Magin Andam Ka!
Magin Andam Ka!
“Kamo . . . magin andam, huli ta sa oras na dai nindo pinaghohona, an Aki nin tawo madatong.”—MAT. 24:44.
1, 2. (a) Anong mga pangyayari na ihinula sa Biblia an puedeng ikomparar sa pag-atake nin sarong tigre? (b) Ano an epekto sa saindo kan maabot na pag-atake?
SA LAOG nin dakol na taon, sarong midbid na enterteyner an naglilibang sa mga paradalan paagi sa matoninong na pakikikawat sa saiyang sinanay na mga tigreng Bengal. Sia nagsabi: “Kun itao sa saimo kan hayop an tiwala kaiyan, an pagmate mo garo ka tinawan kan pinakamagayon na regalo sa kinaban.” Alagad kan Oktubre 3, 2003, nawara an tiwalang iyan. Sa dai maaraman na dahelan, inatake sia kan saro sa mga sinasanay niang hayop, sarong 172 kilos na puting tigre. Biyong dai inaasahan an pag-atakeng iyan, asin bakong andam an nagsasanay nin tigre.
2 Interesanteng mangnohon na ihinula kan Biblia an pag-atake nin sarong “mabangis na hayop,” asin kaipuhan na kita magin andam. (Basahon an Kapahayagan 17:15-18.) Siisay an aatakehon kan hayop na ini? Sa nakakabiglang pagbago nin mga pangyayari, an kinaban kan Diablo magkakabaranga tumang sa sadiri kaiyan. An kolor eskarlatang mabangis na hayop nagrerepresentar sa Naciones Unidas, asin “an sampulong sungay” nagrerepresentar sa gabos na politikal na kapangyarihan. Bibirikan kaini an siring sa patotot na Dakulang Babilonya, an pambilog na kinaban na imperyo nin falsong relihion, asin lalaglagon sia kaini sa madahas na paagi. Noarin ini mangyayari? Dai niato aram an aldaw asin an oras. (Mat. 24:36) An aram niato iyo na maabot iyan sa oras na dai niato inaasahan asin na nainaan na an panahon na natatada bago kan pag-atakeng iyan. (Mat. 24:44; 1 Cor. 7:29) Kun siring, mahalagang marhay na papagdanayon niato an satong sadiri na andam sa espirituwal tanganing kun mangyari na an pag-atakeng iyan asin kun mag-abot na si Cristo bilang Parakastigo, sia man magigin an satong Paraligtas! (Luc. 21:28) Tanganing magin siring kaini kaandam, puede kitang makanood sa maimbod na mga lingkod nin Dios na nagin andam asin sa siring nakaheling mismo kan kaotoban kan mga panuga nin Dios. Isasapuso daw niato an tunay na buhay na mga eksperyensiang ini?
Magin Andam Ka—Arog ni Noe
3. Anong kamugtakan an nagin dahelan na madepisilan si Noe na maimbod na maglingkod sa Dios?
3 Sa ibong kan nakakabaldeng kamugtakan na lakop sa daga kan panahon na nabubuhay si Noe, sia nagin andam na maheling an kaotoban kan panuga nin Dios. Imahinara an kadepisilan na kinaipuhan na atubangon ni Noe kan an rebeldeng mga anghel magsulot nin pisikal na hawak asin makidorog sa magagayon na babae! An bakong natural na pagsasarong ini nagbunga nin mga aki na nakakalabi sa tawo, “mga makokosog” na ginamit an saindang nakakalabing kosog tanganing daog-daogon an iba. (Gen. 6:4) Isip-isipa an ibinungang kadahasan mantang an mga higanteng ini nagpapalakop nin kariribokan saen man sinda magduman. Bilang resulta, an karatan naglakop asin biyong nagin biko an kaisipan saka gawe-gawe nin tawo. Dangan, an Soberanong Kagurangnan na Jehova nagpaluwas nin banal na pagboot na nagin tanda kan kapinonan kan katapusan kan bakong diosnon na kinaban na iyan.—Basahon an Genesis 6:3, 5, 11, 12. *
4, 5. Sa anong mga paagi na an kamugtakan niato ngonyan kaagid kan panahon ni Noe?
