Linalapag kan hadi kan Siria an propeta nin Diyos na si Eliseo asin naaraman kan hadi na yaon ini sa nalalanuban na siyudad nin Dotan na nasa bulod. Pagkabanggi, an hadi kan Siria nagpadara sa Dotan nin mga kabayo, karwaheng panggiyera, asin mga suldados. Kan mag-aagahon na, nasalikupan na kan saiyang hukbo an siyudad.—2 Ha. 6:13, 14.

Kan an suruguon ni Eliseo magbangon asin magluwas, nahiling niya an mga gustong bumihag sa propeta. ‘Ah, sakuyang kagurangnan, anong gigibuhon niyato?’ an sabi kaini. “Dai ka matakot,” an sabi ni Eliseo, ‘huli ta dakul pa an mga uya sa satuya ki kan mga yaon sa sainda.’ Dangan namibi an propeta: ‘Ipinakikimahirak ko sa saimo, O Jehova, na buklaton mo an saiyang mga mata tanganing [mahiling niya].’ An pagkasaysay nagsasabi pa: ‘Binuklat ni Jehova an mga mata kan barobata asin huminiling; asin uya, an bukid pano-pano nin mga nangangarabayo, asin nin mga [karwahe] na kalayo sa palibot ni Eliseo.’ (2 Ha. 6:15-17) Ano an manunudan ta digdi asin sa iba pang pangyayari sa buhay ni Eliseo?

Kalmado si Eliseo sa ibong kan pagsalikop kan mga Siriano huling nagtitiwala siya ki Jehova asin nahiling niya an nagpoprotektar na kapangyarihan nin Diyos. Dai kita naglalaom nin milagro ngunyan, pero aram niyato na pinoprotektaran ni Jehova an saiyang banwaan bilang sarong grupo. Kaya, garo napapalibutan man kita nin nagkakalayong mga kabayo asin karwahe. Kun an mga iyan ‘nahihiling’ kan satong mata nin pagtubod asin kun pirmi kitang nagsasarig sa Diyos, makakapag-irok kita sa katiwasayan asin makakaeksperyensiya nin bendisyon ni Jehova. (Sal. 4:8) Hilingon niyato kun paano kita makikinabang sa iba pang pangyayari sa buhay ni Eliseo.

Sa sarong pangyayari, kan si Eliseo nag-aarado sa uma, duminulok saiya si propeta Elias asin ipinasa sa saiya an opisyal na gubing kaini. Aram ni Eliseo an buot sabihon kaiyan. Nag-andam siya nin bangkete, nagpaaram sa saiyang ama asin ina, asin naghali sa harong tanganing maglingkod ki Elias. (1 Ha. 19:16, 19-21) Huling andam si Eliseo na maglingkod sa Diyos sa pinakalubos na makakaya niya, ginamit siya ni Jehova asin pag-abot nin panahon naglingkod bilang propeta na kasalihid ni Elias.

 Naglingkod si Eliseo ki Elias nin tibaad mga anom na taon. Kan panahon na idto, si Eliseo an ‘[nagbububo] nin tubig sa mga kamot ni Elias.’ (2 Ha. 3:11) Kun nagkakakan an mga tawo kaidto, nakaugalian na nindang magkamot na dai naggagamit nin tinidor, kutsilyo, o iba pang gamit sa pagkakan. Pagkatapos magkakan, binububuan nin tubig kan suruguon an kamot kan saiyang kagurangnan tanganing makahanaw ini. Kaya medyo menos an nagkapira sa mga gibuhon ni Eliseo. Minsan siring, pribilehiyo para sa saiya an magin lingkod ni Elias.

