May Dahelan Kamo na Maggayagaya

POON sa kasaditsaditing nabubuhay na selula sagkod sa grabe kadakulang mga galaksia na grinupo-grupo na magin mga cluster asin supercluster, maheheling sa mga linalang an pagigin organisado. Bako ining makangangalas, huling an Kaglalang ‘bakong Dios nin karibarawan.’ (1 Cor. 14:33) Kahangahanga man an areglo nin Dios sa pagsamba. Isip-isipa an ginibo ni Jehova. Binilog nia sa sarong unibersal na organisasyon an ginatos na milyon na linalang na may intelihensia—mga tawo saka anghel—na igwa nin libreng kabotan asin nagkakasararo sa dalisay na pagsamba. Kahangahanga nanggad iyan!

Sa suanoy na Israel, an daganon na kabtang kan organisasyon nin Dios isinisimbolisar kan Jerusalem, na kinamumugtakan kan templo ni Jehova asin dian nakaistar an linahidan na hade nia. An sarong Israelitang bihag sa Babilonya nagpahayag kan saboot nia dapit sa banal na siudad sa arog kaining paagi: “An sakuyang dila dumukot logod sa sakuyang ngaragngag, kun dai taka magirumdoman, kun dai ko gibohon an Jerusalem na lumangkaw nin orog pa sa sakuyang pangenot na dahelan nin paggayagaya.”—Sal. 137:6.

Arog daw kaiyan an saboot nindo manongod sa organisasyon nin Dios ngonyan? Iyan daw nagtatao sa saindo nin orog na kagayagayahan kisa sa ano pa man na bagay? Nasasabotan daw kan saindong mga aki an kasaysayan asin pagpunsionar kan daganon na kabtang kan organisasyon nin Dios? Pinapahalagahan daw ninda na kabtang sinda kan pambilog na kinaban na kasararoan nin magturugang kan Mga Saksi ni Jehova? (1 Ped. 2:17) Taano ta dai gamiton an minasunod na mga suhestion sa saindong banggi nin Pampamilyang Pagsamba tanganing orog na mapahalagahan kan saindong pamilya an organisasyon ni Jehova?

Girumdomon an “mga Aldaw kan Suanoy”

Kada taon, an mga pamilyang Israelita nagtitiripon tanganing magselebrar kan Paskua. Kan pinonan an kapiestahan, ininstruksionan ni Moises an banwaan: “Kun pag-abot nin panahon hapoton ka kan saimong aki, na nagsasabi, ‘Ano an boot sabihon kaini?’ kun siring sabihon mo sa saiya, ‘Paagi sa kosog nin kamot ilinuwas kami ni Jehova sa Egipto, sa harong nin mga oripon.’” (Ex. 13:14) An ginibo ni Jehova para sa mga Israelita kasaysayan na dai dapat malingawan. Tunay nanggad, dakol na Israelitang ama an nagsunod sa pagboot ni Moises. Pakalihis nin mga henerasyon, sarong Israelita an namibi: “O Dios, nadangog mi kan samong talinga, isinaysay sa samo kan samong mga apoon an aktibidad na ginibo mo kan mga aldaw ninda, kaidtong mga aldaw kan suanoy.”—Sal. 44:1.

Para sa sarong hoben ngonyan, an kasaysayan kan Mga Saksi ni Jehova sa nakalihis na 100 na taon o labi pa tibaad garo baga siring man kan “mga aldaw kan suanoy.” Paano nindo gigibohon na buhay na buhay sa saindong mga aki an mga pangyayaring ini? Tanganing magibo iyan, ginagamit nin nagkapirang magurang an Jehovah’s Witnesses—Proclaimers of God’s Kingdom, Yearbook, mga estorya nin buhay na ipinupublikar sa satong mga magasin, asin iba pang report dapit sa teokratikong kasaysayan, kaiba na an satong bagong DVD manongod sa banwaan nin Dios sa presenteng mga panahon. An mga video mapadapit sa pagpersegir sa satong mga tugang sa dating Unyon Sobyet asin Nazing Alemania nagtotokdo sa mga pamilya na magsarig ki Jehova durante nin mga pagbalo. Iiba an siring na mga reperensia sa saindong banggi nin Pampamilyang Pagsamba. Papasarigon kaiyan an pagtubod kan saindong mga aki kun mapaatubang sinda sa mga kadepisilan sa pagpadanay kan saindang integridad.

