Magtiwala ki Jehova, an ‘Dios nin Bilog na Karangahan’
Magtiwala ki Jehova, an ‘Dios nin Bilog na Karangahan’
“Pagomawon an Dios asin an Ama nin satong Kagurangnan na si Jesu-Cristo, an Ama nin magña pagkaherak, asin Dios nin bilog na karagñahan.”—2 COR. 1:3.
1. Ano an kaipuhan nin mga tawo ano man an edad ninda?
POON kan kita mamundag, kaipuhan na niatong rangahon. An omboy naghihibi tanganing maaraman niato na kaipuhan niang rangahon. Tibaad gusto nia na kargahon o gutom sia. Dawa kun kita nagkakaedad na, sa parate kaipuhan tang rangahon. Nangorognang totoo ini kun nakakaeksperyensia kita nin masakit na mga situwasyon.
2. Ano an sinisierto ni Jehova sa mga nagtitiwala sa saiya kun dapit sa pagranga?
2 Minsan paano parateng makakatao sa sato nin karangahan an mga kapamilya asin katood niato. Minsan siring, may mga panahon na dai kayang remedyohan nin tawo an mga dahelan nin kasakitan niato. An Dios sana an makakaranga sa sato gurano man kasakit kan situwasyon niato. Sinisierto sa sato kan Tataramon nia: “Harani [nanggad] si Jehova sa gabos na nagaarang sa saiya, . . . siring man sana hihinaniogon nia an agagha ninda.” (Sal. 145:18, 19) Iyo, “an magña mata ni Jehova natotorohok sa magña banal, asin andam an saiyang magña taligña sa saindang pagagragñay.” (Sal. 34:15) Alagad tanganing kamtan niato an pagsuportar asin pagranga nin Dios, dapat kitang magtiwala sa saiya. Lininaw iyan ni salmistang David kan sia mag-awit: “Si Jehova manini paalauan nin dukha, paalauan manogñod sa panahon nin kahorasaan. Asin dian sa saimo mananarig si magña nagpapakamidbid kan gñaran mo; huli ta ika, oh Jehova, [dai] mo pinabayaan si magña naharanap sa saimo.”—Sal. 9:9, 10.
3. Paano iinilustrar ni Jesus an pagkamoot ni Jehova sa banwaan Nia?
3 Mahalagang marhay ki Jehova an mga nagsasamba sa saiya. Lininaw ini ni Jesus kan sabihon nia: “Bakong ipinagpapabakal an limang dignos nin duang centavo? Asin ni saro sa sainda dai naliligñawan sa atubang nin Dios. Alagad minsan an magña bohok nin saindong payo nabibilang gabos. Dai kamo matakot: Kamo mahalaga pang gayo ki sa balakid na dignos.” (Luc. 12:6, 7) Paagi ki Jeremias, sinabihan ni Jehova an suanoy na banwaan Nia: “Namotan taka nin pagkamoot na mayong kapinonan asin mayong katapusan; kaya pinasan takang may pagkaherak.”—Jer. 31:3.
4. Taano ta makakapagtiwala kita sa mga panuga ni Jehova?
4 An pagtitiwala ki Jehova asin sa kaotoban kan mga panuga nia makakaranga sa sato sa mga panahon nin kasakitan. Kun siring, an pagtitiwala niato sa Dios maninigo na magin arog kan ipinahayag ni Josue: “Mayo nin mauara sa gabos na magña marahay na tataramon na dapit sa saindo isinabi ni Jehova na saindong Dios: Gabos ominabot sa saindo, . . . mayo nin nauara sa sainda minsan saro.” (Jos. 23:14) Dugang pa, makakasierto kita na dawa kun temporaryo kitang pinangluluyahan nin boot huli sa masakit na mga situwasyon, “an Dios maimbod” asin nungka niang papabayaan an maimbod na mga lingkod nia.—Basahon an 1 Corinto 10:13.