4 Ihinula ni Jesus na an kamugtakan kan satong panahon magigin kaagid kaidtong panahon ni Noe. (Mat. 24:37) Halimbawa, naheheling man niato an pakikiaram kan maraot na mga espiritu. (Kap. 12:7-9, 12) An demonyong mga anghel na ini nagsulot nin pisikal na hawak kan panahon ni Noe. Minsan ngani dai na sinda tinogotan na magsulot nin pisikal na hawak na siring sa tawo, pinagmamaigotan ninda na parehong kontrolon an mga hoben asin gurang. Dai aram nin mga tawo, an mga espiritung ini na biribid an pagmansay sa sekso naoogma sa maraot asin marigsok na mga gibo kan mga tawo na naiimpluwensiahan ninda sa daga.—Efe. 6:11, 12.
5 An Tataramon nin Dios ilinaladawan an Diablo bilang “paragadan” asin nagsasabi na igwa sia “kan kapangyarihan na magpangyari nin kagadanan.” (Juan 8:44; Heb. 2:14) Limitado an kapangyarihan nia kun dapit sa direktang pagpangyari nin kagadanan. Minsan siring, pinapalakop kan mabangis na espiritung ini an pangloloko asin pang-aakit. Itinatanom nia sa puso asin isip nin mga tawo an intension na gumadan. Halimbawa, an 1 sa kada 142 na aking namumundag sa Estados Unidos magigin biktima nin paggadan. Mantang lakop na marhay an daing saysay na kadahasan, sa paghona daw nindo mas dikit na atension an itatao ni Jehova ngonyan kisa kan panahon ni Noe? Dai daw sia mahiro?
6, 7. Paano ipinaheling ni Noe asin kan saiyang pamilya an pagtubod asin diosnon na pagkatakot?
6 Pag-abot nin panahon, sinabi ki Noe an desisyon nin Dios na magpaabot sa daga nin delubyo nin tubig, na malaglag sa gabos na laman. (Gen. 6:13, 17) Ininstruksionan ni Jehova si Noe na magtogdok nin arka na korteng dakulaon na kahon. Pinonan ni Noe asin kan saiyang pamilya an pagtogdok. Ano an nakatabang sa sainda na magkuyog asin magin andam kan mag-abot an paghokom nin Dios?
7 An hararom na pagtubod asin diosnon na pagkatakot nagpahiro ki Noe asin sa saiyang pamilya na gibohon an siring sa ipinagboot nin Dios. (Gen. 6:22; Heb. 11:7) Bilang payo nin pamilya, si Noe nagdanay na alisto sa espirituwal asin linikayan an karatan kan suanoy na kinaban na iyan. (Gen. 6:9) Aram nia na kaipuhan kan saiyang pamilya na mag-ingat na dai maarog an madahas na paggawe asin palaban na ugale kan mga tawong nasa palibot ninda. Mahalaga na dai sinda mabangkag sa pang-aroaldaw na mga aktibidad sa buhay. An Dios igwa nin ipinapagibo sa sainda, asin mahalagang marhay na isentro dian kan bilog na pamilya an saindang buhay.—Basahon an Genesis 6:14, 18.
Nagin Andam si Noe Asin an Saiyang Pamilya
8. Ano an nagpaparisa na an mga miembro kan pamilya ni Noe nagpaheling nin diosnon na debosyon?
8 An pagkasaysay sa Biblia nakasentro sa payo nin pamilya na si Noe, alagad parasamba man ki Jehova an agom ni Noe asin an saiyang mga aking lalaki saka an mga agom ninda. Kinompirmar ini ni propeta Ezequiel. Sia nagsabi na kun si Noe nabuhay kan panahon ni Ezequiel, an mga aki nia dai maliligtas base sa pagigin matanos kan saindang ama. Nasa edad na sinda tanganing magkuyog o dai magkuyog. Kun siring, personal nindang pinatunayan an saindang pagkamoot sa Dios asin sa saiyang mga dalan. (Ezeq. 14:19, 20) An pamilya ni Noe inako an instruksion nia, may pagtubod na kapareho kan sa saiya, asin dai tinogotan an impluwensia nin iba na makaolang sa gibohon na itinao sa sainda nin Dios.