Minsan siring, an sarong pahayag manongod sa kasaysayan puedeng makapalangkag tolos sa mga aki. Kaya papartisiparon an saindong mga aki. Halimbawa, puede nindong papilion an saindong aki nin sarong nasyon na interesante sa saiya, ipasiyasat sa saiya an teokratikong kasaysayan kan nasyon  na iyan, asin ipapresentar sa saiya sa pamilya an nagkapira sa nanodan nia. Sa saindong kongregasyon, tibaad igwa nin mga Kristiano na may halawig nang rekord nin maimbod na paglilingkod na puedeng umiba sa sarong banggi nin pampamilyang pagsamba nindo. Tibaad puede sindang interbiohon kan saindong aki asin aramon an nasa boot ninda, na ipinapasaysay sa sainda an mga eksperyensia ninda. O puede nindong ipadrowing sa saindong aki an dapit sa makahulogan na teokratikong mga pangyayari, arog baga nin pagtogdok sa sangang opisina, sarong internasyonal na kombension, o paggamit nin ponograpo sa pagharongharong.

Aramon Kun Paano “Inootob kan Lambang Kabtang an Gibohon Kaiyan”

Ikinomparar ni apostol Pablo an Kristianong kongregasyon sa “bilog na hawak, na pinagsusurugpon asin pinag-iiriba kan lambang nagsusuportar na litid, [na] nagtatalubo asin nagpapakosog kan sadiri kaiyan sa pagkamoot, mantang inootob kan lambang kabtang an gibohon kaiyan.” (Efe. 4:16, New International Version) An pakaaram sa kun paano nagpupunsionar an hawak nin tawo nagpapaorog sa satong pagpahalaga asin paggalang sa Kaglalang niato. Kaagid kaiyan, kun sinisiyasat niato kun paano nagpupunsionar an pambilog na kinaban na kongregasyon, napapangalas kita sa “manlaenlaen na gayong kadonongan nin Dios.”—Efe. 3:10.

Ilinaladawan ni Jehova kun paano nagpupunsionar an saiyang organisasyon, kaiba an langitnon na kabtang kaiyan. Halimbawa, sinasabi nia sa sato na enot itinao nia an kapahayagan ki Jesu-Cristo, dangan ini ‘nagsugo kan saiyang anghel asin paagi sa mga tanda nagtao kaiyan paagi sa saiya sa saiyang oripon na si Juan, na nagpatotoo.’ (Kap. 1:1, 2) Kun ihinahayag nin Dios kun paano nagpupunsionar an dai naheheling na kabtang kan saiyang organisasyon, bako daw na bobooton niang masabotan niato kun paano “inootob kan lambang kabtang an gibohon kaiyan” sa daga?

Halimbawa, kun madali nang magsongko sa saindong kongregasyon an paraataman nin sirkito, taano ta dai pag-olayan kaiba kan saindong pamilya an mga paninimbagan asin pribilehio kan nagbibiaheng mga paraataman? Paano ninda tinatabangan an lambang saro sa sato? Ini an iba pa sa mga hapot na puedeng pag-olayan: Taano ta mahalaga na ireport an paglilingkod sa langtad? Paano sinusuportaran sa pinansial na paagi an organisasyon nin Dios? Paano inoorganisar an Namamahalang Grupo, asin paano iyan nagtatao nin espirituwal na kakanon?

Kun nasasabotan niato kun paano inoorganisar an banwaan ni Jehova, nakikinabang kita sa kisiera tolong paagi: Orog niatong napapahalagahan an mga nagpapagal para sa sato. (1 Tes. 5:12, 13) Namomotibar kitang suportaran an teokratikong mga areglo. (Gibo 16:4, 5) Ultimo, napapakosog an satong tiwala sa mga nangengenot mantang naheheling niato an sono sa Kasuratan na basehan kan ginigibong mga desisyon asin areglo.—Heb. 13:7.

“Siyasaton Nindo an mga Torreng Erokan Kaiyan”

“Magmartsa kamo sa palibot kan Sion, asin maglibot dian, bilanga nindo an mga torre kaiyan. Isentro nindo an saindong puso sa mga kuta kaiyan. Siyasaton nindo an mga torreng erokan kaiyan, tanganing ikasaysay nindo iyan sa maabot na kapag-arakian.” (Sal. 48:12, 13) Dian dinadagka kan salmista an mga Israelita na helingon nin harani an Jerusalem. Maiimahinar daw nindo an pinakamamahal na mga eksperyensiang nagirumdoman kan mga pamilyang Israelita na nagbiahe pasiring sa banal na siudad para sa taonan na mga kapiestahan asin nakaheling sa kahangahangang templo kaiyan? Siertong napahiro sinda na ‘isaysay iyan sa maabot na kapag-arakian.’

