Magtiwala ki Jehova Mantang Nagdadangadang an Katapusan

“Magtiwala kamo ki Jehova, sa gabos na panahon.”—ISA. 26:4.

1. Ano an pagkakalaen kan mga lingkod nin Dios asin kan mga tawo sa kinaban?

NABUBUHAY kita sa kinaban na minilyon an dai na aram kun siisay o kun ano an pagtitiwalaan, tibaad huli ta kadakol na beses na sindang nakolgan o nadesganar. Laen nanggad sa mga lingkod ni Jehova! Huling ginigiyahan kan diosnon na kadonongan, aram nanggad ninda na dai sinda dapat magtiwala sa kinaban na ini o sa “mga noble” kaiyan. (Sal. 146:3) Imbes, ipinagkakatiwala ninda an saindang buhay asin an saindang futuro sa kamot ni Jehova, huling aram ninda na namomotan nia sinda asin na pirme niang inootob an saiyang Tataramon.—Roma 3:4; 8:38, 39.

2. Paano pinatotoohan ni Josue an pagigin mapagtitiwalaan nin Dios?

² Pinatotoohan ni Josue kan suanoy an pagigin mapagtitiwalaan nin Dios. Sa pagtatapos kan saiyang buhay, sia nagsabi sa mga kapwa Israelita nia: “Aram nindong marhay sa bilog nindong puso asin sa bilog nindong kalag na mayo ni sarong tataramon sa gabos na marahay na tataramon na sinabi sa saindo ni Jehova na saindong Dios an nasudya. Iyan gabos naotob para sa saindo.”—Jos. 23:14.

3. Ano an ihinahayag kan ngaran nin Dios manongod sa saiya?

³ Inootob ni Jehova an saiyang mga panuga, bako sanang huli sa pagkamoot nia sa saiyang mga  lingkod kundi nangorogna para sa kapakanan kan saiya mismong ngaran. (Ex. 3:14; 1 Sam. 12:22) Mapadapit sa ngaran nin Dios, an introduksion kan The Emphasized Bible, ni J. B. Rotherham, nagsasabi: “[Iyan] nagin pinakamaugayon na panuga; an kakayahan nin Dios na makibagay sa ano man na kamugtakan, ano man na kadepisilan, ano man na pangangaipo na tibaad lumataw . . . [Iyan] sarong panuga, . . . sarong kapahayagan, sarong girumdoman, sarong panunumpa. Sa Ngaran na ini, an Dios pirme nanggad na magigin maimbod; nungka Niang ikakasupog iyan.”

4. (a) Ano an isinasadol kan Isaias 26:4 na gibohon niato? (b) Ano an eestudyaran niato sa artikulong ini?

⁴ Hapoton an saimong sadiri: ‘Midbid ko daw na marhay si Jehova tanganing lubos akong magtiwala sa saiya? May kompiansa daw na tinatanaw ko an ngapit, sa pakaaram na biyong kontrolado nin Dios an mga bagay-bagay?’ An Isaias 26:4 nagsasabi: “Magtiwala kamo ki Jehova, sa gabos na panahon, huli ta dian ki Jah Jehova an Gapo kan mga panahon na daing talaan.” Totoo, dai na ngonyan milagrosong nag-iinterbenir an Dios sa buhay nin mga tawo arog kan ginibo nia kun beses kaidtong mga panahon kan Biblia. Minsan siring, bilang “an Gapo kan mga panahon na daing talaan,” mapagtitiwalaan sia “sa gabos na panahon.” Paano tinatabangan kan satong mapagtitiwalaan na Dios an saiyang maimbod na mga parasamba ngonyan? Estudyaran niato an tolong paagi: Pinapakosog nia kita kun hinahagad niato an tabang nia na labanan an sugot, sinusuportaran nia kita kun napapaatubang kita sa pagkaindiperente o direktang pagtumang, asin pinaparigon nia an satong boot kun kita nagagabatan huli sa mga kahaditan. Mantang sinisiyasat niato an mga bagay na ini, siertohon na horophoropon kun paano nindo mapapakosog an pagtitiwala nindo ki Jehova.