9. Sairisay sa presenteng panahon an masasabi niato na mga halimbawa nin pagtubod na arog kan ki Noe?
9 Nakakaparigon nanggad sa boot ngonyan na maheling sa laog kan satong pambilog na kinaban na kasararoan nin magturugang an mga payo nin pamilya na ginigibo an saindang pinakamakakaya tanganing arogon si Noe! Nasasabotan ninda na bakong igo na tawan sana ninda nin kakanon, bado, istaran, asin edukasyon an saindang pamilya. Dapat man nindang asikasohon an espirituwal na mga pangangaipo kan saindang pamilya. Sa paggibo kaiyan, sinda nagigin andam sa madali nang gibohon ni Jehova.
10, 11. (a) Mantang nasa laog kan arka, ano an daing dudang namatean ni Noe asin kan saiyang pamilya? (b) Ano an marahay na ihapot niato sa satong sadiri?
10 Si Noe, an saiyang agom, an saiyang mga aking lalaki, asin an mga agom ninda puedeng nagtogdok kan arka sa laog nin mga 50 taon. Mantang itinotogdok ninda an arka, siertong ginatos na beses sindang naglaog-luwas dian. Iyan ginibo nindang dai malalaog nin tubig, linagan nin istak nin kakanon, asin ilinaog dian an mga hayop. Imahinara an eksena. Sa katapustapusi nag-abot an dakulang aldaw. Ika-17 aldaw iyan kan ikaduwang bulan kan taon 2370 B.C.E., asin sinda naglaog sa arka. Isinera ni Jehova an pinto, asin nagpoon na umoran. Bako sana ining pagbaha sa sarong lugar. An lambong nin tubig, o katubigan sa kalangitan, buminulwak, asin an makosogon na oran buminagsak sa arka. (Gen. 7:11, 16) An mga tawo sa luwas kan arka nagkakagaradan mantang an mga nasa laog kaiyan ligtas. Ano an tibaad namatean kan pamilya ni Noe? Dakulaon nanggad na pagpasalamat sa Dios. Alagad mayong duda na naisip ninda, ‘Nakakaogma nanggad na naglakaw kami kaiba kan tunay na Dios asin nagin andam!’ (Gen. 6:9) Naiimahinar mo daw an saimong sadiri na nakaligtas sa Armagedon, na pano-pano an saimong puso nin kaagid na pagpasalamat?
11 Mayo nin makakapugol sa Makakamhan sa Gabos na otobon an saiyang panuga na taposon an satanikong sistemang ini nin mga bagay. Hapoton an saimong sadiri, ‘Lubos daw akong nagtitiwala na mayo sa mga panuga nin Dios an masusudya dawa sa kasaditsaditing detalye kaiyan asin na an gabos na iyan maootob sa saiyang itinalaan na panahon?’ Kun iyo, magin andam paagi sa pagpapadanay na harani sa saimong isip an “aldaw [na iyan] ni Jehova” na marikas na nagdadangadang.—2 Ped. 3:12.
Si Moises Nagdanay na Alisto
12. Ano an puede kutanang nakapalibog sa espirituwal na pagheling ni Moises?
12 Estudyaran niato an saro pang halimbawa. Sa pagmansay nin tawo, garo baga marahayon an kamugtakan ni Moises sa Egipto. Bilang ampon kan aking babae ni Faraon, posibleng marhay na halangkaw an pagheling sa saiya asin ikinaogma nia an pinakamasisiram na kakanon, pinakamagagayon na bado, asin pinakamaluhong mga kamugtakan sa buhay. Sia nag-ako nin kadakol na klase nin halangkaw na edukasyon. (Basahon an Gibo 7:20-22.) Posibleng kaiba sia sa mga mag-aako nin dakulang mana.
