaga sinda tanganing maglingkod, bakong tanganing paglingkodan. Sinda maigoton asin maogmahon kaya kaipuhan ko man na probaran iyan.” Si Jenny naglilingkod na ngonyan, kaiba kan saiyang agom, bilang misyonera sa Gambia.

“Nakakapayaman” an Bendisyon ni Jehova

Nakakapayaman nanggad an eksperyensia ni Pablo sa Macedonia! Pakalihis nin mga sampulong taon, sia nagsurat sa mga tugang sa Filipos: “Danay akong nagpapasalamat sa sakong Dios sa kada pakagirumdom ko sa saindo.”—Fil. 1:3.

Arog man kaiyan an saboot ni Trevor asin Emily, na naglingkod sa Malawi bago imbitaran sa Paadalan sa Biblia kan Watchtower sa Gilead. “Kun minsan iniisip mi kun baga tama an ginigibo niamo, alagad maogma kami. Nagin mas dayupot kami sa lambang saro asin namatean mi an bendisyon ni Jehova.” Si Greg asin Crystal, na nasambitan sa enotan, nagsabi, “Mayo na nin ibang bagay na gusto ming gibohon.”

Totoo, bakong gabos nasa kamugtakan na maglingkod sa ibang nasyon. Para sa nagkapira mas marahay an pagbalyo sa sarong lugar, sa laog mismo kan saindang nasyon, na mas dakol an pangangaipo para sa mga parahayag. An iba puedeng maghingoa na magin pasohan an paglilingkod sa ibang kongregasyon na harani sa saindang harong. An mahalaga iyo na gibohon mo an pinakamakakaya tanganing paglingkodan si Jehova. (Col. 3:23) Sa siring, an ipinasabong na mga tataramon magigin totoo sa saimo: “An bendisyon ni Jehova—iyan an nakakapayaman, asin dai nia iyan dinadagdagan nin kolog.”—Tal. 10:22.

[Kahon/Ritrato sa pahina 5]

 Midbidon an Saimong Sadiri

Sa pagsiyasat sa saimong sadiri tanganing maaraman kun puede kang maglingkod sa ibang nasyon, estudyaran an minasunod na mga hapot asin sadiosan saka mapagngayongayong turotimbangon nin realistiko kun baga nasa kamugtakan kang bumalyo. An impormasyon hale sa nakaaging mga isyu kan An Torrengbantayan asin The Watchtower makakatabang sa saimo na gibohon iyan.

• Ako daw tawong espirituwal?—“Mga Lakdang Pasiring sa Kaogmahan” (Oktubre 15, 1997, pahina 6)

• Ako daw epektibong ministro?—“How to Succeed in the Pioneer Ministry” (Mayo 15, 1989, pahina 21)

• Kaya ko daw na mamuhay na harayo sa sakong pamilya asin mga katood?—“Pakapanggana sa Kapungawan sa Paglilingkod sa Dios” (Mayo 15, 1994, pahina 28)

• Puede daw akong makanood nin bagong lenguahe?—“Paglilingkod sa Sarong Kongregasyon na Iba an Lenguahe” (Marso 15, 2006, pahina 17)

• Kaya daw kan pinansial na kamugtakan ko kun ako mabalyo?—“Puede daw Kamong Maglingkod sa Langtad sa Ibang Nasyon?” (Oktubre 15, 1999, pahina 23)

[Ritrato sa pahina 6]

An kapakumbabaan asin pagigin andam puedeng magkaigwa nin positibong epekto sa lokal na mga tugang

[Ritrato sa pahina 7]

An mga nagbalyo tanganing maglingkod iyo an mga mapanggana