5. Paano posible para sa sato na rangahon an iba?
5 Inapod ni Pablo si Jehova na “Dios nin bilog na karagñahan.” An ‘pagranga’ nangangahulogan na pagpaginhawa sa saro na nasasakitan o nagmomondo. Ginigibo ini paagi sa pagpagian sa kasakitan o kamondoan nia. Ginigibo nanggad ini ni Jehova. (Basahon an 2 Corinto 1:3, 4.) An satong langitnon na Ama dai nalilimitaran nin ano man o siisay man, kaya magigibo nia an ano man na paagi tanganing rangahon an mga namomoot sa saiya. Huli kaiyan, mararanga niato an mga kapagtubod na “nasa anoman na kamondoan.” Magigibo niato iyan paagi sa “karagñahan na ipinagraragña [sato] nin Dios.” Ipinapahayag nanggad kaini an daing kapantay na kakayahan ni Jehova na rangahon an mga desperado!
Pag-atubang sa mga Dahelan nin Kasakitan
6. Magtao nin mga halimbawa na puedeng magin dahelan nin kasakitan.
6 Kaipuhan niato nin pagranga sa dakol na kabtang nin buhay. An saro sa pinakanakakamondo iyo an pagkagadan nin sarong namomotan, nangorogna an namomotan na agom o aki. Tibaad kaipuhan man an pagranga huli ta an saro biktima nin diskriminasyon o pagpalaenlaen. Huli sa maluyang salud, paggurang, kadukhaan, mga problema nin mag-agom, o masakit na mga kamugtakan sa kinaban, orog na kaipuhan an personal na pagranga.
7. (a) Sa masakiton na mga situwasyon, anong klaseng pagranga an kaipuhan? (b) Ano an magigibo ni Jehova tanganing maomayan an “nalugadan asin ronot” na puso?
7 Sa panahon nin kasakitan, tibaad kaipuhan niato nin pagranga na makakapaginhawa sa satong puso, isip, emosyon, asin pisikal saka espirituwal na salud. Halimbawa, estudyare an puso. Sinasabi kan Tataramon nin Dios na an satong puso puedeng ‘malugadan asin maronot.’ (Sal. 51:17, NW) Siertong kaya ni Jehova na resolberan ini huling ‘binobolong nia an mga napapakaraot na puso, asin binobogkos an saindang mga lugad.’ (Sal. 147:3) Dawa sa grabeng mga situwasyon, mapapaginhawa nin Dios an purisaw na puso niato kun kita mamimibi sa saiya na may lubos na pagtubod asin kinukuyog an mga togon nia.—Basahon an 1 Juan 3:19-22; 5:14, 15.
8. Kun napupurisaw an isip niato, paano kita matatabangan ni Jehova?
8 Sa parate, kaipuhan kan satong isip an pagranga huli sa manlaenlaen na pagbalo na puedeng makapurisaw na gayo dian. Posibleng marhay na dai niato makakaya an mga pagbalo sa pagtubod kun sa sadiri sana niatong kosog. Minsan siring, an salmista nag-awit: “Sa kadaklan nin sakong magña pagisip sa sakong boot, an saimong magña karagñahan nakakaragña sa sakuyang kalag.” (Sal. 94:19) Dugang pa, si Pablo nagsurat: “Sa anoman dai kamo mahadit; kundi sa gabos na bagay huli sa pamibi asin paggñayogñayo na may pagpasalamat, ipahayag nindo sa Dios an saindong magña hinahagad. Asin an katoninogñan nin Dios, na minalampas sa gabos na pakasabot, maigñat kan saindong magña puso asin kan saindong magña pagisip dian ki Cristo Jesus.” (Fil. 4:6, 7) An pagbasa asin paghorophorop sa Kasuratan dakula an ikakatabang tanganing mapangganahan an purisaw na isip.—2 Tim. 3:15-17.