13. Paano si Moises nagdanay na nakapokus sa mga panuga nin Dios?
13 Minalataw na an amay na pagsasanay ki Moises kan mga magurang nia nakatabang sa saiya na maaraman na kalolongan an pagsamba sa idolo na ginigibo kan mga Egipcio. (Ex. 32:8) An sistema sa edukasyon kan Egipto asin an materyal na kamurawayan kan pamilya kan hade dai nagin dahelan na bayaan ni Moises an tunay na pagsamba. Siertong hararom niang hinorophorop an mga panuga nin Dios sa saiyang mga apoon asin makosog an pagmawot nia na magin andam na gibohon an kabotan nin Dios. Total, sinabihan ni Moises an mga aki ni Israel: “Si Jehova . . . an Dios ni Abraham, an Dios ni Isaac asin an Dios ni Jacob, iyo an nagsobol sako sa saindo.”—Basahon an Exodo 3:15-17.
14. Paano nabalo an pagtubod asin kosog nin boot ni Moises?
14 Bakong arog kan gabos na idolong nagrerepresentar sa daing buhay na mga dios nin Egipto, si Jehova, an tunay na Dios, totoo ki Moises. Sia nabuhay na garo baga naheheling nia an “Saro na dai naheheling.” May pagtubod si Moises na papatalingkason an banwaan nin Dios, alagad dai nia aram kun noarin iyan. (Heb. 11:24, 25, 27) An makosog na pagmawot nia na maheling na talingkas an mga Hebreo narisa kan idepensa nia an sarong Israelitang oripon na minamaltrato. (Ex. 2:11, 12) Minsan siring, bako iyan an itinalaan na panahon ni Jehova, kaya kinaipuhan ni Moises na mamuhay bilang dulag sa sarong harayong lugar. Mayong duda na depisil sa saiya na bayaan an komportableng kamugtakan sa palasyo nin Egipto asin mag-istar sa kaawagan. Pero, nagin andam si Moises paagi sa pagdadanay na puka sa gabos na instruksion na itinao sa saiya ni Jehova. Sa siring, puede siang gamiton nin Dios tanganing magtao nin kaginhawahan sa saiyang mga tugang pagkatapos nin 40 taon nia sa Midian. Sa pagdirehir nin Dios, si Moises makinuyog na nagbalik sa Egipto. Nag-abot na an panahon tanganing otobon ni Moises an sugo sa saiya nin Dios asin hamanon an gibohon nin Dios segun sa paagi nin Dios. (Ex. 3:2, 7, 8, 10) Kan makabalik na sa Egipto si Moises, “an pinakamahoyo sa gabos na tawo,” nangaipo sia nin pagtubod asin kosog nin boot na atubangon si Faraon. (Bil. 12:3) Ginibo nia iyan, bako sanang sarong beses, kundi paorootro mantang nagpapadagos an mga damat asin dai nia aram sa pag-oltanan nin mga damat kun pira pang beses na kaipuhan niang umatubang ki Faraon.
15. Sa ibong nin mga olang, ano an nagpahiro ki Moises na magdanay na mapagbantay sa mga oportunidad na magtao nin onra sa saiyang langitnon na Ama?
15 Sa suminunod na 40 taon, poon kan 1513 B.C.E. sagkod 1473 B.C.E., si Moises napaatubang sa mga pagkadesganar. Pero, naghanap sia nin mga oportunidad na magtao nin onra ki Jehova asin bilog na pusong dagkahon an mga kapwa nia Israelita na gibohon iyan. (Deut. 31:1-8) Taano? Huling namomotan nia an ngaran asin an soberaniya ni Jehova nin orog kisa sa sadiri niang ngaran. (Ex. 32:10-13; Bil. 14:11-16) Sa ibong nin mga pagkadesganar o olang, dapat man niatong padagos na suportaran an pamamahala nin Dios, na may kompiansang an saiyang mga paagi nin paghiro mas madonong, mas matanos, asin mas marahay kisa sa arin man na iba pa. (Isa. 55:8-11; Jer. 10:23) Arog daw kaiyan an saboot nindo?
Magpuka Kamo!
16, 17. Taano an Marcos 13:35-37 ta igwa nin dakulang kahulogan para sa saindo?