Magtiwala sa Dios Kun Nasusugotan na Gumibo nin Sala

5. Kun dapit sa pagtitiwala niato sa Dios, sa anong bagay kita tibaad mabalo nanggad?

⁵ Madali sanang magtiwala ki Jehova kun dapit sa saiyang panuga na Paraiso o pagkabuhay liwat—mga bagay na hinihimuyawot niato. Alagad tibaad bako nanggad madali na magtiwala sa saiya sa mga bagay na may koneksion sa moral, na magin lubos na kombensido sa satong puso na tama asin maresulta sa pinakadakulang kaogmahan an pagpasakop sa saiyang mga dalan asin pamantayan. Isinurat ni Hadeng Salomon an konsehong ini: “Magtiwala ka ki Jehova sa bilog mong puso asin dai ka manarig sa saimong sadiring pakasabot. Sa gabos mong dalan girumdomon mo sia, asin itatanos nia mismo an saimong mga dana.” (Tal. 3:5, 6) Mangnoha na sinambit an satong mga “dalan” asin “mga dana.” Iyo, an pagtitiwala niato sa Dios maninigong maheling sa satong bilog na pamumuhay, bako sanang sa satong Kristianong paglaom. Paano niato ikakapaheling an pagtitiwalang iyan kun may maglataw na mga sugot?

6. Paano niato mapapakosog an satong determinasyon na isikwal an maraot na kaisipan?

⁶ An pagrayo sa maraot nagpopoon sa isip. (Basahon an Roma 8:5; Efeso 2:3.) Kun siring, paano nindo mapapakosog an saindong determinasyon na isikwal an maraot na kaisipan? Estudyare an limang paaging ini: 1. Hagadon an tabang nin Dios paagi sa pamibi. (Mat. 6:9, 13) 2. Horophoropon an mga halimbawa sa Biblia kan mga dai naghinanyog ki Jehova asin kan mga naghinanyog sa saiya. Dangan mangnohon kun ano an nangyari sa  sainda. * (1 Cor. 10:8-11) 3. Horophoropon an mental asin emosyonal na danyos sa saindo asin sa mga namomotan nindo na puedeng ibunga kan kasalan. 4. Isip-isipa an seguradong mamamatean nin Dios kun an saro sa saiyang mga lingkod makagibo nin grabeng kasalan. (Basahon an Salmo 78:40, 41.) 5. Imahinara an kagayagayahan sa puso ni Jehova kun naheheling nia an sarong maimbod na parasamba na isinisikwal an maraot asin ginigibo an tama, sa publiko man o sa pribado. (Sal. 15:1, 2; Tal. 27:11) Puede man nindong ipaheling na nagtitiwala kamo ki Jehova.

Magtiwala sa Dios Kun Napapaatubang sa Pagkaindiperente Asin Pagtumang

7. Anong mga pagbalo an napaatubang ki Jeremias, asin ano kun beses an namatean nia?

⁷ An dakol sa satong mga tugang naglilingkod sa mga teritoryo na nangorognang depisil an makatagal. An propetang si Jeremias naglingkod sa siring na lugar—an kahadean nin Juda sa maribok na huring mga aldaw kaiyan. Aroaldaw siang napaatubang sa mga pagbalo sa pagtubod huling makinuyog niang ipinaisi an mga mensahe nin paghokom nin Dios. Sa sarong pangyayari, dawa an saiyang maimbod na sekretaryong si Baruc nagreklamo huli sa kapagalan. (Jer. 45:2, 3) Si Jeremias daw nagpadaog sa pangluluya nin boot? Bueno, may beses na sia nagmondo nin grabe. “Sumpaon an aldaw nin sakong pagkamundag!” an agrangay nia. “Taano ta luminuwas pa ako sa mismong matris tangani na makaheling nin pagpapagal asin kamondoan asin na an sakong mga aldaw matapos sa kasusupgan sana?”—Jer. 20:14, 15, 18.

8, 9. Kaoyon kan Jeremias 17:7, 8 asin Salmo 1:1-3, ano an dapat niatong gibohon tanganing padagos na mamunga nin marahay?

⁸ Pero, dai nagsuko si Jeremias. Padagos siang nagtiwala ki Jehova. Bilang resulta, naeksperyensiahan kan maimbod na propetang ini an kaotoban kan mga tataramon mismo ni Jehova na nasa Jeremias 17:7, 8: “Maogma an pusog na lalaki na nananarig ki Jehova, asin na an nagin kompiansa iyo si Jehova. Asin sia magigin nanggad siring sa kahoy na itinanom sa kataed kan katubigan, na pinapatubo an mga gamot kaiyan sa mismong kataed kan sinusulogan nin tubig; asin dai nia maheheling kun dumatong an init, kundi an saiyang mga dahon talagang magigin marambong. Asin sa taon nin tigmara dai sia mahahadit, ni maontok man sia sa pamumunga.”