Isip-isipa an reyna kan Seba, na kan enot duda sa mga report dapit sa marahayon na pamamahala asin dakulang kadonongan ni Salomon. Ano an nakakombensir sa saiya na totoo an mga bagay na nabaretaan nia? “Dai ako nagtubod sa mga tataramon ninda,” an sabi nia, “sagkod na magdigdi ako tanganing maheling kan sako mismong mga mata.” (2 Cron. 9:6) Iyo, puedeng magkaigwa nin hararom na epekto sa sato an naheheling kan sato “mismong mga mata.”

Paano nindo matatabangan an saindong mga aki na maheling kan sainda “mismong mga mata” an mga ngangalasan kan organisasyon ni Jehova? Kun igwa nin sangang opisina kan Mga Saksi ni Jehova harani sa saindong harong, maghingoang makadalaw dian. Halimbawa, si Mandy asin Bethany nagdakula sa lugar na mga  1,500 kilometros an rayo sa erokan na Bethel sa saindang nasyon. Pero, parateng nagpaplano an mga magurang ninda nin mga pagbiahe tanganing magbisita sa mga pasilidad kaiyan, nangorogna kaidtong nagdadakula an saindang mga aking babae. “Bago kami magbisita sa Bethel, an paghona mi iyan pormalon asin para sana sa mga gurang,” an paliwanag ninda. “Alagad may nakamidbid kaming mga hoben na mahigos na nagtatrabaho para ki Jehova asin ikinakaogma iyan! Naheling mi na an organisasyon ni Jehova bako sana sa sadit na lugar na duman kami nakaistar, asin an kada pagbisita sa Bethel nagtao sa samo nin sarong sokol nin espirituwal na kosog.” Huling naheling nin harani an pagpunsionar kan organisasyon nin Dios, si Mandy asin Bethany namotibar na magpayunir, asin naimbitaran pa ngani sinda na maglingkod sa Bethel bilang temporaryong mga boluntaryo.

Igwa pa kita nin sarong paagi na “maheling” an organisasyon ni Jehova, sarong paagi na mayo kaidto sa suanoy na Israel. Sa nakaagi pa sanang mga taon, an banwaan nin Dios nag-ako nin mga video asin DVD manongod sa manlaenlaen na kabtang kan organisasyon nin Dios, arog kan: Jehovah’s Witnesses—Organized to Share the Good News, Our Whole Association of Brothers, To the Ends of the Earth, asin United by Divine Teaching. Kun maheheling nindo asin kan saindong pamilya an mahigos na pagtatrabaho kan mga Bethelite, mga nagtatabang sa pag-ayuda, mga misyonero, asin mga tugang na nag-aandam saka nag-oorganisar nin mga kombension, siertong matalubo sa saindong puso an pagpahalaga sa pambilog na kinaban na kasararoan nin magturugang.

An lambang kongregasyon kan banwaan nin Dios igwa nin mahalagang kabtang sa paghuhulit kan maogmang bareta asin pagsuportar sa mga Kristiano sa lugar ninda. Minsan siring, magtao nin panahon kaiba kan saindong pamilya na girumdomon an “bilog na kasararoan nin saindong mga tugang sa kinaban.” Ini makakatabang sa saindo asin sa mga aki nindo na magdanay na “marigon sa pagtubod,” na minimidbid na may dahelan kamo na maggayagaya.—1 Ped. 5:9.

 [Kahon/Ritrato sa pahina 18]

Organisasyon nin Dios Sarong Tema na Kapakipakinabang na Pag-adalan

Igwa kita nin abundang probisyon tanganing tabangan an gabos na makanood nin orog pa manongod sa kasaysayan asin pagpunsionar kan organisasyon ni Jehova. An minasunod na mga hapot puedeng makatabang sa saindo na makapoon:

☞ Paano nagpoon an gibohon nin nagbibiaheng mga paraataman sa presenteng panahon?—An Torrengbantayan, Nobyembre 15, 1996, pahina 10-15.

☞ Ano an makahulogan sa “Aldaw kan mga Aki” sa 1941 Teokratikong Asamblea?—An Torrengbantayan, Hulyo 15, 2001, pahina 8.

☞ Paano naggigibo nin mga desisyon an Namamahalang Grupo?—“Bearing Thorough Witness” About God’s Kingdom, pahina 108-114.