Dakul na Kristiyano ngunyan an naglalaog man sa lain-lain na klase nin bilog na panahon na paglilingkod. Sa paggibo kaiyan, pinapahiro sinda nin pagtubod asin pagmawot na gamiton an saindang kusog sagkod sa mapupuwede sa paglilingkod ki Jehova. Sa nagkapirang mga asignasyon, kinaipuhan nindang maghali sa harong asin gibuhon an trabaho—sa Bethel, sa mga proyekto sa pagtugdok, asin iba pa—na tibaad menos para sa dakul. Dai maninigong ibilang nin siisay man na Kristiyano an siring na paglilingkod na mayong halaga o menos, huling lubos na pinapahalagahan iyan ni Jehova.—Heb. 6:10.

Bago nin Diyos ‘buhaton si Elias sa sarong ariporos pasiring sa langit,’ sinugo nin Diyos an propeta hali sa Gilgal pasiring sa Bethel. Isinuherir ni Elias na dai na siya pag-ibanan, pero nagsimbag si Eliseo: “Dai taka babayaan.” Mantang nagbabaklay, duwang beses pang sinadol ni Elias si Eliseo na dai na mag-iba saiya pero dai ini nagtugot. (2 Ha. 2:1-6) Kun paanong si Ruth nagdanay na kaiba ni Noemi, iyo man si Eliseo ki Elias. (Rut 1:8, 16, 17) Taano? Malinaw na pinahalagahan ni Eliseo an pribilehiyong itinao saiya nin Diyos na paglingkudan si Elias.

Si Eliseo nagtao nin marahay na halimbawa sa sato. Kun tinawan kita nin pribilehiyo nin paglilingkod sa organisasyon nin Diyos, lubos tang papahalagahan iyan kun iisipon tang si Jehova an pinaglilingkudan ta. Mayo nang maurog pang onra diyan.—Sal. 65:4; 84:10.

Mantang nagbabaklay an duwa, sinabi ni Elias ki Eliseo: ‘Hagada an buot mong gibuhon ko saimo, bago ako halion sa saimo.’ Arog kan ginibo ni Solomon dakul na taon bago kaini, hinagad ni Eliseo an makakatabang sa saiya na urog pang paglingkudan si Jehova. Hinagad niya na mapasaiya an ‘duwang kabtang kan espiritu’ ni Elias. (1 Ha. 3:5, 9; 2 Ha. 2:9) Sa Israel, an panganay na aking lalaki an tinatawan nin dobleng kabtang kan mana. (Deut. 21:15-17) Kaya, garo man sana hinahagad ni Eliseo na midbidon siya bilang kasalihid ni Elias sa pagigin propeta. Saro pa, malinaw na gusto ni Eliseo na magkaigwa nin kusog nin buot arog ni Elias, na nagin “lubos na maimon para ki Jehova.”—1 Ha. 19:13, 14, NW.

Ano an reaksiyon ni Elias sa kahagadan kan lingkod niya? ‘[Masakit] na bagay an saimong hinahagad,’ an sabi kan propeta. ‘Kun mahiling mo ako na halion sa saimo, siring an mangyayari sa saimo; alagad kun dai, dai.’ (2 Ha. 2:10) Minalataw na may duwang kahulugan an simbag ni Elias. Inot, an Diyos sana an makakadeterminar kun baga maitatao ki Eliseo an hinahagad niya. Ikaduwa, tanganing maako iyan ni Eliseo, dapat determinado siyang magdanay na kaiba ni Elias, ano man an mangyari.

Paano minansay nin Diyos an kahagadan ni Eliseo para sa duwang kabtang kan espiritu ni Elias? An pagkasaysay nagsasabi: ‘Asin nangyari na kan naglalakaw sindang nag-uulay-ulay, uya digdi, an sarong [karwahe] na kalayo sagkod mga kabayong kalayo suminuway saindang duwa; asin si Elias suminakat sa langit sa sarong ariporos. Asin nahiling idto ni Eliseo.’ * Iyan an simbag ni Jehova sa kahagadan ni Eliseo. Nahiling ni Eliseo na kinukua sa saiya si Elias, tinawan siya nin dobleng kabtang kan espiritu ni Elias, asin nagin kasalihid siya kan propeta.—2 Ha. 2:11-14.