⁹ Siring sa marambong na namumungang kahoy na “itinanom sa kataed kan katubigan” o sa may patubig na tatamnan, si Jeremias nungkang ‘uminontok sa pamumunga.’ Sia nagsayumang maimpluwensiahan kan maraot na mga paraolog-olog na nakapalibot sa saiya. Imbes, sia nagdanay sa Gikanan kan ‘tubig’ na nagsusustenir sa buhay asin isinapuso nia an gabos na sinabi sa saiya ni Jehova. (Basahon an Salmo 1:1-3; Jer. 20:9) Si Jeremias sarong marahay nanggad na halimbawa para sa sato, lalo na para sa mga kapwa niatong naglilingkod sa Dios na nasa masakit na mga teritoryo! Kun arog kaiyan an situwasyon nindo, padagos na magsarig nin lubos ki Jehova, na matao sa saindo nin pakatagal mantang kamo “nagpapahayag sa publiko kan saiyang ngaran.”—Heb. 13:15.

10. Anong mga bendisyon an yaon sa sato, asin ano an maninigo niatong ihapot sa satong sadiri?

¹⁰ Tanganing tabangan kita na atubangon an buhay sa huring mga aldaw na ini, tinatawan kita ni Jehova nin kadakol na espirituwal na probisyon. Kaiba sa iba pang bagay, itinao nia an kompletong Tataramon nin Dios, na tinatradusir nin tama sa padakol nang padakol na lenguahe. Nagtatao man sia nin abundang napapanahon na espirituwal na kakanon paagi sa grupong maimbod asin mapagmansay na oripon. Asin itinao nia sa sato an mapagsuportar na pakikiibaiba nin dakulang kaburunyogan nin mga kapagtubod sa mga pagtiripon asin asamblea. Lubos daw nindong inaaprobetsaran an mga probisyon na ini? An gabos na naggigibo kaiyan “magkukururahaw sa kagayagayahan huli sa marahay na kamugtakan kan puso.” Minsan siring, an mga dai naghihinanyog sa Dios “mag-aaragrangay huli sa kakologan nin puso asin . . . mag-uurungal huli sa biyong pagkamondo kan espiritu.”—Isa. 65:13, 14.

Magtiwala sa Dios Kun Napapaatubang sa mga Kahaditan

11, 12. Huli sa mga problema sa kinaban, ano an tunay na madonong na gibohon?

¹¹ Arog kan ihinula, binabaha nin grabeng pagsakit an katawohan. (Mat. 24:6-8; Kap. 12:12) Kun literal na nagbabaha, an ordinaryo nang gigibohon  iyo na magdalagan pasakat sa mas halangkaw na lugar o magduman sa atop nin sarong edipisyo—saen man na lugar na mas halangkaw. Kaagid kaiyan, mantang naggagrabe an problema sa kinaban, minilyon an nagpapaili sa garo baga halangkawon na mga institusyon sa pinansial, politika, o relihion, saka sa siensia asin teknolohiya. Alagad mayo sa mga ini an nagtatao nin tunay na seguridad. (Jer. 17:5, 6) Sa ibong na lado, an mga lingkod ni Jehova igwa nin seguradong pailihan—“an Gapo kan mga panahon na daing talaan.” (Isa. 26:4) An salmista nagsabi: “[Si Jehova] an sakong gapo asin an sakong kaligtasan, an sakong ligtas na kalangkawan.” (Basahon an Salmo 62:6-9.) Paano niato gigibohon na satong pailihan an Gapong ini?

¹² Nangangapot kita ki Jehova kun hinihimate niato an saiyang Tataramon, na sa parate kontra sa kadonongan nin tawo. (Sal. 73:23, 24) Halimbawa, an mga tawong naiimpluwensiahan kan kadonongan nin tawo tibaad magsabi: ‘Saro sana an buhay mo, kaya lubos-luboson mo na iyan.’ ‘Maghingoa ka na magkaigwa nin marahay na karera.’ ‘Pagmaigotan mong magkaigwa nin dakol na kuarta.’ ‘Bakalon mo ini, bakalon mo iyan.’ ‘Magbiahe ka; magpasiramsiram ka sa kinaban.’ Sa ibong na lado, an diosnon na kadonongan kaoyon kan sadol na ini: “An mga minagamit kan kinaban [magin] siring sa mga dai naggagamit kaiyan nin lubos; huli ta an kamugtakan kan kinaban na ini nagbabago.” (1 Cor. 7:31) Siring man, sinasadol kita ni Jesus na pirmeng enoton an intereses kan Kahadean asin paagi kaiyan makakatipon kita nin “mga kayamanan sa langit,” na dian ligtas nanggad iyan.—Mat. 6:19, 20.