9. Paano niato mapapangganahan an negatibong emosyon?
9 Kun beses, tibaad madesganar kitang gayo kaya namemeligro kitang madaog kan mga epekto nin negatibong emosyon. Tibaad para sa sato dai niato kayang asikasohon an sarong paninimbagan o pribilehio nin paglilingkod na sono sa Kasuratan. Sa situwasyon man na ini, mararanga asin matatabangan kita ni Jehova. Sa pag-ilustrar: Kan pagbotan si Josue na pangenotan an mga Israelita tumang sa makapangyarihan na kaiwal na mga nasyon, sinabihan ni Moises an banwaan: “Pagmakosog kamo asin pakakosoga nindo an saindong boot, dai kamo matakot, dai man kamo magkaigua nin katakotan sa sainda: Huli ta si Jehova na [saindong] Dios iyo an kaibahan [nindo]: Dai [nia kamo] babayaan, ni isisikual.” (Deut. 31:6) Paagi sa pagsuportar ni Jehova, nahimo ni Josue na pangenotan an banwaan nin Dios pasiring sa Dagang Panuga asin manggana tumang sa gabos na kaiwal ninda. Bago kaini, naeksperyensiahan ni Moises sa Dagat na Pula an kaagid na pagsuportar nin Dios.—Ex. 14:13, 14, 29-31.
10. Kun apektado nin kasakitan an pisikal na salud niato, ano an makakatabang sa sato?
10 An masakit na mga pangyayari puedeng magkaigwa nin negatibong epekto sa pisikal na salud niato. Siempre, marahay an puedeng magin epekto sa sato kan pagkakan nin tama, pagkaigwa nin supisyenteng pahingalo asin ehersisyo, saka pagdadanay na malinig. An pananaw na basado sa Biblia asin nakakapakosog sa espirituwal puede nanggad na magkaigwa nin marahay na epekto sa satong hawak. Huli kaini, kun kita minaagi nin labi-labing kamondoan, makakatabang kun gigirumdomon niato an eksperyensia asin nakakaparigon sa boot na sinabi ni Pablo: “Kami napipiot sa palibot, alagad dai nakokologan; nahahandal, alagad dai nahahalean nin paglaom; pinaglalamag, alagad dai pinababayaan; ilinalampog, alagad dai naaano.”—2 Cor. 4:8, 9.
11. Paano malalabanan an helang sa espirituwal?
11 An nagkapirang pagbalo puedeng makadanyar sa espirituwal na salud niato. Makakatabang man sa sato si Jehova sa situwasyon na ini. Sinisierto sa sato kan Tataramon nia: “Pinopogolan ni Jehova an gabos na nahoholog, asin binabagñon nia an gabos na nasasakitan.” (Sal. 145:14) Tanganing dai magkahelang sa espirituwal, maninigo tang hagadon an tabang nin mga magurang sa kongregasyon. (Sant. 5:14, 15) Asin an danay na pagsaisip kan sono sa Kasuratan na paglaom na buhay na daing katapusan makakatabang sa pagsustenir sa sato durante kan mga pagbalo sa pagtubod niato.—Juan 17:3.
Mga Halimbawa nin Pagranga nin Dios
12. Iladawan an pagranga ni Jehova ki Abraham.
12 Sarong pinasabngan na salmista an nagsabi: “Magguiromdom ka dapit kan tataramon na itinao sa saimong oripon, na dian kaiyan pinapaghalat mo [Jehova] ako. Ini iyo an sakuyang karagñahan sa sakuyang kamondoan: Huli ta si tataramon mo pinakosog ako.” (Sal. 119:49, 50) Ngonyan, igwa kita kan nasusurat na Tataramon ni Jehova, na dian dakol an halimbawa nin pagranga nin Dios. Halimbawa, puedeng nahadit na gayo si Abraham kan maaraman nia na lalaglagon ni Jehova an Sodoma asin Gomora. An maimbod na patriarkang iyan naghapot sa Dios: “Tutunauon mo man an banal kadamay kan parakasala?” Rinanga ni Jehova si Abraham paagi sa pagsierto sa saiya na dawa kun may 50 katawo sana na matanos, dai Nia lalaglagon an Sodoma. Minsan siring, limang beses pang naghapot si Abraham ki Jehova: Paano kun may 45 katawo sana na matanos? 40? 30? 20? 10? Sa kada hapot, mapasensia asin maboot na marhay na sinierto ni Jehova ki Abraham na maliligtas an Sodoma. Minsan ngani mayo ni sampulong matanos sa lugar na iyan, talagang ilinigtas ni Jehova si Lot asin an mga aking babae kaini.—Gen. 18:22-32; 19:15, 16, 26.