Pinurot ni Eliseo an nahulog na opisyal na gubing ni Elias asin isinulot ini. An gubing na iyan an nagpapamidbid ki Eliseo bilang propeta nin Diyos. Nahiling an dugang pang pruweba kan pagnombra saiya kan dai nahaloy maggibo siya nin milagro paagi sa pagbanga kan tubig sa Salog nin Jordan.

Mayong duda, dai nanggad malilingawan ni Eliseo an nahiling niyang pagsakat ni Elias sa ariporos. Bakong ordinaryo na makahiling an saro nin nagkakalayong karwaheng panggiyera asin nagkakalayong mga kabayo! An mga iyan pruweba kan positibong simbag ni Jehova sa kahagadan ni Eliseo. Kun sinisimbag ni Jehova an mga pamibi ta, mayo kitang nahihiling na bisyon nin nagkakalayong karwaheng panggiyera asin nagkakalayong mga kabayo. Pero mababatid ta na ginagamit nin Diyos an saiyang dakulang kapangyarihan tanganing masigurado na an saiyang kabutan mautob. Asin kun nahihiling ta na binebendisyunan ni Jehova an daganon na kabtang  kan saiyang organisasyon, garo man sana ‘nahihiling’ tang naghihiro an saiyang langitnon na karwahe.—Ezeq. 10:9-13.

Dakul an nagin eksperyensiya ni Eliseo na nakakumbinsir saiya kan pambihirang kapangyarihan ni Jehova. An totoo, huli sa espiritu nin Diyos, nakagibo an propeta nin 16 na milagro—doble kisa nagibo ni Elias. * An ikaduwang beses na nakahiling si Eliseo nin nagkakalayong kabayo asin karwahe na panggiyera iyo an pangyayari sa Dotan na ilinadawan sa kapinunan kan artikulong ini.

Dawa napapalibutan an Dotan nin mga kaiwal, nagdanay na kalmado si Eliseo. Taano? Huling napatalubo niya an makusog na pagtubod ki Jehova. Kaipuhan man niyato an siring na pagtubod. Kun siring, mamibi kita para sa banal na espiritu nin Diyos tanganing ikapahiling ta an pagtubod asin an iba pang aspekto kan bunga kan espiritu.—Luc. 11:13; Gal. 5:22, 23.

An pangyayari sa Dotan nagtao man ki Eliseo nin marigon na dahilan na magtiwala ki Jehova asin sa saiyang nagpoprotektar na hukbo nin mga anghel. Biyong naaraman kan propeta na an Diyos nagpadara nin hukbo nin mga anghel tanganing palibutan an siyudad asin an mga gustong bumihag kaiyan. Paagi sa pagbuta sa mga kaiwal, milagrosong ilinigtas nin Diyos si Eliseo asin an saiyang suruguon. (2 Ha. 6:17-23) Sa kritikal na panahon na idto, arog kan iba pang sitwasyon, si Eliseo nagpahiling nin pagtubod asin lubos na nagtiwala ki Jehova.

Arog ni Eliseo, magtiwala kita ki Jehova Diyos. (Tal. 3:5, 6) Kun gigibuhon ta iyan, ‘kakahirakan kita nin Diyos asin bebendisyunan.’ (Sal. 67:1) Totoo, dai kita literal na napapalibutan nin nagkakalayong mga karwahe asin kabayo. Minsan siring, durante kan nagdadangadang na ‘dakulang kahurasaan,’ poprotektaran kita ni Jehova bilang pambilog na kasararuan nin magturugang. (Mat. 24:21; Kap. 7:9, 14) Sagkod na dai pa iyan minaabot, lugod na pirmi niyatong girumdumon na ‘an Diyos an satong [pailihan].’—Sal. 62:8.