13. Isinasaisip an 1 Juan 2:15-17, ano an maninigo niatong ihapot sa satong sadiri?

¹³ Ipinapaheling daw kan saindong saboot sa “kinaban” asin sa “mga bagay na nasa kinaban” na lubos an pagtitiwala nindo sa Dios? (1 Juan 2:15-17) Mas minamawot asin pinapahalagahan daw nindo an espirituwal na mga kayamanan asin pribilehio sa paglilingkod sa Kahadean kisa sa mga bagay na iinaalok kan kinaban? (Fil. 3:8) Pinagmamaigotan daw nindong papagdanayon an ‘simpleng mata’? (Mat. 6:22) Siempre, habo nin Dios na kamo magin bakong madonong o iresponsable, lalo na kun igwa kamo nin pamilya na dapat asikasohon. (1 Tim. 5:8) Alagad talagang inaasahan nia na an saiyang mga lingkod lubos na magtitiwala sa saiya—bakong sa naghihingagdan na kinaban ni Satanas.—Heb. 13:5.

14-16. Paano nakinabang an nagkapira sa pagpapadanay nin ‘simpleng mata’ asin padagos na pag-enot sa intereses kan Kahadean?

¹⁴ Estudyare an halimbawa ni Richard asin Ruth, na may tolong saradit pang aki. “Sinasabi kan puso ko na mas dakol pa an magigibo ko para ki Jehova,” an sabi ni Richard. “Komportable an buhay ko alagad sa pagmate ko garo baga mga tada-tada sana an ikinakatao ko sa Dios. Pagkatapos na ipamibi an bagay na iyan asin turotimbangon an sakripisyong kalabot dian, nag-oyon kami ni Ruth na makikiolay ako sa superbisor ko na inaan an trabaho ko na magin apat na aldaw kada semana—minsan ngani may krisis sa ekonomiya an samong nasyon. Naaprobaran an sakong ipinakiolay, asin nagpoon na akong magtrabaho sa iskedyul na iyan bago matapos an sarong bulan.” Ano an pagmate ngonyan ni Richard?

¹⁵ “Nainaan nin 20 porsiento an sueldo ko ngonyan kun ikokomparar kaidto,” an sabi nia, “alagad ngonyan igwa ako nin dagdag na 50 aldaw kada taon tanganing makaibanan an sakong pamilya asin masanay an sakong mga aki. Nahimo kong madoble an sakong oras sa paglilingkod sa langtad, matriple an bilang nin mga inaadalan ko sa Biblia, asin mas makapangenot sa kongregasyon. Asin huling mas dakol an panahon ko na  tumabang sa pag-asikaso sa mga aki, nakakapag-auxiliary payunir si Ruth sa panapanahon. Determinado akong papagdanayon an iskedyul na ini sagkod na posible.”

¹⁶ Nahimo ni Roy asin Petina, na may aking babae na nasa poder pa ninda, na inaan an panahon ninda sa sekular na trabaho tanganing makapaglingkod sa ministeryo nin bilog na panahon. “Nagtatrabaho ako nin tolong aldaw kada semana,” an sabi ni Roy, “asin si Petina nagtatrabaho nin duwang aldaw. Nagbalyo man kami hale sa harong pasiring sa sarong apartment, na mas pasil nanggad asikasohon. Payunir kami bago kami nagkaaki nin lalaki asin babae, asin nungkang nawara an pagmawot mi na magpayunir. Kaya kan dakula na an mga aki mi, nagbalik kami sa bilog na panahon na ministeryo. Dai mapapantayan nin ano man na kantidad nin kuarta an mga bendisyon na inako mi.”