13. Paano ipinaheling ni Ana na sia nagtiwala ki Jehova?
13 An agom ni Elcana na si Ana gustong marhay na magkaaki. Alagad baog sia kaya namondo sia. Ipinamibi nia iyan ki Jehova, asin an Halangkaw na Saserdoteng si Eli nagsabi sa saiya: “Itogot logod saimo kan Dios ni Israel an hagad na guinibo mo saiya.” Naranga kaini si Ana “asin bako nang [mamondo] an saiyang lalauogon.” (1 Sam. 1:8, 17, 18) Si Ana nagtiwala ki Jehova, na may kompiansang ipinapabaya sa saiya an mga bagay-bagay. Minsan ngani dai nia aram kun ano an kaaabtan, namatean ni Ana an panglaog na katoninongan. Pag-abot nin panahon, sinimbag ni Jehova an pamibi nia. Sia nagbados asin nangaki, na nginaranan niang Samuel.—1 Sam. 1:20.
14. Taano ta kaipuhan ni David nin pagranga, asin kiisay sia nagdolok?
14 Si Hadeng David kan suanoy na Israel saro pang halimbawa nin indibiduwal na rinanga nin Dios. Kan pilion ni Jehova si David bilang an magigin hade nin Israel, aram nia na si David sinsero asin dedikado sa tunay na pagsamba, huling Sia “naghihiling sa puso.” (1 Sam. 16:7; 2 Sam. 5:10) Minsan siring, kan huri nakagibo si David nin pagsambay ki Bat-seba asin pinagmaigotan niang itago an kasalan paagi sa pagpagadan sa agom kaini. Kan marealisar ni David an gabat kan kasalan nia, sia namibi ki Jehova: “Siring sa kadaklan nin saimong magña pagkabiyaya paraa an sakuyang magña kasumbikalan. Hugasan mo ako sa guiraray kan sakuyang karatan, asin linigan mo ako kan magña kasalan ko. Huli ta namimidbid ko an sakuyang magña kasumbikalan; asin an sakuyang kasalan uya guiraray sa atubagñan ko.” (Sal. 51:1-3) Si David talagang nagsolsol kaya pinatawad sia ni Jehova. Alagad, kaipuhan na atubangon ni David an mga resulta kan pagkakasala nia. (2 Sam. 12:9-12) Minsan siring, an pagkaherak ni Jehova nakaranga sa mapakumbabang lingkod nia.
15. Anong tabang an itinao ni Jehova ki Jesus kan madali na siang gadanon?
15 Kan si Jesus nasa daga pa, napaatubang sia sa dakol na masakit na kamugtakan. Itinogot nin Dios an mga pagbalong ini sa pagtubod, asin napagdanay ni Jesus an integridad bilang perpektong tawo na pirmeng nagtitiwala ki Jehova asin nagsusuportar sa Saiyang soberaniya. Kan si Jesus madali nang pasaloiban asin gadanon, sia namibi ki Jehova: “Bakong an boot ko, kundi an saimo, an maguibo.” Dangan, sarong anghel an nagpaheling ki Jesus asin nagpakosog sa saiya. (Luc. 22:42, 43) Itinao nin Dios ki Jesus an karangahan, kosog, asin suporta na kaipuhan nia kan panahon na idto.
16. Ano an tabang na ikakatao nin Dios kun kita napapaatubang sa kagadanan bilang mga nagpapadanay nin integridad?
16 Dawa kun kita mapaatubang sa kagadanan huli sa marigon na paninindogan niato bilang mga Kristiano, kaya ni Jehova asin tatabangan nia kita na mapagdanay an satong integridad sa saiya. Apuera dian, nararanga kita kan paglaom na pagkabuhay liwat. Asin hinahalat nanggad niato an aldaw na “paparaon” na an huring kaiwal na iyo an kagadanan! (1 Cor. 15:26) An maimbod na mga lingkod nin Dios na gadan na, saka an iba pa, yaon sa dai nagmementis na memorya ni Jehova asin bubuhayon liwat. (Juan 5:28, 29; Gui. 24:15) An kompiansa sa panuga ni Jehova na pagkabuhay liwat nakakaranga sa sato asin iyan seguradong paglaom sa mga panahon nin persekusyon.