16 “Magdanay kamong mapagmasid, magpuka kamo, huli ta dai nindo aram kun noarin an itinalaan na panahon.” (Mar. 13:33) Itinao ni Jesus an patanid na iyan kan ipinapaliwanag nia an tanda na magigin senyal kan pagtatapos kan maraot na sistemang ini nin mga bagay. Estudyare an pantapos na mga tataramon sa bantog na hula ni Jesus na isinurat ni Marcos: “Magdanay kamong mapagbantay, ta dai nindo aram kun noarin madatong an kagurangnan kan harong, kun baga sa hapon o sa matangang banggi o sa pagturaok nin manok o sa amay na aga; tanganing kun sia biglang umabot, dai nia kamo maabotan na nagtotorog. Alagad an sinasabi ko sa saindo sinasabi ko sa gabos, Magdanay kamong mapagbantay.”—Mar. 13:35-37.
17 An sadol ni Jesus nakakapukaw sa isip. Sinambit nia an apat na manlaenlaen na pagbantay sa banggi. Depisil magdanay na puka sa oras nin ultimong pagbantay, huling iyan minapoon nin mga alas tres nin aga asin nagpapadagos sagkod sa pagsirang kan saldang. An mga eksperto sa estratehiya sa guerra ibinibilang iyan na pinakaepektibong oras tanganing salakayon an kaiwal, na nagtatao kan pinakamarahay na oportunidad na maabotan sindang “nagtotorog.” Siring man ngonyan, mantang an kinaban nanok na nagtotorog sa espirituwal na paagi, tibaad masakitan kitang marhay na magdanay na puka. Igwa daw kita nin ano man na pagduda na kaipuhan niatong ‘magpuka’ asin ‘magdanay na mapagmasid’ sa ihinulang katapusan asin sa pagliligtas sa sato?
18. Bilang mga Saksi ni Jehova, igwa kita nin anong pribilehio na daing kaagid sa halaga?
18 An nagsasanay nin hayop na nasambitan sa enotan nakaligtas sa pag-atake kan tigreng Bengal. Alagad malinaw na ipinaparisa kan hula sa Biblia na an falsong relihion asin an iba pang kabtang kan maraot na sistemang ini dai makakaligtas sa nagdadangadang na katapusan. (Kap. 18:4-8) Maheling logod kan gabos na lingkod nin Dios, hoben asin gurang, kun gurano kaseryoso an paggibo kan bilog nindang makakaya tanganing magin andam sa aldaw ni Jehova arog ni Noe asin kan saiyang pamilya. Nabubuhay kita sa kinaban na naglalapastangan sa Dios na dian an mga paratokdo nin falsong relihion, saka an mga agnostiko asin ateista, tinutuya an Kaglalang paagi sa saindang pananaram. Alagad dai niato puedeng isapeligro an satong sadiri na maapektaran kaiyan. Isapuso niato an mga halimbawa na inestudyaran niato asin magdanay kitang mapagbantay sa mga oportunidad na idepensa asin tawan nin onra si Jehova bilang “an Dios nin mga dios,” iyo, “an Dios na dakula, makakamhan asin makangingirhat.”—Deut. 10:17.
[Nota sa Ibaba]
^ par. 3 Kun dapit sa “siento beinteng taon” na sinambit sa Genesis 6:3, helingon An Torrengbantayan na Disyembre 15, 2010, pahina 30.
Nagigirumdoman daw Nindo?
• Taano ta kaipuhan ni Noe na tawan nin prioridad an espirituwal na mga pangangaipo kan saiyang pamilya?
• Paanong an satong panahon kaagid na marhay kan panahon ni Noe?
• Sa ibong nin mga pagkadesganar, taano ta pinagdanay ni Moises an saiyang mga mata na nakapokus sa mga panuga ni Jehova?
• Anong mga hula sa Biblia an nagpapahiro sa saindo na magpuka sa espirituwal?
[Mga Hapot Para sa Pag-adal]
[Ritrato sa pahina 25]
Si Noe asin an saiyang pamilya nagdanay na nakapokus sa gibohon ni Jehova
[Ritrato sa pahina 26]
An seguradong mga panuga nin Dios nakatabang ki Moises na magdanay na mapagbantay