Togotan “an Katoninongan nin Dios” na Ingatan an Saindong Puso

17. Mantang mayong kasiertohan an buhay, paano ka nararanga kan Kasuratan?

¹⁷ Mayo sa sato an nakakaaram kun ano an mangyayari sa aga, huli ta “an panahon asin pagkanorongod” nangyayari sa sato gabos. (Ecl. 9:11) Minsan siring, an dai pakasierto kan mangyayari sa aga dai kaipuhan na maghale kan satong katoninongan nin isip ngonyan, arog kan parateng nagigin resulta kaiyan sa mga mayo nin seguridad na gikan sa dayupot na relasyon sa Dios. (Mat. 6:34) Si apostol Pablo nagsurat: “Dai kamo maghadit sa ano man na bagay, kundi sa gabos na bagay paagi sa pamibi asin pagngayongayo na may pagpasalamat ipahayag nindo sa Dios an saindong mga kahagadan; asin an katoninongan nin Dios na nakakalabi sa gabos na kaisipan mag-iingat sa saindong puso asin sa saindong pag-isip.”—Fil. 4:6, 7.

18, 19. Sa anong mga paagi kita rinaranga nin Dios? Iilustrar.

¹⁸ Dakol na tugang na nasa masakit na mga situwasyon an nakaeksperyensia nin panglaog na pagkakalmado asin katoninongan hale ki Jehova. An sarong tugang na babae nagsabi: “Paorootrong prinobaran nin sarong siruhano na takoton ako tanganing magpasalin nin dugo. ‘Anong kalokohan ini na dai ka mapasalin nin dugo?’ an saro sa enot na mga sinabi nia sa sako. Kan oras na idto asin sa iba pang panahon, silensio akong namibi ki Jehova, asin namatean ko an katoninongan hale sa saiya. An pagmate ko garo ako sarong dakulang gapo. Sa ibong kan pangluluya huling hababa an sakong blood count, nahimo kong magtao nin malinaw asin sono sa Kasuratan na mga dahelan kan sakong paninindogan.”

¹⁹ Kun beses, puedeng itao nin Dios an kinakaipuhan na suporta paagi sa sarong nakakarangang kapagtubod o paagi sa espirituwal na kakanon sa tamang panahon. Posibleng marhay na nakadangog na kamo nin sarong tugang na nagsabi: “An artikulong ini an talagang kaipuhan ko. Isinurat ini para nanggad sa sako!” Iyo, ano man an tibaad kamugtakan o pangangaipo niato, papatunayan ni Jehova an saiyang pagkamoot sa sato kun nagtitiwala kita sa saiya. Total, “mga karnero” nia kita, asin ibinugtak nia an saiyang ngaran sa sato.—Sal. 100:3; Juan 10:16; Gibo 15:14, 17.

20. Taano an mga lingkod ni Jehova ta mag-eerok na may katiwasayan kun matapos na an kinaban ni Satanas?

²⁰ Durante kan marikas na nagdadangadang na “aldaw kan kabangisan ni Jehova,” mabagsak an gabos na bagay na pinagtitiwalaan kan kinaban ni Satanas. An bulawan, plata, asin iba pang mahalagang bagay mayo lamang nin ikakataong seguridad. (Sof. 1:18; Tal. 11:4) An solamenteng magigin pailihan iyo an satong “Gapo kan mga panahon na daing talaan.” (Isa. 26:4) Kaya ipaheling niato ngonyan an satong lubos na pagtitiwala ki Jehova paagi sa makinuyog na paglakaw sa saiyang matanos na mga dalan, pagbalangibog kan mensahe kan Kahadean nia dawa pa mapaatubang kita sa pagkaindiperente o pagtumang, asin pagtao sa saiya kan gabos niatong ikinakahadit. Mantang ginigibo niato an mga bagay na ini, kita tunay nanggad na “mag-eerok na may katiwasayan asin dai mariribok nin grabeng takot sa kapahamakan.”—Tal. 1:33.

[Nota sa Ibaba]

Ikakapaliwanag daw Nindo?

Paano kita puedeng magtiwala sa Dios

• kun nasusugotan na gumibo nin sala?

• kun napapaatubang sa pagkaindiperente o pagtumang?

• kun napapaatubang sa mga kahaditan?

[Mga Hapot Para sa Pag-adal]

[Ritrato sa pahina 13]

An pangangapot sa mga pamantayan nin Dios nagreresulta sa kaogmahan

[Ritrato sa pahina 15]

Si “Jehova an Gapo kan mga panahon na daing talaan”