17. Paano kita mararanga ni Jehova kun nagadan an sarong namomotan niato?
17 Nakakaranga nanggad na maaraman na an mga namomotan niato, na nagtotorog na ngonyan sa pangkagabsan na lolobngan nin katawohan, may paglaom na mabuhay giraray sa marahayon na bagong kinaban na mayo na kan gabos na dahelan nin kasakitan sa presenteng panahon! Asin dakula nanggad na pribilehio para sa “dakulang kadaklan” nin mga lingkod ni Jehova, na makakaligtas sa katapusan kan maraot na sistemang ini nin mga bagay, na sabaton asin tokdoan an mga binuhay liwat digdi sa daga!—Kap. 7:9, 10.
Nasa Irarom an Daing Sagkod na mga Takyag nin Dios
18, 19. Paano rinaranga an mga lingkod nin Dios kun sinda pinepersegir?
18 Paagi sa sarong mapuersa asin nakakaogmang awit, sinierto ni Moises sa banwaan nin Israel: “An dai nin kapinonan asin daing katapusan na Dios iyo an saimong pailihan, asin digdi sa ibaba [“nasa irarom,” NW] an magña daing kapinonan asin daing katapusan na magña takyag.” (Deut. 33:27) Kan huri, sinabihan ni Samuel an mga Israelita: “Dai kamo magsuki sa hurihan ni Jehova, kundi maglingkod kamo ki Jehova sa bilog nindong puso. . . . Si Jehova dai mapabaya sa saiyang banuaan huli kan saiyang dakulang gñaran.” (1 Sam. 12:20-22) Sagkod na nangangapot kita ki Jehova sa tunay na pagsamba, nungka nia kitang pababayaan. Pirme niang itatao sa sato an suporta na kaipuhan niato.
19 Itinatao nanggad nin Dios sa banwaan nia an kinakaipuhan na tabang asin karangahan sa delikadong huring mga aldaw na ini. Sa laog nin labing sarong siglo, rinibo sa mga kapagtubod niato sa bilog na kinaban an pinersegir asin ibinilanggo huli sana sa paglilingkod ninda ki Jehova. Pinapatunayan kan mga eksperyensia ninda na sa mga panahon nin pagbalo, talagang rinaranga ni Jehova an mga lingkod nia. Halimbawa, saro sa mga tugang niato sa dating Unyon Sobyet an nasentensiahan na mabilanggo nin 23 na taon huli sa pagtubod. Dawa siring, may ginibong paagi tanganing matawan sia nin espirituwal na kakanon na makakapakosog asin makakaranga sa saiya. Sia nagsabi: “Sa bilog na mga taon na idto, nakanood akong magtiwala ki Jehova asin pinakosog nia ako.”—Basahon an 1 Pedro 5:6, 7.
20. Taano ta makakaseguro kita na dai kita pababayaan ni Jehova?
20 Ano man an tibaad mapaatubang pa sa sato, marahay na girumdomon an nakakarangang sinabi kan salmista: “Dai [nanggad] pababayaan ni Jehova an saiyang banuaan.” (Sal. 94:14) Minsan ngani kaipuhan niato personalmente na rangahon, dakula man an pribilehio niato na rangahon an iba. Arog kan maheheling niato sa sunod na artikulo, makakapakikabtang kita sa pagranga sa mga nagtatangis sa kinaban na ini na pano nin problema.
Ano an Isisimbag Nindo?
• Ano an nagkapirang bagay na puedeng magin dahelan nin kasakitan niato?
• Paano rinaranga ni Jehova an mga lingkod nia?
• Kun kita napapaatubang sa kagadanan, ano an makakaranga sa sato?
[Mga Hapot Para sa Pag-adal]
[Kahon/Mga Ritrato sa pahina 25]
KUN PAANO AATUBANGON AN MGA BAGAY NA MAKAKAAPEKTAR SA SATONG . . .
▪ puso Sal. 147:3; 1 Juan 3:19-22; 5:14, 15
▪ isip Sal. 94:19; Fil. 4:6, 7
▪ emosyon Ex. 14:13, 14; Deut. 31:6
▪ pisikal na salud 2 Cor. 4:8, 9
▪ espirituwal na salud Sal. 145:14; Sant. 5:14, 15
