Iyo, Ini an Pag-aadalan na Edisyon!

Binago niamo an disenyo kan pag-aadalan na edisyon tanganing magin mas nakakaakit asin nakakatabang sa pag-adal nindo kan mahalagang marhay na Tataramon nin katotoohan ni Jehova.​—⁠Sal. 1:2; 119:⁠97.

Apat na taon na an nakaagi kan pinonan ming magpublikar nin duwang edisyon kan An Torrengbantayan, saro para sa publiko asin saro para sa sato gabos​—⁠mga Saksi ni Jehova asin nag-ooswag na mga tinotokdoan niato sa Biblia.

Mapadapit sa pag-aadalan na edisyon, sarong haloy nang lingkod ni Jehova an nagsurat: “Makangangalas asin nakakapahorophorop​—⁠iyan an impresyon ko sa enot na isyu kan pag-aadalan na edisyon kan An Torrengbantayan. An mas hararom na paliwanag kaiyan sa espirituwal na mga bagay nakataros sa puso ko. Salamat na marhay sa magayonon na bagong probisyon na ini.” An saro pang tugang na lalaki nagsurat: “Gustong-gusto kong gumamit nin halawig na panahon sa pag-adal kan edisyon na ini gamit an sakong Reference Bible.” Aram ming iyan man an saboot nindo.

Siring kan aram nindo, an Torrengbantayan ipinupublikar na poon pa kan 1879, sarong dakulang bagay na nagin posible sana huli sa espiritu asin bendisyon ni Jehova. (Zac. 4:⁠6) Sa nakalihis na 133 na taon, nagkaigwa nin nagkapirang pagbabago sa tutob kan magasin. Para sa 2012, itatampok sa tutob kan lambang pag-aadalan na edisyon an sarong makolor na drowing nin sarong eksena sa paghuhulit, na nagpapagirumdom sa sato dapit sa asignasyon nin Dios na kita lubos na magpatotoo manongod sa Kahadean ni Jehova. (Gui. 28:23) Sa likod kan tutob, sa pahina 2, maheheling nindo an retrato na dian ibinasar an drowing, kaiba an halipot na deskripsion kun ano an nangyayari asin kun saen iyan. Sa bilog na taon, ipapagirumdom kaini sa sato gabos na an mga lingkod ni Jehova naghuhulit kan maogmang bareta “sa gabos na nacion.”​—⁠Mat. 24:⁠14.

Ano an iba pang mga pagbabago na ginibo sa magasin? An kahon sa pagrepaso ibinugtak sa kapinonan kan lambang artikulong pag-aadalan. Huli kaini, matatawan nindo nin atension an pangenot na mga punto na maninigong hanapon mantang binabasa asin pinag-aadalan nindo an artikulo. Siempre, gugustohon kan mga namamayo sa pag-adal sa Torrengbantayan na padagos na gamiton an mga hapot na ini tanganing repasohon an materyal sa katapusan kan pag-adal. Maririsa nindo na an mga numero kan pahina saka parapo pinadakula.

Siring kan ipinaliwanag sa isyu sa bulan na ini, sarong bagong kabtang, “Hale sa Samong Archive,” an idinagdag tanganing ipaheling an mahahalagang pangyayari sa kasaysayan kan Mga Saksi ni Jehova sa presenteng panahon. Siring man, sa panapanahon may mababasa kitang mga totoong eksperyensia sa buhay sa irarom kan titulong “Gikan sa Boot na Iprinesentar an Saindang Sadiri.” Malinaw na ilaladawan kaini an kagayagayahan, satispaksion, asin kaogmahan nin mga tugang sa paglilingkod ninda sa mga lugar na may dakulang pangangaipo para sa mga parabalangibog kan Kahadean.

Logod na ikaogma nindo nin lubos an panahon na ginagamit nindo sa pag-adal kan Tataramon nin Dios sa tabang kan magasin na ini.

An Kagpublikar

[Ritrato sa pahina 3]

1879

[Ritrato sa pahina 3]

1895

[Ritrato sa pahina 3]

1931

[Ritrato sa pahina 3]

1950

[Ritrato sa pahina 3]

1974

[Ritrato sa pahina 3]

2008